Samoan Devotional

OPEN HEAVENS

MATALA LE LAGI MO LE ASO TOFI 18 SETEMA 2025

(tusia e Pastor EA Adeboye)

Manatu Autu:  E mafai ona e siitia pea  (You can go higher)

Tauloto Tusi Paia –  Mataio 5:6 “Amu‘ia ē fia ‘a‘ai ma fia inu i le amiotonu; auā e mā‘o‘ona i latou.”

‭‭

Faitauga - Tusi Paia: Salamo 63:1-5

Tusa poo le a le maualuga e te ausia i le Atua, e mafai ona e siitia pea. Peitai, e nā o i latou e fiaai e mafai ona siitia pea. O tagata e malie gofie e lē mafai ona galulue ia siitia pea ona ua manatu, a lē ua lava lea mo ia, pe ua leai foi se agavaa e ausia ai nisi vaega e sili atu. 

Sa ou malaga i se setete i saute o Nigeria, ma lauga i ni vaega eseese o lea setete. I se tasi o nuu, sa ou lauga ma tatalo ma faaee ou lima i luga o tagata mamai. Ina ua maea, sa ou manao e fufulu ou lima, ona o mai lea o ni tamaitai se toalua, sa aumai e le tasi se apa vai mama, ao leisi o se apavai o loo iai le fasimoli. Ao fufulu ou lima i le apa vai ma le fasimoli, ua ou iloa i lou agaga o le tamaitai o loo uuina le apa, o loo fiaai i le faauuga. Na faafuasei ona ou lagona le tafe atu o le faauuga mai ia te a’u i le vai, pa’i i le apa ma oo atu i ona lima. 

Na faafuaseia ona gatete, ona sau lea o seisi tagata ma aveese le apa vai mai ona lima. Na vave mai tagata na iai ma avatu lenei tamaitai ma faanofo i le nofoa, ae na gatete ma luluina pea lona tino i le faauuga. O le tulaga mataina, sa iai pea le faauuga i le vai i totonu o le apa, peitai o le tagata na tago i le apa vai ma aveese mai ona lima, e na te lei lagonaina le faauga. E na te lei lagonaina le faauuga aua e lei fiaai mo le faauuga. O le fiaai e tosina mai ai le faaopoopoina pea o le faauuga ma latalata atili atu ai tagata i le Atua. O i latou e fiaai mo le Atua e naunau e totogi le tau. E lē faitio pe a oo i le taimi o le anapogi pe tomumu pe a oo i taimi o tatalo. Auā sa fiaaai, e naunau ma saunia i latou e faia so’o se mea ia siitia ai pea. 

O e fiaai mo le Atua ia faaopoopoina pea? E te naunau e siitia pea i le Atua? E moni i le Ioane 7:37, o i latou e fiainu na valaaui iai Iesu e inu mai ia te ia. Peitai o loo fetalai Iesu e tatau ona e alu atu muamua ia te ia ae e te lei inu mai ia te ia. E toatele tagata e talanoa mai i lo latou naunau ia siitia pea ia Keriso, peitai a oo i le taimi e faatino ai le tulaga e siitia ai, o i latou ia e muamua faapea mai e lē mafai ona anapogi, e lē mafai ona tatalo, pe lē mafai ona suesue i le Tusi Paia mo se taimi umi. 

Le au pele e, ia e fia inu e te siitia pea i le Atua ma ia saunia lou tagata e faia mea uma e manaomia. 

Tatalo

Tamā, faamolemole ia faatumu lo’u loto i le fiaai pea ia faaopoopo i lou Agaga. Fesooasoani mai ia te au ia totogi le tau e siitia ai pea ia te oe, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 17 SETEMA 2025

(tusia e Pastor EA Adeboye)

Manatu Autu:  E mafai ona faaaoga oe e le Atua o se fofō  (God can make you a solution)

Tauloto Tusi Paia –  Isaia 60:1 “Tula‘i ia, ‘inā malamalama ia, auā ‘ua o‘o mai lou malamalama; ‘ua alu a‘e fo‘i le pupula o le ALI‘I i ou luga.”

‭‭

Faitauga - Tusi Paia: 1 Tupu 17:17-24

I aso uma, e vaaia e tagata faafitauli e latou te fia faia se mea e fofō ai. Ae ā pe a faaaoga oe e le Atua e saunia fofō mo soo se faafitauli e te lua fetaiai, pe faaaoga foi oe o se fofō i se faafitauli ua tausagā i lou aiga? A tupu se faalavelave matautia i lou nuu, e mafai ona e faia se tatalo faigofie e suia ai ma e vaai atu i tagata na aafia ua suia le faanoanoaga i le fiafia?

