Samoan Devotional

OPEN HEAVENS

MATALA LE LAGI MO LE ASO GAFUA 8 SETEMA 2025

(tusia e Pastor EA Adeboye)

Manatu Autu: Valoaga poo le faaaliga (Vision).

Tauloto –  Faataoto 29:18 “A leai se valo‘aga, e fa‘asalalauina le nu‘u; a o lē ‘ua tausiusi i le tulafono, ‘amu‘ia o ia.”

Faitauga - Tusi Paia: Sapakuka 2:1-3

O loo tusia i le tauloto mai le Tusi Paia o le asō a leai se valoaga, e faasalalauina le nuu. O le mauoa valea i le Luka 12:15-21, na oti aua na ia fai i lona agaga e aua le galue e ausia se mea. O le leai o se valoaga poo se faaaliga è oti ai, ao le galue ia ausia se faamoemoe, e faafouina ai lou talavou ao faasolo aso. I se vaitau talu ai, na ou fai ai i nisi o a’u uo matutua, e le o i matou o ni tagata matutua aua fai mai le Ioelu 2:28 ,e fai miti o ‘outou toeaina, e iloa fa‘aaliga e o ‘outou taulele‘a. Ona o i matou ma a’u uo matutua o loo maua pea faaaliga o loo galulue agai iai, o loo matou talavou ma taulelea pea. 

Le au pele e, e le tatau ona gata i le maua o le faaaliga, e tatau ona galue ia ausia. E iai nisi tagata e mafai ona talanoa fiafia ia latou faaaliga i le asō, peitai a tou toe feiloai i le mavae ai o le tolu tausaga, e te iloa ai o loo talanoa pea ia latou faaaliga ae leai se laasaga ua faia ia taunuu ai. A e fesili iai poo le a le mafuaaga, e tele ni faafitauli o le a latou faailoa mai. 

O tagata e iai faaaliga ua latou talitonu iai, latou te le faatagaina se mea e taofia ai. E gatete le faafitauli  pe a agai atu iai latou se tagata e iai se faaaliga. Ina ua  aumai e le Atua le faaaliga mo le laumua o le Ekalesia RCCG, sa lei iai se tupe, peitai e lei taofia ai i matou i le amata ona faatino i le faatauina o fanua. Ua matou manumalo i le faafitauli muamua, e lei leva ae fotuai leisi luitau, sa leai se vai i le laumua e mafai ona nonofo ai e silia ma le 1000 tagata. E lei taofia ai i matou ae agai pea I luma. E lei leva ae mafai ona maua le vai, ua lava ma totoe. O le mafuaaga e lei ausia ai le tele o miti ma faaaliga a tagata, ona latou te le o faia se mea ina ia ausia ai. O le ausia o se faaaliga, e tatau ona e faia se laasaga, a e faia, e tauave oe e le Atua ia ausia. O le tagata e na te galue ia ausia lana faaaliga e faalogo iai ua tautala mai. Ina ua fetalai le Atua ia Sapakuka e pei ona tusia i le faitauga o le Tusi Paia o le asō, na ia  faatonuina ia tusi i lalo le faaaliga ina ia oo i le aso tu’upoina, ona tautala mai lea. A amata ona e faia laasaga agai i le faaaliga na avatu e le Atua ia te oe, e tautala mai lau faaaliga, ona faalogo lea iai o le toatele. 

Ua faaali atu e le Atua ia te oe se faaaliga? Galue loa, aua le tuua se avanoa ini faafitauli. E finagalo le Atua e avatu le leo i lau faaaliga, ina ia tautala atu i atunuu ma nuu, peitai, seiloga e te faia se mea ma faatino e pei ona faaali atu ia te oe, e filemu pea lena faaaliga. E mafai e le Atua ona tauave oe ia ausia lau faaaliga. Peitai, e tatau ona e amata faatino laasaga e manaomia e ausia ai lau faaaliga, i le suafa o Iesu, Amene. 

OPEN HEAVENS

MATALA LE LAGI MO LE ASO SA 7 SETEMA 2025

(tusia e Pastor EA Adeboye)

Manatu Autu: Mai le leai o se faamoemoe I le ta’utinoga (From Hopeless To Testimony).

Tauloto –  Luka 1:37 “Auā e leai lava se mea e tasi e lē mafaia e le Atua.”

