Samoan Devotional

OPEN HEAVENS

MATALA LE LAGI MO LE ASO SA 28 SETEMA 2025

(tusia e Pastor EA Adeboye)

Manatu Autu:  O ona ala e lē o ou ala ia(His ways are not your ways)

Tauloto Tusi Paia –  Isaia 55:8-9 “Auā o o‘u manatu e lē o ‘outou manatu, o o‘u ala e lē o ‘outou ala, ‘ua fetalai mai ai le ALI‘I. Auā e pei ‘ona sili ‘ona maualuga o le lagi i le lalolagi, ‘ua fa‘apea ‘ona sili ‘ona maualuga o o‘u ala i o ‘outou ala, ma o‘u manatu e sili i o ‘outou manatu.”

‭

Faitauga - Tusi Paia: 2 Tupu 6:1-7

O ala o le Atua e maualuga atu i le mafaufau o le tagata. E mafai ona Ia fa’atautala se asini (Numera 22:28), fa’atupu punaoa I nofoaga e lē masani ai (Mataio 17:27 ) ma fa’aaogā se fili e auala mai ai se siitaga o le tulaga o se uso i le galuega e pei ona fa’aaogā e le Atua tagata Aikupito e foai tupe mo le malaga a le fanauga Isaraelu I le vao ( Esoto 12:36). O a’u o se tagata faaolaina, e leai so’u manatu e mafai ona ou malamalama i ala uma o le Atua, pau le mea e finagalo ou te faia o lo’u faatuatua ma le usitai. Afai e te ole i le Atua mo se mea e te mana’o ai e tatau fo’i ona e faia soose mea e fetalai mai e te fai, ma ia e talitonu e sili atu lona mafai e faataunuu lou mana’o.

O I latou e manatu e tuai tele le tali mai o le Atua ma latou te mafaia lava e i latou mea e mananao ai, e masani ona feto’ai ma puapuaga. O Aperaamo na ia iloa lana sesē i se auala faigata ina ua faaoso e Sara e fesoasoani i le Atua e ala i le momoe ma lana auauna ia vave maua ai sona atalii (Kenese 16:2). O le faaiuga sesē a lena e tasi ua mafua ai faafitauli autu i le lalolagi i le asō. Afai ua fetalai le Atua o le a ia faia, na te faia lava I le lelei atoatoa; e lē mafai, lē mafai lava ona sili atu oe I le Atua.

I le faitauga mai le Tusi Paia o le asō na mananao atalii o perofeta e fau se fale lapo’a atu e nonofo ai, ma na o latou ta’u ia Elisaia. Ona o lea I talane o le vaitafe o Ioritana e ta mai ai laau e fau ai le fale, ma a’o fiafia uma isi ma amata le galuega, na alu le tasi ma fai iā Elisaia e o ma I latou.

Le au pele e, e lelei le fai o tonu ma faatino galuega. Peita’i afai e lē auai le Atua i mea uma e te fai, po o le a le lelei o au tapenaga e mafai lava ona faaletonu. O le mea lea na tupu i atalii o perofeta, a o ta fiafia laau ma faaputu mo le galuega, na faafuasei ona tupu se faaletonu. Na alu se tasi o i latou nonō mai se to’i, ma a’o ta i lalo laau na mamulu le ulu o le to’i ma pa’ū i totonu o le vai. E ese mai le tuai ai o le galuega ona o le faafitauli, ae o le alu o tupe e totogi ai le to’i, auā o le mea nonō. Faafetai i le Atua na i ai se isi o i latou na valaaulia Elisaia i le galuega. Sa na o le fesili o le perofeta poo fea na pa’ū ai le to’i, ta le laau ma togi i totonu o le vai. O le mea na tupu ai, e le mafai ona faamalamalamaina; na goto le laau ae aau le to’i mamafa.

O ala o le Atua e lē o ala ia o le tagata, ma seiloga o se vale e taumafai pea e faamatala pe faafefea ona galue le Atua. A o’o mai i le fesootaiga ma le Atua, na o le faatuatua ma le usitai na te manaomia mai ia te oe aua e lē mafai ona o tatou malamalama atoatoa i ona ala. I le suafa o Iesu, Amene.

OPEN HEAVENS

MATALA LE LAGI MO LE ASO  TOONAI 27 SETEMA 2025

(tusia e Pastor EA Adeboye)

Manatu Autu:  Solipala faiga leaga tuufaasolo (Breaking evil patterns)

Tauloto Tusi Paia –  2 Timoteo 3:14 “A o oe, ‘ia e tumau i mea ‘ua a‘oa‘oina ai oe, ma ‘ua mautinoa ‘iā te oe, ‘ina ‘ua e iloa o ia na a‘oa‘o atu ai ‘iā te oe;”

‭

Faitauga - Tusi Paia: Luka 11:21-26

O so’o se taimi e ulutinoina ai e temoni olaga o tagata, e masani ona o latou fausia ni faiga mautu amioleaga i o latou olaga e i’u ina faigata ona talepe. O nei faiga o le a faasolo ina maua’a ma malolosi ma i’u ai nei tagata i lagona ua leai se faamoemoe, tusa pe latou te iloa o loo agai atu i latou i le fa’afanoga.

