Samoan Devotional

OPEN HEAVENS

MATALA LE LAGI MO LE ASO LUA 19 AOKUSO 2025

(tusia e Pastor EA Adeboye)

Manatu Autu: E mafai ona sili atu lou faatumuina 2(You can be filled with more 2)

Tauloto -Tusi Paia–2 Tupu 4:6 “Ua tūtūmu ipu, ‘ona fai atu lea o ia i lana tama, “‘Ia toe ‘aumai se isi ipu ‘iā te a‘u;” ‘ona fai mai ai lea o ia ‘iā te ia, “E leai se toe ipu.” ‘Ona utu ai lea o le suāu‘u.”

‭‭

Faitauga – Tusi Paia –2 Tupu 4:1-6

O le asō, o le a faaauau atu le tatou talanoaga i le faatumuina i le faauuga i vaega eseese. O le mea moni a faapea o malosi atoatoa lou ma’a faaleagaga i le asō, e lē faapea o le a lē mafai ona faatumuina atili. O le tulaga moni, e leai se tapulaa e iloa ai ua tumu atoatoa lou ma’a faaleagaga. Fai mai le 1 Korinito 12:31, ‘Ia ‘outou naunau i mea alofa e sili’. Ia e matuā naunau pe a oo i le fia faatumuina i le faauuga. 

A e faitau i le 2 Tupu 1:9-12, ina ua valaau Elia e paū le afi mai le lagi e susunuina ai vaegaau e lua a’o o mai e saisai atu o ia, e te iloa ai sa faatumuina o ia i le faauuga. Peitai e oo atu i le taimi i le 2 Tupu 2:9-15, na fai atu Elisaia ia Elia, ‘ou te manao i le tulaga e sili atu ia te oe, lau afioga’. Sa matuā faatumulia Elia i le faauuga e mafai ona ia valaau ona paū mai lea o le afi mai le lagi i soo se taimi e manao ai, sa ia mafai foi ona tapunia le lagi ona leai lea o se timu e paū mo le sili atu ma le tolu tausaga, ae na manao Elisaia ia faaluaina le agaga lea, ma sa ia mauaina. E mafai foi ona e maua le faauuga e sili atu i ou taitai faaleagaga. 

Le au pele e, e mafai ona faatumuina oe i le faauuga e siitia pea. Fai mai le Kolose 2:9 o le tumu o le uiga Atua o loo ia Iesu. Sa faatumuina Iesu i le Agaga Paia, peitai sa ia vavaeeseina o ia ina ia faaopoopo pea le faauuga (Mataio 14:23). O soo se taimi e na te faia ai se vavega faapitoa, e aluese i se nofoaga tuufua e tatalo e toe faatumuina. O Lē na te tauaveina le tumu atoatoa o le uiga Atua o le Tolutasi Paia, sa vavaeeseina o ia ia faaopoopoina pea le faauuga. O le tasi o mafuaaga autu e toatele ai faifeau a le Atua e siitia ona toe pauū lea, ona o le taimi lava e oo atu i se tulaga maualuga, ua le toe naunau e faaopoopo le faatumuina o le faauuga. Ua le toe suesue i le Tusi Paia e pei ona iai muamua, ua faaitiitia le taimi tatalo ona ua matua tele galuega fai. O soo se tagata taalo, e na te iloa lelei e tatau ona galue malosi ina ia avea ma siamupini. Peitai, o le tumau ai ma siamupini, e tatau ona galue malosi atu. O le mea lilo lea i le tuputupu ae faifaipea i le Atua. 

Afai lava e te fiainu pea ia faaopoopoina, e sasaa pea e le Atua ia te oe. Ina ua faatonu e Elisaia le fafine i le faitauga o le Tusi Paia o le asō e faanoi mai ni ipu lē susua, na liligi pea le suauu ao iai pea ipu lē susua. O le tele ona e usitai i le Atua, o le tele foi lena ona ia sasaa Lana faauuga ia te oe ma avea oe ma mea ofoofogia i le lalolagi. 

Tatalo

Tamā, faamolemole faatumu a’u ia faaopoopo pea lou faauuga i aso uma, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 18 AOKUSO 2025

(tusia e Pastor EA Adeboye)

Manatu Autu: E mafai ona sili atu lou faatumuina 1(You can be filled with more 1)

Tauloto -Tusi Paia–Luka 1:53 “Ua fagaina e ia i mea lelei ē sa fia ‘a‘ai, a o ē mau mea ‘ua aufuaina atu e ia.”

‭‭

Faitauga – Tusi Paia –Esekielu 47:1-5

I nai aso ua tuanai atu, sa ou talanoa atu i auala e faatumu ai i le faauuga. O le asō, o le a ou talanoa atu i le maualuga e mafai ona faatumu ai oe i le faauuga ma le malosi o lo’u ma’a faaleagaga e mafai ona iai. O kerisiano uma, e tatou te maua uma Agaga Paia, peitai e mafai ona faatumu se tagata e sili atu i isi tagata. O le mafuaaga lea e eseese ai le maualuga e iai ma le pule e maua e tagata i le Agaga. 