Faitauga - Tusi Paia: Esekielu 37:1-10

I le tele o tausaga ua mavae, sa fai ai sa matou sauniga o le Agaga Paia I le malae taalo I Surulele I Lagos. A o faia le sauniga, na fetalai le Alii o loo i ai se tasi i le faapotopotoga e na o le tasi lona fatuga’o (tulou) ona na fai lona taotoga ma aveese ai le isi. Na toe fetalai le Alii, o le fatuga’o o loo totoe e lē o I se tulaga lelei, ma o le a ia avatu i lea uso ni fatuga’o fou se lua. Ana faapea ou te lē iloa le siufofoga o le Atua, e lē ta’ita’i mafai ona o’u ta’u I le potopotoga le feau mai le Atua. Na iloa e se alii sa i le sauniga ua fetalai le Atua faatatau ia te ia auā o ia lea na fai lona taotoga ma o loo i ai le faaletonu. I le taeao o le Aso Toonai ina ua uma le polokalame, na alu sa’o lenei alii I le falemai sa fai ai le taotoga sa aveese ai lona fatuga’o ma fai i le fomai e siaki ia. Na faapea mai le fomai tipitipi, “Ou te manatua le mea na tupu ia te oe; o le aso lea na fai ai lou taotoga, o mea uma na sesē. O le taotoga sa tatau ona lē atoa se itula e fai ai, ae na alu ai le valu itula.” Ina ua siaki e foma’i le uso lea, na o latou maua ai fatuga’o fou e lua. Afai e pa’i mai le Atua, o ia o le Atua e maua ai le faamoemoe i se faafitauli, o le a suia le tulaga mai le leai o se faamoemoe i le ta’utinoga. 

E aumai e le Atua le manumalō e sui ai le leai o se faamoemoe. Fa’ata’ita’iga, o le Kenese 18:9-14 ina ua fetalai le Atua ia Aperaamo o le a fanau mai e Sara se tama tane pe a mavae le iva masina. Sa ata’ata Sara aua sa ia manatu ua leai sona faamoemoe. Peita’i o le Atua e ona le malosi uma lava na mafai lava ona fetalai mai, “auā ua e ata’ata, ou te faalēaogāina ai la’u upu,” e le’i suia lona finagalo. Na ia fetalai, “e mafai lava ona e ata’ata i le tele e te mana’o ai, ae o le a fanau mai lau Isaako.” Le au pele e, afai ua e manatu o le faafitauli o lua feagai ua leai se fofō, o le tala lelei lenei mo oe i le asō, i le suafa e sili i suafa uma lava, o le a fanau mai lau Isaako. E leai se mea e lē mafaia e le Atua. Fai mai Ieremia 32:27; “Faauta o a’u lava o le Alii, o le Atua o tagata uma; pe faigata ea ia te a’u se mea e tasi?” I le Esekielu 37:1-10; Fai mai le Tusi Paia, o le Atua Mata’utia na Ia toe faaola ivi mamago. Ua lē na o ni tino oti i latou, a’o ivi ua matuā mamago lava. Peita’i na fetalai mai le Alii le Atua e ala i lana auauna ma toe ola ai ivi mamago. Le au pele e, o le Atua na liua ivi mamago ia toe ola, e mafaia fo’i ona faaleleia lou tulaga faaletonu. Atonu ua tusi esea oe e tagata peitai e leai se mea e tasi e lē mafaia e le Atua (Luka 1:37). I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 6 SETEMA 2025

(tusia e Pastor EA Adeboye)

Manatu Autu: Ole atu mo le malamalama (Ask for light)

Tauloto –  Ioane 1:5 “Auā e to‘atasi le Atua, e to‘atasi fo‘i le puluvaga i le Atua ma tagata, o le tagata o Keriso Iesu lea.”

Faitauga - Tusi Paia: Mareko 10:46-52 

Ina ua faia e le Atua le lalolagi I le Kenese 1;1-31; na Ia mua’i faia le malamalama. O le mafuaaga, aua a i ai le malamalama ona faigofie lea ona faatulaga mea uma. 

