Samoan Devotional

OPEN HEAVENS

MATALA LE LAGI MO LE ASO SA 20 IULAI 2025

(tusia e Pastor EA Adeboye)

Manatu Autu: E Inoino Le Atua I Le Tu’ulafoa’iina (God Hates Loneliness)

Tauloto -Tusi Paia–Salamo 68:6 “O le Atua na te fa‘atagatāina ē ‘ua ausage; na te ‘aumaia ē ‘ua noanoatia i le mea e manuia ai; a o ē fouvale, latou te nonofo i le nu‘u naumati.”

‭‭

Faitauga – Tusi Paia –Isaia 34:16-17

I le Mataio 6:9; o loo a’oa’o mai ai Iesu ia i tatou ia amata a tatou tatalo faapea; Lo matou Tamā. O le Atua o le Tamā o aiga. E fiafia I le faavae o aiga ae inoino I le tu’ulafoa’iina. I le Kenese 2:18 na ia fetalai e lē lelei ona nofo toatasi se tagata. Afai ua aulia e lou soifua tausaga faaipoipo ae foliga mai ua lē maua se tagata tatau ma talafeagai mo oe poo I ai ni tulaga o taofiofia oe mai le faia o sou aiga, ou te tatalo ia matalatala uma avanoa mo oe i le tausaga lenei I le suafa o Iesu.

A o faia se tasi o a matou polokalame i ni tausaga ua mavae, na o’o mai le Upu a le Atua faapea, o se tasi o tuafafine I le faapotopotoga o loo faia e lona tinā ni faiga faa tiāpolo e taofia ai le faia o sona aiga. Na fetalai mai le Atua o le a tanu (tulou) le tinā lenei a’o le’i uma aso e fitu pe a fa’aauau pea ona ia taofia lana tama teine mai le faia o sona toalua. O le aso na soso’o ai na omai ai se tamaita’i ma lona tinā i lo’u ofisa. Na ita tele le tinā ma fai mai, “O oe le perofeta valea ua e fa’asesē mafaufau o a matou fanau teine, ua e fai i la’u tama o a’u ua mafua ai ona lē faia sona toalua?” Sa ou tali, “O a’u? Tuafafine na o’u fai atu faapenā? O le fetalaiga a le Atua, o le tinā o se tuafafine i le potopotoga, o loo taofiofia lana tama mai le faia o sona toalua. Na o’u tāua lou igoa?” Ona o’u liliu lea I le tinā ma fai atu i ai, “Mama aua e te amanaia ia, e leai se isi na tāua lou igoa.” Ona fai lea o le tinā i lana tama e alu I fafo mai lo’u ofisa, e fia talanoa mai na o a’u. Ina ua alu lana tama na fai mai le tinā, “Faifeau, e moni o le a maliu le tinā o le uso ua tāua?” Na o’u tali, “ou te lē o talanoa fa’atatau ia te oe, peita’i o le a faataunuuina lava le fetalaiga a le Atua. A o le’i uma le vaiaso, poo ai lava o loo fetalai faatatau ai le Atua, o le a tanumia.” Na amata ona memumemu le tinā, “Ou te lē o fai i le teine aua ne’i faia sona toalua peita’i, o ai a tausia a’u pe a uma ona faaipoipo la’u tama?” Na o’u tali, “Faigofie. E mafai ona o’u fai i le teine ma lona toalua e ta’utino mai o le a o laua tausia lelei oe,” O le tamaita’i toeitiiti fasefulu tausaga e le’i maua se isi e avea ma sona toalua, na faaipoipo i totonu o le ono masina na lumana’i ai.

I le faitauga mai le Tusi Paia o le asō, na folafola mai e le Atua e leai se isi e lē iloa lona soa. Afai o e lagona tu’ulafoa’iina, ou te tatalo ia toe fa’aleleia e le Atua mafutaga motusia i lou olaga po o le avatu ia te oe o lou soa e tatau ma oe. Mo se tasi o loo faitau i lenei fa’amalosi’au i le asō o le a taui atu e le Atua so’o se tasi o fai mai, o le a le faia sau faaipoipoga. O le a faataunuuina e le Atua lau faaipoipoga I le taimi tatau i le suafa o Iesu. O le Upu a le Atua e lē fo’i fua. Tumau lou faamoemoe ia te Ia I le suafa o Iesu. Amene.

OPEN HEAVENS

MATALA LE LAGI MO LE ASO TOONAI 19 IULAI 2025

(tusia e Pastor EA Adeboye)

Manatu Autu: Ia Agaalofa e lē Aunoa (Be Kind Always)

Tauloto -Tusi Paia–Efeso 4:32 “A ‘ia ‘outou feagaleleia‘i, ‘ia femutimutivalea‘i lo ‘outou alofa, ‘ia fefa‘amāgāloa‘i ‘outou, fa‘apei ‘ona fa‘amāgaloina ‘outou e le Atua ‘iā Keriso.”