O le mafai ona malamalama pe faapefea ona maualuga atu le faauuga i se kerisiano i lo isi kerisiano, o le a ou faamatalaina atu i le ulufia i le temoni aua o temoni o ni agaga. I le Mareko 1:23-24, o le tamaloa na maua e Iesu i le malumalu, e na o le tasi le agaga leaga sa ia te ia, e tasi le temoni ae tele mea e mafai ona ia faaleagaina. I le Luka 8:1-3, na faasaolotoina Maria le Makatala mai temoni e fitu, o lona uiga o le tamaloa ma le temoni e tasi, sa ulufia o ia, ae o le tagata ma le fitu temoni, e sili atu lona ulufia. A e faitau i le Mataio 12:43-45, e te iloa ai e amata se tagata e tasi le temoni o iai, e uma ane ua valu temoni aua na fetalai Iesu, a alu ese se agaga leaga mai se tagata, e fealualuai e sue e nofoaga e nofo ai, a le maua, e toe foi i le tagata sa nofo ai muamua, a foi atu ua tuufua, e alu ma aumai isi fitu temoni, ma o mai e nonofo ma ia i totonu o lea tagata, ma o le a sili atu ona leaga lea tagata. A e faitau foi i le Mareko 5:1-15, e te iloa ai le mafai telē e le agaga o le tagata ona tauave agaga. O le tamaloa Katara na ulufia e le tele o temoni, fai mai le au suesue o le Tusi Paia e tutusa ma le 6000 temoni, o lona uiga o loo iai le mafai e gafatia ai ona e tauave le telē o le faauuga. 

O le faitauga o Ie Tusi Paia o le asō o loo faaalia ai e mafai e le kerisiano ona sili atu le loloto o le mafutaga ma le Atua. E iai lava le tulaga e sili atu e maua i le Atua, mo i latou e fiaaai pea i le agaga. Mo le 1000 kupita e uia i le agaga, e sili atu lava le mamao e mafai ona oo iai. Mo soo se maualuga e tatau ona ausia, e sili atu foi le maualuga e mafai ona oo iai. O le mafuaaga lea e tatau ai ona e fiaai pea aua e faatumu e le Atua tagata o loo fiaaai pea (Mataio 5:6, Isaia 44:3). Ou te tatalo e faatumu oe e le Atua i lana faauuga i aso uma, ia sili atu ma sili atu pea, i le suafa o Iesu. Tusa poo le a le maualuga o le faauuga o loo ia te oe, o loo iai pea le avanoa e siitia ai, i le suafa o Iesu, Amene. 

OPEN HEAVENS

MATALA LE LAGI MO LE ASO SA 17 AOKUSO 2025

(tusia e Pastor EA Adeboye)

Manatu Autu: Ia faatumu I taimi uma 7 (Always refill 7)

Tauloto -Tusi Paia–Ioane 6:55 “auā o lo‘u tino o le mea e ‘ai moni lea, o lo‘u toto fo‘i o le mea e inu moni lea.”

‭‭

Faitauga – Tusi Paia –1 Korinito 11:26-34

I le faaiuga o lenei a’oa’oga faasolo, ou te mana’o ia e silafia e mafai fo’i ona toe faatumuina oe fa’aleagaga e ala i le Faamanatuga Paia. Na fetalai Iesu i le tusi o Ioane 6:48-51; “Afai e te ai i lo’u tino ua e ai i le areto o le ola.” I se isi fa’aupuga, na Ia fetalai, “O le areto o le ola o lo’u tino.” A e ai i le tino o Keriso ua e ai i se tino e tumu i le mana ma le faauuga a Agaga Paia; ua e avatu uma lea faauuga i totonu ia te oe. Afai e te talia le Faamanatuga Paia ma le tatau, e mautinoa o le a faatumulia lou malosi fa’aleagaga. Ina ua pa’i le fafine sa ia te ia le punatoto I le ofu o Iesu, na fetalai Iesu ua alu ese atu le mana na ia te Ia, (Mareko 5;25-34). A e ai i le areto, ua e talisua i mea mamana aua o le mana o le faailoga o le tino o Keriso. 

O le uaina o le Faamanatuga Paia, o le faailoga o le toto Paia o Iesu, o loo i ai le soifua atoatoa o Iesu (Levitiko 17:11). Fai mai le tusi o Kolose 2:9, “Auā o loo mau i totonu ia te Ia le tumu uma lava o le uiga Atua ua i lona tino.” O lea la, o le tuuina o lona soifua i totonu ia te oe e ala i le inuina o le uaina o le Faamanatuga Paia o le tuuina atu lea o le tumu uma lava o le uiga Atua i totonu ia te oe lava, pe a e inu i le uaina ma le tatau. 