I le faitauga mai le Tusi Paia o le asō sa I ai se tauaso aisi e igoa ia Patimaio sa tagi atu ma le pulunaunau iā Iesu Keriso e sisila mai ona fofoga ia te ia. Sa faapologaina e le mativa ma foliga o se tagata tuulafoaiina e leai se isi e fesoasoani iā te ia. Ua atili foliga ua leai sona faamoemoe ona o le po o lana vaai. Ina ua fesili Iesu poo le a se mea e mana’o ai, na ole atu ia pupula ona mata. Sa mafai ona ia talosaga mo se tupe ma ni lavalava peita’i pau lona mana’o ia mafai ona pupula ma vaai atu i le malamalama. O le mafai ona e pupula, e aofia ai le itu i le tino ma le fa’aleagaga e sili atu lona taua nai loo tupe ma lavalava. 

A o’o mai le malamalama o le Atua, e mou ese uma ituaiga pogisa ma fa’anoanoaga. O le fesili i le taimi nei, e faafefea ona e faataga le malamalama o le Atua i lou olaga? Na fetalai Iesu I le Ioane 8:2; o Ia o le malamalama o le lalolagi. Afai e te faataga Iesu I lou olaga, o le a susulu lona malamalama ia te oe ma tuliesea ai soose galuega a le pouliuli. O le a Ia susulu malosi ia te oe ma amata ai ona e susulu atu i isi. O le mafuaaga lea na fetalai ai i le Mataio 5:14; o outou o le malamalama o le lalolagi outou. E auala atu ia te oe ona tafiesea le pogisa mai lou aiga, ma o I latou uma e mafuta atu ia te oe o le a manuia I le malamalama o e tauaveina. A o le’i faaolaina lo’u olaga sa I ai fetu’u ma mala i le aiga Adeboye, peita’i ina ua o’u maua le malamalama o Iesu Keriso I lo’u olaga na fa’alēaogaina uma ma motusia fetu’u tuufaasolo I augatupulaga I totonu o lo’u aiga. O le mativa ma le loto faavauvau fo’i na tafiesea e faavavau. 

“O lenei, ‘āfai o ‘iā Keriso se tasi, o le tagata fou ia; ‘ua mavae le ola tuai, fa‘auta, ‘ua o‘o mai le ola fou.” 2 Korinito‬ ‭17

Le au pele e, poo lē a le malosi o fetu’u tuufaasolo poo malosiaga o le pouliuli e ono taofiofia oe, o le taimi lava e tu’u atoa ai lou soifua ia Iesu Keriso, o le a faafouina mea uma ma o le a aveesea e lona malamalama le pouliuli mai ia te oe. Ae afai e te le’i fanaufouina, faamolemole ia e fa’ata’ita’i le tatalo lenei. 

‘Le Alii e, Iesu, ou te ta’u ta’u sa ou ola I le pogisa. O le taimi nei ua o’u sauni e talia lou malamalama. Faamolemole afio mai i lo’u olaga ma faia a’u o se tagata fou ua te oe. Ou te fa’alēaogaina agasala uma sa masani ona o’u fai ma ua ou talia oe e fai ma Alii ma Fa’aola i lo’u olaga. Faafetai Iesu’. 

Tatalo 

Tamā faamolemole ia faasusulu lou malamalama i luga o mea uma lava e faatatau ia te a’u i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 5 SETEMA 2025

(tusia e Pastor EA Adeboye)

Manatu Autu: Tatalo mo taitai (Prayers for leaders)

Tauloto –  Faataoto 28:2 “O le fouvale o le nu‘u e to‘atele ai ona ali‘i; a o le ali‘i mafaufau ma le poto, e fa‘afualoaina ai le mālō.”

Faitauga - Tusi Paia: 1 Timoteo 2:1-2 “O lenei, e muamua i mea uma ‘ou te apoapoa‘i atu ‘ia faia ōlega, ma tatalo, ma fa‘atoga, ma fa‘afetai mo tagata uma lava; mo tupu ma i latou uma ‘ua i ai le pule, ‘ina ‘ia tatou nonofo ma le lē atuatuvale ma le filemū, i le amio Atua uma lava ma le amio matagofie.”

