Samoan Devotional

OPEN HEAVENS

MATALA LE LAGI MO LE ASO TOONAI 9 AOKUSO 2025

(tusia e Pastor EA Adeboye)

Manatu Autu: Aloese mai Tutulu (Avoid Leakages).

Tauloto -Tusi Paia–Pese a Solomona 2:15 “Inā ‘outou pupu‘e ia mā tatou o alope, o alope iti, o ē fa‘amaumau i vine auā ‘ua fua o tatou vine.”

‭‭

Faitauga – Tusi Paia –Faamasino 16:1-21

I nai aso ua tuana’i atu, sa ou talanoa ai faatatau I le tumu taumasuasua i le Agaga Paia. Afai e mafai ona faatumulia se tagata o lona uiga e i ai fo’i le avanoa e matūtū ai. O le talanoaga faatatau i le mafai ona matua’i leai se mea ua o’u manatua ai e mafai ona tupu se tutulu. E tele auala e fa’amātūtū ai se tanevai; o le tasi, o le sasa’a ese uma o vai o loo i totonu, i le taimi e tasi, ma le isi o le tui fa’apu o le tanevai ma amata sinasina ai le vai seia o’o ina uma lelei le vai ma matutu le tanevai. 

O le tele o taimi a manao satani e fa’asagatau i se kerisiano o loo tumu i le Agaga Paia, e lē faia lana osofaiga i le taimi e tasi. E malamalama lelei le tiapolo i le malosiaga o le faauuga; o lea la a manao e osofa’i kerisiano, e vaavaai i ni auala e faigofie ai ona leiloa le faauuga mai lea uso. E su’esu’e mo ni avanoa laiti mā’ale’ale i o latou olaga e mafai ona ia fa’aaogā ia toulu ese taitasitasi ai le faauuga seia o’o lava ina matutu i latou, osofa’i loa. 

O kerisiano e taaalo i le agasala o le a muamua latou iloa ua faasolo faaitiitia le faauuga i ona luga ma afai e le salamo, o le a iu ina oti (Roma 6:23). Atonu e mafai ona galue pea se kerisiano i meaalofa a Agaga Paia, peita’i afai o ola ma aafia i le olaga agasala lilo, o le a amata alu ese le faauuga. O le faafitauli o le sinasina o le vai mai se tanevai poo se kalone, e masani ona faatoa iloa ina ua itiiti lava se vai e totoe ua lē toe i ai se mea e aoga ai, poo le matua’i matutu lava ua leai se mea o totoe; o le taimi lea ua siliga se togafiti e mafai ona toe fai, ua tuai. Ina ua fai mai Samasoni, “Ou te alu atu e pei ona mua’i fai,” (Faamasino 16:20), na te le’i iloa ua alu ese le faauuga ia te ia. E masani ona iloa ifo ua leai se faauuga ina ua mālō le tiapolo, ma ua na o le alofa tunoa faapitoa o le Atua e toe laveaiina ai le uso. 

Fai mai se vaega o le Roma 13:11-12 .., ‘ua o‘o i le itū po ē ala ai ē na momoe; …o lea ‘ia tatou fa‘ate‘a ‘ese ai galuega o le pogisā, a ‘ia tatou ‘o‘ofu i ‘ofu tau o le malamalama.”

Le au pele e, afai o loo e taalo i le agasala, o le taimi lenei e te ala ai i luga. O i latou o taaalo i le agasala o loo agai i le fa’afanoga. Atonu e leai se isi o iloa au mea o loo fai i le mea lilo, a o loo silafia e le Atua, ma e mautinoa o loo iloa fo’i e le tiapolo. O loo talanoa Solomona faatatau i alope iti o e fa’amaumau I vine i le upu tauloto o le asō. Afai o loo e faia pea le agasala faalilolilo, faamolemole fai sau fuafuaga i le taimi nei a’o le’i fa’aleagaina oe e le agasala. O agasala faalilolilo e amata tutulu ese ai le faauuga seia oo ina faaumatia le tagata faatuatua, I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 8 AOKUSO 2025

(tusia e Pastor EA Adeboye)

Manatu Autu: Taumasuasua i le Agaga Paia 2 (Overflowing with the Holy Spirit 2)

Tauloto -Tusi Paia–Ioane 7:38 “O sē fa‘atuatua ‘iā te a‘u, e fa‘apei ‘ona fai mai o le Tusi, ‘E tafe mai o vaitafe mai totonu ‘iā te ia, o le vai ola lava.’

‭‭

Faitauga – Tusi Paia –Ioane 7:37-39

Fai mai le Salamo 23:5 “‘E te laulau mai mea i le la‘o‘ai ma a‘u, i luma o ē ita mai ‘iā te a‘u; ‘ua e fa‘au‘uina lo‘u ulu i le suāu‘u; ‘ua taumasuasua la‘u ipu.”