A e talanoa i tagata o loo pologa i le matamata ata leaga poo le auai ma faatino amioga lē lelei e  masani ai e pei o le ulaula, e masani ona e iloa na amata tutupu faiga leaga nei, ina ua amata vaaia manuia i o latou olaga. E fa’aoso e le tiapolo nei uiga amioleaga i olaga o i latou ua ia tapu’e ma faapologa, ina ia aua ai ne’i taunuu, vaai ma fiafia i manuia ma mea lelei ua maea tapena e le Atua mo i latou. Peita’i e amata malepe loa faiga faavae leaga a le fili, saoloto loa I latou uma o saisaitia i ana mailei. 

Ina ia faamuta nei amioga leaga, e taua le fesili iā Agaga Paia mo se fesoasoani. Ua ta’u mai I le faitauga mai le Tusi Paia o le asō na o le tagata e sili atu le malosi e mafaia ona ia fao mea a le tagata malosi. A taumafai se temoni e atia’e ma fafau ni uiga leaga i le olaga o se kerisiano, o le a fesoasoani Agaga Paia i lea uso e tete’e atu i galuega a le tiapolo. Toatele tagata e faia le mea sesē o le faalagolago i lo latou lava malosi e tete’e ai le tiapolo; peita’i e lē o le auala lenā. E tatau ona o latou naunau i se faiga fa’aleagaga ia faatumu ai I latou e Agaga Paia. E mafai ona amata I le viiga ma le tapuaiga I le Atua po o le tatalo I gagana ese. A o latou faia faapea o le a fa’aitiitia faiga leaga a le tiapolo I o latou olaga. Peita’i e tatau ona naunau i latou e fa’aauau ai pea le viiga ma le tatalo i gagana ese e faavavau. A o latou fa’aauau ai pea o le a o latou iloa e lē umi ae malolosi iā Agaga Paia ma ua gausia le amo sa i o latou ua. Fai mai Isaia 10;27; e gausia le amo ona o le faauuga.

Na fetalai Iesu i le Tusi faitau o le asō e faapea; a alu ese le agaga leaga i fafo o le tagata, e toe fo’i e vaai poo le a le tulaga o i ai lona fale sa sau ai, afai e sau ua mamā le fale a o loo gaogao, ona alu ai lea o ia ma aumai isi agaga e toafitu e sili atu lo latou leaga i lona, ona o latou ulufale lea. O lona uiga afai e gausia se mamanu leaga i le olaga o se kerisiano, e ao ona fa’aauau ona tupu i le alofa tunoa o le Atua. O lea uso e tatau ona tatalo ma anapogi, suesue le upu a le Atua ma mafuta ma isi uso kerisiano e lē aunoa. O le loloto o le saili a lea uso ia Keriso; o le atili mautinoa lea e tumau lona manumalō i so’o se ituaiga faiga leaga. I le suafa o Iesu, Amene.

OPEN HEAVENS

MATALA LE LAGI MO LE ASO  FARAILE 26 SETEMA 2025

(tusia e Pastor EA Adeboye)

Manatu Autu:  Faafoisia e le Atua (Divine turnaround)

Tauloto Tusi Paia –  Salamo 126:1 “Na fa‘afoisia mai e le ALI‘I o Siona nai le tāfeaga, ‘ona tusa ai lea o i tatou ma tagata ‘ua fai a latou miti.”

‭

Faitauga - Tusi Paia: Mataio 17:14-18

I le 1984, na sau se fafine ia te a’u mo tatalo mo le itu tau tupe. Na ou fai iai, ‘aua e te popole, e saunia e le Atua mea uma mo oe. Ia alu loa i le fale’. Sa ia tali mai, ‘ e lē mafai ona ou alu i le fale, ona e leai sa’u tupe ou te pasese ai’. Sa tau leai foi ni a’u tupe i lea vaitau, peitai na ou vaeluaina sina tupe na ia te au, ona ou foai lea iai le isi afa. Sa tupu lea tulaga ia Iuni. E oo atu ia Aokuso, na sau lenei fafine ma aumai se manu papalagi aua le fonotele a le Ekalesia. E mafai e le Atua ona faafoisia talaaga o tagata ma suia mo le lelei o latou olaga i se taimi puupuu. 