Ina ua sau le fafine o le toalua o se tasi o atalii o perofeta ua maliu ia Elisaia ona o lana aitalafu, e lei toe foi i le fale ma lona faafitauli. Na tatala e Elisaia mata o le fafine ia iloa le fofō o loo naunau iai o loo i totonu o lona fale. Na ia faaalia atu ia te ia le auala e soloia ai aitalafu ma ola i se olaga e mautu le tulaga tau seleni (2 Tupu 4:1-7). E iai taimi o le avea ma fofō i se faafitauli o seisi tagata e lē o le foai iai o tupe ae o le tatalaina o latou mata e vaai atu i mea latou te lei iloa muamua, e faaaupegaina i latou i le poto ma maua faamaumauga sa’o e soifua ai i se olaga saoloto mai saisaitiaga. Na fetalai Iesu, “E iloa fo‘i e ‘outou le mea moni, e tu‘u sa‘oloto fo‘i ‘outou e le ‘upu moni.” (Ioane‬ ‭8‬:‭32‬). O Iesu o le ala, o le Upu Moni ma le ola (Ioane 14:6). O lea, o le auala moni e fesoasoani ai i tagata ma o latou faafitauli, o le faailoa atu lea o Iesu iai latou. 

I le faitauga mai le Tusi Paia o le asō, ina ua oti le tama a le fafine ua oti lana tane,  e lei alu i le tupu mo se fesoasoani. Na liliu o ia ia Elia, ma na faaaogaina e le Atua Elia e toe faatu le tamaitiiti mai le oti. A tupu se mea faapea i lou siomaga, e mafai e le Atua ona faaaogaina oe e momoli atu ai le fofō? E mafai ona e faapea mai, ‘e lē o a’u o se perofeta e pei o Elia’. Peitai, e leai se faamaumauga i le Tusi Paia e na o faifeau faauuina e mafai ona faia vavega. Fai mai le Mareko 16:17-18 “E mulimuli atu fo‘i nei fa‘ailoga i ē fa‘atuatua; e tutuli e i latou temoni i lo‘u igoa; e tautalatala i latou i gagana fou; e fetāgofi i latou i gata; ‘āfai fo‘i latou te inu i se mea e oti ai, latou te lē afaina ai lava; e fa‘ae‘e atu fo‘i o latou lima i luga o ē mama‘i, ma fa‘amālōlōina i latou.”

‭‭O Iesu o le fofō sili lea i soo se faafitauli, ma ua ia foai atu iai latou e faatuatua ia te ia le pule ma le mana e faia faailoga ma mea ofoofogia i lona suafa. E mafai ona e faia e ala i lou agaga ae lē o lou tino. 

Le au pele e, avea oe ma tagata faatuatua e suesue i le Tusi Paia ma tatalo faifaipea. A e faapea, e faaaoga oe e le Atua o se fofō i faafitauli o le toatele o tagata i lou siomaga. A e mafuta ma Iesu, o le Fofō sili, e mafai ona ia faaaogaina oe o se fofō i faafitauli i lou siomaga, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 16 SETEMA 2025

(tusia e Pastor EA Adeboye)

Manatu Autu:  Tagata faitio poo tagata e finau ma saunia tali  (Mere critic or activist with solutions)

Tauloto Tusi Paia –  Mataio 10:16 “Fa‘auta, ‘ou te ‘a‘au atu ‘iā te ‘outou e pei o mamoe i le vā o luko; o lenei, ‘ia ‘outou atamamai pei o gata, a ‘ia fīfīlemū pei o lupe.”

‭‭

Faitauga - Tusi Paia: 1 Tupu 17:1-16

E masani ona faapea na fausia tulafono e lē faapea e faaaloalo ai i ē faitio. E ui e lē leaga le faitio i tagata e lē o faia mea e tatau ona latou faia, e le tatau ona gata ai iina. Fai mai le 1 Tupu 17:1 “Ua fai atu Elia le Tisepi, o so le nu‘u e nonofo i Kiliata, ‘iā Aapo, “O lo‘o soifua le ALI‘I le Atua o Isaraelu, o ia ‘ou te tu ai i ona luma, e leai se sau po o se timu i nisi tausaga se‘i ‘iloga ‘ou te fai atu.”

I le fuaitau o loo taua i luga, ua tatou iloa na amata Elia o se tagata faitio. Sa lei savali le tupu i le amio e tatau ona iai le tupu, ae pei lava o tagata faapea, na ulu atu Elia i le maota o le tupu ma ta’u sa’o atu ia te ia. E lei gata ai iina, na avea o ia ma ipu na faaaoga e le Atua e saunia le manaoga o le fafine mativa ua oti lana tane, ma lana tama ( 1 Tupu 17:8-16). 

E fia avea oe o se tagata faitio poo se tagata finau e faaaoga e le Atua e fausia tali o mataupu aua le alualu i luma? E te malie i le tauave o faailo e tetee atu ai, pe e te fia matuā milionea e mafai ona e fafagaina tagata fiaaai? O le tauave o faailo e tetee atu ai, e ono iloa mai e tagata o loo e faitio ai. Peitai, e sili atu le tupu o lou poto ma faailoa atu auala e fofo ai pe e te saunia foi e oe lava, ni tali lelei o mea o loo e finau atu ai. ‘Aua le nā o le avea ma tagata faitio e lui i latou o loo tulai mai tulaga taitai, ae ia siitia lou iloa ma mea e te faia mo le manuia lautele, aua e lē mafai ona tu’uesea e tagata. 

