Samoan Devotional

OPEN HEAVENS

MATALA LE LAGI MO LE ASO FARAILE 29 AOKUSO 2025

(tusia e Pastor EA Adeboye)

Manatu Autu: E leai se mataupu ua leai se faamoemoe (No case is hopeless)

Tauloto –  Kenese 18:14'E i ai ‘ea se mea e faigatā i le ALI‘I? O ona pō ‘ua tu‘upoina ‘ou te toe fo‘i mai ai ‘iā te oe, i lelā tausaga, e maua mai ai e Sara, le tama tane.’

Faitauga - Tusi Paia: Ieremia 32:26-27  

I ni tausaga ua tuanai, sa iai se fafine sa faaipoipo atu i se tamaloa milionea, peitai e pā. Sa saili e lenei ulugalii se fofo ma e tele tupe na faaaluina peitai e leai se suiga poo se tali. E iai se aso na fai ai iai se tasi o le aiga o lona toalua e aua le maimauina la tupe aua ua faoa e taulaitu lona toala fanau (tulou) ma e lē maua sana tama. Na sau lenei fafine i se tasi o matou sauniga o le Agaga Paia, ona fetalai lea o le Atua, ‘e iai se tagata iinei faatoa  uma ona logoina o ia e leai se toala fanau. Aua e te popole aua o le a ou foai atu se masaga’. E lei leva ae tō lenei fafine. I le falemai ao faia ana siaki, na faapea mai le fomai, ‘e foliga mai o loo iai se pepe’. Na tali lea fafine, ‘leai e lē tasi le pepe, na folafola e le Atua ia te au se masaga”. Na tali mai le fomai, ‘ e tatau ona e faafetai i le Atua o lena ua iai se pepe tusa pe tasi’. Na toe foi lenei fafine mo seisi siaki ina ua mavae le tolu masina, ona faapea mai lea o le fomai, ‘ e lua pepe lea ua iai’. Ina ua oo i le taimi e fanau ai, sa avatu e ola i se falemai pito lelei ma taugata i se atunuu i fafo, ma na ia talosaga e taoto e aumai pepe i fafo. Ina ua aumai pepe i fafo, na saili e le fomai le toala fanau i totonu o le fafine ae e lē maua. Ina ua tea le malosi o le vaimoe ma ua ala mai le fafine, na sau le fomai ma fai atu ia te ia, ‘e silia ma le 3000 taotoga ua ia faia. O le taimi muamua lenei ua ou aumaia ai se masaga mai se fafine e leai se toala fanau’. 

Fai mai le Mareko 10:27 ‘ A ua silasila atu Iesu ia te i latou ua faapea atu, ‘E le mafaia e tagata, na o le Atua, aua e mafaia mea uma e le Atua’

Le au pele e, e le afaina pe toafia tagata ua fai atu ua leai se faamoemoe i mataupu lē lelei i lou olaga, o loo iai pea le faamoemoe  o lau mataupu. A fai atu tagata ua leai se faamoemoe o lau mataupu, ua faia latou faamatalaga aua latou te lē iloa, o le Atua, e mafai ona feliuaina lau mataupu faigata. O le tulaga pā o Elisapeta na foliga mai o se mataupu ua leai se faamoemoe, seia oo ina auina mai e le Atua le agelu e talanoa ma lana tane o Sakaria (Luka 1:5-25). A lau atu lou pā e le lalolagi ma faapea mai ua leai se faamoemoe o lau mataupu, i le suafa e sili i suafa uma lava, e asiasi atu le Atua ia te oe ma suia le talaaga o lou olaga. Afai o loo e tagi pea i le faanoanoa, o le a e tagi nei i le olioli, i le suafa o Iesu. Aua e te faavaivai, tuu lou faatuatua i le Atua. E leai se mataupu ua leai se faamoemoe pe afai e tuu lou faatuatua i le Atua, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 28 AOKUSO 2025

(tusia e Pastor EA Adeboye)

Manatu Autu: Fofo e faavavau(Everlasting solution )

Tauloto –  Luka 1: 37 'Auā e leai lava se mea e tasi e lē mafaia e le Atua.’

Faitauga - Tusi Paia: Galuega 3:1-11.   

E iai lava vaega e faapea tagata oni faafitauli ua tausagā. O faafitauli nei ua umi tele ona iai ua foliga mai ua leai se fofo. Ou te fia faailoa atu ia te oe Lē e matua atu i le tagata pito matua. O ia o le Fofō e faavavau’ o soo se faafitauli ua umi tele ona iai, aua foi sa iai o ia mai le amataga ae lei tulai mai ni faafitauli. 

