Samoan Devotional

OPEN HEAVENS

MATALA LE LAGI MO LE ASO TOFI 30 IULAI 2025

(tusia e Pastor EA Adeboye)

Manatu Autu: O le Atua e fa’afaula’i(All sufficient God)

Tauloto -Tusi Paia–2 Korinito 9:8  “E mafai fo‘i e le Atua ‘ona fa‘afaula‘i ‘iā te ‘outou o mea alofa uma; o lo‘o fa‘alavaina i aso uma o mea uma ‘iā te ‘outou i mea uma lava, ‘ina ‘ia faula‘i ‘iā te ‘outou o galuega lelei uma.”

‭‭

Faitauga – Tusi Paia –Salamo 23:1-6

O le faamaumauga muamua o le faailoa mai o le Atua i le tagata, o lona suafa i le Kenese 17:1  ua fetalai mai,  “O a‘u o le Atua e ou le malosi uma lava”. E masani foi ona faamatalaina, o le ‘Atua e faulai ma sili atu i mea manaomia’. E iai foi nisi tagata popoto o le Tusi Paia o faapea mai e iai isi uiga loloto o lea Upu e faamatalaina ai le Atua o le punaoa e tausia i tatou. O loo atagia ai o loo faapea mai le Atua, ‘e mafai ona e utuvai ma maua mea uma e te manaomia mai ia te ia mo lou tuputupu ae, aemaise se olaga e malie ai le loto.’

O lou Atua o le Atua e faafaulai. Fai mai Tavita i le Salamo 23:1 “O le ALI‘I, o lo‘u leoleo mamoe o ia; e leai se mea ‘ou te mativa ai.”. Fai mai le Filipi 4:19 “A o lo‘u Atua e fa‘a‘atoa e ia ‘iā te ‘outou mea uma e matitiva ai ‘outou, e tusa ma le faula‘i o lona vi‘iga, ‘iā Keriso Iesu.”

Fai mai foi le Filipi 4:13 “‘Ou te mafaia mea uma lava ‘ona o ia ‘ua fa‘amalosi mai ‘iā te a‘u.”  O nei fuaitau e tele e aumai ai ia te a’u le faamaoniga, afai ou te fesootai i le Atua e faafaulai, e lē mafai ona ou mativa i se mea. 

E na te faaopoopo ia tei tatou faamanuiaga (Salamo 68:19). E na te foai mai faamanuiaga mo aso uma. Afai e finagalo o ia e foai atu mea o loo e manaomia mo se aso, e na te faaaogaina soo se auala. I le 1956, sa ou nofo ma so’u tausoga I se tasi o taulaga I Nigeria I Sasae. O lou tausoga e tā tigipalau ma e pau le vaega e maua ai sana tupe pe a valaaulia mai e tagata e ta tigipalau. A leai ni valaaulia, e leai se tupe e maua, ona ma fiaaai lea. E iai se aso ua matuā ma fiaaai ai lava, ma ua ma naunau e maua sona valaaulia e ta tigipalau. E lei leva ae sau se teine i lo ma fale ma se ipu tele o tuu mai lona ulu, ua ia tuu i lalo ma faapea mai, ‘fai mai lo’u uso e avatu le meaai lea mo oulua’. Ua fai atu lo’u tausoga, ‘ou te leiloa lou uso’. Ae tali mai le teine, ‘ae iloa la oe e lo’u uso’ ua faliu ma alu loa. Na ona alu ese atu lava, ua ma tatalaina le ipu ma maua ai ni ufi ma le supo moa o iai. Ua matua ma fia aai ma o lea na vave ona ma aai. Ao ma aai i ponaivi moa, na toe foi mai le teine ma faapea mai, ‘faamalie atu e sese le fale na ou sau iai’, peitai ua tuai. A finagalo le Atua e foai mai se mea o loo e manaomia, e mafai ona ia faaui mai ia te oe faamanuiaga e foliga e lē oe e ona. 

Le au pele e, aua e te popole i mea o loo e manaomia. Faatuatua ma usitai i le Atua o le faafaulai, ona e maua lea o mea uma o lo’o e manaomia ma sili atu. E leai se gata i mea e maua mai le Atua, tutumau ma pipii pea ia te ia, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 29 IULAI 2025

(tusia e Pastor EA Adeboye)

Manatu Autu: O lou lumanai (Your future)

Tauloto -Tusi Paia–Faataoto 4:18  “A o le ala o ē amiotonu, e tusa ia ma le malamalama o le ao, o lo‘o tupu pea lona malamalama e o‘o i le totonu o le la.”

‭‭

Faitauga – Tusi Paia –2 Korinito 5:16-17

I aso e lua ua tuanai, sa ou talanoa atu i lou tuanai ma lou taimi nei. O le a faauma lenei a’oa’oga i le talanoaina o lou lumanai ma le a’afiaga e afua mai I lou taimi nei.    

I lou tulaga o se tagata faatuatua, ua maua’a lou lumanai aua e pule le Atua i lou tuanai, ma le taimi nei, faapea ma lou lumanai. O ia o le Alefa ma le Omeka! O le mafua’aga lena e faapea mai ai le tusi o Kolose 1:27-“o Keriso lea o lo‘o ‘iā te ‘outou, o le fa‘amoemoe i le manuia.”