O loo talanoa mai Tavita e faatatau i le taumasuasua o Agaga Paia i le fuaitau lea. O le taumasuasua ia Agaga Paia ma le faauuga, o le finagalo lea o le Atua mo lana fanau. I le faitauga mai le Tusi Paia o le asō, na fetalai ai Iesu o i latou e fia feinu ia o mai ia te ia e feinu.  Na fetalai ‘E tafe mai o vaitafe mai totonu ‘iā te ia, o le vai ola lava’, o le matuai tele lea taumasuasua o Agaga Paia. O Peteru, ua taumasuasua i le Agaga Paia, e oo i lona ataata lafoai na malolo ai tagata mamai (Galuega 5:14-16). Na matua taumasuasua foi Elisaia i le faauuga na tafe pea e ui ua maliu ma sa faatūina tagata maliliu (2 Tupu 13:20-21). E leai se pa puipui o le tele o Agaga Paia e mafai ona e tauaveina aua e finagalo le Atua ia e faatumuina, ia taumasuasua. 

I le 2011, na faia se tautinoga a se fafine i Dublin. Fai mai na ia faalogo e iai fafine pa na fananau ina ua maea ona nonofo i nofoa na ou nofo ai. Ma o lea sa ia auai atu i se tasi o  matou sauniga peitai na lē mafai ona ia maua se nofoa na ou nofo ai ona ua  vave ona aveese. Na faanoanoa  peitai na ia maua se manatu lelei, ‘sa tu o ia i le pulelaa e lauga, e tatau ona iai se faauuga i luga o lenei pulelaa’. O lea na alu ai faapipii lona manava i le pulelaa. Na to i le masina lea, ma na ia fanauina se masaga told. Na tafe taumasuasua atu Agaga Paia ma ia te au ma ua malosi lona mana i le pulelaa e oo i tagata pā ua uluola.

Le au pele e, e mafai ona tafe taumasuasua Agaga Paia e tauala ia te oe. E mafai ona matua faatumulia oe e Agaga Paia e oo i mea e te pai iai e latou te tauaveina Agaga Paia. Peitai e faatoa tupu, pe afai e te onā pe a faatumu oe e Agaga Paia. Tusa poo le a lou tumu ia Agaga Paia , e tatau ona e naunau ia faaopooopoina. E tatau ona e taumafai ia fai ma masani lou mafuta i lona manalu, ua oo i le tulaga e te lē tilotilo i se taimi. Ou te tatalo ao e mafuta atu i le mamalu o le Atua, e na te faatumu ia te oe ia taumasuasua i le Agaga Paia ma lona mana. 

Tatalo, 

Tamā, faamolemole faatumu au seia ou taumasuasua i lou Agaga Paia. Ia faataga le vaiola e tafe mai i lo’u loto, i le suafa o Iesu, Amene. 

‭‭

OPEN HEAVENS

MATALA LE LAGI MO LE ASO TOFI 7 AOKUSO 2025

(tusia e Pastor EA Adeboye)

Manatu Autu: Taumasuasua i le Agaga Paia 1 (Overflowing with the Holy Spirit 1)

Tauloto -Tusi Paia–Galuega 2:4 “Ua fa‘atūtūmuina fo‘i i latou uma i le Agaga Pa‘ia, ‘ua āfua ai ‘ona tautatala i gagana ‘ese‘ese, pei ‘ona foa‘iina mai e le Agaga o le gagana ‘iā te i latou.”

‭‭

Faitauga – Tusi Paia –Galuega 2:1-18

A faatutumuina tagata i le ava malosi, e onānā. Peitai, e lē finagalo le Atua e faapena lana fanau, e finagalo ia faatutumuina i latou i le Agaga Paia (Efeso 5:18). I le aso Penetekoso, na matua faatutumuina le au so’o i le Agaga Paia, o tagata na iai na manatu e onānā. O le tulaga moni, na taumasuasua i latou i se uaina mai le lagi e taua o Agaga Paia. 

E lē iloa atu e tagata onānā mea e pei ona masani ai tagata. E mafai ona vaai atu se tagata onā i se faulaiga lapisi ma manatu o se moega matagofie. E faapena foi se tagata e faatumulia ia Agaga Paia, e mafai ona ia vaai atu i se pipili ae o loo ia iloa atu se tagata o tamoe. Ina ua ou alu atu e nofo i le nofoaga lea ua taua o Redemption City, na manatu tagata na matou faiaoga faatasi i le Iunivesite ua tau faaletonu lo’u mafaufau. Na latou vaai atu i se vaomatua, ao a’u, o loo ou vaai atu i se taulaga tele. I le taimi nei, ua iloa tino atu e tagata le taulaga na ou vaai iai i le tele o tausaga talu ai. 