O loo taua i le faitauga o le Tusi Paia o Le asō se tamaloa na fanau mai o pipili, ua e iloa o se faafitauli ua umi ona iai ae leai seisi na mafai ona fofoina. Ao o atu Peteru ma Ioane i le malumalu, na ole atu lenei pipili iai laua mo se tupe. Na faapea atu iai Peteru, ‘ e lē o ia tei maua se auro poo se ario, ae ou te tuuina atu le mea o loo ia te au’. Ona ia faapea atu lea, ‘ i le suafa o Iesu Keriso o Nasareta, tu i luga ma savali’. Na faafuasei ona vaaia, le tamaloa e lei savali i le olaga atoa, ua amata ona savali, osooso ma vivii i le Atua. Fai mai le Tusi Paia ina ua ia ulufale atu i le malumalu, na tilotilo iai tagata ma le ofo aua foi o loo latou iloa na fanau mai e pipili, ae leai ma seisi o i latou na manatu e iai se fofo o lona faafitauli. 

I le Mareko 5:2-19, ua tatou faitau i se tamaloa e faaletonu le mafaufau e nofo i le fanuatanu. Ua umi se taimi o faaletonu lona mafaufau, sa iloa o ia e tagata uma, e foliga mai o se faafitauli e leai se fofo. Ona ia fetaiai lea ma Iesu Keriso, ma è tasi lava le Upu na faia e Iesu, ona faasaolotoina lea. Ina ua vaaia e tagata o lea nuu atoa le tamaloa sa faaletonu le mafaufau, ua nofo lelei, lelei ona lavalava ma ua tonu lona mafaufau, ona latou fefefe ai lea. Na afio mai le ‘Fofo e faavavau’ ma ua ia aumaia se fofō vave i le faaletonu o le mafaufau ua leva tele. E faapena foi i le Ioane 5:1-9, o le tamaloa pipili mo le 38 tausaga. O lenei tamaloa sa iai lona nofoaga tumau i tafatafa o le vaieli i Petesa ma o soo se taimi na sau ai le agelu e gaepu le vai, e na te misia lava lona avanoa e malolo ai. Peitai ina ua fetaiai lona faafitauli tumau i le ‘Fofo e faavavau’, na vave ona aveesea. 

Le au pele e, afai o e fetaiai ma ni faafitauli ua umi se taimi e leai se fofo, ua na o Iesu e te manaomia. O ia o le ‘Fofo Faavavau’ I soo se faafitauli ua leva tele, ma è finagalo o ia e faamuta uma soo se faafitauli o loo feagai ma oe, pe a maea ona lafoai moni lou ola ia te ia. 

Tatalo

Le Alii e, Iesu, faamolemole asiasi mai ia te au i le asō ma faamuta lenei faafitauli tumau i lou olaga, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 27 AOKUSO 2025

(tusia e Pastor EA Adeboye)

Manatu Autu: E lē fa‘ailogaina ni tagata (No respecter of persons)

Tauloto –  Roma 2:11 'Auā e lē fa‘ailogaina e le Atua ni tagata.'

Faitauga - Tusi Paia: Mataio 8:5-13

E lē faailogaina e le Atua ni tagata (Galuega 10:34), o soo se mea ua ia faia i seisi tagata, e mafai ona ia faia mo oe. Mo se faataitaiga, i le 1 Tupu 17:8-16, sa iai se fafine ua oti lana tane ua toe o se aiga meaai e tasi o totoe. Na asiasi le Atua ia te ia, ma na lava lana meaai lea e tasi mo le tolu tausaga. I le 2 Tupu 4:1-7, sa iai foi seisi fafine ua oti lana tane sa totoe na o sina suauu i le fagu. Na galue le Atua ia te ia, ma na faateleina le suauu seia oo ina tele ma lava e totogiina uma ai aitalafu ma ola manuia ai mo lona olaga. A e vaai i le Atua ua ia faia se mea i se tasi tagata o loo e manao iai, ia avea lena ma auala e faamautuina ai ia te oe e mafai ona ia faia  mo oe. A e tau ane i se ituaiga vavega i le Tusi Paia o loo e manao foi iai, ia e fiafia aua o loo agai mai lau vavega. Afai lava o i latou o fanau a le Atua, e le faailoga tagata le Atua, e pau le tulaga e finagalo iai o ia ia e faatuatua, aua e mafaia mea uma iai latou e faatuatua (Mareko 9:23). O le Atua o le Atua o poloaiga, ma o soo se tagata e mulimuli i ana poloaiga ma faatuatua ia te ia, e na te maua lona agalelei ma le mana. 

Sa lē mafai e Iesu ona faia ni vavega i lona nuu ona o le lē faatuatua o tagata (Mataio 13:58). E ui o tagata o lona nuu, a leai se faatuatua, e le mafai ona maua vavega. O le lē talitonu ma le lē faatuatua e tapunia faitotoa o vavega iai latou, ma o Iesu o loo iai Agaga Paia auā e lē foa‘i fa‘atatauina le Agaga e le Atua(Ioane 3:34), ua na ia faamalolo na o ni nai tagata mamai (Mareko 6:5). Tusa poo le a lou latalata i le Atua, a e le faatuatua, e te ono taofia nisi o mea e mafai ona ia faia i lou olaga e tauala ia te oe. 