‭‭

Faitauga – Tusi Paia –Iosua 2:1-24

O nisi tagata e tautatala lē faaaloalo i tagata latou te lē masani aemaise lava i latou e foliga maualalo ifo o latou tulaga. A o isi tagata a vili atu se isi i se numera e lē o lisiina I lana telefoni, e tali i ai pei o lea tagata ua fai ma faalavelave. E lē faatali se’i iloa po o ai o lo o vili mai, na o le piki lava o le telefoni ma masau le fesili, “o ai lea?” Fai mai le tusi o Eperu 13:2; e tatau ona e alofa i tagata ese auā e te lē iloa le taimi e te lua fetaui ai ma se agelu. E te iloa e mafai ona auina atu e le Atua lou fesoasoani e ala atu i se valaau telefoni?

Sa o’u faamatala se tala i lenei fa’amalosi’au i le lua aso ua tuana’i i le taimi na o’u mana’omia ai se £50 a’o o’u alu i sau malaga i Peretania i ni tausaga ua mavae. Sa ou tatalo i le Atua mo se £50 ma i ni nai minute mulimuliane na tatagi la’u telefoni. Na faapea mai le tagata, “Biyi?” Sa o’u tali “E leai se Biyi iinei.” Na toe fesili mai, “ e lē o le numera lea a Pai ma Lafai?” Sa o’u tali, “Ioe, peita’i e leai se Biyi iinei.” O lea na fai mai ai, “Faamalie atu.” Na o’u tali, “e lē afaina, faamanuia le Atua ia te oe.” Ona faapea mai lea, “o le a le uiga o lau tala faamanuia le Atua ia te a’u? E faafefea ona e iloa le Atua?” Na o’u tali, “o ia o lo’u Fa’aola.” Ona toe fesili mai lea, “O ai lea ma te talanoa?” Na o’u faailoa I ai lo’u igoa ma o le auala lea na fa’aaogā ai e le Atua lea uso e tali mai ai la’u tatalo mo se £50. Pe ana o’u tautala sauā I le telefoni auā o’u te lē iloa lea tagata ma ua ala ona ma talanoa ona ua sesē le numera sa ia vilia, semanu o’u te misia faamanuiaga a le Atua.

I le Faitauga mai le Tusi Paia o le asō, o Raava le fafine talitane na agalelei i tagata na auina e asiasi faalilolilo le nu’u. Na ia talia nei tagata i totonu o lona fale, o se fa’aiuga e ono o’o ai le leaga ia te ia. O lona agalelei na laveaiina ai mulimuli ane lona aiga ina ua soloia pa o Ieriko (Iosua 6:22-25). Na auala ai fo’i le tofia ma filifilia o ia o se tasi o tinā o Iesu le Fa’aola (Mataio 1:5) ma fa’amautinoa ai le faitaulia o ia i le lisi o le ‘au faatuatua (Eperu 11:31). Ua faamatala mai le tusi o Fa’ataoto 31:26 ia i tatou faatatau i le fafine amio lelei, e tautala o ia ma le poto ma ua i lona laulaufaiva le tulafono o le alofa. Ia e agalelei i au upu ma au amioga i isi. Ia avea au upu e fa’atupu ai le faamoemoe I tagata ae lē o le faanoanoa ma le fa’avaivai. E te toe selesele so’o se fatu e te totō.

Le au pele e, e mafai ona tali le Atua i lau tatalo e ala mai i se telefoni mai se numera sesē poo se talanoaga fa’asamasamanoa ma se tagata e te matua’i lē masani ai. O le mafuaaga lea e tatau ai ona e agalelei ma loto alofa i so’ose tagata i taimi uma. Ou te tatalo ia aua ne’i e misia faamanuiaga a le Atua mo oe, i le suafa o Iesu. Ia e agaalofa ma faaaloalo e lē aunoa, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 18 IULAI 2025

(tusia e Pastor EA Adeboye)

Manatu Autu: Aua e te mafaufau mo le Atua (Don’t think for God)

Tauloto –  Iopu 26:14 “Fa‘auta, o mea aupito mai ia a ona ala, ‘ae matuā itiiti se mea ‘ua tatou lagona ‘iā te ia; a o le faititili o lona malosi lea, o ai sē e malamalama i ai?”