O lenei feau taua e faapitoa i talavou. E tatau ona aoaoina i latou mai ia Mose, o lē na manatu e mafai ona ia faataunuuina lona lumanai i lona malosi, o le iuga, na nofo i le vao mo leisi 40 tausaga seia saunia lona tagata. O le lelei o loo e naunau iai e mafai ona tupu, peitai e tatau ona e poto ina ia taunuu e tusa ma le finagalo o le Atua. Fai mai le Mataio 10:16, “Fa‘auta, ‘ou te ‘a‘au atu ‘iā te ‘outou e pei o mamoe i le vā o luko; o lenei, ‘ia ‘outou atamamai pei o gata, a ‘ia fīfīlemū pei o lupe.”

E tatau i kerisiano ona fuafua lelei e pei o gata. O le tulaga pito i lamatia o le gata, o lona filemu pe a sauni e osofai seisi. A osofai, e iloa ane e le manu poo le tagata, ae ua tuai. 

Le au pele e, ia e poto. Ua saunia e le Atua se lumanai lelei mo oe, peitai e lē tatau ona avea lou naunau tele e taofia le ausia o lou lumanai manuia. ‘Aua le avea oe, ua na o se tagata e soona tapisa, ae faalautele lou iloa ma le poto masani ina ia avea oe ma se malosi e iloa ma faaaogaina. O lou faamaufaailogaina e tatau ona tutusa lelei ma lou iloa, malamalama ma galuega faatino (Roma 10:1-2). Aua le nā o le faitio i mea o tutupu poo tagata, avea oe ma vaega e faatinoina tali ma fofō o mataupu o loo e maelegā iai, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 15 SETEMA 2025

(tusia e Pastor EA Adeboye)

Manatu Autu:  E tatau ona alofagia aiga o lou toalua  (In-Laws should be loved)

Tauloto Tusi Paia –  Iuta 1:21 “Ia ‘outou fa‘atumau ‘iā te ‘outou i le alofa o le Atua, ma fa‘atalitali atu i le alofa mutimutivale o lo tatou Ali‘i o Iesu Keriso, e o‘o atu i le ola e fa‘avavau.”

‭‭

Faitauga - Tusi Paia: Ruta 1:8-18

Ina ua tuua lo’u aiga mo aoaoga i le Iunivesite,  na ou tuua lo’u tina i la’u avā, ma lo’u mautinoa o le a ia tausia lelei o ia. O la’u avā o se fesoasoani lelei, ma o se fesoasoani moni, o se faamanuiaga e le gata o lana tane ae faapena i le aiga o lona toalua. E le saili o ia e tauvā ma le tanē pe lē faaaloalo iai, peitai e fesoasoani o ia i lana tane i le faaaloalo lea i lona aiga. O nei aso, o nisi avā e faapea mai e na o le tane o loo faaipoipo iai ma e leai se manatu i lona aiga. E lē sa’o lea tulaga aua foi o le tane na sau mai se aiga, ma i le tulaga o le avā o se fesoasoani, e iai le matafaioi ia alofa i le aiga o lana tane. 

O Ruta o se fafine poto. Ina ua faaipoipo i le tama a Naomi, na ia faia Naomi o lona tina. O lona alofa ia Naomi e tele naua e oo ina ua oti lana tane, na ia tuua lona nuu ma mulimuli i le tina o lona toalua i se nuu e lei ola ai. Sa saunia o ia, ia faia soo se mea e tausi ai i le tina o lona toalua ua matua. Na tauia o ia e le Atua i lona lē manatu na o ia, ma ua tuuina atu ia te ia seisi aiga faaopoopo. O le tautua a Ruta i le tina o lona toalua na tatala ai le faitotoa o le uluola ia te ia (Ruta 1-4), ma i le talaaga o le gafa o Iesu Keriso i le Mataio 1:1-16, e te maua ai lona igoa i le fuaiupu e 5. 

O le alofa i aiga o lau tane e le faapea e mo na o avā. E tatau foi i tane ona alolofa i aiga o latou avā. O le foai o mea uma na manaomia i le aganuu i le taimi o le faaipoipoga e lē faapea e gata ai iina lo latou taua. Mo se faataitaiga, na faamalolo e Iesu le tina o le avā a Peteru ina ua ia oo atu i le fale o Peteru i le Mataio 8:14-15. Na faamalolo e Iesu i le taimi lava lena ona tulai lea o ia ma auauna mai iai latou. Ana faapea e lē lelei le tausia o ia muamua atu i le taimi lea, pe ana faapea e lē alolofa iai Peteru ma lana avā ma latou nonofo faatasi, semanu e lē manatu e auauna atu iai latou uma na iai e aofia ai ma le toalua o lana tama. 