O tagata onānā e le mafai ona pulea latou aga e faia, e latou te faia soo se mea e faaosofia e le ava malosi. Afai e faaosofia i latou e moe i le auala tele, e latou te faia e aunoa ma le mafaufau i le lamatia ai o le ola. E faapena foi Agaga Paia, a e onā i le Agaga Paia, e te lē toe pule i lou olaga. E te alu i so’o se mea e faatonu oe e te alu iai pe faia foi soo se mea e faatonu oe e fai. E te lē finau ma ia pe a fai atu ia te oe se mea e faia. Ou te talitonu e lei pulea oe e le uaina o Agaga Paia pe afai o loo faigata pea ia te oe ona usitai i faatonuga a le Atua. Ae lei faatumulia Peteru i le Agaga Paia, sa pule a ia i le mea e faia i so’o se taimi, ma è iai le taimi na ia faafiti ma fai mai na te lē iloa Iesu. Peitai ina ua faatumuina o ia e Agaga Paia i le aso Penetekoso, na amata ona ia talai le Talalelei ma e lei toe taofia seia valaauina o ia e lona matai. E iai le taimi na lui ai e tagata e aua le toe tautala ma ta’uta’u Iesu, ae na tali mai ma le toa, “Auā ma te lē mafaia ‘ona lē tautala i mea ‘ua ma va‘ai i ai ma fa‘alogo i ai.” Galuega‬ ‭4‬:‭20‬ . E ui I le tele o sauaga sa feagai ma ia, na musu e taofia le tautala pea ia Iesu. 

O tagata onānā, e le mafai ona malilie i le onā ananafi, ma è toe foi lava i le ava malosi i aso uma. A faatumulia oe e Agaga Paia ua taumasuasua, e te foi faafia iai ia maua pea. O le tele ona ia faatumuina oe, o le tele foi lena o lou naunau ia te ia, ma o le tele foi lena ona e maua o ia, o le tele ma taumasuasua foi lena o lona mana i lou olaga. Le au pele e, ole atu i le Atua e faatumu oe i lona Agaga Paia, ia fou i aso uma, i le suafa o Iesu, Amene

OPEN HEAVENS

MATALA LE LAGI MO LE ASO LULU 6 AOKUSO 2025

(tusia e Pastor EA Adeboye)

Manatu Autu: Alofa taumasuasua (Overflowing mercy)

Tauloto -Tusi Paia–Efeso 2:4-5 “A o le Atua, ‘ua i ai le faula‘i o le alofa, ‘ona o lona lava alofa tele, na ia alofa mai ai ‘iā i tatou, a o oti lava i tatou i amio leaga, ‘ua na fa‘aola mai ‘iā i tatou fa‘atasi ma Keriso; (o le alofa tunoa ‘ua fa‘aolaina ai ‘outou.)”

‭‭

Faitauga – Tusi Paia –Mareko 1:40-45

E tele uiga o le Atua o loo faailoa i le Tusi Paia ma o se tasi o ia uiga o le Alofa mutimutivale. Fai mai le upu tauloto mai le Tusi Paia o le asō e faulai lona alofa, o lona uiga e tele lona alofa e lava mo tagata uma, ma e lē uma. Fai mai foi le Tusi Paia i le Salamo 62:12 “Le ALI‘I e, o lo‘o ‘iā te oe fo‘i le alofa;.”

‭‭

Fai mai le fuaitau o loo taua i luga, o loo i le Atua le alofa. Afai o loo I se tagata e alofa ia te oe se mea, e te malolo lelei ma le mautinoa, e mafai ona ia avatu ia te oe I soo se taimi e te manao ai iai. O lona uiga, afai o loo e iai i le Atua, e te fiafia pea i lona alofa. 

I le faitauga o le Tusi Paia o le asō, o loo faamatala ai le tala I le lepela na sau ia Iesu ma faapea mai, ‘Āfai ‘ua e finagalo i ai, ‘e te mafaia ‘ona fa‘amamā ‘iā te a‘u.’. I nisi faaupuga o loo ia faapea mai, ‘ou te iloa e te alofa ae ou te lē iloa pe oo mai ia te a’u lou alofa. Afai e te alofa mai ia te a’u, e mafai ona ou faamamāina’. E lei ita Iesu ia te ia, ae na aapa ma pa’i atu ia te ia. I aso nā, e matua faasā ona pa’i se tagata i se lepela, peitai a iai le alofa mo se tagata, e gausia aga ua masani ai tagata. Na faasa’oina foi e Iesu le manatu sese o le lepela. Na ia faapea atu, ‘ou te loto iai, ia e malolō’. Na faaali atu e Iesu ia te ia, o le alofa e maua e soo se tagata e sau ia te ia. E lē taitai ona tuua le alofa o le Atua i so’o se tagata e ole atu ia te ia. Ina ua alaga atu le tauaso o Patimaio mo le alofa i le Mareko 10:46-52, na lagona e Iesu lana alaga ma tali mai. Ina ua ole atu se tamā mo lona alofa i lona atalii na ulufia e temoni, na tali atu Iesu ma faasaolotoina le tamaitiiti (Mataio 17:14-18). Ina ua ole atu le fafine Kanana ia alofa I lana tama teine, e ui e lei oo i le taimi o tagata ese e maua ai le meaalofa o le faaolataga, na tali atu ia te ia Iesu ma ua faamaloloina le teine (Mataio 15:22-28). I le suafa e sili i suafa uma lava, ou te tatalo ia e maua le alofa o le Atua ina ia e atoatoa i so’o se vaega o lou olaga. 