I le matou nuu o Yorubaland anamua, afai e aami i taulasea e fofō tagata mamai tigaina ma ua toe a feoti, e masani ona fai taulasea i aiga o gasegase tigaina nei e avatu ni lavalava, ma se ata poo se faatusa o le tagata ma’i e fai ma ona sui. Ona fa’aofu lea e taulasea o le ata poo le faatusa i ofu o le tagata ma’i ma ave tu’u i le ogatotonu o le nu’u i le leva o le po. Afai e savali ane se isi ma vaai i le faatusa, o le a ola le ma’i ae oti le tagata na vaai i le faatusa. O le a faapea mai tagata matutua o le ola o le tagata na sau i fafo i le po e vaai i le mea sa lē tatau ona vaai i ai, ua fai lea ma sui i le ola o le uso na ma’i tigaina. O se taumafaiga lea a le tiapolo e fa’ata’ita’i polokalame faavae mautu, o le suitulaga, a le Atua. 

Le au pele e, a e talisua ma le tatau i le Faamanatuga Paia, o le a aveesea ou vaivaiga ma e maua le malosi o Keriso. E te maua lona soifua ma suia ai ou faaletonu uma i lona mana e leai se tapula’a, e lē gata. Talisua I le tino o Iesu ma inu i lona toto e lē aunoa; o le a Ia toe faatumu lau utu fa’aleagaga ma avatu ia te oe le malosi ma le mana e faataunuu ai lona finagalo ma lona faamoemoe mo lou soifua. I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 16 AOKUSO 2025

(tusia e Pastor EA Adeboye)

Manatu Autu: Ia faatumu I taimi uma 6 (Always refill 6)

Tauloto –  Iuta 20 “A o ‘outou le ‘au pele e, ‘ia ‘outou ati a‘e ‘iā te ‘outou i lo ‘outou fa‘atuatua e silisili ‘ona pa‘ia, o le Agaga Pa‘ia tou te tatalo ai. '

Faitauga - Tusi Paia: 1 Korinito 2:10-16

I le lua aso ua tuanai, sa ou talanoa atu ai, o le upu a le Atua ma le tapuaiga o auala ia e toe fafaga ai lau ma’a fa’aleagaga. O le asō o le a o’u talanoa ai faatatau I se isi auala mamana e mafai ona toe faatumu ai lou malosi fa’aleagaga; tatalo i le Agaga. 

Afai e te fia talanoa i se tagata, o le a sili atu ona lelei le lua talanoaga pe a e tautala I le gagana a lea tagata. O le ala e fesoota’i ai ma le Atua, o le tautala atu ia te Ia I lana lava gagana; tatalo i le Agaga. Sa ou maitauina mai le amataga I le galuega a le Atua, afai ou te mafuta ma le Atua I le mealilo, o le a ia mafuta mai ia te a’u I le nofoaga faitele. Afai ou te faatalitali ia te Ia a o le’i faia so’o se polokalame, o le a Ia faailoa ma fa’aali mai. Fa’ata’ita’iga so’o se taimi ou te tapena ai mo le Sauniga a le Agaga Paia, ou te fa’amautinoa ou te faaalu se taimi e lē itiiti ifo ma le tolu aso ma te mafuta ai na o a’u ma le Atua I se nofoaga e lē I ai lo’u toalua ma la’u fanau. Ou te faatali I le Alii, vivi’i ia te Ia ma saili I ona fofoga mo le polokalame o le a fai auā fai mai le tusi o Isaia 40:31 'A o ē fa‘atalitali i le ALI‘I, e toe fa‘afouina lo latou malosi. Latou te si‘i a‘e ‘apa‘au e pei o aeto; latou te tamomo‘e, ‘ae lē vaivai; latou te sāvavali, ‘ae lē tigāina.'

E faaalu lo’u taimi e toe faatumu ai lo’u malosi fa’aleagaga e ala i lo’u tatalo i le Agaga. A uma ona ma mafuta ma le Atua mo le tele o itula, ao ma le po, faapena fo’i a’o lei amataina la’u lauga I le tele o taimi, e amata ai iina ona faia e le Atua vavega. 

O le tatalo I le Agaga e fafagaina lou malosi fa’aleagaga ma fesoasoani ia te oe ia tumau lou sasao fa’aafi mo le Atua. E le fiafia lago I ogaumu vevela. A maalili se ogaumu o le a e vaaia lago o mumu I ai. Peita’i a fa’aola loa le ogaumu o le a le toe mafai e lago ona sōsō I ai, auā latou te lē mafaia le afi. A e tatalo i le Agaga Paia ua e fa’amumū oe lava I le afi, ma soosemea e fesootai ma le pogisa e le mafai ona tu lalata ia te oe. A e tatalo I le Agaga o le a tupu lou malosi ma o le a fa’ateleina lou aasa ma lou maaleale faaleagaga. 

A’o e tatalo i le Agaga Paia e te iloa mea lilo I le finagalo o le Atua auā na o Agaga Paia e silafia mealilo a le Atua, ua tatou iloa I le faitauga mai le Tusi Paia o le asō, e tauala ia Agaga Paia, e mafai ai ona tatou iloa mea ua foaifuaina mai mo i tatou; o le tatalo I le Agaga e mafai ai ona o tatou malamalama I nei meaalofa. O mealilo nei o le a fesoasoani iā te oe ia tumau lou malosi fa’aleagaga mo le Atua. Le au pele e, fai ma masani le tatalo i le Agaga ma afai ua e fanaufouina ae le’i mafai ona tatalo i le Agaga, ole I le Atua mo le meaalofa I le asō, fa’aalu lou taimi e te tatalo ai i le Agaga I aso uma. I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 15 AOKUSO 2025

(tusia e Pastor EA Adeboye)

Manatu Autu: Ia faatumu I taimi uma 5 (Always refill 5)

Tauloto –  Salamo 96:9 “Ia ‘outou ifo atu i le ALI‘I i le malumalu e matagofie; ‘ia ‘outou gatete i ona luma le lalolagi uma.”