Afai ua e faaipoipo, na tuu oe e le Atua i le aiga o lou toalua aua e finagalo o ia e faalautele atu lou alofa iai latou. Pe tauia mai pe leai, o lau matafaioi o le alofa iai latou. E leai se tagata e na te tapēina se malamalama mumū itiiti o loo ia maua, ona o loo nonofo uma le toatele i le pogisa. Peitai, e na te faamumū atili le malamalama ia iloa uma atu e isi. Afai o aiga o lou toalua e lei talitonu lava ia Iesu, o lau faaipoipoga e avatu ai le avanoa ia te oe e susulu atu ai le malamalama. Ole atu i le Atua mo le poto e te mafuta ai iai latou, ma o mea uma e te faia, ia e faataga le alofa o Keriso e pulea lou loto, o mea e fai ma au faaiuga. E tatau ona e alofa i aiga o lou toalua pe tauia mai pe leai, i le suafa o Iesu, Amene. 

OPEN HEAVENS

MATALA LE LAGI MO LE ASO SA 14 SETEMA 2025

(tusia e Pastor EA Adeboye)

Manatu Autu:  Tausia i latou i upu lelei (Raise them with wholesome words)

Tauloto Tusi Paia –  Faataoto 18:21 “O le oti ma le ola, o lo‘o i le pule a le laulaufaiva ia; o ē manana‘o i ai latou te ‘a‘ai i lona fua.”

‭‭

Faitauga - Tusi Paia: Iakopo 3:1-12

E taua i matua ona tautala ma folafola upu tonu ma lelei i luga o olaga o latou fanau. O le tautala i upu tonu ma lelei e iai lona taua i le fausia o se faavae mautu mo le fanau. Peitai ane, o nisi matua e ese ma le faatamala I a latou upu. E lē faaeteete ma mafaufau lelei i mea i o latou loto ao lei tautatala, aua o upu e gagana mai ai ia latou fanau e matua lē lelei. E tatau i matua ona faamanuia ia latou fanau ae lē o le fetuu pe faia ni folafolaga leaga io latou luga. Ina ua fanau e Rasela lana pepe lona lua,  na ia folafola se fetuu i ona luga ona o le tigā na ia ui ai. Ana le suia e Iakopo le Igoa ia Peniamina semanu e ola ane lea tamaitiiti i se olaga faanoanoa (Kenese 35:18). 

E toatele tagata e ola I faanoanoaga ona o fetuu ua folafola i o latou luga e latou matua. E lē tatau ona faia e matua lenei faiga ia latou fanau, ae tatau ona latou faaaogaina o latou fofoga e faamanuia  ai fanau i aso uma. E tatau foi ona aoaoina matua e taofiofi nao i laua nisi o mea ua faaali atu e le Atua mo la fanau, ina ia aua nei tatalaina le avanoa i osofaiga mai tagata poo temoni.  Na teu e Maria mea na ia maua e faatatau ia Iesu i lona loto ( Luka 2:19). E le tatau i matua ona faasoa atu i latou fanau mea uma na faailoa atu e le Atua mo latou. O nisi mea e faatali seia oo i le aso tuupoina, e tatau ona faatali seia oo i lena taimi. 

E le tatau foi i matua ona faasoa mea uma o tutupu i latou fanau i luga o upega tafailagi. O upega tafailagi o se maketi e iai soo se ituaiga tagata. Ana faatamala Maria ma Iosefa i le vaaia o Iesu ina ua faatonu e le Atua e o i Aikupito, semanu e maua lava e Herota se auala e fasiotia ai o ia i Aikupito. E tatau ona popoto matua i le iloilo lelei a’o lei faasoa atu ata ma isi o latou fanau i upega tafailagi. O nisi tamaiti ua pauū atu i tagata leaga ona o le faatamala o matua. 

Fai mai le Teuteronome 6:6-9, e tatau i matua ona aoao latou fanau i ala o le Atua. E tatau ona latou iloa ana tulafono i le taeao, aoauli afiafi ma le po ma ia faaaoga avanoa uma e aoao ai i latou ia tumau le upu a le Atua io latou mafaufau. Afai o oe o se matua, faaaoga lou fofoga e aoao lelei lau tama, ae le o le faatoilaloina o i latou. E faamanuia lava lou tina ia te au, e faapea lava o ia, ia valaau o ia i se tagata se toatasi, ae toatele o le a tali mai, ma i le asō ua taunuu ma iloa ia mea i lou olaga. Ia avea au upu e faasusuina i le alofa tunoa i taimi uma (Kolose 4:6). Ia avea lou fofoga o se vaipuna i le ola mo lau fanau. Ia latou iloa, e latou te feiloai ma  upu o le ola ae lē o le oti mai ou fofoga. E tatau i matua ona folafola atu upu o le ola i latou fanau, i le suafa o Iesu, Amene. 

OPEN HEAVENS

MATALA LE LAGI MO LE ASO TOONAI 13 SETEMA 2025

(tusia e Pastor EA Adeboye)

Manatu Autu:  Tamo’e ma le faaaliga (Run with the vision)

Tauloto Tusi Paia –  Ioelu 2:28  “Mulimuli ane, e i‘u ‘ina ‘ou liligi ifo ai lo‘u Agaga i luga i tagata uma; ona perofeta ai lea o ‘outou atali‘i ma o ‘outou afafine, e fai miti o ‘outou toeaina, e iloa fa‘aaliga e o ‘outou taulele‘a.”