Faitauga o le Tusi Paia: Roma 11:33-36

E tele taimi e ole atu ai tagata faatuatua i le Atua mo ni mea o mananao ai ona amata lea ona mafaufau pe faapefea ona faia e le Atua mo latou. Ao le mea moni, e le mafai e tatou mafaufau ona malamalama pe faapefea ona faia e le Atua mea o loo ia finagalo iai. Mo se faataitaiga, a fai mai se tagata e iai lona faailoga faapitoa PhD i le Matematika, e te ono ofo ai, peitai, o lona poto faapitoa e na o se vaega itiiti lava o le mataupu. A alu i se faapotopotoga o tagata poto faapitoa i le matematika, e mafai ona fesili atu iai isi au popoto o le matematika, ‘o le a le vaega e iai lo’u poto faapitoa?’ A faapea mai o le ‘applied maths’. E mafai ona toe fesili mai, ‘o le a le vaega o le applied maths?’. A faapea mai o le ‘fluid dynamics’ e mafai ona toe fesili mai o le a le vaega o le fluid dynamics? E mafai ona faasolo pea fesili ma iloa ai, na o se vaega itiiti lava o le matematika o loo iai lona poto. E 1000 tausaga pe a, e mafai ai e se tagata ona malamalama atoatoa i le matematika. Peitai e silafia uma e le Atua le matematika, physics, chemistry, geography ma isi uma mataupu e oo i mataupu e lei iloa e tagata. E le mafai ona e faatusaina lou poto ma le iloa, i le Atua. Aisea la e taumafai ai le au faatuatua e saili pe faapefea ona faia e le Atua se mea?

Ina ua avea a’u ma taitai aoao o le Ekalesia RCCG i le 1981, e toatele tagata na manatu na faaalatua le faiga o lo’u tofiga. Na latou manatu na ou faaaogaina lo’u tulaga i le matematika e feliuaina le taitai aoao i lea taimi e tofia a’u ona e lei alu o ia i se aoga. Na ou tilotilo atu i le Atua e faaalia atu i tagata ou te lei faia se mea ina ia tofia a’u e avea ma taitai aoao, ae o le Atua na tofia au. Ona faia loa lea e le Atua se mea matautia. Sa fai matou semina i masina uma mo ni aso, ae o le aso muamua o nei semina,e fanau lava se pepe tama i le matou falemai. Ina ua maea le fia masina ma ua iloa ai e nisi e malamalama i mea o le agaga, o ni faailoga mai le Atua e faamaonia ai na ia tofia a’u mo ia lava. E matua leai sou manatu o le auala lea o le a faaaoga e le Atua e faamaonia ai, o ia lava na tofia a’u.

Le au pele e, a e ole atu i le Atua i se mea, faamolemole aua e te manatu pe faapefea ona ia faia aua e te lē gafatia. Tau lava o le ole atu, usitai i faatonuga e tuuina atu ia te oe, ona taatia lea o mea uma i le Atua. 

A e ole atu i le Atua i se mea, aua è te mafaufau pe faapefea ona ia faia, tau o le faatuatua ma usitai ia te ia, i le suafa o Iesu, Amene.

OPEN HEAVENS

MATALA LE LAGI MO LE ASO TOFI 17 IULAI 2025

(tusia e Pastor EA Adeboye)

Manatu Autu: Tou te lei ole atu i se mea (Because you ask not)

Tauloto –  Ioane 16:24 “Ua o‘o mai nei lava tou te le‘i ole atu i se mea i lo‘u igoa; ‘inā ole atu ia, ‘ona ‘outou maua ai lea, ‘ina ‘ia ‘ato‘atoa ai lo ‘outou ‘oli‘oli.”

Faitauga o le Tusi Paia: Ioane 6:5-13

O loo faaalia i le Iakopo 4:2 le mafuaaga e tele ai kerisiano e lē lava le faasoa. E te silafia e mafai ona e ole atu i le Atua e faamuta le le tagolima i lou olaga, e mafai ona ia faia mo oe? I le faitauga o le Tusi Paia o le aso, na fagaina e Iesu le faitau afe o tagata i le lima areto ma i’a e lua. E oo atu i le taimi ua maea ona aai ma maoona uma tagata, e 12 ato o toega meaai na totoe. A foai mai e le Atua mea uma e te manaomia, e na te foai atu mea e sili atu e atoatoa ai lo outou olioli. O lau talosaga telē o se mea itiiti i le Atua. 