E tele le alofa o le Atua. Fai mai le Salamo 57:10, o le alofa o le Atua e tele e oo i le lagi. Peitai, e ui na tele le alofa o le Atua, e maua e na o i latou ua salamo moni i a latou agasala, tuuina atu o latou ola ia Iesu ma ola I se olaga faapaiaina. E nā o i latou e matau i le Atua e mafai ona maua lona alofa taumasuasua (Salamo 103:11). O ē matatau i le Atua, e fiafia pea i latou i le maua o lona alofa taumasuasua, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 5 AOKUSO 2025

(tusia e Pastor EA Adeboye)

Manatu Autu: Viiga Taumasuasua (Overflowing praise)

Tauloto -Tusi Paia–Salamo 147:1 “Ia ‘outou vivi‘i atu i le ALI‘I. Auā e lelei ‘ona fai pesega i lo tatou Atua; auā e matagofie, e ono lava le vi‘iga.”

‭‭

Faitauga – Tusi Paia –2 Samuelu 6:14-16

I le faitauga o le Tusi Paia mo le asō, na vivii Tavita i le Atua ma lona malosi atoa ma siva e leai ma se manatu i seisi. O se faataitaiga lelei lea o le viiga e taumasuasua, leitioa faamanuia le Atua ia te ia e lē mafaitaulia. A taumasuasua la tatou viiga i le Atua,e na te foai mai faamanuiaga e lē mafaitaulia. A e vivii i le Atua, e te faafiafia ia te ia, afai e te faafiafia ia te ia, e na te faia ou tuaoi e faia le leleiga ma oe (Faataoto 16:7). Leitoa e lē taitai ona faiaina Tavita i se taua, o le taumasuasua o lana viiga e faaosofia le Atua e faafilemu ona fili i ona luma. A e faaaoga soo se auala e vivii ai i le Atua, e na te faia soo se auala e foai faasoloatoa atu ai ia te oe faamanuiaga faulai. 

O le avatu o viiga e taumasuasua i le Atua, e le mafai ona e tuua ni tapulaa i lau viiga, e tatau ona e vivii ia te ia e lē aunoa. O lona uiga, e te vivii ia te ia I soo se mea e te alu iai ma a’o faia foi au galuega masani o le aso. O lona uiga o le tulaga e alu iai lou mafaufau i aso uma o lou olaga, o le vivii i le Atua e faifaipea. O le mafuaaga lea o so’o se taimi e vaai ai tagata ia te au, e latou te iloa ai o loo gaoioi pea lou gutu, o loo ou pese i pese lotu e vivii ai i le Atua. Ou te manatua e iai se aso na ou malaga ai i se atunuu i fafo ona ou alu lea i se faletusi e faatau ni a’u tusi. Ao tau sue ni au tusi, sa ou pese e vivii  i le Atua.  E iai se palagi na sau i totonu o le faletusi, vaai mai ia te a’u, ma fai sana tala ula i lau pese. Na ma taliē, ma lulu lima, ao faliu e alu, na faapea mai, ‘sei faatali a, o lea ua te’a’. Fai mai sa ia pologa i le tigā o le tua mo le tele o tausaga. O le taimi na ou luluina ai lona lima ao ou iai i le agaga vivii ma tapuai, na te’a vave le tua tigā. Afai e te fia vaai i vavega i so’o se mea e te alu iai, tusa pe e te lē o mafaufau iai, e tatau ona e vivii i le Atua ia taumasuasua. 

O i latou e avatu i le Atua viiga e taumasuasua, e le faatali sei fai e le Atua se mea mo i latou ona faatoa vivii lea. E vivii i latou i le Atua i ona aso e taugalemū ai ma aso e lē taugalemū ai. O le mafai ona nofo i luga mai le moega i taeao uma, ua lava lea mafuaaga e vivii ai i le Atua. E taui e le Atua i le faamautinoa lea, latou te maua mea uma e manaomia ae lei ole atu i le Atua ina ia atili ona faaavanoa latou taimi e vivii ai ia te ia. Ae lei o’o mai faigata, e na te fofoina ina ia aua nei mapu le tafe o le viiga. Le au pele e, ia fai ma au masani le vivii i le Atua i so’o se mea e te alu iai, ona ia faamatagofieina lea o lou olaga i ana faamanuiaga faulai. O le avatu i le Atua o le viiga e taumasuasua, e tatau ona e vivii ia te ia I soo se mea e te alu iai I taimi uma, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 4 AOKUSO 2025

(tusia e Pastor EA Adeboye)

Manatu Autu: Soifua maloloina manuia Taumasuasua (Overflowing health)

Tauloto -Tusi Paia–3 Ioane 2“Le pele e, ‘ia e manuia i mea uma, ma ‘ia e mālōlō, fa‘apei ‘ona manuia o lou agaga.”