A maua ese tagata le faatuatua, e le afaina le atunuu e sau ai, lona mafai poo le tulaga, e mafai ona ia maua ni vavega. Ao iai Iesu i le lalolagi, ao maliliu le au Iutaia i latou ma’i ona o le lē faatuatua, o nisi o tagata nuu ese sa fiafia i vavega ofoofogia na latou maua. O le taitai o le toaselau i le faitauga mai le Tusi Paia o le aso o se faataitaiga lelei lea o se tagata o nuu ese na avea lona faatuatua e maua ai vavega. Na ia malamalama o le mamao e le o se pa puipui pe afai e iai le faatuatua, ma sa matua ofo Iesu i le tele o lona faatuatua. 

Le au pele e, afai e iai lou faatuatua I le Atua I se vavega ua e vaai iai pe faitau ai foi, e mafai e le Atua ona ia faia foi i lou olaga. E le afaina poo le a le leaga o lou tulaga poo le matuia o le faalavelave o loo siomia oe, a e faatuatua, e te vaai i le galue mai o le mana o le Atua. E le faailoga tagata le Atua. E na te faailogaina ma tali tau lava o ana poloaiga ma lo tatou faatuatua, i le suafa o Iesu, Amene. 

OPEN HEAVENS

MATALA LE LAGI MO LE ASO LUA  26AOKUSO 2025

(tusia e Pastor EA Adeboye)

Manatu Autu: Ofoofogia 2 (Wonderful 2)

Tauloto -Tusi Paia–Esoto 15:11 “Le ALI‘I e, o ai ‘ea sē ‘ua tusa ma oe i le vao atua? O ai sē ‘ua tusa ma oe, o lē silisili ‘ona pa‘ia, o lē mata‘utia i vi‘iga, o lē fai vāvega?”

‭‭

Faitauga – Tusi Paia –Psalms 77:13-20

I le Tanielu 6:27, na faapea mai le tupu, ‘e leai seisi Atua e pei o le Atua o Tanielu, o lē na faasaoina o ia mai le lua o leona, e na te faia vavega ofoofogia’. Na pepese Mose ma le fanauga a Isaraelu i Upu o le tauloto mai le Tusi Paia o le asō, e tautino ai vavega ofoofogia a le Atua ina ua ia laveai i latou mai le au Aikupito. Sa ave e malolo i luma o le sami ulaula, ae na tuliloa i latou e le autau matautia a Aikupito e toe ave e fai ma pologa. Ua leiloa poo fea latou te sulu iai, peitai na faatonu  e le Atua Mose e faaloaloa lona tootoo i luga o le sami, ona faafuaseia lea ona vaeluaina ma ua mafai ona savavali i le eleeele matutū i leisi itu. Ua taunuu i leisi itu ma tilotilo mai i latou i tua ma iloa le autau a Aikupito sa tuliloa atu i latou, ua malelemo i le sami e tasi lea na vaeluaina mo i latou. Ana e iai i lea aso, e le tau faiatu seisi ia te oe o le Atua o le Atua faivavega ofoofogia. 

E faia e le Atua mea e ofo ai tagata. Sa ou malaga i se atunuu i fafo, ma ina ua ou taunuu atu i le malae vaalele, ou te lei vaai atu i se tasi o ou atalii na ou manatu e iai ma i latou na faatalia a’u. Na ou fesili mo ia ae fai mai o loo i le falemai o loo faatalitali le taimi e oti ai. Ua ou faapea atu, ‘tatou afe atu i le falemai’. Ina ua matou taunuu atu, na ave i matou i se potu o loo tuu ai tagata o loo faatalitali oti. O tagata mamai e ave i totonu o le potu lea, e le toe foi mai i fafo o soifua. O lo’u atalii e iai se mai, o le fua o le siama PSA e 4000. O le tulaga masani o le PSA i le tino o le tagata e 10, a oo atu i le 100,  e tele le avanoa e maua ai i le kanesa, ae a oo atu i le 300, ua lē toe aoga iai se togafiti. I le atunuu lea, e faasā ona e tatalo mo se tagata seiloga e faataga mai. E ui e toatele tagata na iai i lea potu, na ou tatalo tau lava o lo’u atalii ona ou alu ese lea. O le aso Toonai na tupu ai, e oo atu i le aso Lulu na sosoo ai, ua tea I tua ma le falemai. Peitai o le tulaga ofoofogia, o tagata uma na iai i lea potu ina ua ou alu atu, na tetea uma I tua ma le falemai i lea aso.