I tausaga talu ai, sa ou malaga i Lonetona i se galuega ae toe tolu aso o’u toe foi, ae uma la’u tupe ma sa ou manaomia se 50 pauni e faatau ai ni tusi ma isi mea. Ua ou liliu atu i le Atua ma faapea atu, ‘Tama, e lelei pe a maua sa’u 50 pauni’. E lei leva ae tatagi le telefoni ma è ese le tagata o loo tau sue mai, ma a’o ma talanoa, ua ia iloa o a’u o loo la talanoa. Ua fiafia ma ta’u atu i lona uso. Ua ou iloa ai, sa la tau suea se avanoa e feiloai mai ai, a’o lea ua matou talanoa i le telefoni. Na iu ina o mai matou talanoa ma ae lei ō ese, na la foai mai se 50 pauni. Ina ua ō ese, ua ou fai atu, ‘Tamā, ana ou iloa e faigofie faapea, semanu ou te ole atu mo se 100 pauni’. Ao ou fiafia ma faafetai, na tuitui mai le faitotoa, ae ou te lei oo atu i le faitotoa, ae tuu mai lalo o le faitotoa se teutusi. Ua ou tatalaina ma ou iloa ai, e aumai i se tamaloa e lei foai muamua mai ia te a’u. I totonu o le teutusi, sa iai se 50 pauni  ma se tusi e faapea, ‘ua ou fia foai atu se tupe ia te oe I le asō’. Ua ou toe fai atu i le Atua, ‘ana ou iloa e te faaopoopo mai se 50 pauni semanu ou te ole atu mo seisi 50 pauni’. I le po lava lea e tasi ae ou te lei moe, na foai mai e seisi tagata le 50 pauni. Ua oo mai le fefe ma le  matau,  ma ua ou fai atu i le Atua, sa ou fia malie ma ou te lē fia faaonoono ia te ia. Na faamanatu mai e le Atua lenei mea talu ai nei lava, ma faapea mai sa ou valea, ‘A faapea na e ole mai I se 50 pauni ma ou foai atua, aisea na e le ole mai ai i se 5000 pauni?’

Le au pele e, saili poo le a le finagalo o le Atua i mea o loo e manaomia ma ia faamaonia o loo ō gatasi mea o loo e ole atu ai ma mea o loo e manaomia. Taofi le tomumu i lē lava o le faasoa i lou olaga, ae ole atu i le Atua i mea o loo e manaomia. Aua  nei maluelue lou faatuatua ona ia tali mai lea. Ole atu i le Atua e saunia mea o loo e manaomia e tusa ma lona finagalo ma ia e faatuatua e mafai e le Atua ona faataunuuina, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 16 IULAI 2025

(tusia e Pastor EA Adeboye)

Manatu Autu: Usitai i faatonuga a le Atua (Obey God’s instructions)

Tauloto –  Faataoto 8:10 “Ia ‘outou talia la‘u a‘oa‘o atu, ‘ae ‘aua i le ario; ma ia talia le poto e sili i le auro e aupito lelei.”

Faitauga o le Tusi Paia: 2 Kings 5:1-14

I le 2 Tupu 5:1-14 o le fafine ua oti lana tane ua tele ana aitalafu, ma na fai iai i latou na nofo aitalafu ai o le a latou aveina lana fanau tama e fai ma pologa pe a lē totogiina lana aitalafu. Na tamoe ia Elisaia mo se fesoasoani ma na fai iai ni faatonuga e le tagata o le Atua e pei e valea. Na ia faatonuina e alu e faanoi mai ni fagu se tele mai I ona tuaoi ona sasaa mai lea o le fagu suauu I totonu o nei fagu. O se vavega aua ua faatumuina nei fagu i le suauu. O le tele o taimi, o faatonuga a le Atua e faia e te lē malamalama ai, peitai a e usitai iai, e te maua se vavega. 

I le tele o tausaga talu ai, o le taitai o le Ekalesia, lo’u tamā faaleagaga, na ia logo tagata faigaluega uma e iai se manaoga o le Ekalesia e tatau ona maua se tali mautu i le vaiaso na sosoo ai. Na ia  faatonuina le aufaigaluega i totonu o le Ekalesia e tapunia uma a latou teugatupe i faletupe ae aumai tupe i le lotu i le aso Sa e sosoo ai. Na ma usitai  ma lo’u toalua, tapunia ma teugatupe ma aumai Tupe i le aso Sa na sosoo ai. I le aso Sa na sosoo ai, fai mai le faifeau ua maua le tali o le manaoga o le lotu, ona fesili mai lea poo ai na tapunia latou teugatupe. Na sii ma lima ma lo’u toalua ae ina ua ou autilo solo, e leai ma nisi lima na sii. Ua amata ona ou manatu ia te a’u, ‘fefe ua ou valea ea i le mapo lotu’, ona ou faalogoina lea o le Atua o faapea mai, ‘atalii e te lē valea, o loo ou saunia oe aua a oo i le taimi e Siitia ai oe i le maualuga ua ou fuafuaina, e leai seisi e mafai ona faapea mai sa ou faapito ia te oe’. E tele ina lē talafeagai ma oe le taimi e te usitai ai i faatonuga a le Atua. Peitai, a e usitai, e te fiafia i taui e uiga ese. 

I le faitauga o le Tusi Paia o le asō, o Naamanu le Suria, na alu e vaai Elisaia ma le manatu i se vavega. Na ia manatu e sau i fafo Elisaia ma faaee ona lima i ona luga, peitai na auina mai se feau mai ia Elisaia ma se faatonuga faigofie: alu i le vai i Ioritana ma tofu faafitu. O le umi lava o le finau ma lea faatonuga, na tumau pea lona lepela.  Peitai o le taimi lava na usitaia ai le faatonuga, ua faamaloloina o ia, ma na pei lona pa’u e pei o se pepe. 