‭‭

Faitauga – Tusi Paia –Galuega 5:14-16

E lē finagalo le Atua ia tau o le maua o le soifua maloloina lelei ae ia tatou taumasuasua i le soifua maloloina manuia. E mafai ona e matuā soifua maloloina manuia e oo i tagata mama’i e pa’i ia te oe e malōlō. O Lo tatou Alii Faaola o Iesu na matuā taumasuasua i le soifua maloloina lelei, ma sa pai i lona ofu le fafine puna toto ona malōlō lea o ia (Mataio 9:20-22). 

I ni tausaga talu ai, sa iai se talavou e ma’i e vaivai lona toto ma sa ma’i i le tele o taimi, na tulai e fai lana tautinoga ma faapea mai, ‘Ou te faalogo e sau i le Ekalesia lenei le Tamā ia EA Adeboye i le Aso Sa a sau nei. Ou te faia se tautinoga o le a ou malōlō i le aso Sa a sau nei’. Na vili mai se tagata e ta’u mai ia te au le tautinoga a lenei talavou, na amata loa ona ou tatalo ia faataga e le Atua ona ma feiloai. Na faia e le Atua, ou te taunuu atu i le Ekalesia o tūtū mai fafo lenei talavou. E lē foliga o se talavou ona o le tino laitiiti. Na sau ia te au ma faapea mai, ‘Tamā, ou te mai i lo’u olaga atoa, peitai ou te talitonu ou te malōlō i le asō ona o lou sau i lenei Ekalesia i le asō’. Na ou opoina o ia ma faapea atu, ‘o le a faia ia te oe e tusa ma lou faatuatua’. Na ou maua se tusi mai ia te ia I ni nai masina mulimuli ane, na ia tusi mai, ‘Tamā, ou te Faafetai i le Atua ma faafetai ia te oe. Ua ou maloloina na amata mai i le aso na e sau ai i la matou Ekalesia’. 

Le au pele e, e lei maliu Iesu mo oe tau ia e maloloina, e finagalo o ia ia taumasuasua lou soifua maloloina lelei , e oo i tagata mama’i e te pai iai e malōlō ma maua le soifua maloloina manuia. Na ia fetalai i le Mareko 16:17-18 “E mulimuli atu fo‘i nei fa‘ailoga i ē fa‘atuatua; e tutuli e i latou temoni i lo‘u igoa; e tautalatala i latou i gagana fou; e fetāgofi i latou i gata; ‘āfai fo‘i latou te inu i se mea e oti ai, latou te lē afaina ai lava; e fa‘ae‘e atu fo‘i o latou lima i luga o ē mama‘i, ma fa‘amālōlōina i latou.”

I le 1 Peteru 2:24, fai mai le Tusi Paia ua maea totogi e Iesu lou soifua maloloina manuia ma o le mafuaaga lea e tatau ai ona e inoino i ma’i ma faama’i. E pei a ona malolo tagata i le ataata lafoia o Peteru (Galuega 5:15) ma avea solosolo mai le tino o Paulo na tuli esea ma’i mai tagata (Galuega 19:12), e finagalo le Atua e taumasuasua le soifua maloloina lelei mai ia te oe ma avea ma auala e malolo ma maua ai e tagata le soifua maloloina manuia. Ou te tatalo ia e soifua i le maloloina manuia lelei i aso uma o lou olaga ma ia tafe atu mai ia te oe i Isi tagata le faauuga faamalolo i ma’i, i le suafa o Iesu. 

Tatalo

Tamā, faamolemole faatumu a’u i le soifua maloloina manuia ia taumasuasua ina ia aua nei ou toe ma’i ma ia maloloina ē mama’i e tauala ia te a’u, i le suafa o Iesu, Amene. 

OPEN HEAVENS

MATALA LE LAGI MO LE ASO SA 3 AOKUSO 2025

(tusia e Pastor EA Adeboye)

Manatu Autu: Tamāoaiga Taumasuasua (Overflowing wealth)

Tauloto -Tusi Paia–Salamo 112:3 “E i lona fale le ‘oloa ma mea e tele; e tumau fo‘i lana amiotonu e fa‘avavau.”

‭‭

Faitauga – Tusi Paia –Sakaria 1:14-17

E lē na o le mauoa e finagalo ai le Atua mo oe. E finagalo fo’i ia fa’atumulia oe ma taumasuasua I le tamāoaiga. I le 2 Nofoaiga Tupu 1:6-15; o loo faamau ai I le Tusi Paia o Solomona sa tele nauā lona tamāoaiga na ia te ia ario ma auro I Ierusalema e pei o ma’a. E ui sa na o le poto na ole atu ai Solomona I le Atua na te faamasinoina ai Isaraelu, ae na foai e le Atua ia te ia le oloa ma le tamāoaiga atoa ma le poto.