Faitauga - Tusi Paia: Ioane 4:23-24

O ananafi, na amata ona ou talanoa atu I le taua o le toe faaola o lau ma’a faaleagaga I le suesue, tauloto ma manatunatu lea i le Upu a le Atua. O le aso, ou le a ou talanoa atu I le viiga, o seisi auala e mafai ai ona toe faaolaola lou ma’a faaleagaga. 

E toatele tagata e latou te faataga le aufaipese e vivii mo latou i le lotu i le taimi o sauniga. Ou te faafetai I le Atua I aufaipese e faatumuina I le Agaga i le lalolagi atoa e latou te taitaia pese ma viiga, peitai e le mafai ona latou vivii atu I le Atua mo oe. E tatau ona a’oa’oina oe e te pese ma vivii I le Atua. I le Efeso 5:18-19, fai mai le Aposetolo o Paulo, ‘'Aua fo‘i ne‘i ‘onā ‘outou i le uaina, o le mea e ulavale ai; a ‘ia fa‘atumuina ‘outou i le Agaga. ‘Ia ‘outou fetautalatala‘i i salāmo, ma pese, ma siva fa‘aleagaga, ‘ia fa‘ane‘ene‘e atu ma pepese atu i le Ali‘i i o ‘outou loto.”

O le fuaitau mai le Tusi Paia o loo taua I luga o loo atagia ai e tatau ona e pese so’o, e oo i talanoaga ma isi tagata. O loo faamanino mai e Paulo e tatau ona e pese I viiga o le Atua aua o loo taitaia e Agaga Paia. Ou te faafetai i le Atua i pese ma viiga o loo tatou maua i nei aso, peitai e tele ina galo atu nisi. Ae e iai lava pese ma viiga  o loo tumau pea e oo mai I nei aso e ui ina leva, o le tele o nei pese na tusia i le silia ma le selau tausaga ae o loo tumau pea lona lafulemu. 

I le faitauga o le Tusi Paia o le aso, na fetalai Iesu o le Atua o le Agaga ia, ma o e tapuai ia te ia e tatau ona tapuai i le Agaga ma le Upu moni aua e saili le Atua i e tapuai ia te ia. A avea oe o se tagata tapuai, e saili oe e Agaga Paia. O le tapuaiga o lona uiga o lo’o e ava ma ave lau faaaloalo I se tagata poo se mea. A e tapuai i le Atua, e te faaaloalo maualuga ia te ia, e te tuuina o ia i le mea pito sili ona maualuga i lou olaga. O so’o se tagata i le lalolagi o ia o se tagata tapuai, a le tapuai i se tagata, e tapuai i se mea. O le auala e te iloa ai poo le a le mea e tapuai iai le tagata, o le suesue lea poo le a le mea e ave iai lana faamuamua ma le faaaloalo. Mo se faataitaiga, o tagata e le mafai ona faia se mea e aunoa ma le siakiina o le telefoni, pe matamata faasolo ai, o na telefoni ua avea ma mea e latou te tapuai iai. A faia e tagata so’o se mea mo tupe, o le na tagata o loo tapuai i tupe. 

O le tapuai, o lona uiga o le gauai. E te gauai I so’o se mea poo se tagata e te tapuai iai. A e tapuai i le Atua, o loo e gauai ma faamaualalo lou loto ia te ia, ina ia faatumu e ia i lona mana ma le mamalu. Afai e te gauai i le Atua, e afio mai o ia ma lotolotoi ia te oe. 

Le au pele, ia fai pesega ma viiga i le Atua faapea le tapuai ia te ia o se mea masani i lou soifua. A e auai i nei tapuaiga i le agaga i taimi uma, e na te faatumu ia te oe i lona Agaga ma faatumauina le faaolaolaga o lou ma’a faaleagaga i taimi uma, i le suafa o Iesu, Amene.

OPEN HEAVENS

MATALA LE LAGI MO LE ASO TOFI 14 AOKUSO 2025

(tusia e Pastor EA Adeboye)

Manatu Autu: Ia faatumu I taimi uma 4 (Always refill 4)

Tauloto –  Kolose 3:16 “Ia nofo le afioga a Keriso i totonu ‘iā te ‘outou ‘iā tele lava, a o ‘outou a‘oa‘o ma apoapoa‘i le tasi i le tasi i le poto uma lava, a o ‘outou pepese fo‘i i salāmo ma pese, ma siva fa‘aleagaga ma le fa‘afetai i le Atua i o ‘outou loto.”