Le au pele e, e finagalo le Atua e na te foai ia te oe se vavega, peitai e tatau ona e usitai i ana faatonuga tusa pe foliga mai e valea. O le usitai i faatonuga a le Atua e fanau mai vavega tetele i le suafa o Iesu, Amene. 

OPEN HEAVENS

MATALA LE LAGI MO LE ASO LUA 15 IULAI 2025

(tusia e Pastor EA Adeboye)

Manatu Autu: O le Manogi o le Alofa Tunoa (The fragrance of favour )

Tauloto –  Faataoto 16:15 “O lo‘o i ai le ola i le malamalama o fofoga o le tupu; o lona alofa mai, e tusa lea ma le ao o le uaga mulimuli.”

‭‭

Faitauga o le Tusi Paia: Salamo 44:1-3

I le Numera 6:22-27, na faatonu e le Atua le au ositaulaga e faamanuia i le fanauga a Isaraelu ma folafola e fa‘amalamalamaina e le ALI‘I ona fofoga i luga ‘iā tei latou. A faamalamalamaina fofoga o le Alii i ou luga, e sasala mai ia te oe le manogi o lona alofa tunoa ma o soo se mea ete alu iai, e te vaaia tagata e faaalia lo latou alolofa ia te oe e aunoa ma se mafuaaga. 

I le 1976, ao avea a’u ma se faiaoga talavou i le Iunivesite, na ou auai ma isi faiaoga i se fonotaga faavāomalo sa faia i Kanata e fai matou ma sui o Nigeria. I lea taimi e na o le 12 ni pepa o suesuega ua ou tusia mo le Iunivesite. O le tamaloa na faia le lauga autu e tatala ai le fonotaga, e 150 pepa o suesuega ua ia tusia. Na ia faamatala le matematika e maua ai le timu, fa’atoa ou faalogo lea I se mea faapea. Ua ou tilotilo solo ma faapea, ‘le Atua e, o le a ea la’u mea lea e fai iinei?’ O loo fuafua o a’u e faia le folasaga o la’u pepa i le aso e sosoo ai ma o lea na ou tatalo i le Atua I le po atoa ia maualuga le viiga o lona suafa i lo’u olaga pe a fai la’u folasaga. Na ou tatalo foi ia aua nei auai mai le tamaloa lea na lauga amata i tei ua faalogo ma faapea, ‘o ai na aumaia lenei vale?’. Ua oo mai le taimi o la’u folasaga, ae faauta, o loo nofo i le pito i luma le tamaloa e faasaga tonu mai ia te a’u. Peitai, e maea ane la’u folasaga, ua tu i luga le tamaloa ma patipati ona lima. Ina ua vaai atu tagata ua patipati le tamaloa, na tutū uma i luga ma patipati. E le taua tele la’u pepa pe a faatusa i isi pepa, ae ua tuu e le Atua le manogi o lona alofa tunoa i o’u luga. 

A tuu e le Atua lona alofa tunoa i ou luga, e galulue mea uma e faigofie mo lou lelei. Ina ua iai le alofa tunoa i le fanauga a Isaraelu, o le au Aikupito na faapologaina i latou mo le 430 tausaga, ua latou foai atu iai latou mea uma na ole atu ai. Fai mai le Esoto 12:36

“‘Ua fa‘atupuina, e le ALI‘I le alofa o Aikupito i le nu‘u; ‘ua latou ‘aumaia mea na fai atu ai; ‘ua latou fa‘amatitivaina ai Aikupito.”

‭‭

O le alofa tunoa o le Atua i luga o le tagata, e liliuina i latou e ita i lea tagata e faia mea uma e faamanuia ai ia te ia. E latou te lē malamalama pe aisea ua naunau ai ia tagata e foai atu mea uma o loo latou manaomia. O le alofa tunoa o le Atua ia Eseta na alofaina ai o ia e tagata ma vave talia o ia.  Na taitaiina ai foi le tupu e filifili ia te ia mai le toatele o tamaitai na auai ai (Eseta 2:15-17). A faamalamalamaina e le Atua ona fofoga I se tagata, e matua aulelei ma matagofie o ia i le vaaiga a tagata. Ou te tatalo ia faapupulaina fofoga o le Atua i luga ia te oe, i le suafa o Iesu. 

Tatalo

Tamā, faamolemole ia i luga ia te au ma lo’u aiga le manogi o lou alofa tunoa I taimi uma, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 14 IULAI 2025

(tusia e Pastor EA Adeboye)

Manatu Autu: Fesoasoani moni 2 (Helpmeet indeed 2)

Tauloto –  Kenese 2:18“Ua fetalai mai fo‘i le ALI‘I le Atua, “E lē lelei ‘ina to‘atasi o le tagata; ‘ou te faia sona fesoasoani e tatau ma ia.”