‭‭

Faitauga - Tusi Paia: Numera 14:1-9

I le tauloto mai le Tusi Paia o le asō, na folafola e le Atua o le a ia  liligi ifo Lona Agaga i aso mulimuli, e fai miti ia toeaina ao taulelea e iloa faaaliga. Pe e te matua pe talavou, e finagalo le Atua e te faia mea tetele ma lona Agaga Paia o loo nofo i totonu ia te oe. 

A avatu e le Atua ia te oe se faaaliga, e finagalo o ia e te tamoe ma le faaaliga lena. E te ono fetaiai ma luitau, peitai e tatau ona e  tilotilo I tua atu. Mo se faataitaiga, i le Numera 13 ma le 14, na auina atu e Mose tagata asiasi e vaavaai i le nuu na folafolaina ma aumai ia te ia se ripoti.   Na toe foi mai tagata asiasi ma vine lapopoa e faailoa mai ai o le nuu moni o loo iai le suauu ma le meli, peitai o le toasefulu o i latou, ua tomumumu ma faapea mai, e tumu le nuu i sauai. O Kalepo ma Iosua, o loo manino lo la iloa o le faaaliga a le Atua ua faapea mai, ‘ Matou te iloa mea na vaai iai matou mata, ae a aina e le eleele ona tagata, e le tatau ona toe totoe ai nisi. Na aumai e le Atua le faaaliga, ma è fesoasoani mai o ia tatou te avea le nuu, ia tatou o atu loa e fai le nuu mo tatou’. Fai mai le Tusi Paia i le Numera 32:11-12, e ui na faaumatia tagata uma o lena augatupulaga, ua na o Iosua ma Kalepo na oo i le nuu na folafolaina. 

Le au pele e, o le faaaliga na avatu e le Atua ia te oe e faasao ia te oe ma faalevalevaina ai ou aso. Tusa poo le a lou tausaga, afai e te iloa atu le mea o loo finagalo le Atua ia te oe e te faia ma ua e sauni e faia, o le a ia saunia oe ia e ola pea ma malosi atoatoa. E 75 tausaga o Aperaamo ina ua valaau le Atua ia te ia e alu i le  nuu o le a ia faaali atu ia te ia ( Kenese 12:1-4). Aua sa naunau e tamoe ma le faaaliga lea, na faataga e le Atua ia ola pea seia aulia le 175 tausaga (Kenese 25:7-8). 

A avatu e le Atua se faaaliga, tamoe ma oe, aua te musua ona o ni faafitauli. E le tatau foi ona e muamua i luma o le Atua aua e oo atu ai ia te oe puapuaga. Fai mai le Sapakuka 2:3, ‘“Auā o le fa‘aaliga ‘ua tu‘uina mo ona aso ‘ua tu‘upoina, ‘ae tautala mai pe a o‘o i le i‘uga, e le pepelo lava; e ui lava ‘ina tuai mai, a ‘ia fa‘atalitali pea i ai auā e o‘o mai lava, e le fa‘atuai mai.”

‭

O lona uiga e tatau ona lava lou onosai e te tamoe ai ma le faaaliga na tuuina atu e le Atua ia te oe (Eperu 12:1). I lea auala, e te le faia ai ni faaiuga faatopetope ao e mulimuli i le faaaliga. Ou te tatalo ia e ausia faaaliga uma ua avatu e le Atua ia te oe, i le suafa o Iesu. Afai na avatu e le Atua se faaaliga ia te oe, tamoe ma oe, i le suafa o Iesu, Amene. 

OPEN HEAVENS

MATALA LE LAGI MO LE ASO FARAILE 12 SETEMA 2025

(tusia e Pastor EA Adeboye)

Manatu Autu: Mata faaleagaga 2(Spiritual eyes 2).

Tauloto Tusi Paia –  Salamo 119:18  “Ia e fa‘apupula mai o‘u mata, ‘ia ‘ou va‘ai lava i mea e ofo ai i lau tulafono.”

‭‭

Faitauga - Tusi Paia: 2 Tupu 6:15-23

O le a faamaea atu i le asō le talanoaga i mata faaleagaga i le aoaoga na amata mai i aso e tolu talu ai. 

I le faitauga o le Tusi Paia o le asō, na auina mai le ‘autau e saisai atu Elisaia, ona matua fefe ai lea o lana auauna. Peitai e lei ano iai Elisaia, ua fai atu I lana auauna e sili atu ē e au ma i laua i lo ē faasagatau mai iai laua. Ona ia  tatalo lea ia faapupulaina e le Atua mata o lana auauna. E ui e le tauaso le auauna aua sa ia iloa atu le autau a Suria, ae sa manaomia le faapupulaina o ona mata faaleagaga ina ia iloa atu le ‘autau a le Atua o loo siomia i latou. 