Fai mai le Salamo 35:27. “Ia pepese ma taufai‘oli‘oli o ē loto i la‘u amiotonu; ‘ia fai ane pea lava i latou, “‘Ia vi‘ia le ALI‘I, o lē ‘ua finagalo ‘ia manuia lana ‘au‘auna.”

E fiafia le Atua I le manuia o ana auauna. E mafai ona filifili le Atua e faatumu oe I le tamāoaiga peita’i na te lē faia I se tagata e manatu lava ia na o ia. Ina ua ia avatu ia Solomona le tamāoaiga tele nauā, na maua ona e lei ole Solomona I se mea tau o ia lava, peita’i na ole mo le lelei o tagata o le Atua. E le avatua e le Atua ia te oe le oa ma le tamāoaiga taumasuasua pe a e lē alofa i ona tagata ma filiga i lana galuega i le lalolagi. Afai o lou mana’o ia maua le tamāoaiga tau lava o oe ma lou aiga poo le faalialia vale ai i tagata, e lē tatalaina e le Atua punāvai i le tamāoaiga taumasuasua mo oe.

A silafia e le Atua e mafai ona ia faamoemoeina oe e faaaoga punaoa na te avatu mo le faalauteleina o lona mālō I le lalolagi; o le a ia faamanuia ia te oe i le oloa faula’i; Na ia faamanuia ia Aperaamo i le oloa tulu’i ma avea ia o se tagata taualoa aua na ia silafia e mafai ona avea Aperaamo ma faamanuiaga I le lalolagi atoa (Kenese 18:17-19). E mafai ona faamoemoeina oe e le Atua I le tamāoaiga taumasuasua?

Sa ou malaga I Gibraltar i se taimi, ma sa ou fiafia i se avanoa na o’u matamata ai i nofoaga e faatosina atu i ai tagata tafafao, e pei o le Papa o Gibraltar ma isi. Na faafuasei ona o’u vaaia se nofoaga na uma ai lo’u fiafia, o se faletapuai o tagata Mosalemi sa fausia i totonu o lea nofoaga, o lona tau e tusa ma le tele o miliona pauni Peretania. Ina ua ‘ou fesili sa ou iloa ai na o ni nai tagata toaitiiti e fa’aaogaina lea faletapuai ae toatasi le tagata na faatupea le fauina le fale. Sa ou faliu ma fesili i le Atua, “Le Alii e, o le a lenei?” O le tali na o’u maua mai le Atua, “O outou o ni tagata faiaga tele! aemaise lava outou tagata Nigeria, o nisi o outou e fefefe e manuia. A outou tatalo, ‘Le Atua e, faamanuia mai a’u; pau la outou tatalo o se miliona se tasi. E le o i ai sa outou fuafuaga e liliu le lalolagi atoa mo Iesu Keriso.’ 

Le au pele e, a mumū i lou loto se galala e faalautele le mālō o le Atua, o le a foai mai e le Atua ia te oe le tamaoaiga taumasuasua, i le suafa o Iesu, Amene.

OPEN HEAVENS

MATALA LE LAGI MO LE ASO TOONAI 2 AOKUSO 2025

(tusia e Pastor EA Adeboye)

Manatu Autu: O le faavalevalea o le agasala (The foolishness of sin)

Tauloto -Tusi Paia–Faataoto 14:34 “O le amiotonu e vi‘ia ai le nu‘u; a o le agasala, o le luma lea o le nu‘u.”

‭‭

Faitauga – Tusi Paia –Iosua 7:1-26

A o le’i avea a’u ma kerisiano, sa o’u manatu ou te poto. Ua avea a’u o se faiaoga i se Iunivesite, o lea na o’u faapea ai ua o’u iloa sina mea, sa avea fo’i a’u ma tagata taalo, peita’i e tele taimi na faata’otolia ai a’u I le fa’ama’i o le malaria. Sa ou maua se totogi lelei o se faiaoga i le Iunivesite, peita’i ona sa o’u fefe i le feoai o taavale i totonu o Lagos, sa fai ai sa’u ave taavale. Ou te totogia I le amataga o le masina, ae o’o ifo i le ogatotonu o le masina ua o’u toe aitalafu i le tupe a le ave taavale e utu ai la’u penisini. Sa faigatā mea uma aua fai mai le tusi o Isaia 3:11; ua faataga e le Atua faigata i e agasala. Ou te mautinoa afai e te silasila i faamaumauga a foma’i o le falema’i i totonu o le Iunivesite o Lagos, o le a e vaaia ai le lapoa o lo’u faila auā oka so matou mama’i so’o, o a’u, lo’u toalua ma la’u fanau. Peita’i talu ona tu’u lo’u ola i le Atua i le 1973, ua maloloina uma lo matou aiga e o’o mai i le asō e ala i lona alofa tunoa. 