‭‭

Faitauga o le Tusi Paia: Faataoto 19:13-14

O le fesoasoani moni, e tumau pea ma lana tane tusa poo a faigata, ma e lē foi pe a oo mai luitau. Ua 57 tausaga talu ona mā faaipoipo ma e iai taimi e suamalie pei lava faatoa ma nonofo. Ou te pito mativa lava i e na fia uo ia te ia ae ma te lei faaipoipo, ae na ou fai iai, a ia faaipoipo mai ia te a’u, o mea uma ou te maua ma tulaga ou te ausia, e na te maua foi. Ina ua ma faatoa faaipoipo, a ma aai, ma te taliē ma taufao i se tamai fasipovi, ao le asō, tusa pe ma te mananao e ai se povi atoa, e mafai aua ua matuā faamanuia le Atua iai maua. 

A oo I taimi faigata, o se fesoasoani moni, e faamalosiau I lana tane, e lagolago ia te ia e aunoa ma le taumafai e tuu o ia I lalo. E lē fesoasoani ia te ia ae toe feau mulimuli ma faapea, ‘ua e vaai i le mea na ou faia mo oe?e tatau ona e toe totogi mai’. O se mea fiafia i le fesoasoani moni le maua o avanoa e fesoasoani ai i lana tane ma è vave atu e fesoasoani. 

O se fesoasoani moni, e iloa I taimi e ui ai lana tane i luitau. I tausaga ua mavae, sa ou manatu o le a ou anapogi ona o ni luitau sa ou ui ai. Na ou anapogi mo le 40 ao ma po, ma ina ua iloa e lo’u toalua e faigata ona ou aso e aunoa ma ia, ona anapogi foi lea. Ina ua maea le 40 aso ma po, sa tumau le luitau ma o lea  na ou filifili ai e toe faia seisi anapogi mo le 40 aso ma po. Sa ia faaauau ai foi i le anapogi lona lua. Ina ua maea le anapogi lona lua, o loo tumau pea le luitau, ma o lea na ou filifili ai e faaauau pea seia tali mai le Atua. Ou te lei manao e faaauau ai lau avā i le anapogi ma o lea na ma malilie ai, a maea le 40 aso ma po ae lei maua le tali, o le a taofi ia, ae ou faaauau pea. Ina ua maea le 40 aso ma po, ua musu la’u avā e taofi le anapogi. Ina ua ou vaai atu o loo anapogi pea, na ou fai i le Atua, ‘e lē mafai ona ou tālia pe a oti lo’u toalua. A e finagalo iai, e mafai ona e fofoina lenei faafitauli, ae o le taimi lenei, o le a taofi la’u anapogi’. Faatoa taofi lana anapogi ina ua taofi la’u anapogi. Ma na tali mai le Atua e faaalia ai lona faaamaoini. 

Afai ua e faaipoipo ma fai sau tane,  taumafai i le malosi e tatau ai e fesoasoani ai i lo’u toalua e fofo ana luitau. O le fesoasoani moni o se uo sili lea e ‘au ma lana tane*, ae lē o se faatigā ulu i le ogatotonu o luitau o le olaga, i le suafa o Iesu, Amene. 

OPEN HEAVENS

MATALA LE LAGI MO LE ASO SA 13 IULAI 2025

(tusia e Pastor EA Adeboye)

Manatu Autu: Fesoasoani moni 1 (Helpmeet indeed 1)

Tauloto –  Faataoto 31:11 “Ua fa‘atuatua ‘iā te ia le loto o lana tane; e le mativa o ia i ‘oloa.”

‭‭

Faitauga o le Tusi Paia: Faataoto 31:10-31 

O le fesoasoani o se avā e fa’amalosi’au ma lagolagosua i lona toalua e faataunuu le faamoemoe o le Atua i o la soifua tusa pe faigata.

Na fa’au’uina e le Atua le faaipoipoga o se faatasiga e avea ai se avā ma fesoasoani mo lona toalua ae lē o le faatautavā ia te ia e pei o le ata o loo vali e le lalolagi i aso nei. E pei ona lē mafai e sui ta’itasi o se ‘au ona tauvā le isi I le tasi ae manatu e manumalō, o ulugalii e femisai ma fetauai, e lē tatau ona manatu la te i’u i se ulugalii manuia. O se aiga fevaevaea’i e lē mafai ona tumau (Mareko 3:25). O le tane ma lana ava, e tasi i laua ma e tatau ona galulue faatasi o se au e tasi ina ia i ai manuia i lo la āiga ma o la soifua (Mareko 10:7-8).