Faitauga - Tusi Paia: Iosua 1:6-9

I aso e tolu ua mavae atu, sa ou talanoa atu i le taua o le toe faatumu i le faauuga. O le asō ma nai aso o sosoo atu nei, o le a ou talanoa atu I auala e mafai ai e le au faatuatua ona toe faatumuina. 

O soo se atalii poo se afafine o le Atua,e tatau ona e faamautinoaina o loo e naunau ma filiga i mea e finagalo iai le Atua, e le tatau ona faaitiitia. O le Upu a le Atua o se auupega malosi e toe faatumu ai lou ma’a faaleagaga, ma o le mafuaaga lea e tatau ai ona tele lou taimi e faaalu e suesue, tauloto ma mafaufau i ana afioga i aso uma. 

O nei aso, o le tele o kerisiano ua le toe taulotoina fuaitau o le Tusi Paia ona ua faigofie ona maua i luga o le telefoni. A sue e se tagata se fuaitau o le Tusi Paia, e mafai ona sue i luga o le google poo isi auala. E na o se vaega lava o le fuaitau e sue ae faaali mai loa le fuaitau atoa. E ui ina lelei vaega faatekonolosi ua faigofie ai, ia e manatunatu i fuaitau o le Tusi Paia ma tauloto, aua e saunia ai oe e faasagatau atu i soo se mea o taumafai mai ai le tiapolo ia te oe. I le Mataio 4:1-11, na manumalo Iesu i faaosoosoga a le tiapolo i le sii mau mai i afioga paia a le Atua. E lei iai ni auala e sue ai ni fuaitau i lena taimi, ma e na te lei manaomia, na ia silafia le Upu a le Atua i lona loto aua sa taulotoina ma sa manatunatu iai. O lo’u tama faaleagaga e lei aoaoina i se aoga, peitai e tele fuaitau o le Tusi Paia e na te taulotoina ma teu i lona loto. Afai e mafai ona ia taulotoina afioga mai le Tusi Paia, e te mafaia foi. 

I le Ioane 6:63, na fetalai Iesu o ana upu o le agaga ia ma le ola. O lona uiga, o le tele o ana Upu e te avea ma teuina, o le tele foi lena ona faatumu oe i le agaga. Auā o lo‘o ola le afioga a le Atua, o lo‘o matuā galue fo‘i, o lo‘o sili fo‘i lona ma‘ai i pelu uma e fa‘atau ma‘ai itū,  (Eperu 4:12). A’o e faatumu lou tagata i lana Upu, e na te faaali atu ni mea, o mafutaga ma isi tagata, ma nofoaga e vave ona uma ai lou ma’a faaleagaga ma tuia lou faatuatua. 

O se tasi o auala e te iloa ai poo faatumu moni oe i le Upu a le Atua o le suesue lelei lea o lau talanoa. Fai mai le Mataio 12:34, o le tele o mea i le loto e tautala mai ai le gutu. A faatumu lou loto i le Upu a le Atua, e tumu foi lou gutu I lana upu. O le tele ona e suesue i le Upu a le Atua, o le tele foi lena ona e faapei o ia (2 Korinito 3:18). 

Le au pele e, ia e faamasani ma lou loto atoa e suesue, tauloto ma manatunatu i le upu a le Atua ona e malosi lelei lea i le agaga i taimi uma. Ou te tatalo ia aua lava nei faaitiitia lou naunau ma lou filiga I mea tau le Atua , I le suafa o Iesu. E faafia ona e suesue, tauloto ma manatunatu i le Upu a le Atua? i le suafa o Iesu, Amene.

OPEN HEAVENS

MATALA LE LAGI MO LE ASO LULU 13 AOKUSO 2025

(tusia e Pastor EA Adeboye)

Manatu Autu: Ia faatumu I taimi uma 3 (Always refill 3)

Tauloto -Tusi Paia–Kalatia 5:16 “Ou te fai atu, ‘ia ‘outou sāvavali i la le Agaga, ‘ona lē faia lea e ‘outou o le tu‘inanau o le tino.”

‭‭

Faitauga – Tusi Paia –Kalatia 5:13-25

O le a toe faaauau atu i le asō la tatou mataupu i le talanoaina lea o leisi mafuaaga taua e tatau ai ona toe faatumu le faauuga. 

E iai nisi taimi, o le mafuaaga e manaomia ai lou toe faatumu e lē faapea ua e lelava pe ua faaitiitia le faauuga i le maea ai o galuega faaleagaga tetele, ae ua maualuga atu le pule a le tino i lo le agaga mo sina taimi. I le taimi lea, e te ono faia se mea e lamatia ai tagata, e pei o Elisaia i le 2 Tupu 2:23-24. O lona uiga afai ua aoaoina lelei oe e le Atua, e ono lē faaaogaina le faauuga mo lena vaitau  ina ia aloese mai se faafitauli e te ono salamo ai mulimuli. 