‭‭Ae le gata i lea o loo faapea mai le tusi o Isaia 3:10 –“Fai atu ia i lē ‘ua amiotonu, e manuia o ia”. O folafolaga nei mai le Atua, e faamaonia ai ia te oe, e manuia lou lumanai.

E lua vaega e fa’avasega ai lou lumanai: o lou lumanai i le lalolagi ma lou lumanai i le ola e faavavau. A fai o oe o se Kerisiano fa’amaoni, e le tatau ona e atugalu mo a taeao aua foi, ua folafolaina e le Atua lona tausia o oe i le lalolagi. I le tusi o Ioane 14:13 - o lo’o faapea mai  Iesu, o so’o se mea e te ole atu ai i lona suafa o le a foa’ina ia te oe. O lo’o faapea mai foi o ia i le tusi o Mataio 7 :9-11- po’o le a le tulaga faaletonu o loo tatou iai, e le mafai e se tagata ona tuu atu i a latou fanau ni ma’a pe a latou ole mai i se areto. O lona uiga, e faapefea ona tatou manatu na te le aumaia iai tatou so’o se mea lelei tatou te ole atu ai ia te ia? Afai o oe o se afafine poo se atalii o le Atua, ua folafolaina mai e ia, e leai se mea lelei e te mativa ai i lenei lalolagi.

Ua folafolaina e le Atua lona tausia o oe pe a mavae lenei lalolagi – I le Ioane 14:1-3 o lo’o fetalai Iesu e faapea: “Aua le atuatuvale o ‘outou loto; ‘ia ‘outou fa‘atuatua i le Atua, ‘ia fa‘atuatua mai fo‘i ‘iā te a‘u. E tele mea e nonofo ai i le maota o lo‘u Tamā; ‘ana leai, ‘ua ‘ou fai atu ‘iā te ‘outou; ‘ou te alu e sauni se mea e nonofo ai ‘outou. ‘Āfai fo‘i ‘ou te alu ma sauni se mea e nonofo ai ‘outou, ‘ou te toe sau, ‘ou te talia fo‘i ‘outou ‘ia fa‘atasi ma a‘u; ‘ina ‘ia i ai ‘outou i le mea ‘ou te i ai a‘u.”

‭

I lou tulaga o le alo moni o le Atua, a e tuua lenei lalolagi, o se fale tele I le aai e fausia i le ‘auro mao’i o lo o faatali mai mo oe i le lagi.

Le ‘au pele, afai e te lei tuuina atu lou ola ia Iesu Keriso, o loo e iai i le malo o le pouliuli, ma e faaluaina le leaga mo oe. I le lalolagi, e iai le pule faitalia  a Satani e faatamaia lou ola, aua o loo e iai i lona malo. Ae a o’o foi i le fa’avavau, e lafoai oe i le lepa afi, e mamao ese ma le Atua, o le puna’oa o le filemu, le olioli ma le malamalama. A fai e te lei tuuina atu lou ola ia Iesu, liliu nei ia te ia, aua a I fafo o le Atua, e malaia lou lumanai (Isaia 3:11). A fai o e ia Keriso, ma tumau ia te ia, e manuia lou lumanai, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 28 IULAI 2025

(tusia e Pastor EA Adeboye)

Manatu Autu: O lou taimi nei(Your present)

Tauloto -Tusi Paia–Efeso 5:15  “O lenei, ‘ia fa‘aeteete ‘outou ‘ina ‘ia ‘outou sāvavali ma le fa‘autauta, ‘aua ne‘i fa‘apei o ē vālelea, a ‘ia fa‘apei o ē popoto;”

‭‭

Faitauga – Tusi Paia –Kenese 25:27-34

O lou taimi nei, e avea ma ou tuanai i le lumanai. E pei a ona avea filifiliga ma mea na ui ai I le tuanai e fanau mai ai lou taimi nei, e faapena foi ona avea mea o loo e ui ai ma filifiliga i le taimi nei, e fanau mai ai lou lumanai. O le mafuaaga lea e tatau ai ona e mafaufau lelei ma faaeteeete i le ituaiga soifuaga o loo e ola ai i le taimi nei ia fanau mai ai se lumanai lelei mo oe. Fai mai le Efeso 5:15-16 ‘ia ‘tatou sāvavali ma le fa‘autauta, ‘aua ne‘i fa‘apei o ē vālelea, a ‘ia fa‘apei o ē popoto; ‘ia fa‘aaogāina o tatou aso i lenei olaga, auā o ona po nei ‘ua leaga. I le fuaiupu e sosoo ai, o loo faailoa mai ai le uiga o le savali ma le faautauta:

“O lenei, ‘aua ne‘i fa‘avalea ‘outou, a ‘ia ‘outou iloa le finagalo o le Ali‘i.” Efeso‬ ‭5‬:‭17‬ ‭

O le savali ma le faautauta o le savali ma le poto. O le faataga lea o le poto o le Atua e faatumu lou loto ina ia e maua se malamalama i lou loto i le finagalo o le Atua, ma faia. 