O nisi o tinā e iloa o latou tulaga faaeaina ua avea ma ala e faamaualuluga ai o latou loto ma lē toe gaua’i ai i o latou ta’itoalua. E o’o mai i le asō o la’u ava e kukaina a’u meaai. A talafeagai tulaga na te aulia o’u lavalava faapena fo’i ona o’u aulia ona ofu. A’o o’u faiaoga ma ma nonofo i se nofoaga mamao ese ma le taulaga, sa masani ona ia ‘otiina lo’u lauulu. Faapei o le tane a le fafine amio lelei I le faitauga mai le Tusi Paia o le asō, na faatuatua lo’u loto ia te ia. Poo le a lona pisi e lē taofia ai le fesoasoani iā te a’u, ma sa ia lagolago i so’ose mea ou te faia. 

O’u te manatua a o fausia le nofoaga tatalo o Mount Carmel, o se galuega tele nauā peita’i na o le faatolu ona o’u alu i ai; o le aso na fai ai le sauniga o le faiga o le faavae, o le aso na o’u alu ai e ave I ai fanau a a’u fanau, ma le aso na umusa ai le galuega ua maea. I le taimi atoa a o faia le galuega, o lo’u toalua na faafoeina ma le loto filiga le galuega- o le fesoasoani moni lea. E loto naunau e lē aunoa e ui i ala e tatau ai ia fa’ataunu’uina ai lo’u mana’o. Sa tu i o’u talane i taimi uma, o le lelei ma le faaletonu ma o le mafuaaga lea na te maua atoa ai lona tofi i mea uma e faamanuia mai ai le Atua ia te a’u. A maua e se tane faatuatuaina se fesoasoani tonu e fai ma ana avā o le a ia pulunaunau e puipui, tausi lelei ma faafiafia ia te ia. E masani ona fai la’u tala, e mafai e se tagata ona po a’u ma ou liliu atu i ai le isi o’u itu; peita’i afai e pa’i se isi i lo’u toalua, o le a finau lea tagata faapea ma lo’u Atua, le afi ma’ama’ai. 

Oe le ava, e mafai ea ona faalagolago lou toalua ia te oe? E tatau ona mafaia ona e faaleleia ona vaivaiga, faamanatu ma sami ona manumalō ma avea o lana fa’amalosi’au numera muamua. Afai o oe o se tane e I ai sou fesoasoani moni i ou autafa, e tatau ona e fafaga ma faapelepele ia te ia. O ia o se ma’a taua taugatā ma e tatau ona e tausi lelei ia te ia. I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 12 IULAI 2025

(tusia e Pastor EA Adeboye)

Manatu Autu: O se tatalo faigofie (A simple prayer)

Tauloto –  Mareko 1:35 “O le taeao ‘ua ala pō ai o ia, ‘ona ulufafo lea o ia ma maliu atu i le mea tu‘ufua ma tatalo ai.”

‭‭

Faitauga o le Tusi Paia: Iakopo 5:16-18

I tausaga ua mavae, na faaletonu ai le mafaufau o le toalua o le isi tamaloa ma sa ave o ia i se fai vai fa’anatura e togafiti ai. Sa umi se taimi o togafiti e le fomai fa’anatura e le’i manuia ae na o le faateteleina o le ma’i. Na sau se tasi ma ta’u mai ia te a’u le mea ua tupu ma o’u manatu loa o’u te alu e tatalo mo le fafine. Ina ua o’u taunuu atu, sa fai la’u tatalo puupuu ma o’u toe alu ese. Ina ua o’u alu sa o nisi ma logo le toalua o le fafine ma fai i ai, “O le tamaloa lea na sau ma tatalo mo le na o le lua minute. E lua minute o le tatalo mo le ituaiga faafitauli lea?!” Ona latou te lē talitonu i le mana o le tatalo, na toe o ai ave le fafine I le falema’i o le mafaufau. Ina ua taunuu i le falema’i na fai i ai le foma’i faapitoa, “Se’i o tatou maitauina lenei tinā mo sina taimi se’i o tatou iloa ai le ituaiga vailaau e togafiti ai.” Ina ua uma le lua vaiaso, na aami e le fomai le toalua o le tinā ma fai atu i ai, “Afai e te faapea mai o loo i ai se tulaga faaletonu i le tinā lenei, o lona uiga o oe o loo I ai le faaletonu.” E leai ni vailaau ua na o se tatalo faigofie na malōlō atoatoa ai le tinā.

I le 1 Tupu 18:36-38; o le tatalo a Elia na pa’ū ifo ai le afi masalo na o ni nai minute le umi. A fai e auauna a le Atua tatalo pupu’u ma tutupu ai vavega tetele, e mafua auā e tele itula na mafuta ai ma le Atua i le mea lilo. Ina o feafioa’i Iesu i luga o le fogaeleele, e tasi lana fetalaiga ma tutupu vavega. Peita’i o loo faamauina i le Tusi Paia le tele o taimi e tuua ai e Iesu ona so’o ma isi tagata ae afio i se nofoaga e tatalo ai e pei ona o tatou faitau i le fuaiupu tauloto o le asō. O le mealilo lea e ala ai ona tele le fa’au’uga ma le mana o tatalo pupu’u.