I tausaga e tele talu ai, na ou faalogo i se tala i se fafine e pā. Sa tatalo lana faifeau ia maua sana tama mo le tele o tausaga peitai e lei manuia. Na oo ina valaau iai le faifeau ma faapea atu, ‘o fafine pā uma na ou tatalo ai ua avea uma ma tina. Aisea e ese ai lau mataupu?’. Na fai lea o le fafine i le faifeai, i le taimi ao talavou ai, sa tō ma taumafai e faapau le pepe peitai e lei manuia. Ina ia faasaoina lona ola, na aveese e fomai lona toala fanau (tulou). Ua fesili atu le faifeau, ‘e leai sou toala fanau?’ Na tali le fafine, ‘ioe’. Na toe fesili le faifeau, ‘aisea la e te manao ai ou te tatalo mo oe ia e tō?’. Na tali le fafine, ‘ ae o oe na e aoao mai e leai se mea e lē mafaia e le Atua’. Na amata mai le aso lea ona alo le faifeau pe a vaai mai i lenei fafine. O so’o se taimi e vaai atu ai o savali mai le fafine, e liliu ma savali i le isi itu. Na faaauau pea mo se taimi, ona oo lea i se tasi aso, ona faapea lea o le fafine ia te ia, ‘e le afaina, afai o loo alo le faifeau mai ia te au, o le a taulai la’u vaai i le Atua ae aveese mai ma ia’. I le na po, sa fai lana miti o loo tu i le ogatotonu o se potu. Ona sau lea o se tamaloa maualuga i totonu o le potu e ati mai le puipui o le potu, o loo uu mai se pa’u o se manu i lona lima. Ua fefe o ia ma ua lē mafai ona gaoioi. Ina ua oo atu le tamaloa ia te ia, na ia ufiufi o ia i le pau o le manu ona toe mou ese lea. Na tei ane i luga, ua luluina o ia ma ua afu, peitai na ia iloa vave, na afio mai le Atua e foai atu sona toala fanau fou. O ia o se tina o se fanau aulelei e toatele i le taimi nei. 

Le au pele e, o Iesu o le taitai sili e faafoisia so’o se tulaga leaga ma faaletonu. Afai o lo’o e ui ma soifua i se tulaga lē lelei i le taimi nei i lou olaga, ou te folafola atu, e faafoisia e le Atua matautia lena tulaga i le suafa o Iesu. E mafai e le Atua ona feliuaina soo se tulaga faaletonu ma lē lelei ina ia atagia ai lona manalu, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 25 SETEMA 2025

(tusia e Pastor EA Adeboye)

Manatu Autu:  Tau o le faatuatua (Just believe)

Tauloto Tusi Paia –  Mareko 11:23 “auā e moni, ‘ou te fai atu ‘iā te ‘outou, ‘ai sē fai atu i lenei mauga, ‘‘Ia si‘itia oe, ma ‘ia lafoina i le sami,’ ma le lē māsalosalo lona loto, ‘ae peita‘i e fa‘atuatua o ia e taunu‘u lava mea na ia fai atu ai, ‘ona faia lea mo ia o le mea na te fai atu ai.”

‭

Faitauga - Tusi Paia: Iakopo 1:5-7

Fai mai le faitauga o le Tusi Paia o le asō e tatau ona e ole atu i le Atua mo manaoga, tau lava o le faatuatua. O loo fai mai foi a masalosalo, e le tatau ona e manatu e te maua se mea mai le Atua. Ou te iloa e iai vaega faigatā ma le fitā, peitai a e fia soifua e sili atu i na tulaga, e tatau ona e faatuatua i le Atua. I le Mataio 14:28-29, o le faatuatua o Peteru sa lēai se masalosalo ina ua ia fai atu ia Iesu ‘ia e fetalai mai ‘iā te a‘u, ‘ou te alu atu ‘iā te oe i luga o le vai.’ Peitai ina ua tilotilo atu i le malosi o le matagi ona taofia lea o lona faatuatua, ma ua amata ona goto. Tusa poo le a le faigata o le olaga, aua nei tuua lou faatuatua. 

Ina ua ou faatoa faaolaina i le RCCG, sa ou matua fiafia ina ua ou faaolaina, peitai o lou maimaia ia. E tai lua vaiaso ma ou maua i le malaria e manaomia ai togafitiga faafomai. I le taimi lea, a talanoa kerisiano i faamalologa e aunoa ma vai mai le falemai, ou te lē talitonu ai. Sa masani ona ou faapea, ‘ua maea ona e faailoa mai le auala i le lagi, aua le vave avatua a’u iai’. Ona iai lea o se aso, na ou faaloga ai i se tautinoga a se tamaloa matua ina ua faamaloloina o ia mai le tua pi’o, ma na faafuaseia ona faatupuina lou faatuatua. Ou te faafetai i le Atua aua na amata mai i lena taimi, o lo’u faatuatua o loo tuputupu pea i aso uma. Afai e te fia vaai i vavega tetele i lou olaga, faatuatua i le mea na faiatu ai le Atua. Afai na ia faia mea ofoofogia muamua, e mafai ona ia faia, e faifai pea. 

Sa ou auai i se togalauapiga a Kenneth Hagin i America ma ou vaai ai i le 7000 tagata i le fono e tasi. Ou te lei vaai muamua i se mea faapea aua i le taimi lea, o le aofaiga o le Ekalesia atoa a le Redeemed Christiana Church of God e le atoa se 1000 tagata. Peitai ao matou agai atu i le vaalele i Nigeria, na ou fai i le matou aumalaga, e iai le aso o le aofaiga tau o tatou faifeau,e sili atu ma le 17,000. Latou te lei talitonu ia te au. O le asō, ua faasili mamao atu e le Atua. Afai e te talitonu ma faatuatua i le Atua, e na te saunia oe e suia matatia ausia. E na te saunia oe e ofo ai le toatele, pe afai e te faatuatua. 