I le 2 Tupu 3:11-16, e iai tupu na o mai e vaai Elisaia, ona toatamai lea o Elisaia i se tasi o i latou. Mulimuli ane ua manaomia ona ia faia se perofetaga, ua ia valaau i se tasi e tā le laaupese ina ia faatumuina o ia. E lei leva ae faapea mai le tagata o le Atua ‘ o loo fetalai mai le Alii’. Ua ou maitauina, o soo se taimi e malosi atu ai le tino i lō le agaga, e manaomia le tuumuli atu i se nofoaga e fai ai viiga. I lena siomaga, ao afio ane le Alii i ou luga, e na te toe faatumu ia te oe. 

O leisi auala e ono siitia ai le tino i lo le agaga i le tele o faifeau o le manatu ua sili ona lelei . E ui na lapatai atu Iesu o le a ia faafiti ia te ia, na manatu mautinoa Peteru I lona malosi, ma ua lē tatalo mo le malosi faaleagaga ina ia aua ai nei tupu, na ia fai atu ia Iesu e le mafai ona ia faia se mea faapea, peitai na iu ina ia faafiti (Mataio 26:69-75). O soo se taimi e te manatu maualuga ai i lou poto ma le mafai ma faapea na e ausia mea uma i le galue malosi, o loo saunia oe e le tiapolo ia e paū , ma e tatau ona e alu atu i se nofoaga tuufua e toe Iloilo laasaga ua faia. Fai mai le Faataoto 16:18

   “E muamua le fa‘amaualuga i le malaia; e muamua fo‘i le loto fa‘asiasia i le pa‘ū.”

‭‭

Le au pele e, a alu ae i luga lou tino e sili i lou agaga, tamoe i le Atua ma ole atu mo lona alofa mutimutivale, ma è na te toe faafoisia oe. Ina ua toetu Iesu, na ia maliu atu i le nofoaga sa faigaluega muamua ai  Peteru e faatumu ia te ia. Na ia saunia se meaai mo Peteru, fafaga ia te ia ma toe valaauina o ia I le galuega (Ioane 21:1-7). A alu ae i luga lou tino i lō lou agaga, alu atu i se nofoaga ese e mafuta ma le Atua e toe maua ma faatumuina i le faauuga ina ia e manumalo i vaivaiga o le tino ma faataunuuina le finagalo o le Atua mo lou olaga, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 12 AOKUSO 2025

(tusia e Pastor EA Adeboye)

Manatu Autu: Ia faatumu I taimi uma 2 (Always refill 2)

Tauloto -Tusi Paia–Mareko 6:31 “Ona fetalai atu lea o ia ‘iā te i latou, “‘Inā ō mai ia, tau lava o i tatou, i se mea tu‘ufua, se‘i tou mapu a‘e teisi” Auā e to‘atele ē na feoa‘i ai, ‘ua lē mafai ai i latou ‘ona ‘a‘ai.”

‭‭

Faitauga – Tusi Paia –Luka 9:1-10

O ananafi, sa amata ona faatalanoaina le taua o le fa’atumuina i le faau’uga i le maea ai o galuega tetele faaleagaga. O le isi taimi e te manaomia ai le faatumuina, o le taimi ua e matua lelavā. I le tusi 1 Tupu 19:5-8 ina ua lelava Elia, ona ua leva ona solasola ese ma Iesepela, sa ia faapea atu i le Atua ia faa’umatia loa ia. Ae sa fetalai le Atua, “E leai, ou te le tanuina o’u tagata ua manunu’a, ou te fafaga iai latou. A latou tigaina, ou te faatumu iai latou”. Na saunia e le Atua  meaai mo Elia, na ia ai ona toe moe ai lea. O le mea mata’ina, o le tagata sa faapea mai “Fasioti a’u” na te lei faapea ane..”ou te le ‘ai.” Ona fafagu faalua ai lea e le Atua ma avatu ia te ia seisi mea’ai. Sa manino mai ai, o le mea tonu lea e mana’omia o se malologa ma se taumafataga, ona fa’aauau ai lea o lana malaga. 

Ina ua uma ona ai, ua fa’amalosia Elia ma faaauauina lana malaga mo le 40 po ma le 40 ao. Afai e toe faatumuina oe, e te maua leisi malosiaga ma le mafai, e te faaauau ai pea ma le Atua. 

I le faitauga mai le Tusi Paia o le asō, ina ua foi mai le ‘au so’o mai le latou galuega tala’I sa auina atu i I latou e Iesu e fai, na latou aumaia le tala fiafia i mea uma sa faatino i le faau’uga. Ona taitaia lea e Iesu o i latou, i se nofoaga tuufua e faia ai se latou malologa. A alu ese le mana ma le tagata, e iai le a’afiaga i lona tino, a fai e le malolo lea tagata, e ono vaivai tele e lē mafaia seisi galuega. Sa silafia lelei e Iesu le tulaga lea, ma ina ua uma ona ia faatino vavega e tele, ona maliu ane lea i se nofoaga tuufua, ina ia toe faatumuina o ia, e pei ona ou fa’amatalaina ananafi. Sa mafai ona ia fa’ataunu’uina vavega mata’utia I taimi uma aua sa fai ma ana masani le faaavanoa o le taimi e toe fa’atumuina ai o ia. Sa fetalai foi Iesu, e mafai e i latou e mulimuli ia te ia ona faia mea e sili atu ia te ia (Ioane 14:12), o lona uiga, e manaomia ona fa’atumuina i latou e pei o ia. 