Tatalo mo taitai

1. Faafetai le Alii e, mo taitai uma ua e tofia mo matou i lo matou atunuu, i le malo, le Ekalesia, i fale faigaluega ma so’o se vaega o matou olaga. Faafetai mo lau tausiga ma le faasaoina o latou soifua.
2. Tamā, faamolemole ia e foai i matou taitai le poto faa le Atua ma è taitai iai latou ina ia faia faaiuga pito sili ona lelei e ō gatasi ma lou finagalo I taimi uma.  
3. Tamā, faamolemole foai i matou taitai le loto auauna. Ia faataga i latou e taitai i le agamalu ma le loto alofa. 
4. Tamā, faamolemole fesoasoani i matou taitai ia latou taitai ma le amiotonu ma le amio lelei. Fesoasoani iai latou ia tafiesea faiga faaalatua, i le suafa o Iesu. 
5. Tamā, faamolemole foai i matou taitai le malosi o le mafaufau e tapasāina luitau ma tulaga lavelave e feagai ona o tulaga tau taitai, i le suafa o Iesu. 
6. Tamā, faamolemole ia e tausia aiga o matou taitai ma saunia mea uma latou te manaomia. Aua e te faatagaina le tiapolo e faalavelave i le faatinoina lelei o latou tiute taitai ona o faafitauli i le aiga, i le suafa o Iesu. 
7. Tamā, faamolemole ia e puipui i o matou taitai mai agaga leaga. Aua nei faatagaina fuafuaga a le tiapolo e taunuu i o matou taitai, i le suafa o Iesu. 
8. Tamā, ua na o oe lo matou fesoasoani, faamolemole auina vave mai fesoasoani i o matou taitai ina ia latou faataunuuina faamoemoega autu mo latou olaga. 
9. Tamā, faamolemole ia e siomia o matou taitai i faufautua lelei ma tagata e iai tomai faapitoa. Ia aveesea mamao mai o matou taitai, tagata e manatu na o i latou lava ma fai togafiti, i le suafa o Iesu. 
10. Tamā, ou te tatalo ia maua e matou taitai le poto mai ia te oe. Ia taitaia i latou e faia faiga faavae e ō gatasi ma lou finagalo, i le suafa o Iesu. 
11. Tamā, faamolemole ia faataga lou agaga o le silisili ona lelei ia i luga o matou taitai. Fesoasoani iai latou ia saili auala lelei ma fofo I luitai uma ina ia siitia ma lelei auaunaga ma mea uma mo tagata lautele.   
12. Tamā, matou te faafetai mo matou taitai ua e tofia i le faigapalota faatoa maea atu nei. Ia e liligi faaua manuia mai le lagi io matou taitai aemaise le Palemia. Foai le loto toa faapea le matau pea ia te oe. Ia e siomia o matou taitai ini faufautua lelei e matatau ia te oe. I le suafa o Iesu e tatalo atu ai, Amene. 

OPEN HEAVENS

MATALA LE LAGI MO LE ASO TOFI 4 SETEMA 2025

(tusia e Pastor EA Adeboye)

Manatu Autu: Amuia e fiaaai (Blessed are the hungry)

Tauloto –  Luka 6:21 “Amu‘ia ‘outou e fia ‘a‘ai nei; auā e mā‘o‘ona ‘outou. ‘Amu‘ia ‘outou e tagi nei; auā e featani ‘outou.” 

Faitauga - Tusi Paia: Galuega 8:27-39

Fai mai le Salamo 63:1 “Le Atua e, o lo‘u Atua lava oe; ‘ou te ala sā‘ili ‘iā te oe; ‘ua fia inu lo‘u agaga ‘iā te oe, ‘ua ‘ou matuā naunau atu ‘iā te oe i le nu‘u naumati, e lailoa ai, e leai ni vai.”

‭‭

O le fuaitau o loo taua i luga na tusia e Tavita ao iai i le vao I Iuta. O le vao e mafai ona faamatalaina e lē lava meaai ma vaiinu e iai, ma è ui na fiaai ma fiainu Tavita, sa sili atu lona naunau i se mea e sili atu i le meaai ma le vai, o le mamalu o le Atua. Leitioa a faaigoa e le Atua Tavita o le tagata e tutusa ma lona loto (Galuega 13:22). 