O Esaù o le faataitaiga o se tagata i le Tusi Paia e lei savali ma le poto ma na aafia leaga ai lona lumanai. O ia o le ulumatua a Isaako ma Repeka, ma e tatau ona ia maua faamanuiaga o le ulumatua mai lona tamā. Sa susulu manuia lona lumanai seia oo i le aso na alu ai e tulimanu. E foi mai I le fale ma le fiaai ae o loo fai atu le kuka a lona uso o Iakopo. Na faataga e Esau lona fiaai e faanenefu lona mafaufau ma ia talia le ofo a Iakopo e faatau lona tofi o le ulumatua mo se ipu meaai e pei ona tatou iloa i le faitauga o le Tusi Paia o le asō. E na te lei iloa o lona tofi o le ulumatua na ia faatau atu faatauvaaina, o le fesootaiga lea ma le faamanuiaga o loo faatali mai i lona lumanai. Auā na faatauvaa ia te ia le tofi o le ulumatua, na aveeseina le faamanuiaga ma ia. E tatau ona e soifua i se auala e te lē tausami lou lumanai i le asō. Aua e te faapei o Esau, e lei mafai ona silasila mamao e sili atu i se mea o manaomia, ma ua ia faatagaina le fiaai e lē maua ai se faamanuiaga tumau. 

O lei si tagata e lei savali ma le poto ae faataga mea na ia faia e faaumatia lona lumanai o Reupena. O Reupena o le ulumatua a Iakopo, ma ona o ia o le ulumatua, e agavaa e na te maua uma faamanuiaga. Peitai e lei poto ma ua ia momoe ma toalua a lona tamā. Ua ia faatagaina le manaoga o le tino e faoa e lana fanau faamanuiaga e tele semanu latou te maua. Ina ua lata ina o le a oti lona tamā, e lei maua e ia ma ona suli ni faamanuiaga, ae na latou maua fetuu (Kenese 49:3-4). 

Le au pele e, filifili e savali ma le poto, savali e tusa ma le Upu a le Atua I taimi uma ina ia mafai e oe ma lau fanau ona selesele fua lelei i le lumanai. O mea e te faia i le asō e fua iai taunuuga o lou olaga ma lau fanau i le lumanai. Ia soifua ma le poto, i le suafa o Iesu, Amene. 

OPEN HEAVENS

MATALA LE LAGI MO LE ASO SA 27 IULAI 2025

(tusia e Pastor EA Adeboye)

Manatu Autu: O lou tuanai(Your past)

Tauloto -Tusi Paia–Isaia 43:18-19  “Aua tou te manatua mea na muamua, ‘aua fo‘i le mafaufau i mea anamua. Fa‘auta, ‘ou te faia se mea e fa‘ato‘ā iloa, e tupu a‘e nei lava; tou te lē iloa ‘ea? E moni, ‘ou te faia se ala i le vao lafulafuā, ma vaitafe i le nu‘u naumati.”

‭‭

Faitauga – Tusi Paia –1 Korinito 4:9-10

O le tuana’i e mafai ona faapea o le tinā o le taimi nei. Po o le a lava se tulaga o e i ai i le asō, e mafai ona mafua mai i mea na tutupu i aso ua te’a. Atonu o e ui i ni faigata I le taimi nei ona o ni au faaiuga sesē i aso ua mavae. peita’i o le tala lelei lenei, ‘O lē ua tā’ua o le Alefa ma Omeka’, na te aveesea lou tuana’i faaletonu. Na te fufulu esea ou sesē i le taimi ua alu e ala i lona toto (1 Ioane 1:7). O le ala lea o le fai mai o le tusi 2 Korinito 5:17 o sē ua iā Keriso o le tagata fou ia; ua mavae mea tuai faauta ua faafouina mea uma.

E lē afaina po o a mea na tutupu i lou tagata tuai, o le taimi e te sau ai iā Iesu, na te avatu ai ia te oe se amataga fou. E ulufale atu Ia i lou tuana’i ma toe fetu’una’i mea uma ia galulue mo lou lelei. E le mana’omia e le Atua se minute e su’esu’e ai i lou olaga tuai e fa’asa’osa’o ni sesē. Fai mai le tusi o Fa’aaliga 1:8; ““O a‘u le Alefa ma le Omeka,” ‘ua fetalai mai ai le Ali‘i le Atua, o lo‘o soifua, na soifua fo‘i, o le a afio mai, e ona le malosi uma lava.”

‭‭

O le Atua o le Alefa ma le Omeka, ma e mafai ona Ia toe fo’i i tua I le aso na fai ai le sauniga na faaigoa ai oe, le aso na e fanau mai ai, e o’o i le taimi ae e te lei soifua mai, e liliu ma suia mea uma mo lou lelei.