Fai mai le faasaienisi, aumai faamaoniga ona ou talitonu lea. Peitai, fai mai le Atua, faatuatua mai, ona ou faamaonia atu lea. A fai atu le Atua ia te oe i se mea e faia, faatuatua ia te ia. Aua e te taumafai e faaopoopo pe toese mai ana fetalaiga. Tau o le faatuatua, ona ia faia lea o mea uma e fa‘asilisili lava i mea tou te ole atu ai ma mafaufau i ai (Efeso 3:20). 

Tatalo

Tamā, faamolemole fesoasoani mai ia te au ia ou talitonu i lau Upu i mea uma e faatautau ia te au ina ia ou maua lou mamalu, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 24 SETEMA 2025

(tusia e Pastor EA Adeboye)

Manatu Autu:  O le tulaga ua e iloa atu, e fai mo oe (What you see is what you get)

Tauloto Tusi Paia –  Kenese 13:15 “auā o le lau‘ele‘ele uma ‘ua e iloa atu nei, ‘ou te foa‘iina atu mo oe ma lau fānau e fa‘avauvau.”

‭‭

Faitauga - Tusi Paia: Numera 13:16-33

Sa fai se talanoaga a le Atua ma Aperaamo i se tasi po i le Kenese 15:3-6, ma sa faamanatu e Aperaamo i le Atua e na te lei foai atu lava sona suli. Na tali le Atua, ma faatonu e alu i fafo ma vaai pe mafai ona ia faitauina fetu o le lagi. Ona ia fai lea iai o lana fanau o le a toatele e pei o fetu o le lagi. E te ono manatu pe aisea na fai ai le Atua e alu i fafo e vaavaai i fetu? Aisea na le na o le fai iai o ona suli o le a matua toatele e faigata on faitauina? Ou te talitonu na finagalo le Atua ia vaai ma tilotilo Aperaamo i le aofaiga o le a ia maua. 

E faapena foi i le Kenese 13:14-17, na fetalai le Atua ia Aperaamo, ‘o le laueleele o loo e vaai atu iai, e fai mo oe’. Na ia faapea mai foi, ‘Alu ese mai le tulaga o loo e iai, savali i le laueleeele i le mamao e te mafaia, ona avea lea ma oe’. Na silafia e le Atua, e tatau ona umia e Aperaamo se fanua, peitai e na te manaomia le maua o se faaaliga, iloa ma vaai atu iai, e na te maua ai. I soo se tulaga e te iai, o mea o loo e iloa atu, e te maua. I soo se tamaoaiga o se atunuu o loo iai tagata e faitio ma faapea, ua faigata ma taugata mea uma, afai e te vaai atu i le mativa, o le mea lena e te maua. I se tulaga e faapea mai ua leai se faamoemoe, afai e te vaai atu i le ola, e te maua le ola. E pau lau mea e faia o le fuafua lelei o lou faatuatua ia e vaai ma tilotilo atu, tau o folafolaga a Iesu ia te oe, o mea na e te maua. 

I le faitauga mai le Tusi Paia o le asō,  na auina atu e Mose ni tagata asiasi e vaavaai i le nuu o Kanana, ona o mai lea ma ni ripoti. Na vaai atu Iosua ma Kalepo, o loo la nonofo i le nuu, ae o le isi to’asefulu, na latou vaai atu i sauai ma se nuu e matua toatele tagata e nonofo ai. Na iloa atu e Iosua ma Kalepo le matautia o le Atua ma mea e na te faia, peitai o isi ua latou faatusa i latou ini loi. I le iuga, na maua ma iu le tagata lava ia i mea na vaai atu iai. Na maliliu uma le toasefulu i le vao, a’o Iosua ma Kalepo, na la taunuu i le nuu na folafolaina ma nonofo ai (Numera 32:11-12). 

Le au pele e, o le a le mea o loo e iloa atu i lou olaga? O le mea e te vaai atu iai, o lena foi e fai mo oe. A e vaai atu i le manumalo, e te savali ai. Peitai a e vaai atu i le faiaina, e te maua foi. E finagalo le Atua ia sa’o lau vaai, ma e pau le tulaga e faatino ai, o le iloa o Lana Upu. O le a se mea ua faailoa atu e le Atua e faatatau i lou aiga, lau fanau, lau galuega, soifua maloloina lelei ma lou soifua? Talitonu ma faatuatua i ana folafolaga mo oe, ona taunuu lea. Tusa poo le a le tulaga o loo e iai, ia e tumau i folafolaga a le Atua i lana Upu, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 23 SETEMA 2025

(tusia e Pastor EA Adeboye)

Manatu Autu:  Tali le faitotoa (Answer the door)

Tauloto Tusi Paia –  Faaaliga 3:20 “Fa‘auta, ‘ou te tu atu i le puipui ma tu‘itu‘i atu; ‘ai se tasi e fa‘alogo mai i lo‘u leo, ma tatala mai le puipui, ‘ou te ulufale atu ‘iā te ia, ma te talisua fo‘i ma ia, o ia fo‘i ma a‘u.”