Le au pele e, afai o loo e faitau i lenei faamalosiau ae ua fai atu le lalolagi ua lē toe iai se faamoemoe i lou olaga, o le Atua o vavega ofoofogia e faateia ai i latou, i le suafa o Iesu. Valaau i le Atua o vavega ofoofogia e na te liliuina soo se vaega i lou olaga poo olaga foi o i latou i lou siomaga i le asō, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 25 AOKUSO 2025

(tusia e Pastor EA Adeboye)

Manatu Autu: Ofoofogia 1 (Wonderful 1)

Tauloto -Tusi Paia–Isaia 25:1 “Le ALI‘I e, o lo‘u Atua lava oe; ‘ou te fa‘ane‘ene‘e ‘iā te oe; ‘ou te vivi‘i atu i lou suafa; auā ‘ua e faia mea e ofo ai; o mea na e pule ai talu anamua e fa‘amaoni ia, e moni lava.”

‭‭

Faitauga – Tusi Paia –Ioane 11:38-45

Ofoofogia o lona uiga o mea e te ofo ai. O le Atua e ofoofogia ma silisili, ua faaigoa o ia e le Tusi Paia o le ‘Silisili Ese’ (Isaia 9:6). 

I ni tausaga e tele talu ai, sa ou malaga mai i Ilorin i Nigeria i Sisifo, na ou ui mai I se auala laupapa va itiiti e lē mafai ona ofi ai ni taavale se lua. Sa iai se faasino auala o loo tusia ai, ‘auala laupapa va itiiti o loo i luma atu’, a iloa atu e se ave taavale se taavale o sau mai leisi itu ona tu lea ma faatali sei pasi lea taavale. I lea aso, ua ma i luga o le auala laupapa i la’u taavale, ae vaaia loa se taavale ua lē tu i lei si itu ae ua sau sao i luga  o Le auala laupapa ma le saosaoa. Sa tatau ona tū ae ua lē tu. E tatau ona fetoai taavale, ae ua leai se taimi e tatalo ai, ua na o le alaga leotele, ‘Iesu’. Ua matou fetaui i le ogatotonu o le auala laupapa ma ua mafai ona fepasiai taavale. E ma te oo atu i le isi itu, ua matua luluina le tino o la’u ave taavale pei se i’a o le papau ao ia faatuina le taavale. E to’a ane le avetaavale, ua tau maua foi sou to’a. Ua faliu mai ma faapea mai, ‘Lo’u tama e, o le a le mea lea na tupu?’. Ua ou tali atu, ‘Na faalautele e le Atua le auala laupapa’. Ao faaauau le ma faigamalaga, ua le mapu le faapea, ‘ofoofogia!’, ma ua ou faapea atu ia te ia, ‘o lona suafa lena’. 

O mea uma e faatatau i le Atua e ofoofogia ma Silisili Ese. O galuega a ona lima o ni vavega (Salamo 107:8). Na ia faia le lagi ma le lalolagi i le nā o le ono aso. O loo tusia i le Salamo 40:5, e tele lava mea ‘ua ia faia, e lē mafaitaulia lava. O mea e ofo ai ana tulafono (Salamo 119:129). Na ia vaeluaina le sami ulaula (Esoto 14:21-22) ma solo i lalo le pā I Ieriko (Iosua 6:20). O lona poto e silisili ese (Salamo 139:6), e maeu lona faautauta ma sili lona poto (Isaia 28:29), e lē mafai ona e maua seisi e sili atu lana faufautua i lo le Atua Silisili Ese. Tusa pe o lana faautautaga e valea i le mafaufau a le tagata, e lē mafaitaulia lona poto e sili atu i le poto o le tagata (1 Korinito 1:25). 

O lo’u Atua e ofoofogia e faia mea ofoofogia. Ou te tatalo mo oe i le asō, e te tofo i lona ofoofogia ma le Silisili Ese ae lei maea lenei tausaga. Ina ua toetu mai Lasalo mai le oti i le maea ai o aso e fa i le tuugamau, o se mea ofoofogia. E asiasi atu lo’u Atua e ofoofogia i so’o se mea ua leai se ola i lou olaga ina ia e maua se mea ofooofogia, i le suafa o Iesu. 

Tatalo

Tamā, faamolemole aapa mai ou aao Silisili Ese ia te au, ina ia ou tofo i se tulaga ofoofogia, i le suafa o Iesu, Amene. 

‭‭

OPEN HEAVENS

MATALA LE LAGI MO LE ASO SA 25 AOKUSO 2025

(tusia e Pastor EA Adeboye)

Manatu Autu: Aua Ne’i Matūtū (Don’t Be Empty)

Tauloto -Tusi Paia–Efeso 5:18 “Aua fo‘i ne‘i ‘onā ‘outou i le uaina, o le mea e ulavale ai; a ‘ia fa‘atumuina ‘outou i le Agaga.”