O nisi tagata o loo feagai nei ma faafitauli ona o o latou igoa. O nisi o i latou na faaigoa i igoa e atagia ai mea na tutupu ia i latou, po o latou aiga i le taimi na fananau mai ai. Fa’ata’ita’iga, afai o faaigoa se tagata iā Esugbogo (o lona uiga o satani ua faamamaluina, i le gagana Yoruba), o lea tagata e lē mafai ona ia tu’uai’a satani mo le faapologaina o ia aua o le igoa o le uso o loo valaaulia satani e pule ia lava i le uso. O tagata ia e itiiti lava se mea e mafai ona ia faia i aafiaga na tutupu a’o le’i fananau mai i le lalolagi poo le faaigoaina o i latou. Peita’i e i ai lē e mafaia ona toe fo’i i tua i lea taimi ma suia tulaga o mea. O le Atua na te mafaia ona feliua’i ma suia tulaga e lē talafeagai ma lona finagalo ma lona faamoemoe mo oe.

Le au pele e, o le Atua o loo umia le ki i lou tuana’i. Tagi atu nei ia te Ia e suia so’ose mea leaga o lou tuana’i o lo o faalavelave i lana polokalame ma lona faamoemoe mo lou olaga, e pei ona faia e Iapesa i le faitauga mai le Tusi Paia o le asō. Ou te tatalo ia soloiesea e lo’u Tamā maasiasi ma faaletonu uma i lou tuana’i o loo faalavelave i lou taimi nei, ma ia avatu ia te oe se amataga fou i le suafa o Iesu, Amene.

OPEN HEAVENS

MATALA LE LAGI MO LE ASO TOONAI 26 IULAI 2025

(tusia e Pastor EA Adeboye)

Manatu Autu: Tu’u saoloto mai fetuu tuufaasolo i augatupulaga 2 (Freedom from generational curses 2)

Tauloto -Tusi Paia–Isaia 10:27 “O lea aso fo‘i e ‘ave‘eseina ai lana avega i lou fuatāua ma lona amo fo‘i i lou ua; e gausia fo‘i le amo ‘ona o lē fa‘au‘uina.”

‭‭

Faitauga – Tusi Paia –2 Korinito 3:17-18

O le asō o le a fa’ai’u la’u talanoaga faatatau i fetu’u tu’u faasolo ma o latou aafiaga. O ia fetu’u e fa’asolosolo aafia ai augā tupulaga e tele, ma a mana’o se isi e aveese ia fetu’u, e lē mafai ona ia faia e aunoa ma se taua. Fa’ata’ita’iga; ina ua taumafai Mose e fa’asa’oloto Isaraelu mai lima o tagata Aikupito, na musu Farao e tu’u i latou e o. E sefulu mala na fa’ao’o e le Atua iā Aikupito fa’ato’ā māluelue le loto o Farao e fa’asa’oloto le nu’u o Isaraelu. E ui fo’i la ua o le fanauga Isaraelu, na toe tuliloa lava e Farao ma lana ‘autau e toe fa’afo’i atu i latou e fai ma pologa. Na faapologaina e Aikupito Isaraelu mo le tele o augā tupulaga - e tusa ma le fa selau tolusefulu tausaga (Esoto 12:40) ma e le’i manana’o Aikupito e fa’asa’oloto i latou. Na fa’aumatia e le Atua Farao ma ana itu taua uma ina ia fa’asa’oloto Isaraelu (Esoto 14:27-28). Afai o i ai ni fetu’u tu’u faasolo o faasagatau ia te oe, ou te poloaiina uma i latou ia fa’alēaogaina I le asō I le suafa o Iesu.

Ina ia fa’asa’oloto mai i fetu’u tu’u fa’asolo i augā tupulaga, e mafai ona o tagata i le aufaigaluega moni a le Atua latou te fa’alēaogaina nei fetu’u. Peita’i afai e fa’aauau pea ona ola i se olaga agasala e mafai ona toe fo’i mai fetu’u. Manatu pe ana fai na uma ona fa’a saoloto Isaraelu, ae fulitua i latou Ia Mose lo latou sootaga I le Atua, semanū e toe maua i latou e Aikupito. O le tulaga aupito tāua e manaomia e motusia ai e faavavau fetu’u tu’u fa’asolo i augā tupulaga, o le tumau o tagata i le Atua.

E mafai fo’i e tagata ona talepe ma fa’alēaogā e i latou lava fetu’u tu’u fa’asolo i augā tupulaga pe afai e avea i latou ma tagata e mafana mafutaga ma Keriso. O le uiga moni lava o le fuaiupu tauloto o le asō e faapea; a fa’aauau pea ona fa’atumulia oe e Agaga Paia o le a e tupu i le Agaga ma lē toe mafai ai e so’ose malosiaga faa temoni ona faalavelave ia te oe. Ina ua uma ona faamalolō e Iesu le tagata I le vai o Petesa, na ia apoapoai ia te ia aua ne’i toe fo’i i le agasala ne’i sili atu se leaga e o’o iā te ia (Ioane 5:14). O le agasala na te tatalaina pea e lē aunoa le faitotoa i fetu’u tu’u fa’asolo i augā tupulaga. E ao ona e ola faapaiaina aua e toe fo’i mai le tiapolo e vaai po ua maua sona avanoa e toe faapologaina ai oe (Ioane 14:30). E tatau fo’i ona e fiafia i le tatalo ma le anapogi ma le filigā auā o nisi temoni na o le tatalo ma le anapogi e mafai ai ona o ese (Mareko 9:29). E tatau fo’i ona su’esu’e lau Tusi Paia auā o le Upu moni e tu’u saoloto ai outou (Ioane 8:32) ma aua ne’i tuua le mafutaga a le au uso auā e to’atasi e tulia le to’a afe ae toalua e mafai ona tutuli le sefulu o afe (Eperu 10:25, Teuterenome 32;30). A e faia faapea, e leai se fetu’u tu’u fa’asolo i augā tupulaga poo se isi lava fetu’u e mafai ona faaleaga ia te oe, o lou aiga ma i latou uma e fesootai ia te oe. 