‭‭

Faitauga - Tusi Paia: Ioane 10:27-28

O loo faapea mai le tatou tauloto o le asō, o lo’o tū Iesu I le faitoto’a o lou agaga I le taimi nei, o lo’o tu’itu’i ma faatalitali seia e tatala atu le faitotoa ia te ia. O taimi uma e te faalogo ai I le Upu mai le Atua e faailoa ai lau agasala, o Iesu lena o lo’o faapea atu “Faataga mai a’u i lou loto e mafai ai ona ou faamamaina lou loto agasala.” E te lē silafia tulaga e mafai e Iesu Keriso ona faia mo oe, pe a e faataga o ia I lou loto. O le taimi e te fa’atagaina ai Iesu i lou ola, e lē toe aafia lou lumanai e lou tuana’i, ua na’o Iesu e taiala. I le afio ai o Iesu ia te oe, o le a matagofie ma malamalama pea lou lumanai(Faata’oto 4:18). 

E mafai ona e faapea mai: “Ua leva ona ou talia Iesu i lo’u loto.” E lelei lena tulaga, peita’i po’o e iloa pea sau agasala pe a e faalogo i se lauga po’o le faitauina o le Tusi Pa’ia? Afai e “Ioe”, o lona uiga o loo iai pea vaega o lou olaga e lei pulea e Iesu, ma o lo’o ia tu’itu’i pea i le faitoto’a o lou loto ina ia e tatala atu mo ia. E leai se faaolataga e na o sina vaega, fai mai le Efeso 5:27, o le a afio mai Iesu mo lana faato’anofotane, e aunoa ma se ponā poo le maanuminumi. Afai o iai pea se ponā i lou olaga, ia lafoa’i atoatoa i Iesu Keriso I le asō.

E mafai ona e faapea mai, ‘E lelei la’u mafutaga ma Iesu’. Peitai e iai le tulaga e sili atu. Na faamatala e Tavita le mafutaga ma le Atua, o se malaga i le loloto. Fai mai i le Salamo 42:7, ‘Mai lea moana i lea moana’. 

I le mae’a ona savali, taumafa ma talanoa ma Iesu i le taimi o lana galuega talai i le tolu ma le ‘afa tausaga i le lalolagi, sa va’aia e Ioane o ia i le Faaaliga 4:1, ma faapea iai Iesu: “Inā sau ia i luga nei, ‘ou te fa‘aali atu ai ‘iā te oe mea e tusa ‘ona tutupu amulī.”

E iai lava itu e maualuga atu i le Atua, ma o lo’o tū pea Iesu i le faitoto’a o lou loto, tu’itu’i ma vala’au ia te oe e te afio i luga atu. E le lava nā o lou ta’utino o Iesu o lou Alii ma lou Faaola; e iai leisi tulaga sili atu. E finagalo le Atua e te galue i lona mana fai vavega(Mareko 16:17-18). E finagalo e ‘avea oe ma se tagata e faia suiga lelei,  ae e manaomia le mana o le Agaga Pa’ia ina ia faatinoina ai. E iai pea faitoto’a e maualuluga atu e te ulufale atu ai i le loloto o le Atua. 

Le ‘au pele, o lo’o tuitui Iesu i lou loto i le asō. O lo’o ia valaau ia te oe ia sili atu ma loloto atu lau mafutaga ma ia. Tatala lou loto ia te ia; e na te fa’amatagofieina lou olaga i lona mamalu ma avea oe o se tagata e faia suiga lelei mo lona malo.

Tatalo:

Le Alii e Iesu, ou te tatala lo’u loto ia te oe. Faamolemole, taitai ia te a’u i tulaga maoa’e ia te oe, i le suafa o Iesu, Amene.

OPEN HEAVENS

MATALA LE LAGI MO LE ASO GAFUA 22 SETEMA 2025

(tusia e Pastor EA Adeboye)

Manatu Autu:  Ua lua fetaiai moni ma Iesu? (Have you encountered Jesus?)

Tauloto Tusi Paia –  Ioane 1:1 “Sa i le amataga le ‘Upu, sa i le Atua le ‘Upu, o le Atua fo‘i le ‘Upu.”

‭‭

Faitauga - Tusi Paia: Galuega 9:1-6

E ono manatu tagata o i latou uma e masani ona o i le lotu ma auai i mea fai a le lotu ua latou fetaiai moni ma Iesu. Peitai, ua ou iloa, o le toatele o tagata o loo galulue i le tovine a le Alii, e latou te lei fetaiai i se feiloaiga vavalalata ma Iesu. E latou te iloa faamatalaga e faatatau ia te ia, peitai latou te lei iloa o ia i se mafutaga. 