Afai e te tuuina maa i totonu o se moli uila, ma fa’aaogaina mo se itula atoa, e tatau ona e fa’amalolo lea moli mo se itula nai lo le faaaogaina faasolo’atoa ina ia faasaoina le ma’a. E faapena foi pe afai e te fai ma malolo I taimi uma ina ia mafaia pea ona e faia mea sili mo le Atua.

Le ‘au pele, aua nei e manatu e le mafai ona suia oe e seisi ona o lou fa’aaogaina faasoloatoa o ou ma’a faaleagaga tusa pe e te faalogo atu ua e matua lelava. E te ono silafia mulimuli le ala faigata, e pei o Elia, e iai isi tagata e faigofie ona suia oe (1 Tupu 19:15-16). Ia saili tagata i le taimi nei, e aoao lelei ina ia latou galulue so’oso’o tau’au ma oe. ‘Aua nei e fa’atalitali sei e tigaina ua lē mafai ona toe faatumuina, ma afai ua e tigaina i le taimi nei,  ia faia loa se malologa i le taimi nei e toe faatumuina oe. Ia faamautinoa e fai ma e malolo ina ia mafai ai pea ona faaauau ma sili atu galuega e faia, i le suafa o Iesu, Amene.

OPEN HEAVENS

MATALA LE LAGI MO LE ASO GAFUA 11 AOKUSO 2025

(tusia e Pastor EA Adeboye)

Manatu Autu: Ia faatumu I taimi uma 1 (Always refill 1)

Tauloto -Tusi Paia–Mareko 14:38 “Inā mataala ia, ma tatalo, ne‘i o‘o mai le fa‘aosoosoga ‘iā te ‘outou; ‘ua mana‘o i ai le loto, a o le tino ‘ua vaivai.”

‭‭

Faitauga – Tusi Paia –1 Tupu 19:1-4

I le faitauga mai le Tusi Paia o le asō, ina ua maea ona valaau Elia e paū le afi i luga o le Mauga Karamelu, e tele  le mana na alu ese ma ia ma na manaomia le toe faatumu. Na faatoa maea le taua na manumalo ai, ua amata se faaolaolaga, peitai ina ua taunuu atu i lalo o le mauga ma iloa ai e leai ma se salamo o Iesepela e pei lava na iai muamua. Peitai, ona o le faauuga sa ia te ia ua faaitiitia, sa ia lē mafai ona faasagatau atu ia te ia ma o lea na ia sola ese ai. 

E iai taimi e faia ai e tagata ni mea tetele i le faauuga, ma manatu ua maea, peitai e lei leva ae latou iloa e iai foi Isi mea e manaomia ai le faauuga o loo faatali mai. E mafai e se tagata ona faatu se tagata mai le oti i totonu o le sauniga lotu, ona fiafia ai lea o tagata, peitai a oo atu lea tagata i le fale, o loo faatali mai ai seisi faafitauli e manaomia le faauuga e fofo ai. O le mafuaaga lea e matuā taua ai le toe faatumu o ou maa faaleagaga i so’o se taimi e te faaaogaina ai le faauuga. 

E toatele faifeau a fai a latou polokalame, ma ao sauni atu iai, e latou te anapogi ma tatalo. Peitai e maea loa lea polokalame, e amata loa ona fiafia ma aai e aunoa ma le faataga o le Atua e toe faatumu i latou i le faauuga. E oo atu i le Aso Sa e sosoo ai, o le a iloa ai e tagata e lē tutusa le faifeau lea e lauga i le vaiaso nei  ma le faifeau lea na lauga i le vaiaso talu ai, aua foi ua faaitiitia le faauuga ma è lei toe faatumuina. O le anapogi ma Isi auala ia faatumuina i le Agaga Paia, e le tatau ona gata pe a maea polokalame, e tatau ona avea ma tulaga masani e faifaipea i le olaga. A maea taimi o polokalame e maualuga galuega faaleagaga ma le faauuga e faaaogaina ai, e tatau ona toe faatumuina oe ia maua le maualuga sa iai muamua, a le o lenā, ia sili atu. 

Le au pele e, e tatau ona e mataala ma tatalo I taimi uma ona o lou fili e lē malolo. O loo fealualua‘i o ia e pei o se leona tagi, e sā‘ili se tasi e ‘aina e ia (1 Peteru‬ ‭5‬:‭8‬ ). E faatoa maea ona e maua le manumalo? E le o le taimi lena e te malolo ai, o le taimi e te toe foi ai i le mea lilo e toe faamalosi le mana ma toe faatumu le faauuga. O le taimi lea e leoleo ai lou loto i lou malosi atoa ina ia e aoga pea mo leisi galuega e sosoo ai a le Atua.  O loo faamauina i le Tusi Paia le tele o taimi na maliu atu ai Iesu e tatalo e toe faatumu. Mo se faataitaiga, ina ua maea se galuega i le Mareko 1:34, o le fuaiupu na sosoo ai o loo faapea mai na maliu atu o ia i le mea tuufua e tatalo ai. O ia o lō tatou faataitaiga sili ma e tatau ona tatou faia faapea ina ia tatou aoga pea i le galuega a le Atua. A maea le manumalo i se mea, alu atu i le mamalu o le Atua e toe faatumu oe, i le suafa o Iesu, Amene. 