‭‭

Faitauga – Tusi Paia –Galuega 19:12-16

I nai vaiaso ua mavae, sa ou tāua ai I lenei faamalosi faasolo, afai e mafai ona fa’atumulia I le Agaga Paia, e mafai fo’i ona gaogao ma matūtū. Peita’i e le finagalo le Alii e fo’ifua lana fanau. I le 1 Samuelu 16;1; na fetalai le Atua ia Samuelu, “Tula’i ia ina faatumu lau fagu nifo I lenei suāu’u.” O lona uiga sa leai se mea I le fagu ma ua manaomia ona toe faatumu. 

I le 1 Samuelu 16:14; ina ua uma ona fa’au’u Tavita e fai ma tupu, na alu ese le Agaga o le Alii mai iā Saulo, ma e talu ai e lē tatau ona i ai se avanoa, i le natura o mea, o lea na osofaia ai Saulo e le agaga leaga. O le matūtū poo le leai o Agaga Paia o se tulaga mata’utia; o lea la e tatau lava ona e aloese mai soosemea e ono tupu ai le gaogao fa’aleagaga. Ou te tatalo ia aua ne’i e aunoa ma Agaga Paia, i le suafa o Iesu. 

I tausaga ua mavae sa i ai se mea na tupu i se nuu o le taulaga i Ogun State, Nigeria. Sa i ai se fe’ese’esea’iga laititi i le va o tagata o le aulotu I le nuu lea ma ni tagata faataulaitu, ma i’u ina manatu ai le au faataulaitu e tu’u se faatusa o le tiapolo i luma o le falesa a le aulotu lea. Ina ua iloa ma maua lea faatusa, na faatama’ia e se tasi o o’u atalii fa’aleagaga i se pelu. Pe ana fai e gaogao o ia fa’aleagaga semanu e oti lava i le taimi lea. Ona manatu lea o tagata faataulaitu e omai i le falesa e fai se misa. Ina ua ulufale se tasi o i latou i le falesa, e la’a mai i totonu ae tifa. E toe la’a mai ae palasi. Le au pele e, o loo fealualua’i solo le tiapolo e saili se tasi e aina e ia (1 Peteru 5:8). O lea ina ia e manumalō i le tiapolo, e ao ona fa’atumulia oe e Agaga Paia i taimi uma. Po o le a le taumafai malosi mai o le fili, e te manumalō lava pea, i taimi uma. O atalii e toafitu o Seva o loo tāua i le tusi faitau o le asō o ni uso matūtū pe leai se Agaga Paia. Sa mananao e tutuli temoni ma manatu latou te mafaia ona fai pe a o latou faatonu le tiapolo e alu ese i le suafa o Iesu, o loo talaiina e Paulo. Sa o atu i latou i luma o le tagata na ulutinoina e le tiapolo e aunoa ma se faauuga, ma na faamāina i latou. O tagata e manatu latou te mafaia ona faataitai galuega mamana e aunoa ma le totogiina o le tau talafeagai ua o latou tuu I latou lava i le leaga. O lē aunoa ma le mana o le Atua ma lona mamalu, o se tulaga ogaoga mata’utia auā o agaga leaga o loo latou suea i taimi uma ni nofoaga gaogao e nonofo ai (Mataio 12:43-45). 

Aua fo’i ne’i tuuina atu e outou se mea e mautu ai le tiapolo; aua ne’i faatagaina agaga leaga e pulea lou tagata. Fa’amautinoa e fa’atumulia oe e Agaga Paia i taimi uma ina ia mafai ai ona e ola i le manumalō. E ao ona e tumu i le Agaga Paia i taimi uma. E mata’utia le leaga o le matūtū fa’aleagaga. I le suafa o Iesu Amene.

OPEN HEAVENS

MATALA LE LAGI MO LE ASO TOONAI 23 AOKUSO 2025

(tusia e Pastor EA Adeboye)

Manatu Autu: O Se Atua Tele Nauā (A Very Big God)

Tauloto -Tusi Paia–Salamo 147:5 “E silisili lava lo tatou Ali‘i, e tele lona malosi; e lē ma fa‘amatalaina lona poto.”

‭‭

Faitauga – Tusi Paia –Isaia 40:18-28

I le Isaia 66:1; na fetalai le Atua, “O Le Lagi o lo’u nofoalii lea, ma o le Lalolagi o le mea e tu ai o’u vae lea.” Fai mai fo’i Teuterenome 33,27; o ona aao e faavavau. O lo tatou Atua o se Atua tele nauā, peita’i na te mafaia ona faaitiitia ia lava, ia mafai ai ona afio i lou loto. Fai mai 1 Ioane 4;4; e sili atu le o ia te oe nai loo le o i le lalolagi. O le Atua e tele, e lē ma fa’amatalaina ma e mafai ona Ia fo’ia soose faafitauli e ala i sana fetalaiga. A Ia fetalai i se upu ia te oe, o le a suia lou olaga e lē toe tutusa. E leai se tagata, faafitauli poo se tulaga tutupu e tutusa ma le mata’utia o le Atua Silisiliese.