Na manatu Paulo ua ia silafia le Atua seia oo i le aso na fetaiai moni ai ma Iesu Keriso. Afai ete feiloai moni ma Iesu, o le a avea oe ma tagata fou. Ae lei feiloai Paulo ma Iesu, sa ia sauaina kerisiano. Peitai ina ua ia fetaiai ma Iesu, na matua suia lona olaga. I le 1 Timoteo 1:13-16, sa ia talanoa mai i lona olaga leaga i le tuanai, o se tagata taufaifai, faasauā ma faatautala peitai na alofaina o ia e le Atua. Ina ua ia maua Keriso, na avea o ia ma aposetolo sili (2 Korinito 11:5) ma ua taunuu ai le faamoemoega o lona olaga (2 Timoteo 4:6-7). 

O Peteru ua na o se tasi o faifaiva mai Kalilaia ae lei feiloai ma Iesu. Peitai ina ua ia fetaiai ma Iesu, na tuuina atu ia te ia se faamoemoega mamalu (Luka 5:10). E ui e lei manuia i lona faafiti o Iesu, na mautū lona lumanai ina ua fetaiai ma Iesu. A feiloai se tagata ma Iesu, o tulaga lē ausia ma lē manuia, o le a avea ma vaega o lona olaga manuia aua e galue e le Atua mea uma mo lona lelei (Roma 8:28). 

Na manatu Isaia ua ia silafia le Atua seia oo ina fetaiai ma le Atua i le Isaia 6:1 ma ua suia ai lona olaga. Ina ua ia vaai atu i le Alii i lona mamalu, na faapaū ifo ma alaga, “Auē a‘u nei! auā ai a‘u a fano; auā o a‘u o le tagata laugutu leaga, o a‘u fo‘i matou te mau fa‘atasi ma le nu‘u laugutu leaga; auā lava ‘ua iloa i o‘u mata le Tupu o le ALI‘I o ‘au.”(Isaia 6:5)

‭‭Ae ina ua maea ona fetaiai ma le Alii, na naunau Isaia e alu i soo se mea na auina iai o ia e le Alii. A e fetaiai moni ma Iesu, o soo se ‘alofaga e te faia, e mū ma lelea ese e pei o aputi o saito. 

Le au pele e, afai e te fia feiloai moni ma Iesu, ia fai ma tulaga masani ia te oe le suesue i le Upu a le Atua i aso uma. Fai mai le Faaaliga 19:13, o Iesu o le Upu a le Atua. A e suesue i le Upu a le Atua, o loo e mafuta ma Iesu Keriso. O le tele o le Upu a le Atua e te suesue iai, o lou latalata foi lena ia te ia. O le a faigata i le amataga aua o le a taumafai le tiapolo e taofia oe, peitai a e tumau ai, e te iloa ai, ua suia lou tagata aua o loo faatupuina lou iloa o le Atalii o le Atua. 

Tatalo

Lou Alii e, Iesu, faamolemole faailoa mai oe ia te au e ala i lau Upu. Ou te naunau e faatupuina lo’u iloa o lau afio ma mulimuli ia te oe i lo’u olaga atoa, i le suafa o Iesu, Amene. 

OPEN HEAVENS

MATALA LE LAGI MO LE ASO SA 21 SETEMA 2025

(tusia e Pastor EA Adeboye)

Manatu Autu:  Taimi Ma Avanoa (Time And Chance)

Tauloto Tusi Paia –  Failauga 9:11 “Ua ‘ou toe iloa fo‘i i lalo o le lā ‘ua lē sini i le tausinioga ē ‘ua tele vavave, ‘ua lē mālō i le tau‘a ē ‘ua malosi, ‘ua lē i ai fo‘i i ē ‘ua popoto le mea e ‘ai, ‘ua lē i ai i ē ‘ua fa‘autauta le ‘oloa tele, ‘ua lē i ai fo‘i i ē ‘ua atamamai le alofaina mai; a o le tausaga ma le mea e tupu ai e o‘o ‘iā te i latou uma.”

‭‭

Faitauga - Tusi Paia: 1 Samuelu 17:12-50

E i ai se fa’aupuga masani faapea; e maua se manuia pe a fetaui tapenaga ma avanoa - e sa’o lelei lea fa’aupuga. E mafai ona fai se miti a se tagata faapea ua ia ausia se tulaga maualuga faapitoa, peita’i afai e le sauni ma tapena lea tagata e o’o mai le avanoa e fa’ateia ma iloa lelei ai le le sauni o lea uso. I le Tusi Paia faitau o le asō e te maitauina ai ua leva na tapena e Tavita ia lava mo taua a’o i le vao e leoleo mamoe a lona tamā. Sa leai ni ana auupega peita’i na faaauau pea ana tapenaga seia o’o ina avea ma faamatua i le sasauina o le ma’atā. O lona aso manuia na o’o mai ina ua ia faasagatau ia Koliata ma fasia o ia i le ma’atā ma le ma’a e tasi. Fai mai le 1 Samuelu 17:50 “Ua mālō Tavita i le Filisitia i le ma‘atā, ma le ma‘a, ‘ua na fasi le Filisitia ‘ua oti ai, ‘ae leai se pelu i le lima o Tavita.”