‘Ona fa‘apupulaina lea e le ALI‘I o mata o le taule‘ale‘a, ‘ona iloa ai lea e ia, fa‘auta fo‘i, ‘ua tumu le mauga i solofanua ma kariota afi, ‘ua latou vagavagai ‘iā Elisaia.” 2 Tupu‬ ‭6‬:‭17‬ ‭

Ina ua maea ona tatalaina e le Atua mata faaleagaga o le auauna a Elisaia, e mautinoa na vave ona mou atu lona fefe. Ona ole atu lea o Elisaia i le Atua ia faatauasoina fitafita a Suria, ona ia taitaia lea o i latou i le maota o le tupu. E lei faaaogaina e Elisaia se auupega pe na ia saisaia foi seisi o i latou, ua na o le fai lava iai e mulimuli ia te ia, ona ua faatauasoina i latou, o lea na latou mulimuli atu ai i le togalauapiga a le fili. Semanu e maumau uma o latou ola I lea aso pe ana lē taofia e Elisaia le tupu mai le fasiotia o i latou. Ua mafaia ona ia saisai i fitafita na auina mai e saisai ia te ia aua e mafai ona ia iloa atu I tua atu o mea e vaaia e mata. 

I le 1 Samuelu 17, sa sauaina Isaraelu e Koliata. Sa sauaina mo le 40 ao ma po, aua foi sa leai seisi i le malae o taua na pupula mata faaleagaga. O i latou uma, na tilotilo atu i se sauai malosi, peitai ina ua sau Tavita i le malae o le taua, na ia iloa atu se tagata ua faaumatia. Na faapea atu Tavita ia te ia,“a o a‘u, ‘ou te alu atu ‘iā te oe i le suafa o le ALI‘I o ‘au, o le Atua o le itūtau‘a a Isaraelu ‘ua e fāifai i ai. O le aso nei e tu‘uina mai ai oe e le ALI‘I i lo‘u lima, ‘ou te fasi ‘iā te oe, ma ‘ave ‘ese lou ulu; ‘ou te foa‘i atu fo‘i tino oti o ‘au a Filisitia i lenei aso i manu felelei ma manu fe‘ai e tata‘a; e iloa ai e le lalolagi uma, o i ai le Atua ‘iā Isaraelu.” (1 Samuelu‬ ‭17‬:‭45‬-‭46‬). 

Le au pele e, o mea e te vaai ma iloa atu i ou mata faaleagaga e mamao atu lona aafiaga, e fua iai pe ete ola faiaina pe e te ola o se tagata faatuatua manumalo. Afai ua tuuina atu lou ola ia Iesu Keriso, ia faaalu lou taimi e mafuta ai ma ia. Ao e faia, ou te tatalo ia tatala e le Atua ou mata faaleagaga, ou te tatalo ia siitia faaaliga mo oe, i le suafa o Iesu, Amene.  

OPEN HEAVENS

MATALA LE LAGI MO LE ASO TOFI 11 SETEMA 2025

(tusia e Pastor EA Adeboye)

Manatu Autu: Mata faaleagaga 1(Spiritual eyes 1 ).

Tauloto Tusi Paia –  Eperu 11:27  “O le fa‘atuatua na tu‘uina ai e ia o Aikupito, ‘ua lē fefe i le ita o le tupu; auā na fa‘amalosi o ia pei o sē iloa atu i le lē o va‘aia.”

‭‭

Faitauga - Tusi Paia: 2 Tupu 2:1-15

I aso e lua faatoa mavae atu nei, na ou talanoa atu i ituaiga e lua o mata e tolu o le tagata, mata o le tino ma mata o le mafaufau. O le asō, o le a ou talanoa atu i mata lona tolu, mata faaleagaga. O ou mata faaleagaga e avatu ai ia te oe le malosiaga e vaai ai i le itu o le agaga. 

Fai mai le 2 Tupu 2:9-10 “Ua uma ‘ona la sopo‘ia atu, ‘ona fai atu lea o Elia ‘iā Elisaia, “Fai mai ia pe se a se mea ‘ou te faia mo oe manū e le‘i ‘ave‘eseina a‘u ‘iā te oe.” ‘Ona fai mai ai lea o Elisaia, “‘Ia fa‘alua mai lou agaga ‘iā te a‘u.” ‘Ona fai atu ai lea o ia, “O le mea faigatā ‘ua e fai mai ai; ‘āfai ‘e te iloa mai a‘u pe a ‘ave‘eseina a‘u ‘iā te oe, ‘ona fa‘apea lea ‘iā te oe; ‘ae ‘āfai e leai, ‘ona lē fa‘apea lea.”