 I le tausaga 1987 sa tupu ai se tulaga uiga ese i se tasi o faifeau o le ekalesia. Sa galue o ia i le gaosiina o fasimoli ma o le tasi Aso Toonai, ona e le faigaluega i Aso Sa, sa manatu ai e tapena uma ana galuega mo le Aso Gafua ina ua manava uma tagata faigaluega ma o i o latou aiga. A’o ia tuufaatasia ni vailaau na pau o ia i lalo ma masaa atu ai se apa o i ai vailaau oona i luga o ona foliga. Na faataio le uso i le matuitui o le tiga o ona foliga ma ona mata ua mu i le vailaau peita’i e leai ma se tasi na latalata ifo sei maua ai se fesoasoani. Mulimuli ane, na ui ane se tasi i talaane o le falegaosi oloa lenei ma iloa ifo le faitoto’a o matala, na ulufale i totonu ma iloa ai le uso o taatia i luga o le eleele o loo oi i le tiga. Na ave faanatinati lenei alii i le falema, ma ina ua uma ona vaai o ia e le fomai ma togafiti ona foliga, na fai i ai le fomai ua leaga ona mata ma ua po lana vaai. Na faapea mai le faifeau, “Oi, o le vaaiga lena a le fomai, ave a’u i le Aai o le Togiola se’i o’u faalogo i le lipoti a Iesu.” Ina ua o latou aumai le uso ia te a’u, na lūlūina moni lava lo’u faatuatua ina ua o’u vaai i foliga o le uso. Peita’i o loo tatou auauna i se Atua tele e lē suia lona finagalo i mea e manatu ai le tagata; e mafaia mea uma e le Atua (Mataio 19:26). Sa amata ona o’u tatalo, “Tamā e leai se mea e te lē mafaia ona fai. Faamalolō i mata o lou atalii. Avatu ia te ia ni mata fou.” O le asō, o le tagata na fai mai fomai e le toe pupula, e le gata o loo pupula pea, a o loo faitau lana Tusi Paia e aunoa ma se vaaiga faitau tusi. 

Le au pele e, poo le a se faaletonu matuiā o ni tulaga e ono o’o i ai lou soifua, aua le atuatuvale. Faailoa i le tatou Atua e silisili le malosi auā na te mafaia ona fo’ia uma faaletonu. Ou te tatalo ia faaali atu e le Atua lava Ia lona tele ma lona malosi ma feliuaina faaletonu e ono tutupu i lou olaga ma suia i le lelei i le suafa o Iesu. Amene.

OPEN HEAVENS

MATALA LE LAGI MO LE ASO FARAILE 22 AOKUSO 2025

(tusia e Pastor EA Adeboye)

Manatu Autu: O itu e lua o le tupe siliva (Two sides of a coin)

Tauloto -Tusi Paia–Salamo 119:105 “O lau afioga o le sulu lea i o‘u vae, ma le malamalama i lo‘u ala.”

‭‭

Faitauga – Tusi Paia –Filipi 2:12-13

E tele tulaga i le olaga e lua itu e matua eseese lava, e pei lava o itu e lua o le tupe siliva. Mo se faataitaiga, e iai le la ma le masina, o le alii ma le tamaitai.  E lua foi itu o le Atua. Fai mai le 1 Ioane 4:8 o Ia o le alofa, peitai e fai mai foi le Eperu 12:29, o Ia o le afi maamaai. 

O le Atua e ofoofogia, e tele mea e faamaonia ai lea tulaga. O ia o le tamai mamoe ma o ia foi o le leona. A e talanoa mai i le tamai mamoe, e vave ona e mafaufau i se tamai mamoe itiiti e te fia tago atu e opo mai, ae a e talanoa mai i se leona, o se manu e lē taalo pe latalata iai se tagata. O loo faapea mai foi le Tusi Paia, o le Atua o le la ma o se talitā (Salamo 84:11). O le lā e matua vevela e tamomoe ese tagata mai ai, peitai o le talitā e puipui i tagata ina ia latou saogalemu. E tatou te iloa foi le Atua o le Alefa ma le Omeka (Faaaliga 1:8). O ia o le amataga ma le gataaga, o le muamua ma le mulimuli (Faaaliga 22:13). Ao ia amataina nisi mea, o loo ia faaiuina isi mea. O ia o Lē mafai ona faamanuia i se aiga i se pepe fou ma tulai faamaoni i tafatafa o se tagata faatuatua ae to loa lana manava. O le Atua lava e tasi e alofa mutimutivale (Salamo 103:8) e faapena foi ona matautia (Teuteronome 7:21). O lo tatou Atua e faigata ma e lē gafatia e tatou mafaufau ona malamalama ai. 