O taimi uma lava e tatalo ai Elia o loo tāua I le Tusi Paia, e pupu’u lava ana tatalo ae tutupu ai suiga. I le 2 Tupu 1:9-12, ina ua ia faatonuina le afi e pa’ū ifo mai le lagi ma fa’aumatia ai ta’ita’i e toalua ma a la ‘autau na faia lava i nai upu e faapea; “Afai o le tagata o le Atua a’u, ia alu ifo le afi mai le lagi e fa’aumatia ai oe ma le to’alimagafulu.” O le faitauga mai le Tusi Paia o le asō o loo ta’u mai ai ia i tatou le mafuaaga o loo i tua atu o nei poloaiga pupu’u ae malolosi. O Elia o se tagata ia e tusa ma i tatou, ua matua’i tatalo ia ona tali mai lea o le Atua ia te ia (Iakopo 5:17). Afai e te mana’o e te tatalo i se tatalo puupuu ma faigofie ae tutupu vavega ma mea tetele i luma o tagata e toatele, e tatau ona e galue faamaoni ma filiga i tatalo i le mea lilo. O faaiuga tetele ma loloto e vaaia i luma o tagata e toatele fa’ato’ā tutupu ma fananau mai ina ua matua’i naunau e faitaulaga na o oe ma le Atua i le mea lilo. I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 11 IULAI 2025

(tusia e Pastor EA Adeboye)

Manatu Autu: E aogā le faamalositino (Physical exercise is profitable)

Tauloto -Tusi Paia–1 Timoteo 4:8 “Auā e aogā fo‘i le fa‘amasani i la le tino; a o le amio Atua e aogā lea i mea uma lava, o lo‘o i ai le mea ‘ua folafolaina mai i la le olaga nei ‘atoa ma lē atalī.”

‭‭

Faitauga – Tusi Paia – 1 Korinito 6:19-20

O le upu tauloto mai le Tusi Paia o le asō o loo faaalia ai o le amio Atua e aogā lea i mea uma lava, e sili atu i le aoga o le faamalositino peitai o loo atagia ai foi, o le aogā itiiti e maua mai i le faamalositino, e le mafai ona maua mai le faamalosi i le agaga. O le mafai ona e galue lelei i le tino nei, e manaomia le gaoioi ma maloloina lelei lou tino ma e tatau ai le faamalositino. Afai e te faatalale i le aogā itiiti mai le faamalositino, tusa poo le a lou amio Atua, e te ono faia lava e oe le faaiuga e faapuupuu ai lou soifua i le olaga nei. 

E toatele tagata i nei aso e fiafia e ola ma le filemu. E lē fia faia ni galuega e faatigaina ai le tino pe faagaoioi ai maso. E fiafia e faigofie ma filemu o latou olaga e ui o loo fai mai le Tusi Paia è tatau ona tatou onosai i mea tigā e pei o se tagata tau lelei (2 Timoteo 2:3). E tatau ona e tino lelei e faia mea uma na tuu ai oe e le Atua i le lalolagi nei. O lona uiga e tatau ona faaavanoa lou taimi e faamalositino ai ina ia e malosi ma agavaa e faaaoga e le Atua. 

O nei aso, e toatele tagata o loo ola i olaga lamatia ona e leai se faamalositino. E o mai mai latou potu ea malulu i latou fale, feosofi i taavale ea malulu ia ma faigaluega I ofisa ea malulu. E toatele tagata e lē fia auai le lotu pe a leai se ea malulu. Peitai o loo fautua mai foma’i e aoga le afu o le tino.  E taua foi le faalā mo se taimi i aso uma aemaise le aoauli aua foi e iai le aogā o ave o le lā i o tatou tino. Ou te fiafia ma masani e savali e tatalo ma faamalositino. O le savali e aoga e malosi ai lo’u tino ao le tatalo e aoga e maua ai lo’u malosi faaleagaga. 

Le au pele e, e manatu ma finagalo le Atua I le soifua maloloina lelei o lou tino (3 Ioane 1:2). E manatu alofa mai o ia pe faapefea ona e tausia le tino ua ia foai ia te oe ina ia taunuu le faamoemoega o lou olaga. O le faamalositino e fesoasoani ia te oe e pulea lou mamafa ma fesoasoani e malolosi ai ou ponaivi ma maso. E faaitiitia ai le maua o oe i ma’i ma siitia ai lou malosi e faia galuega manaomia i aso uma. O le toaga e faamalositino e fesoasoani i le maloloina o le mafaufau. Afai o lau galuega e manaomia le nofo i le aso atoa pe faigaluega mai foi i le fale, e tatau ona e faamalositino i aso uma. Aua nei faatagaina lou naunau i se olaga faigofie ma filemu e vave ai ona faapuupuuina. Amata loa i le asō ona fai sau fuafuaga e faamalositino i aso uma pe afai e te lē o faia lea tulaga, i le suafa o Iesu, amene.