OPEN HEAVENS

MATALA LE LAGI MO LE ASO SA 10 AOKUSO 2025

(tusia e Pastor EA Adeboye)

Manatu Autu: Aua Le Faatagaina Le Fa’avaivai (Don’t Allow Discouragement)

Tauloto -Tusi Paia–1 Samuelu 30:6 “Ua atuatuvale tele lava Tavita, auā na tautala le nu‘u e fetogi ‘iā te ia i ma‘a, ‘ina ‘ua tigā loto o le nu‘u uma ta‘itasi i ona atali‘i ma ona afafine; a ‘ua fa‘amalosi Tavita lona loto i le ALI‘I lona Atua.”

‭‭

Faitauga – Tusi Paia –Numera 11:4-17

I le tusi faitau mai le Tusi Paia o le asō, sa muimui ma fetagisi le fanauga Isaraelu ma fai mai, “Matou te mananao i manufasi; ua matou le lavavā ai manai. Na o latou muimui pea e le misi mo le fasefulu tausaga, ma sa onosai pea Mose, peita’i o le taimi lea na ia fai ai I le Atua, “Ou te le’i fanauina mai nei tagata, aisea ua e fetalai mai ai ou te tauaveina a latou avega? Ia e fasioti mai ia te a’u aua ua o’u lē lavatia nei mea uma.” Na fetalai mai le Atua, “talu ai ua e fai mai ua mamafa tele le avega, aumaia ia te a’u ni tagata e toafitugafulu ona ou aveese lea o le Agaga ai ou luga ma tuu atu i o latou luga.” 

A e mafaufau I le tulaga moni o le faauuga i luga o Mose sā vaevae i tagata e toa fitusefulu, o le a e manatua ai ina ua uma ona faasoasoa le faauuga sa ia Mose, na tula’i mai se Mose fou ae ua itiiti ifo le faauuga ua i ai na i loo le tulaga sa I ai muamua. O le mafuaaga lea, e le’i umi ai ae sui, e pei ona taua i le Numera 20:7-12, o le tagata na fa’amatalaina e le Atua, e aupito sili ona loto maualalo i luga o le fogaeleele (Numera 12:3) ua pupuna a’e i le ita. O le faauuga na mafai ai ona lava papale mole fasefulu tausaga, ua aveesea ona o ana upu na lafo i se taimi na lotovaivai ai.  O le loto fa’avaivai e mafai ona fai ai e tagata faamatalaga e ono faalavelave i o latou olaga ma taofia ai lo latou manuia.

 Na faataga fo’i e Elia ana upu i se taimi na loto faavaivai ai e faamutalia faafuasei lana galuega mo le Atua. Ina ua uma ona ia valaaua le afi e pau ifo, i luga o le mauga o Karamelu, na faafefe ia e Iesepela, ma ia sola ese ai, na fa’atoga i le Atua ia oti o ia. Faafetai e lei faataunuuina e le Atua le manao o Elia, ae na ia auina mai se agelu e fafaga ia te ia (1 Tupu 19;1-8). Mulimuli ane, na avatu e le Atua ia te ia lana galuega mulimuli o le fa’au’uina o Ieu, Asaeli, ma Elisaia e suitulaga ia te ia. (1 Tupu 19;15-16). Na maea le faaaogaina o ia mo le Atua ona ua ia faataga le loto faavaivai e tautala ai i upu sese. Na matuā faavaivai foi Ioane le papatiso ma afua ai ona ia fesiligia le moni o mea uma na ia folafolaina e faatatau ia Iesu, “Faauta i le tamai mamoe a le Atua o le aveesea agasala a le lalolagi,” (Ioane 1:29), Peita’i o ia lava lea na ia auina atu lona au soo e fesili ia Iesu, “Poo oe le maliu mai, pe matou te faatali atu i se tasi?”, (Luka 7;19-20). E lei pine ona tupu lea, ae vavaeeseina lona ulu (tulou) ( Luka 9;7-9). 

Le au pele e, talu ai e lē mafai ona e taofia mea tutupu e faavaivai loto, e mafai ona e filifili pe faapefea ona e tali atu i nei faafitauli. Faapei o Tavita, e mafai ona e fa’amalosia oe lava i le Alii; e pei ona vaaia i le tauloto mai le Tusi Paia o le asō. E mafaia e le Atua ona leoleo ia te outou ina nei pauū (Iuta 1;24). E mafaia fo’i e Ia ona avatu ia te oe se feliuaina mata’utia, peita’i e tatau ona e faamoemoe ia te Ia. E lava ma totoe lona mafai, e leoleo ai ia te oe mai so’ose tulaga e ono faavaivai ai lou loto. Aua ne’i e faatagaina faafitauli ma le faavaivai e te tautala ai i upu sesē, i le suafa o Iesu, Amene.