O le lua mafutaga ma le Atua, e lua foi itu, o le itu a le Atua ma lau itu. A’o e talia le faaolataga i le fefe ma le gatete, e galue ia te oe ia e loto i mea e finagalo malie iai o ia ( Filipi 2:13). Afai e te faapea mai ona o loo ia galue ia te oe, e mafai ona e faia pea le agasala, ma manatu e faatele pea lona alofa tunoa, e na te taofia ma teena lea itu (Roma 6:1-2). Ioe, e finagalo o ia ia lua mafuta ma ia i lou fale tele i le lagi (Ioane 14:2-3), peitai a lē faia lau vaega e maua ai le faletele, e te iu i seoli. Ou te ioe na auina mai e Iesu le alofa tunoa (Ioane 1:17): peitai i le fuaitau e tasi, o loo faapea mai na ia aumaia le Upu moni. A e teena le Upu moni, e faamama ma taitaia oe e ola paia (Ioane 17:17), o Lona uiga e te lē fiafia i lona alofa tunoa. 

Le au pele e, o le itu o le Atua o loo e vaaia ma tofo iai, e fua i mea e te faia ma mea e te lē faia. Savali I lana Upu moni ma usitai i ana poloaiga, ona e ola ma soifua lea i le faulai o lona agalelei ma le alofa mutimutivale i lou olaga, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 21 AOKUSO 2025

(tusia e Pastor EA Adeboye)

Manatu Autu: E lē mafai e tekonolosi ona aoaoina i latou (Technology cannot train them)

Tauloto -Tusi Paia–Faataoto 22:6 “A‘oa‘o ia i le tama e tusa ma lona ala; a o‘o ‘ina toeaina lava o ia, e le te‘a ‘ese ai.”

‭‭

Faitauga – Tusi Paia –Faataoto 29:15

Faafetai i le Atua e mafai ona oo atu le talalelei i le toatele o tagata e ala i upega tafailagi ma le tele o ala o fesootaiga. Peitai, e pei a ona tatou talai atu le Talalelei e faaaogaina ai tekonolosi, o loo faaaogaina foi e le tiapolo metotia e tasi e oo atu ai i tagata e aofia ai tamaiti. E toatele tamaiti ua latou matamata i vaega e iai ata leaga e ala i telefoni ma isi, ma o tagata o loo faia faiga matagā i tamaiti, e fiafia e faatosina mai tamaiti i faigauō ma amioga  matagā e ala i upega tafailagi. O le mafuaaga lea, e lē tatau ai ona faalagolago tasi matua i tekonolosi i le aoaoina o latou fanau. 

Ao ou laitiiti, sa leai ni masini komepiuta poo masini faaopoopo, e faaaoga le mafaufau pe a fai le numera. O aso nei, o le toatele o talavou ua le mafai ona faaopoopo se faatau seiloga e faaaoga le masini faaopoopo. Afai o oe o se matua, aoao lau fanau ia aua nei faalagolago tele i tekonolosi. A’oa’o i latou ia latou faia ni galuega e i latou lava ina ia faalautele ai lo latou iloa. O nei aso, ua faigata i tagata ona fesootai ma tagata pe a feiloai aua foi ua masani i le fesootai ma tagata i luga o fesootaiga faatekonolosi. E le gata i lea ua lē mafai e tamaiti ona faafeiloai atu i isi tagata aua foi e tuu  lava mea i taliga ao usi le maimoa i le telefoni ma isi ituaiga. E le mafai ona e faatagaina le tekonolosi e taitaia lau fanau e faigata ona fesootai ma isi tagata. E tatau ona e faamalosi i ai latou, ia aoaoina ma atinae a latou taleni, ma aoao i latou ia fesootai ma le faaaloalo ma isi tagata i lenei lalolagi.

O le tulaga faanoanoa ua iai, e iai nisi tamaiti ua sauaina e tagata i luga o tekonolosi, ona oo atu lea I tulaga faaletonu le mafaufau ona o upu na lafo e se tagata iai latou. E tatau ona mataala matua. E le tatau ona faalagolago matua i tekonolosi e faafilemu ai tamaiti ona e le mananao e faalavelave atu tamaiti, ae latou te le iloa, o loo latou tuuina atu latou fanau i le tiapolo. Aua e te tuuina atu le aoaoina o lau fanau i tekonolosi. Afai e te le iloa poo a mea a lau fanau o loo faia i luga o latou masini, o lona uiga o loo e faamoemoe i tekonolosi e aoaoina lau fanau, ma talitonu mai, e lei faia tekonolosi ia avea ma se matua kerisiano. O le tauloto mai le Tusi Paia o le asō, o loo aoao mai e tatau ona e aoao lau fanau i ala e tatau ona savavali ai. E mafai e tekonolosi o loo faaaogaina e lau fanau ona ta’u mai le ala e tatau ona ui ai?