 E le tutusa Tavita ma Reopoamo. O Reopoamo e le’i sauni mo le nofoalii o Isaraelu. E ui o ia o le atalii o le tupu o Solomona o le sa vaai i ai le toatele o le tupu aupito poto lea o Isaraelu peita’i o se atali’i valea. O ia o le suli i le nofoalii na manatu tagata o loo sauni mo le aso e avea ai ma tupu. Paga lea e lei sauniuni mo se tulaga na te iloa o le a o’o mai, ma o lea, e le’i manuia o ia (2 Nofoaiga A Tupu 10:1-19). 

A iloa e se tama/teine aoga ua lata mai se suega ae lē sauni ma su’esu’e, e mafai ona faapea o le tama/teine aoga e valea. Afai o se tagata faigaluega i se faalapotopotoga na te iloa e fai lipoti o galuega a le aufaigaluega ae nofonofo e lē faia lelei lana galuega, o lea tagata e valea ma e le mafai ona siitia lona tulaga. Afai o se faifeau na te iloa o ia e lauga i le Aso Sa ae lē anapogi, tatalo pe suesue le upu, o lea faifeau o ia lava o le tiapolo ua ia taofia lona lava lelei. A o’o mai le taimi mo suiga lelei mata’utia o lou olaga, ou te tatalo o le a e sauni ma tapena, i le suafa o Iesu. 

Fai mai le upu tauloto o le asō, o le tausaga ma le mea e tupu ai e o’o iā te i latou uma o i le lalolagi. O lona uiga o tagata soifua uma o i le fogaeleele e i ai avanoa i manuia o le soifuaga. Peita’i na o i latou e sauniuni ma galulue latou te iloa ia avanoa pe a oo mai ma o latou fa’aaogā lelei. 

Le au pele e, e tatau ona faateleina faifaipea lou silafia aemaise i vaega o loo e galue ai, a o’o mai ai le avanoa o e sauni e fa’aaogā lelei i le mea e gata ai lou mafai. O le a se galuega o loo e faia i le taimi nei e saunia ai lou tagata mo le avanoa tele ma manuia  pe oo mai ia te oe? I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 20 SETEMA 2025

(tusia e Pastor EA Adeboye)

Manatu Autu:  Usita’i Faigofie (Simple Obedience)

Tauloto Tusi Paia –  Iakopo 1:22 “A ‘ia fai ‘outou ma ē ‘ana‘ana i le ‘upu, ‘ae ‘aua le na ‘ona fa‘alogologo i ai, o fa‘asesēina ai ‘outou e ‘outou.”

‭‭

Faitauga - Tusi Paia: Teuteronome 28:1-13

I le tele o tausaga ua mavae, sa ou alu ai ou te lauga i Onitsha, o se taulaga i totonu o Sauté Sasae o Nigeria. I lo’u toe fo’i i Lagos, sa manaomia ona toe utu la’u taavale, ma sa ou tu ai loa i Asaba e utu ai se penisini. Paga lea sa le maua se penisini poo se suāu’u mo la’u taavale. Sa ou alu pea seia ou taunuu i le nuu o Benin, ae le’i maua lava se pamu penisini. Sa fa’aauau pea la’u malaga seia ou taunuu i Ore. O le taimi lea ua mumū le molī o le fua penisini o le taavale. Sa ou le iloa se mea a fai. O le afiafi o le Aso Sa lea ou te malaga ai ae tatau ona fai a’u vasega i le taeao e soso’o ai. Ona fetalai mai lea o le Atua ia te a’u, “Atalii aua e te vaai i le fua penisini ae fa’aauau lau malaga.” Sa o’u alu pea i le penisini fa’aleoleo o le taavale mai Ore seia ou taunuu i lo’u fale i Surulere (silia ma le lua selau km le mamao). E mafai ona faia e le Atua se mea mai le leai o se mea peita’i o lou maua ma fiafia i na faamanuiaga e tatau ona e usiusita’i ia te Ia. A fetalai mai e te alu e tatau ona e alu, ae a fai mai taofi, e tatau ona e nofo. Faimai Faataoto 3:5, e lē tatau ona e faalagolago i lou lava atamai. 

I le Ioane 5:2-9, sa iai le tagata sa ma’i i tausaga e tolusefulu ma le valu, ua silasila atu Iesu ia te ia o taoto latalata i le vai ma fesili ia te ia, “e te fia mālōlō?”, na tali le tagata ma’i, “Lē Alii e, e leai lava se tagata na te tuuina ifo a’u i le taelega pea gaepu le vai.” Ona fetalai atu lea o Iesu ia te ia, “Inā tu ia i luga, ave lou moega ma ia e savali” ona malolo loa lea ole tagata ua ave lona moega ma ua savali. Ole usitai ole tagata ma’i I fa’atonuga a Iesu, ina ia tula’i ma ave lona moega, na gausia ai le pologa sa i ai i le tolusefulu valu tausaga. Poo lē a le umi o se faafitauli, e auina mai loa e le Atua lana upu, ma e usitai ia te Ia, o le a e saoloto atoatoa. 