Ua lē toe alu vale a’u tupe ina ua o’u lē toe ola i le agasala. A o le’i fa’aolaina lo’u olaga e te maua uma ituaiga ava malosi i lo’u fale. So’ose taimi e asiasi mai ai a’u uo latou te fai mai, “E lē mafai ona o matou o loa i luma o le maota e aunoa ma se faatalofa i le tupu.” Na omai moni lava e inu auā o a’u sa pei o le tupu o ava malosi. Ina ua faaolaina lo’u olaga, na omai pea a’u uo ae a manana’o mai i ava malosi ou te fai i ai, “Faamalie atu, ua lē toe ia te a’u ava malosi na o vai inu suamalie e maua.” Sa o latou lē fiafia, ma ua ta’ito’atasi ona lē toe vaaia a’u uo tuai peita’i na suia i latou e le Atua i uso ma tuafafine ia Keriso. E amata loa ona e soifua i se olaga faapaiaina o le a feliuaina e le Atua mea uma mo le lelei o lou olaga.

O le agasala e masani lava ona sili atu mea na te ave na i lo’o mea e maua e tagata. Ina ua ta’ita’ia e Iosua Isaraelu e faatoilalo Ieriko, na sologa lelei mea uma auā sa leai se agasala i le togalauapiga a le nuu. Peita’i o le taimi lava na ave ai e Akana mea faatoina na amata ai ona faatoilaloina le nuu o Isaraelu. Na matua fasia i latou e le nuu to’aitiiti o Ai ma o latou sosola ese ai i luma o tagata o Ai (Iosua 7:1-14). O le agasala e tupu ai le matagā ma le faalumaina i e fai le agasala.

Le au Pele e, o le valea lou faia o le agasala. Taofi mau Afioga Paia a le Atua i lou loto ina ia e manumalō ai i faaosoosoga e si’osi’omia oe (Salamo 119:11) ma sola mamao ese mai mea leaga eseese uma lava (Tesalonia 5:22). O’u te tatalo ia avatu e le Atua Silisiliese ia te oe le alofa tunoa e faatoilalo ai tofotofoga uma i le suafa o Iesu.

Tatalo.

Tamā faamolemole fesoasoani mai ia te a’u ia ou ola mo oe nei ma aso uma i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 1 AOKUSO 2025

(tusia e Pastor EA Adeboye)

Manatu Autu: Tatalo mo ou tuaoi ma le nuu(Prayers for your neighbourhood)

Tauloto -Tusi Paia–Kalatia 6:2 “Ia ‘outou fesui ‘iā ‘outou avega e ‘ave, ma ia fa‘apea ‘ona ‘outou faia le tulafono a Keriso.”

‭‭

Faitauga – Tusi Paia –Roma 12:15-16

Tatalo mo tatou tuaoi ma nuu.

1. Tamā, ou te faafetai ia te oe  mo ou tuaoi, lo matou nuu, ma i latou uma o nonofo ai. Faafetai mo lau puipuiga faifaipea iai matou. 
2. Tamā, faamolemole ia faaauau ona e puipui i o’u tuaoi uma mai le tulaga lamatia. Ia faaumatia fuafuaga uma a le tiapolo e faasagatau mai iai matou, i le suafa o Iesu. 
3. Tamā, faamolemole ia faia pea lou finagalo i ou tuaoi ma lo matou nuu. Fesoasoani mai ina ia matou ola pea i le filemu ma le loto gatasi, i le suafa o Iesu. 
4. Tamā, faamolemole fesoasoani mai ina ia matou alolofa ia te oe ma faapena foi le tasi i le Isi i la matou nuu. Faamolemole ia nofo tupu le alofa iai matou i le suafa o Iesu. 
5. Tamā, faamolemole fesoasoani i tamaiti i lo matou pitonuu ma le nuu, ina ia tutupu ae ma avea ma tagatanuu lelei. Fesoasoani i o latou matua ma faiaoga e aoao i latou e tusa ma lou finagalo, i le suafa o Iesu.
6. Tamā, faamolemole fesoasoani i matou tuaoi uma o loo feagai ma luitau i vaega tau tupe, lagona, le mafaufau, i faaipoipoga ma soo se vaega o latou olaga. Faamolemole ia e auina atu se fesoasoani iai latou i le asō, i le suafa o Iesu. 
7. Tamā, faamolemole saunia au nei ma ou tuaoi, ia avea ma se faamanuiaga i lo’u atunuu ma le lalolagi. Foai mai tagata ma punaoa e manuia ai lo matou nuu, atunuu ma le lalolagi. 
8. Tamā, faamolemole puipui mai ou tuaoi ma le matou nuu mai faamai pipisi. Fesoasoani mai ina ia matou malolosi ma manuia i o matou mafaufau ma le tino, i le suafa o Iesu. 
9. Tamā, faamolemole fesoasoani i le malo ia faatino faiga faavae e oo mai ai le alu alu i luma i o matou tuaoi ma le nuu. Ia matou maua mea uma e mafai ai ona matou nonofo ma le filemu, tulaga lelei ma le manuia faulai, i le suafa o Iesu. 
10. Tamā, faamolemole ia tausia ma puipui tagata uma o loo manaomia se fesoasoani i la matou nuu e pei o tagata matutua, o i latou ua leai ni matua, tagata e lē atoatoa le malosi i le tino ma le mafaufau, tagata mama’i ma faapena. Faamolemole auina atu tagata talafeagai e fesoasoani iai latou i le suafa o Iesu. 
11. Tamā, faamolemole ia auina mai se faaolaolaga tele i lo’u nuu ma tuaoi. Foai i tagata e lei tuuina atu o latou ola ia te oe, se avanoa e feiloai ai ma lau afio, ia faaolaina agaga ma faasaolotoina ē ua saisaitia, i le suafa o Iesu. 
12. Tamā, ia tafiesea mai o matou tuaoi ma le nuu soo se saisiatiaga i mea tau fuaalau faasāina. Ia talepe pā puipui uma ua fausia e le tiapolo i la matou nuu ma tuaoi, i le suafa o Iesu. O le tatalo lea e ala atu ia Iesu Keriso, Amene.   