Matua, faaalu lou taimi ma le fanau ma aoao i latou. Ou te tatalo ia puipui e le Atua oe mai fuafuaga uma a le tiapolo e gaoi, fasioti ma faaumatia(Ioane 10:10), i le suafa o Iesu,Amene.  

OPEN HEAVENS

MATALA LE LAGI MO LE ASO LULU 20 AOKUSO 2025

(tusia e Pastor EA Adeboye)

Manatu Autu: E mafai ona sili atu lou faatumuina 3 (You can be filled with more 3)

Tauloto -Tusi Paia–Salamo 42:7 “O lo‘o fevala‘aua‘i lea moana ma lea moana i le vāgana mai o ou afu. ‘Ua fela‘aa‘i mai i luga ‘iā te a‘u o ou galu ma ou peau uma lava.”

‭‭

Faitauga – Tusi Paia –Galuega 4:31-33

O le a faamaea atu i le asō lenei aoaoga faasolo i le talanoaina lea o le malosi o le ea i totonu o se mea. O le malosi o le ea i totonu o pau e fua i le mamafa na te tauaveina. Mo se faataitaiga, o le malosi o le ea i pau o le uila vilivae mai i le taavale. E faatumu uma nei pau i le ea , peitai e sili atu le ea e tuuina atu i pau o le taavale i lo le uila vilivae . Aua foi e sili atu le mamafa e mafai ona tauave e le taavale i lo le uila. O pau o le vaalele e sili laitiiti atu lava i pau o loli tetele, peitai o le malosi o le ea i totonu e eseese. Aua foi e mamafa atu le vaalele, a oo o le a tulaueleele, e tatau ona gafatia e pau le mamafa o le tino o le vaalele. A faaitiitia le malosi o le ea o pau o le vaalele ia faapei o le loli lapoa, e pa le vaalele pe a oo ina tulaueleele. 

O le tele o mea e te fia ausia mo le Atua e fua iai le tele o le faauuga e te sailia ma maua. Ou te le o talanoa atu i ni tulaga tofi, ae o le aafiaga lautele o mea e te fia faia mo le Atua. O mea e naunau iai se tagata faatuatua e ausia e le fua i ni tulaga tofi. O nisi taitai i le lotu, e lē mafai ona latou faasaolotoina ni tamai taulaga mai lima o le tiapolo, ae o nisi tagata faatuatua e leai ni tofi, e mafai ona latou feliuaina se atunuu atoa mo le Atua. A oo loa I le ausia o mea tetele ma le matautia mo le malo o le Atua, o le vaega pito taua, o le telē o le faauuga o loo tauave e lea tagata faatuatua. E le mafai e le Atua ona faia ni vavega matautia pe faasaolotoina se nuu ma se atunuu mai malosiaga o le pogisa e faaaogaina ai ni tagata faatuatua e maualalo faauuga latou te tauaveina.  

Fai mai le Ioane 14:12 “E moni, e moni, ‘ou te fai atu ‘iā te ‘outou, o lē talitonu mai ‘iā te a‘u, e faia lava e ia o galuega ‘ou te faia; e fai fo‘i e ia mea e sili i ia mea, auā ‘ou te alu i lo‘u Tamā.”

‭‭

Afai e te fia faia mea sili e pei ona fetalai ai Iesu, e tatau ona e faatumuina i le faauuga i lona tulaga maualuga. O le tele o mea e te naunau e faia i le malò o le Atua, e fua iai le maualuga o le faauuga e te saili e faatumu ai oe. 

Le au pele e, saili ia faatumuina oe i le faauuga, e te taitaia faaolaolaga tetele i le mea o loo e galue ai, lou nuu, lou malo ma le lalolagi atoa, e pei o Iesu, o lē na feafioae e faia galuega lelei i le faauuga. Fai mai le  Galuega 10:38 “o Iesu o le Nasareta, o lē na fa‘au‘uina e le Atua i le Agaga Pa‘ia ma le mana, o ia sa femaliua‘i ma agalelei ma fa‘amālōlō atu i ē na fa‘ato‘ilaloina uma lava e le tiapolo; auā sa ‘iā te ia le Atua.”

Ou te tatalo e faatumuina oe e le Atua I Lona faauuga, ia faaopoopoina pea ina ia talai le Talalelei ma taitaia mai tagata o le lalolagi i lona malo, i le suafa o Iesu. Saili ia faatumuina oe ia maualuga i le faauuga, ina ia e faia mea matautia i le malo o le Atua, i le suafa o Iesu, Amene.