E silia male 40 tausaga ua te’a, sa ou malaga ai I fafo atu o Nigeria mo le taimi muamua, ma ou te le’i tietie muamua fo’i I se vaalele. O le taimi lea o o’u faiaoga I le Iunivesite I Lagos ma sa ou alu e fai se aoga I Sierra Leone. Sa fai si ou popole auā faatoa o’u alu ese lea ma le atunuu peita’i sa i ai se tagata sa aumaia ia te a’u faatonuga oute uia i le malae vaalele. Sa ou faalogo lelei ma usitai I fa’atonuga, ma sa manuia la’u malaga. 

Le au pele e, a avatu e le Atua ia te oe se fa’atonuga, ‘aua e te manatu e sili atu lou iloa. E silafia e le Atua le taunuuga mai le amataga ma le auala e sili ona lelei mo lou olaga. Afai e te mana’o e manuia lou olaga, usitai I fa’atonuga a le Atua. O le usita’i e muamua mai i taimi uma, ona sosoo lea ma vavega. O le ki i le maua o le manuia e faigofie lava, o le usitai i faatonuga a le Atua, I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 19 SETEMA 2025

(tusia e Pastor EA Adeboye)

Manatu Autu:  E mafai ona e faia mea maoa’e  (You can also do exploits)

Tauloto Tusi Paia –  Isaia 28:10“Auā o lo‘o i ai le ‘upu ma le ‘upu, o le ‘upu ma le ‘upu; o le vavao ma le vavao, o le vavao ma le vavao; o sina mea itiiti ‘i‘inei ma sina mea itiiti ‘i‘inā.”

‭‭

Faitauga - Tusi Paia: Ioane 14:11-12

Ina ua valaau le Atua ia te au ia avea ma faifeau, ou te lei fia tali i lea valaau, ae na ia tuitui mai. O lea na ou fai atu ia te ia, ‘ou te lē fia avea ma kerisiano poo se faifeau, e masani ai. Afai e te finagalo ia avea a’u e pei ona e fai mai ai, ou te manao ia ou faia mea na faia e Iesu, pe sili atu foi. Na faapea mai le Alii, ‘Ua lelei, e leai se faigata. Pau o lea, e tatau ona e amata mai i le tulaga na amata ai Iesu. Sa ia anapogi mo le 40 aso ma le 40 po ona faatoa faia lea o lana vavega muamua’. I lea taimi, e pau le taimi ou te anapogi ai o le taimi o Aso Maliu poo ituaiga anapogi foi lele e mai le taeao ae maea i le 12 i le aoauli. Ua ou fai i le Atua, “40 aso ma le 40 po?” Na ia tali mai,’ o oe lava na e manao e te fia pei o Iesu, pe sili atu foi, o lona uiga e tatau ona e amata mai i le mea na amata ai Iesu. Toeitiiti lava ou faapea atu, ‘Le alii e, aua e te popole’, ona ou manatu ifo lea ia te au, ‘a iai se mea ua ou iloa i le Matematika, e te amata mai i mea e iloa seia oo i mea e lē iloa atu, fuaiupu faigofie seia oo i fuaiupu faigata ma isi. Ona ou amata anapogi lea mo le tolu aso ma le tolu po. Ou te ta’u atu, e pei e tolu masina. Ina ua maea sina taimi, o le anapogi mo le 3 aso ma po, ua lē toe faigata ia te a’u, ona sosoo atu ai lea o le 5 aso ma po, ona sosoo lea ma le fitu aso ma po seia oo ina mafai le anapogi mo le 40 aso ma po, e faia e faatasi pe faalua i le tausaga.

Le au pele e, e mafai ona e ausia le maualuga pe afai o loo e tuputupu pea i le itu sa’o. Aua e te manatu o i latou o loo i tulaga maualuga, na oo iai i se aso se tasi. Auā o lo‘o i ai le ‘upu ma le ‘upu, o le vavao ma le vavao; o sina mea itiiti ‘i‘inei ma sina mea itiiti ‘i‘inā. (Isaia‬ ‭28‬:‭10‬), a maea, ona e iloa lea ua e iai i se nofoaga na e naunau iai. 

Ou te talitonu o aoaoga uma a Iesu e mafai ona faapea, ‘e leai se mea e faia e leai se aogā’. E iai le taui e totogi pe afai e te fia avea ma tagata maoa’e. E ono le mafai ona totogiina le tau atoa i le taimi nei, peitai afai e te taumafai e laa i luma mai lea taimi i lea taimi, e le umi ae e iloa ua e oo i le tulaga o loo e naunau iai. E mafai ona amata mai i le tulaga o loo e iai, auā a e faatali sei telē pe sili atu, e te ono lē amata lava. E siitia mea e tuuina atu e le Atua iai latou o ē faamaoni i mea itiiti (Luka 16:10). Faasolosolo ona totogi le tau ia ausia se tulaga e maualuga atu, i le Atua e amata atu nei, i le suafa o Iesu, Amene.