I le faitauga o le Tusi Paia o le aso, ua tatou faitau ai i le eunuka mai le Ekalesia i Aitiope na malaga mai I ni maila se tele i Ierusalema e tapuai i le Atua. Peitai sa tele ni ana fesili ao ia toe foi atu i lona atunuu. Ao ia malaga ma ui atu i magaala pefua o Gaza, na fesootai atu se agelu ia Filipo ia tu i le auala o loo ui atu ai eunuka. Ao tu Filipo i tafatafa ala, na oo atu seisi faaaliga mai ia Agaga Paia ia soso atu i le kariota a le tamaloa. Na matua manatu le Atua i le eunuka, ma na ia galueaina mea uma, o le agelu, o se tagata ma lona Agaga, e momoli atu le tali na ia ole mai ai (Galuega 8:26-40). O le mea lea e tupu, pe a silasila mai le Atua i le fiaai moni i le olaga o se tagata. E na te lē tuua se tagata fiaai e alu e aunoa ma lona fafagaina o ia, ma e na te foai atu mea lelei mo i latou (Luka 1:53). 

“Amu‘ia ē fia ‘a‘ai ma fia inu i le amiotonu; auā e mā‘o‘ona i latou.” Mataio‬ ‭5‬:‭6‬ ‭

E fagaina e le Atua oe e fua i lou fiaai mo ia. Fai mai le Salamo 42:7, ‘…. fevala‘aua‘i lea moana ma lea moana’. Afai e te fia oo atu i le loloto ma le Atua, o lou fiaai e tosina mai ai punaoa e te manaomia e te oo atu ai i le loloto. O se tagata fiaai ma fia inu, o se tagata ua matua naunau i se meaai ma se meainu. E faapena foi ona manatu le Atua iai tatou ia fiaaai ma fiafeinu mo lona mana ma le viiga. E finagalo e tatou te sailiili ma mulimuli ia te ia ma saili ia mafuta vavalalata ma ia. Na tuuina mai e Iesu le faataoto i le Mataio 13:44-46, o le malo o le Atua e pei o se tagata na ia maua le oa i se fanua, ona ia faatau lea o mea uma sa ia te ia ina ia mafai ona ia faatauina le fanua lea ina ia maua le oa. E pei lava o le tamaloa i le faataoto, e finagalo le Atua ia e fiaai mo ia ona ia faatumulia lea o oe ma atagia ia te oe lona viiga i le lalolagi. O e fiaai moni ea mo le Atua? i le suafa o Iesu, Amene

OPEN HEAVENS

MATALA LE LAGI MO LE ASO LULU 3 SETEMA 2025

(tusia e Pastor EA Adeboye)

Manatu Autu: Aveese le paie (Banish laziness )

Tauloto –  Faataoto 10:4 “E mativa lē ‘ua galue ma le lima vaivai; a o ē lima malosi e mau‘oa i latou.” 

Faitauga - Tusi Paia: Faataoto 6:6-11

E tauia e le Atua i latou o ē matua saili ia te ia (Eperu 11:6); e na te lē tauia i latou e paie. Afai e te fia manuia, e tatau ona e filigā.

O ma’ua ma se tasi o au uo na faaolaina i le vaitau, o fai ma tulaga masani i le au kerisiano le faia o tautinoga. I lea taimi, o le aoaoga taatele lenei, ‘e pau lau mea e faia o le tautino faafia le mea e te manao ai, ona maua lea’. O la’u uo, sa matua filiga i le faia o nei tautinoga lelei. A ala mai i le taeao ua faia lana tautinoga ma faapea, ‘ou te maua se taavale fou, i le suafa o Iesu’. E lima tausaga mulimuli ane, e lei maua lava sana taavale. E iai se aso na ia fesili mai ai ia te au, ‘o le a lau mealilo? Sa ou filiga e faia tautinoga ae leai se taui’. Na ou tali atu ia te ia, ‘e te ala mai i le 10 i le taeao, ae ua 5 itula talu ona ou faigaluega. E te lē galue ae na o Le faia o tautinoga. E faamalie atu, peitai e faaauau pea ona e savali solo mo se taimi umi pe afai e te lē faia se suiga’.

E iai isi tagata ua fai ma fiafiaga le faalogologo i tautalaga a tagata e faamalosiau mai. E muamua ona resitara i fonotaga faapenei, peitai a oo i le taimi e faatino ai, e te fui e sue i latou. E le mafai e ni tautinoga ma aoaoga e lē faatinoina ona suia se tagata paie i se tagata faaeaina i le ola galue. O se tagata e lē faalogo ini tautalaga faamalosiau ma faia ni tautinoga, e iu pea o ia i le manuia pe afai na te iloa galue ma le filiga.