‭‭

I le fuaitau i luga, na ole atu Elisaia mo le faalua o le agaga sa ia Elia. Na tali mai Elia; ‘āfai ‘e te iloa mai a‘u pe a ‘ave‘eseina a‘u ‘iā te oe, ‘ona fa‘apea lea ‘iā te oe’. O le uiga o lana faamatalaga, ‘afai e mafai ona pupula ou mata faaleagaga e vaai atu i le itu i le agaga, e te maua le mea o loo e ole mai ai. Ina ua paū mai le afi mai le lagi, na iloa atu e Elisaia ona alaga lea, “Lo‘u tamā e, lo‘u tamā e, le kariota o Isaraelu ma ana ‘au e ti‘eti‘e i solofanua” (2 Tupu 2:12). E leiloa pe na faapea le Atua ‘ua pupula ou mata faaleagaga, avatu loa le mea o loo e ole mai ai’. A tatala ou mata faaleagaga, e tatala foi lou lumanai manuia. 

I le 2 Tupu 6:15-23, na siomia e le autau a Suria le fale o Elisaia ma na iloa atu e lana auauna, ona fefe ai lea. Na tamoe e logo Elisaia I le tulaga ua iai, ona tatalo lea o Elisaia i le Atua ia tatala ona mata faaleagaga. Ina ua uma na tatalo, na tatala e le Atua mata faaleagaga o le auauna, o ia sa fefe muamua ua liua i le lototele aua ua pupula ona mata faaleagaga. Fai mai le 2 Tupu 6:17, ‘‘Ona fa‘apupulaina lea e le ALI‘I o mata o le taule‘ale‘a, ‘ona iloa ai lea e ia, fa‘auta fo‘i, ‘ua tumu le mauga i solofanua ma kariota afi, ‘ua latou vagavagai ‘iā Elisaia.”

A tatala e le Atua ou mata faaleagaga, e mafai ona e iloa atu I tua atu o mea e vaaia e mata o le tino ma o le a e malamalama atu i le mana o le Atua o loo puipui ia te oe. Afai na faaaoga muamua oe e le Atua, e avea lea ma tulaga e faamalosia lou faatuatua ma fesoasoani ia te oe e faia isi galuega tetele mo lona malo. A fia tupu lea tulaga,e tatau ona e fanaufouina ma ia sili atu ona fafagaina lou agaga i lo lou tino. E faia lea i le tatalo, suesue ma manatunatu i le Upu a le Atua, anapogi, tapuai ma lou loto atoa faapea le mafuta faifaipea ma isi kerisiano faatuatua. 

Tatalo

Tamā, faamolemole ia tatala ou mata faaleagaga ina ia ou iloa atili lau afio, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 10 SETEMA 2025

(tusia e Pastor EA Adeboye)

Manatu Autu: Mata o le mafaufau (Mental eyes).

Tauloto Tusi Paia –  Faataoto 15:14 “O le loto o lē ‘ua mafaufau, ‘ua sā‘ili lea i le poto; a o gutu o ē vālelea ‘ua ‘a‘ai i le valea.”

Faitauga - Tusi Paia: Efeso 1:15-23

E ese mai mata o le tino, ou te talitonu o so’o se tagata e iai mata o le mafaufau, lea e taua i le Tusi Paia o mata o le loto. I le Efeso 1:18, fai mai Paulo,  “Ia fa‘apupulaina mata o ‘outou loto, ‘ina ‘ia ‘outou iloa le uiga o le fa‘amoemoe”. I nisi faaupuga, o loo ia faapea mai, ‘ou te tatalo ia tatala mata o lou loto’. 

O mata o lou loto e matua taua. E tusa ai ma le Teuteronome 1:13, o le iloa, o se tasi lea o tapulaa manaomia i so’o se taitai. O lea, o le avea ma taitai lelei, e tatau ona e maua le iloa ma pupula lelei mata o lou loto. O le mafuaaga lea na ole atu ai Solomona i le Atua mo le loto matala e taitaia ona tagata. (1 Tupu 3:9). O le tulaga lea o mata i le loto, e manino lelei ai le eseesega o tagata ua aoaoina lelei, feololo le aoaoina ma i latou e lē aoaoina. 

Sa ou galue o se faiaoga i se aoga tulaga lua a tama i se vaega i Sauté i Sasae i Nigeria, ao lei amata lau aoga mo se faailoga. I na aso, e 40 vasega e faia i le vaiaso, ma sa faatulaga mai ou te faia vasega e 36 i le vaiaso. Sa ma galulue faatasi  ma se faiaoga na iu mai se Iunivesite e na o le 23 vasega na te faia i le vaiaso peitai e tomumu lava ma faapea mai, ua matua tele naua ana galuega o loo faia. O lo’u totogi e 15 pauni i le masina ao ia e 60 pauni i le masina. Sa faateia a’u I lana faaseā aua o lona totogi e faafaina lo’u totogi, e ui e laiti atu le aofai o vasega o loo ia faia. E iai se aso na ou fesili ai ia te ia, ‘Aisea e te faaseā ai? E laiti atu le aofai o vasega o loo e faia’. Na tali mai e faapea: ‘e lē o totogiina au mo le galuega o loo ou faia i le taimi nei, o loo totogi au mo galuega na ou faia e faaaoga ai le mafaufau i aso ua tuanai’. O lo’u iloa ma le malamalama e lē mafai ona faatusaina a’u ia te ia aua foi e na o le tusipasi mai aoga tulagalua lo’u faailoga, ao ia, o le faailoga mai le Iunivesite,  ma o le mafuaaga lea e eseese ai ma totogi, ona e fua i le maualuga o le iloa. 