Tatalo

Tamā faamolemole fa’asa’oloto mai ia te a’u ma lo’u aiga mai fetu’u tu’u fa’asolo i augā tupulaga poo nisi lava fetu’u i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 25 IULAI 2025

(tusia e Pastor EA Adeboye)

Manatu Autu: Tu’u saoloto mai fetuu tuufaasolo i augatupulaga 1 (Freedom from generational curses 1)

Tauloto -Tusi Paia–Ioane 8:36 “O lenei pe ā tu‘u sa‘oloto ‘outou e le Atali‘i, ‘ona sa‘oloto fa‘amaoni ai lea o ‘outou.”

‭‭

Faitauga – Tusi Paia –Kolose 2:14-15

O nei aso, e toatele tagata o loo puapuagatia i fetuu tuufaasolo mai augatupulaga. E faigata ona latou manuia i aso uma, peitai e peiseai o iai se malosiaga o loo tetee iai latou. Afai o le tala lea o lou olaga, ou te folafola atu lou saolotoga i le asō, i le suafa o Iesu. 

Afai e te maitauina ni mea lē lelei  ma faaletonu o tutupu i lou aiga e foliga mai e lē mafai e seisi ona pulea, e leiloa poo ni fetuu tuufaasolo . O se vaega taua i fetuu tuufaasolo i augatupulaga, e faatonutonu e temoni ona ua maea ona latou fausia ‘olo po’o pa puipui malolosi i lea aiga. Ona o le malosi o nei ‘olo ua fausia i le aiga, e i’u ina toatele tagata o le aiga e lavevea ai. Ua latou vaai atu i aafiaga o fetuu, ua manatu o se mea masani i le aiga ma è lē taumafai e tetee iai. Ina ua fasiotia e Mose le Aikupito e faasaoina le Iutaia, o le Iutaia lava lea e tasi na tetee ia te ia ma faailoa le mea na tupu. Ua latou alolofa i tagata o loo faapologaina i latou e ui o loo puapuagatia ai. Na latou misa ma Mose i le vao i le tele o taimi ona o le faasaoloto fua o latou. E talanoa mai lava i meaai sa aai ai i Aikupito e oo i tuugamau (Numera 11:5, Esoto 14:11). O loo manino e mananao e oti i le tulaga pologa e pei foi ona maliliu ai o latou tuaā. O le ‘olo ua fausia e le tiapolo ua pulea o latou mafaufau. 

Le au pele e, afai e te vaai atu i se mea lē lelei o tuufaasolo i lou aiga, faamolemole aua e te taliaina o se tulaga masani. Aua e te faatagaina fetuu e pulea lou mafaufau, ae ia e filiga e talepe ma tuu saoloto oe mai na fetuu. E ono ui ai lou tama, tina ma i latou e matutua atu ia te oe, peitai e le faapea e tatau ona e ui ai foi ma oe. 

E iai se alii talavou e 39 tausaga ua lata ona atoa le 40. Na sau ia te au mo tatalo ma faapea mai e leai se alii i lona aiga e ola ma sili atu ma le 40 tausaga. Fai mai o ia o le alii pito matua i lona aiga ao lea ua lata ona atoa lona 40. Na fefe o le a oti foi o ia ma o le mafuaaga lea na sau ai e vaai au. Na ma tatalo ma o loo soifua pea o ia e o’o mai I le asō e sili ma le 30 tausaga mulimuli ane. Ana faapea e lē musu e fano i fetuu tuufaasolo i augatupulaga a lona aiga ae sauni o le a oti, semanu e lē mafai ona faasaolotoina. Afai o loo e maitauina ni fetuu tuufaasolo i lou aiga, gauai i le Atua i le asō, tetee atu i le tiapolo ona ia sola ese lea ma oe (Iakopo 4:7). 

Tatalo

Ou te pulea lo’u olaga, ma ou te talepe ni olo ma pa puipui ua tuu e le tiapolo i lo’u olaga, i le asō, i le suafa o Iesu e tatalo atu ai nei, Amene. 