E ui ua 80 ou tausaga, o loo ou galue malosi pea i le galuega a le Atua. Ao momoe le toatele, o loo ou savalivali solo i le po ma tatalo. Ou te lē lauga ini mataupu papau: a e faalogo I au lauga, e te iloa ai, ou te sii mau mai le tele o fuaitau o le Tusi Paia. O mea nei e lē mafai ona maua tau i le malolo ma leai o se mea e faia. O le manuia i le olaga nei e lē tei a ua tupu, o le fanau mai o se purinisese poo se perenise, e lē faapea o le a manuia loa lea tagata i le ola nei. Tusa poo lea a le tele o le tamaoaiga e maua e se tagata mai lona aiga, afai e  paiē ma musu e faia le galuega e faatupu ai le tamaoaiga, e iu lea tagata i le faamaumau o mea uma ma amata ona tigaina. Fai mai le Faataoto 18:9 o le tagata paiē fo‘i i lana galuega, la te uso ma lē na te fa‘amaumau mea. 

Le au pele e, o le paie e na te faamaumauina avanoa matagofie. E lē saunia ai foi lou tagata e faaaoga lelei avanoa e te maua. Aua e te tuua se avanoa i le paie, ia tafiesea mai so’o se vaega o lou olaga. O le paie e lē saunia ai lou tagata mo avanoa e te maua ma e faamaumau ai avanoa matagofie, i le suafa o Iesu, Amene. 

‭

OPEN HEAVENS

MATALA LE LAGI MO LE ASO LUA 2 SETEMA 2025

(tusia e Pastor EA Adeboye)

Manatu Autu: Faatuatua e leai ni galuega (Faith without works )

Tauloto –  Iakopo 2:17 “E fa‘apea fo‘i le fa‘atuatua, pe ‘āfai e lē i ai galuega, e mate lava ia ‘ina ‘ua na o ia.”

Faitauga - Tusi Paia: Iakopo 2:20-26

I tausaga ua tuanai, sa iai ni tamaiti kerisiano e aooga i se tasi o Iunivesite na o mai ia te au ma faapea mai, ‘matou te lē iloa poo le a mea lea e tupu. O i matou o loo auai i mafutaga e tele an ina lē papasi’. Na ou tali atu, ‘e leiloa pe mafua ona o le faia o tou mafutaga i taimi e tatau ai ona faia tou meaaoga. Ua latou faapea mai, ‘e le o tusia ea e fesoasoani mai Agaga Paia iai matou?’ Na ou tali atu, ‘Faafetai ia Agaga Paia, peitai o loo faapea mai le Tusi Pa’ia, e faamanatu mai e le Agaga Pa’ia mea uma na a’oa’oina ai outou. Peitai afai e lei aoaoina outou, e i’u ina tou le papasi, a maea ona ia aoai outou ona ia faamafanafana lea ia te outou.

Le ‘au pele, a tou fia savavali I faamanuiaga a le Atua,e tatau ona ō faatasi le faatuatua ma galuega. O se faataitaiga I le tusi o Luka 5: 1-9, na afio ane Iesu ia Peteru, o loo iai lana va’a, ma faanoi e na te fia fa’aaogaina mo se taimi. Ina ua mae’a ona lauga Iesu mai le vaa, na faatonu e Iesu Peteru,e lafo lona upega I le sami ina ia maua ai ni i’a. Ana faapea e le faia e Peteru le faatonuga a Iesu, semanu e na te le molimauina le mana o le Atua. Ana na o le faapea mai o Peteru, ‘Ou te talitonu ia te oe Iesu, ou te iloa e te mafaia soo se mea’, ae musu e faatino le faatonuga a Iesu ia te ia, semanu e foi Peteru i le fale e aunoa ma se i’a.  Peitai na tali Peteru – ‘ona o lau upu, ua e fetalai mai ai ia te a’u, o le a ou faia lau faatonuga’. Sa faia e Peteru se la’asaga i le faatuatua, sa faia le galuega o le togi atu o le ‘upega i le sami. Ona faatumuina lea o le ‘upega ma ua I’u ina motusia le upega. O tagata e faia galuega i le faatuatua, latou te maua ni vavega matautia. 