Afai e te fia manuia, e tatau ona matala ou mata o le loto. E tatau ona e aoaoina ma faataitai i mea fou ina ia siitia tulaga e ausia. Fai mai se tasi o tamaloa mauoa, o le tele o mea e te iloa o le tele foi lea o tupe e te maua. Ae fai mai seisi tagata, o tagata faitau tusi o tagata taitai ia. O i latou e avea ma tagata e siitia mea silisili, e latou te faatauaina le aoaoina pea i lo mea faafiafia, ma è saili ia aoaoina pea. O le aso e te filifili ai ua le toe iai se mea e toe aoaoina ai oe, e amata ai loa ona leaga ma puaoa ou mata o le loto. Le au pele e, o le siitia o vaega e aoaoina ai oe, o le siitia foi lena ona maua e ou mata o le loto le malamalama. O lea, fai sau filifiliga ina ia aua lava nei taofia le aoaoina pea o lou tagata, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 9 SETEMA 2025

(tusia e Pastor EA Adeboye)

Manatu Autu: Ou fofoga (Your eyes).

Tauloto –  Salamo 101:3 “Ou te lē tu‘u i o‘u luma se mea leaga; ‘ou te ‘ino‘ino i le amio a ē liliu ‘ese, e le pipi‘i mai lea ‘iā te a‘u.”

Faitauga - Tusi Paia: Mataio 6:22-23

Ou te talitonu o tagata soifua, e tolu ituaiga mata poo fofoga o iai latou: mata o le tino, mata o le mafaufau ma mata faaleagaga. I aso o lumanai nei, o le a ou faatalanoaina ia ituaiga mata.

O mata o le tino o mata e lua ia e te faaaogaina e vaai ma iloa tino ai se mea, faapea le lalolagi o siomia oe. E tusa ma le faitauga o le Tusi Pa’ia o le aso, o mata o le malamalama o le tino ma e sili ona taua, ma sa faamaloloina e Iesu tagata tauaso uma na o mai ia te ia ma ole mai e fia pupula, I le amataga o lana galuega faamisiona. I le mataupu a Patimaio, sa fetalai Iesu I lana upu, ma o lana upu sa maua ai ona mata fou e lua. (Mareko 10: 46-52). O le tamaloa o loo ta’ua I le tusi o Ioane 9:1-8, sa ia tatala le faauuga i le palapala, mai lea palapala, na ia faia ai ni mata fou se lua. I le tusi o Mareko 8:22-26 sa ia pa’i faalua I se tagata tauaso. O le taimi muamua sa ia pa’i ai ia te ia, fai mai le tamaloa sa ia vaai atu i tagata e pei ni la’au. E lei lava lea mo Iesu, o lea sa ia toe pa’i atu ai ia te ia. 

A e faitau I afioga paia a le Atua, e te silafia ai e pau lea o le taimi sa pa’i faalua ai Iesu i se tagata mo lona faamalologa. Ou te mautinoa na faia e Iesu e faailoa mai ai, le taua o mata o le tino. Afai o faitau e se tasi lenei lesona ae e lē o atoatoa lau vaai, ou te folafolaina atu, ia pa’i atu le Atua ia te oe i le asō, i le suafa o Iesu Keriso. 

Ona o ou mata o le tino o le malamalama lea o lou tino atoa, o mea e te vaai iai e fua iai le tulaga o lou tino atoa. A fai e te mana’o e faatumuina lou tino i le malamalama, e lē tatau ona e vaai i mea mai le malo o le pogisa. E te lē matamata i ata tifaga ma isi ata e tatau ona tapu, e ono tapeina ai le  malamalama i totonu ia te oe ma e soifua ai loa I le pogisa. O loo naunau Satani i ou mata aua e na te iloa, a mafai ona ia faapogisaina ou mata, ua ia manumalo e faapogisaina lou tino, le malumalu o le Atua. ‘Aua e te faatagaina Satani e manumalo ia te oe; liliu ese ou fofoga mai mea e aumaia le pogisa ia te oe. Ia mamao ‘outou mai mea leaga ‘ese‘ese uma lava (1 Tesalonia 5:22).

O Samasoni o se tagata sa maoa’e le fesoasoani a le Atua iai, sa faaaogaina e le Atua e ausia ai ni tulaga matautia. Peitai, o le taimi lava na amata ai ona pupula I mea le talafeagai, ua ia tatalaina o ia e osofaia e le fili. Na aveeseinae le fili ona mata, ma ua paū atu I le pogisa ona o lona faatamala I ona mata (Faamasino 14 -16). Le ‘au pele, ia e faaeteete lava i mea e te pupula ma vaai iai, ma ‘aua nei e tuuina atu se avanoa i le fili e te paū atu ai i le pogisa. ‘Aua e te tuu avanoa i mea e te ono paū atu ai i le pogisa, i le suafa o Iesu, Amene.