OPEN HEAVENS

MATALA LE LAGI MO LE ASO TOFI 24 IULAI 2025

(tusia e Pastor EA Adeboye)

Manatu Autu: Faauu ma tatalo i luga o lau fanau  (Anoint and pray over your children)

Tauloto -Tusi Paia–Ioelu 2:28 “Mulimuli ane, e i‘u ‘ina ‘ou liligi ifo ai lo‘u Agaga i luga i tagata uma; ona perofeta ai lea o ‘outou atali‘i ma o ‘outou afafine, e fai miti o ‘outou toeaina, e iloa fa‘aaliga e o ‘outou taulele‘a.”

‭‭

Faitauga – Tusi Paia –1 Samuelu 16:12-13

E le mafai e matua ona tausi ma aoao latou fanau na o I latou. E mafua ona e tele vaega e aafia ai le faamoemoega o le olaga o se tamaitiiti e lē mafai e matua ona pule ai. O nisi o ia vaega e aofia ai le siosiomaga o loo tuputupu ane ai le tamaitiiti, o tagata o loo latou feagai, o le aiga e tupuga mai ai e oo i malosiaga i le agaga o loo siomia lea aiga aemaise le tamaitiiti. O le mafuaaga lea e tatau ai i  matua ona tatalo mo latou ia faifaipea ma saili le fesoasoani mai le Atua ina ia aoao ma tausia lelei le fanau.  E tatau foi i matou ona faauu ma tatalo faifaipea i luga o latou fanau  e puipuia i latou mai agaga leaga. 

I se taimi laitiiti o loo ou ola ai i le lalolagi nei, ua ou vaai i le tiapolo o galue mai i soo se auala amioleaga e osofaia ai olaga o le fanau. O le tele o taimi e tuaia e matua le fanau mo le lē toaga ma lē taumafai pea, poo le paiē, pe a lē tulaga lelei mai I soo se vaega, aemaise le aoga. E amata ona fiu ona o le tele o tupe ua alu i le tau faaa’ogaina ae leai se tulaga lelei o tino mai. E latou te le iloa o loo iai agaga leaga o loo taofia le alu alu i luma o le tamaitiiti. E mafai i se tamaitiiti aoga ona toaga e fai ana mea aoga ae oo i le taimi o le suega, ua matua galo uma mea na suesueina.

O le faauuga e mafai ona vavaeeseina se tamaitiiti mo mea silisili. E ui o Tavita o lona faamoemoega o le avea ma tupu, peitai e lei mafai ona amata seia oo ina faauuina. Ina ua maea ona faauuina, fai mai le Tusi Paia ona osofia lea o Tavita e le Agaga o le Atua e amata mai lea aso (1 Samuelu 17:48-51). I le mataupu e sosoo ai, na fasiotia e Tavita le sauai Filisitia o Koliata ma avea ai o ia ma tagata tautaua i le malò atoa (1Samuelu 17:48-51). Afai o oe o se matua, ia e tautala ma folafola apoapoaiga a le Atua i luga o lau fanau ma faauu iai latou ia faifaipea. Ia latou iloa o le Atua e pule iai latou ma o soo seisi e tago ma pa’i iai latou, e pa’i foi i le ioimata o le Atua (Sakaria 2:8). Ou te tatalo ia puipui e le Atua fanau uma mai soo se osofaiga a le fili, i le suafa o Iesu. O le faauuga ma le tatalo faifaipea i luga o le fanau e puipuia ai i latou mai so’o se fuafuaga a le tiapolo ina ia saunia i latou mo mea silisili, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 23 IULAI 2025

(tusia e Pastor EA Adeboye)

Manatu Autu: Saolotoga mai le fa‘ato‘ilaloina (Freedom from oppression)

Tauloto -Tusi Paia–Galuega 10:38 “o Iesu o le Nasareta, o lē na fa‘au‘uina e le Atua i le Agaga Pa‘ia ma le mana, o ia sa femaliua‘i ma agalelei ma fa‘amālōlō atu i ē na fa‘ato‘ilaloina uma lava e le tiapolo; auā sa ‘iā te ia le Atua.”

‭‭

Faitauga – Tusi Paia –Mareko 5:1-20

Sa ou asiasi i se aiga, ma ou te lē iloa, o le tinā o le aiga o se taulaitu, sa ia faia se feagaiga e fasioti i faiga faatemoni so’o sana tama lona lua e na te fanauina. Sa iai sana tama teine sa ia fuafua e fasioti i le aso na ou alu atu ai. Ao ou sauni e tuua lo latou fale, na aapa mai lenei teineitiiti ia te au ao fafa i le tua o lona tina ma na faaosofia a’u e sii o ia. Faatoa ou iloa mulimuli ane, na o ona matua lava o lenei teineitiiti e mafai ona siia o ia. E pei lava sa musumusu seisi ia te ia e faapea, ‘o le tagata lenei e mafai e le Atua ona faaaoga e faaleaogaina fuafuaga a le tiapolo’. Sa ou siia o ia ma tatalo mo ia, e aunoa ma lo’u iloa le fuafuaga leaga mo ia. ‘Tamā, faamanuia i lenei teineitiiti, ia taumamao le ma’i ma le oti mai ia te ia’. Na faatoilaloina le avega mamafa mai ia te ia i le taimi lava lena. Na faasaoina lona ola ma e lei leva ae tautino e lona tinā ana fuafuaga amioleaga. Ou te tatalo o so’o se avega mamafa a satani i luga o soo se tagata o loo faitau pe faalogo foi i lenei faamalosiau, ia faaumatia nei, i le suafa o Iesu. 