O se isi faataitaiga o se tagata i le Tusi Pa’ia sa faaopoopoina sana galuega i lona faatuatua o le fafine punatoto i le Luka 8:43 -48. E lei gata tau o lona silafia, o Iesu e iai le mana e fofo ai lona gasegase, ae sa ia sue avanoa atu i le motu o tagata ina ia tau o le pa’i atu i le pito ‘ofu a Iesu. O le tali, na faamaloloina o ia mai se ma’i na pologa ai mo le 12 tausaga. 

A fai e te le o faia se mea e faamaonia ai lou faatuatua ua folafolaina, o lona uiga ua leai sou faatuatua. E le mafai ona e nofo I lou fale ma e tatalo mo sau galuega ae e te lei faia se talosaga tusitusia mo sau galuega.  Ma e faapena foi ona lē mafai ona e faatuatua I le Atua mo se pemita e te malaga ai I se isi atunuu pe a fai e te le o umia sou tusifolau. Ia faaola lou faatuatua i le faia o ni galuega; aua, o le faatuatua e aunoa ma ni galuega, e mate. Ia e faia se galuega talafeagai e tusa  ma mea o loo e faatuatua e te maua mai le Atua, i le suafa o Iesu, Amene.

OPEN HEAVENS

MATALA LE LAGI MO LE ASO GAFUA 1 SETEMA 2025

(tusia e Pastor EA Adeboye)

Manatu Autu: Aua nei faatagaina ni pa puipui i le Talalelei (Allow no barriers to the gospel )

Tauloto –  Isaia 61:1 “Ua i o‘u luga le Agaga o le Ali‘i le ATUA; Auā ‘ua fa‘au‘uina a‘u e le ALI‘I e tala‘i le tala lelei i ē ‘ua tigāina, ‘Ua ia ‘auina mai a‘u e fufusi i ē loto momomo, E tala‘i le sa‘olotoga i le tāfeaga ma le matuā tatalaina o ē ‘ua fusifusia.”

Faitauga - Tusi Paia: 1 Korinito 9:16-17

E masani ona fesili tagata pe aisea e manuia ai le Ekalesia Redeemed Christian Church of God I le lalolagi atoa. O le mea moni o loo iai la matou Ekalesia i atunuu e matua tapu ai le fa’akerisiano. I nisi o nei atunuu, e faalilolilo ona papatiso tagata, ma a matou fia talanoa i le Totò o Iesu, e faapuupuu TOI. Ua telē le tulaga lelei i nei atunuu aua matou te lē faatagaina se mea e taofia i matou i le talai atu o le Talalelei. E fai matou aoga Tusi Paia i malae taalaelae ma e tutupu vavega. E iai taimi e omai ai faipule mai ia vaega o le atunuu i le po e auai ma talitonu, o lo matou Atua e malosi ma matautia. 

E iai se tamaitai faievagelia o se misionare foi sa galue i se nuu i Aferika. I le nuu lea, sa ia taitaia tagata uma e faaolaina. Ua iloa e tagata mea na faia e le Atua mo i latou ma ua ola le afi mo le Atua. Ona manatu lea o lenei tamaitai ia faaolaina le nuu tuaoi.  Na ia logo tagata i lona manatu, peitai sa lē lagolagoina. Na faapea mai, ‘e mafai ona e alu i seisi nuu ae aua lava nei e alu i le nuu tuaoi’. Na fesili le tamaitai pe aisea. Na tali mai, ‘e tele leona i le ala. O loo matou faalogo atu i a latou tagi, ma a tagi faapea, o lona uiga o loo fiaaai. Faamolemole aua e te alu latalata i le nuu le la’. Peitai na finau atu e tatau ona alu. Ona sau lea o se tamaloa matua e tino vale ma faapea mai, ‘afai e tatau ona e alu, e mafai ona tā ō’. Na fai atu le faievagalia ia te ia, ‘a osofaia mai se leona, e sili atu le mafai ona ou puipui a’u lava nai lo lou puipui o oe lava’. Ae tali le tamaloa, ‘e te lē malamalama, e le osofai mai ni leona pe a maoona. E faatoa osofai ma fasioti se tagata pe a fiaaai. O le mea la e tatau ona fai, ou te savali i ou luma, a osofai mai leona ma ‘ai a’u, ona avanoa lea o le ala mo oe’. O tagata o le nuu lea ua saunia e tuuina atu o latou ola mo le Talalelei ina ia oo atu iai latou e lei oo iai. 