OPEN HEAVENS

MATALA LE LAGI MO LE ASO TOFI 31 IULAI 2025

(tusia e Pastor EA Adeboye)

Manatu Autu: O le paolo o le Atua Malosi (The Shadow of the Almighty)

Tauloto -Tusi Paia–Salamo 84:11  “Auā o le ALI‘I le Atua o le lā lava ia ma le talitā; e foa‘iina mai e le ALI‘I le alofa tunoa ma le manuia e le tāofia e ia se mea lelei i ē ‘ua sao lo latou sāvavali.”

‭‭

Faitauga – Tusi Paia –Salamo 91:1-16

E iai le tulaga ese o le paolo poo le ataata, e leai se paolo pe a iai le malamalama. A pouliuli foi, e leai se paolo. 

I le Malaki 4:2, na ia faaigoaina Iesu o le Lā o le amiotonu. A e faitau i le Ioane 5:2-9, e te vaai ai i le tala o le tamaloa na ma’i mo le 38 tausaga ma ua tuulafoaia e tagata. A’o taoto i le palapala e leai sona fesoasoani, na faafuaseia ona lafoia o ia e le ataata. Ina ua siitia ane ona fofoga, na ia iloa atu le Lā o le amiotonu. E lei leva, ae tu i luga ma ua iai i le malumalu (Ioane 5:14). 

O le tamaloa na ulutinoina e temoni ua faasaolotoina mai le faapologaina e temoni ina ua ia feiloai ma le Lā o le amiotonu (Mareko 5:1-15). E lei iai se faamoemoe o le fafine ma’i punatoto e faamalolōina o ia ma le atoatoa seia oo ina sau i lalo o le paolo o le Atua malosi. O le 12 tausaga na ui ai I tigā, lē fiafia ma faanoanoaga, na faamutaina i le taimi na feiloai ai ma le Lā o le amiotonu (Mareko 5:25-34). 

I le tauloto mai le Tusi Paia o le asō, na faamatalaina e Tavita le Atua o le Lā ma le talitā. O le La e aveesea le pogisa mai lou olaga ma avatu ia te oe le manumalo ma le atoatoaga, ae o le talitā, e na te puipui ia te oe  mai amioleaga uma ma faasao I lou agaga. Na ui ai Tavita i le avea o le Atua ma ona Lā ma le talitā ao ia sola ese ma Saulo. Leitioa fai mai i le Salamo 37:40, e fesoasoani le Atua ma faasaoina ona tagata mai le amioleaga aua latou te faatuatua ia te ia. Na o i latou e nonofo i le mea lilo o iai le Silisili Ese e mafai ona mau i lalo o le  paolo o Lē e ona le malosi uma lava ma talai atu lea ituaiga  faasaolotoga (Salamo 91:1). 

O le mealilo o le Silisili Ese o se nofoaga o talanoaga vavalalata ma le Atua, o se nofoaga e te fausia ai se mafutaga vavalalata ma ia. E le gata i lea, o le nofoaga lilo, e na te faailoa atu ai ia te oe mea lilo e te manumalo ai i le fili. Na iloa e Elisaia talanoaga faalilolilo a le Tupu o Suria aua sa iai sana mafutaga vavalalata ma le Atua (2Tupu 6:8-12). Afai e te fia mau i lalo o le paolo o Keriso, e tatau ona e nofo i le mea lilo. 

Le au pele e, o e nofo ea i le mealilo o iai le Silisili Ese? Na o i latou e ola faapaiaina ma ave le faamuamua e mafuta ma le Atua e mafai ona nofo ai iina. E le mafai e tagata agasala ona mau i le mea lilo, ma o le mafuaaga lea, afai e te lei fanaufouina, pe o ē taaalo pea i le agasala, salamo nei ma e sau i lalo o le paolo o le Atua Malosi. 

Tatalo

Tama, faamolemole fesoasoani mai ia te au ina ia ou nofo i le mea lilo o e iai, ina ia ou mau i lalo o lou paolo, i le suafa o Iesu, Amene.