E toatele tagata o loo faatoilalo e temoni. E faigata iai latou ona tetee ma tutuli i nei temoni aua foi o latou o tagata, ao temoni o ni agaga. O le fesili, e faapefea ona e faasagatau atu i se fili e lē mafai ona e iloa atu? O le mea moni, e te manaomia se paaga e mafai ona ia iloa atu lou fili. E tatau ona malosi atu lau paaga i lo lou fili ina ia mafai ona ia faatoilalo i lou fili mo oe. O le Atua o le Agaga ia (Ioane 4:24 ma le 2 Korinito 3:17) o loo faapea mai, o le mea o iai le agaga o le Alii e iai le saolotoga. I nisi faaupuga, a e valaaulia le Atua i le tulaga lena i lou olaga, ona ia faasagatau atu lea mo oe e pei ona ia faia mo le teineitiiti, e mautinoa le manumalo. 

I le faitauga o le Tusi Paia o le asō, o le tamaloa saua I Katara ua matua saisaitia e malosiaga o le pogisā, peitai ina ua oo atu Iesu i le mea ua tupu i lona olaga, e le gata na faasaolotoina, na toe faafoisia le faamoemoega o lona olaga. O soo se mea ua gaoia e le tiapolo mai ia te oe, e toe faafoisia i le asō i le suafa o Iesu. 

Ao iai Iesu i le fogaeleele, sa femaliuai ma agalelei ma faamalolo iai latou ua faatoilaloina e le tiapolo aua sa ia te ia le Atua. A iai le Atua ma oe, e faaumatia uma avega mamafa o le pogisā. Afai o loo e tauaveina soo se ituaiga saisaitiaga I ni vaega o lou olaga, valaaulia Iesu i lou olaga i le aso, ona e fiafia lea i le faasaolotoga atoatoa. Afai e te valaaulia le Atua i se tulaga, o lona mamalu e faaumatia soo se avega mamafa o loo faatoilaloina se tagata, i le suafa o Iesu, Amene.  

OPEN HEAVENS

MATALA LE LAGI MO LE ASO LUA 22 IULAI 2025

(tusia e Pastor EA Adeboye)

Manatu Autu: O ou aso ua i aao o le Atua (Your times are in God’s hands )

Tauloto -Tusi Paia–Tanielu 2:21“O ia fo‘i na te liua tausaga ma tau; e ‘ave‘eseina e ia o tupu, e tofia fo‘i e ia o tupu; Pe foa‘iina mai e ia le poto i ē o popoto, ma le malamalama i ē o iloa mafaufau.”

‭‭

Faitauga – Tusi Paia –Salamo 31:14-21

I tausaga ua tuanai,sa iai se tamaitai sa tuu lona faatuatua i le Atua mo sona tofi i ni tausaga se tele, seia oo ina matua, ua le toe fanau. I se tasi o matou sauniga faa Evagelia, sa ou faapea atu I tagata uma, ia latou ole atu  I le Atua mo soo se mea latou te mana’omia, ona faasaga lea o le tamaitai lea i le Atua ma fapea atu: “Le Alii e, ou te le toe faalavelave atu ia te oe i so’u to’alua. Ua leai se aoga aua ua le mafai ona ou toe fanau. Ae ou te auauna pea ia te oe.” Na lagona e le Atua Matautia lenei tatalo, ma e lei leva tele ae o’o mai se tamaloa ia te ia ma faapea atu: “Ua fetalai mai le Ali’I, ia avea oe ma a’u ava”. Ua faate’ia o ia, ma fai i le tamaloa e alu e toe tatalo e faamautinoa o sa’o lana faalogo i le Atua. Ae peita’i, sa maumaututu pea o ia, ua maea tatalo ma ua faalogo i le Atua.  Ona ia fesili atu lea, “E te lē mana’o I se fanau? Aua o a’u ua te’a le taimi e mafai ona ou fanau ai.” Ae tali le tamaloa: ‘E le afaina lena tulaga aua e iai la’u fanau. Sa fai muamua lo’u aiga, ua maliu, pau le tulaga o loo ou mana’omi, o se uo ma te nonofo ma avea ma tina mo la’u fanau.” Ona la faaipoipo lea, ma o le tina lenei sa manatu e le mafai ona toe fanau, ua fanauina se masaga I le 9 masina mulimuli ane. E leai se tapula’a i le taimi a le Atua, e mafai ona ia faatelevaveina le taimi pe toe faafoi I tua e tusa ma lona finagalo. 

E u’u e le Atua le taimi, tausaga ma fuata I ona a’ao, ma e mafai ona ia suia e tusa ma lona finagalo. (Tanielu 2:21). A faapea mai tagata ua faagata se tulaga e mafai ona e o’o iai, aua e te amanaiaina. E na o le Atua e iai le upu mulimuli mo lou olaga. O ia o le Alefa ma le Omeka (Faaaliga 1:8). Ina ua faapea mai tagata e le toe fananau Aperaamo ma Sara, sa liliu e le Atua le taimi ma ua faatupuina lo lā ataata. (Kenese 21:6-7) E ui ina manatu tuafafine o Lasalo ua maliu ma ua le toe iai Lasalo, sa taunuu atu Iesu ma fetalai, “O a’u o le toetu ma le ola.” (Ioane 11:25).

A asiasi le Atua i se tagata, e nate toe faafoisia tausaga ua maumau i le soifua o le tagata lena. Afai o e soifua pea ma o le Atua o lou Tamā, e le‘i uma lou taimi. O ou aso o loo I a’ao o le Atua, ma a fai mai e lei uma, aisea e te faapea mai ai ua te’a lou taimi? Ia e ta’utino le Upu a le Atua ae lē o le tulaga o loo e soifua ai nei. E na o le Atua e iai le pule e faagata ai lau mataupu, afai o lena o loo e soifua pea, o lona uiga, e na te lei tapunia, ma e tele pea ni fuafuaga mo lou soifua! Afai o lo’o e soifua pea, e mafai e le Atua ona pulea taimi, o le tau ma aso e alofaina ai oe, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 21 IULAI 2025

(tusia e Pastor EA Adeboye)

Manatu Autu: E Inoino Le Atua I le lē fanau(God Hates barrenness )

Tauloto -Tusi Paia–Isaia 54:1“Ia pese oe na le fafine pā sa le fānau; ‘ia leo tele ma ‘ia ‘alaga fiafia oe sa le fa‘atigā, Auā ‘ua sili ‘ona to‘atele o le fānau a le nofo fua, i le fānau a le nofo tane, ‘ua fetalai mai ai le ALI‘I.”

‭‭

Faitauga – Tusi Paia –Kenese 21:1-7 

I le aso ananafi na ou faamatala atu, e inoino le Atua i le tuulafoaiina. E finagalo o ia, ia avea oe ma sui o se aiga. E moni o le tane ma le avā o se aiga, ae lē gata ai iina. E finagalo o ia I le tane ma le avā ia fanafanau ma ia maua fanau. Afai ua e faaipoipo ma o loo faatali mo se fanau, ia avatu le faamalo aua ua maea le tulaga faatalitali. I le Kenese 1:26-28, na faia e le Atua se poloaiga ia te oe ma a’u ia e uluola ma fanafanau. I le Esoto 23:26, na ia fetalai mai o le a leai se tagata lē fanau i le laueleele ma i le  1 Samuelu 2:5, na ia folafola mai o le fafine pa e na te fanau mai fanau e toafitu. E leiloa poo e faapea mai, ‘Le Atua e, e na o le toatasi lava se tamaitiiti o loo ou ole atu ai’. O le tulaga moni, e mafai ona e maua fanau i le tele ma le aofai e te manao ai ma e pule oe i le numera e gata ai. 

I le tele o tausaga talu ai, sa faia se matou polokalame i se tasi o taulaga i Nigeria. Sa auai atu iai se fafine pa, e lē fanau mo le 12 tausaga ma na talosaga atu ia matou tatalo mo ia ona ua fai atu le aiga o lona toalua o le a tuli ese o ia pe a maea le tausaga e le maua sana tama. Na ou tatalo mo ia ona alu lea. I le tausaga na sosoo ai, na faia foi se matou polokalame i seisi taulaga ma sa umī le laina o tagata o loo mananao ou te tatalo mo latou. Ou te lē iloa o loo iai le fafine lea ma ina ua oo atu le faasologa ia te ia, na taumafai e tautala mai, ae ua le mafai. Na oo ina mafai ona faia mai se upu e tasi, ua faapea mai ‘Iesu’. Ina ua mafai ona tautala, na ia faailoa mai o ia lea na ou tatalo ai i le tausaga ua tuanai. Ona ou iloa lea o le mafuaaga o le tau le mafai ona faia se tala, ua matua fiafia ma loto faafetai aua ua ia fanauina se masaga, ma o o loo ia sapaia  maia I laua I ona lima.  

Le au pele e, e inoino le Atua I le pā ma le lē fanau aua e tetee I lana poloaiga ia uluola ma fanafanau i le Kenese 1:26-28. Afai o loo e iai i se tulaga lē fanafanau ma leai se uluola i le lua ulugalii, tulaga tau tupe, tamaoaiga, tulaga i le mafaufau poo soo se vaega o lou olaga, ou te tatalo ia faia e le Atua se mea mo oe e te pese ai ma le olioli ona o le faulai o ana faamanuiaga ia te oe i vaega uma na, i le suafa o Iesu. E le gata i lea ,a fai o loo e faitau pe faalogo foi I lenei faamalosiau ae o loo e faatali mo se pepe, i le suafa e sili i suafa uma lava, ua matala  lou toala fanau (tulou) alu atu ia ma tauave lau fanau i le suafa o Iesu. Pese ma le olioli aua e lei faia oe e .le Atua e pā ae ia uluola ma fanafanau, i le suafa o Iesu, Amene.