Le au pele e, e lē fai atu le Atua ia te oe e faia se galuega tele e pei o le talai atu i lou pule. Peitai a e fefe i tei ua tuli oe ma le galuega ma musu e faia, o le a taofia le avanoa e faalogo ai se tagata e lei faaolaina i le Talalelei. Aua nei e faatagaina ni pa puipui e taofia oe mai le talai atu o le Talalelei; o loo faalagolago le Atua ia te oe e taofia le toatele o tagata mai le oo atu i le faafanoga. Ia e faaaogaina avanoa uma e talai atu ai Iesu i tagata, i le suafa o Iesu, Amene. 

OPEN HEAVENS

MATALA LE LAGI MO LE ASO SA 31 AOKUSO 2025

(tusia e Pastor EA Adeboye)

Manatu Autu: Vivii atu i le Atua (Praise the Lord )

Tauloto –  Salamo 150:6 “Ia vivi‘i atu i le ALI‘I o mea uma lava e mānava. ‘Ia ‘outou vivi‘i atu i le ALI‘I.”

Faitauga - Tusi Paia: Salamo 107:1-9

I le 2 Samuelu 6:14, o loo tusia i le Tusi Paia na siva Tavita i le Atua ma lona malosi atoa. E alofa tele le Atua ia Tavita ma sa iai le Alii ma Tavita I taimi uma aua e vivii o ia i le Atua I taimi uma.  O soo se taimi e ulufia ai e temoni Saulo ae tā e Tavita le kitara, e afio mai le mamalu o le Atua I le potu ona sosola ese ai lea o temoni (1 Samuelu 16:23). Fai mai le Salamo 22:3 e afio mai le Atua pe a fai viiga a Isaraelu. Afai e te vivii i le Atua I taimi uma, e lē mafai e temoni ona omai i ou autafa aua a oo mai le malamalama, e alu ese le pogisa (Ioane 1:5). 

Le au pele e, e tatau ona e faamasani i le vivii i le Atua i aso uma. I afioga a le Atua e te maua ai mafuaaga e tele e tatau ai ona e vivii ia te ia. I le Kenese 17:1, e faaigoa e le Atua o ia o Ieova El Shaddai, o le Atua e ona le malosi uma lava’ , o le Atua e iai le lava ma totoe. I le Kenese 18:9-14 ma le Ieremia 32:27, o loo faailoa mai ai, o ia o le Atua o tagata uma ma e leai se mea e na te lē mafaia. I le Esoto 15:26, ua ia faailoa mai o ia o le ‘Alii e faamalolo ia te oe’ aua o ia o le fomai sili. I le Salamo 24:7-10, na faailoa mai o ia i ni suafa se lua, o le Tupu Mamalu ma le Alii o ‘au. I le Salamo 23:1, ua faailoa mai o ia o Ieova Rohi, o le leoleo mamoe lelei e foai mai mea uma e te manaomia. I le Kenese 16:13, o ia o Ieova Roi, o le Atua e faaali mai, o le Atua e silafia mea uma, o loo sisila alofa mai. E manatu alofa mai o ia ia te oe ma e na te silafia lou igoa (Esoto 33:17). I le Ieremia 32:17-19, o ia o El Gibhor, o le Atua Malosi e na te laveai mai. I le Esoto 17:15, e faaigoa o ia o Ieova Nissi, o le Alii o lo’u tagavai ia, o le tagavai malosi mo le faasaolotoga. I le Isaia 1:24, o ia o Ieova Sapaota, o le Alii o ‘au, e na te tauina taua e tatou te iloa atu ma taua e lē iloa e mata, e tau mo tatou ma tuuina mai le manumalo i ou fili ma ē ita mai. 

E tusa ma le Esekielu 48:35, o ia o Ieova Shammah, o le Atua e iai o ia I mea uma. E iai o ia I soo se taimi e te manaomia ai o ia, e lē moe pe tulemoe o ia (Salamo 121:4). O ia o le Alefa ma le Omeka o lou ola (Faaaliga 21:6); o Lana Upu e muamua ma o ia foi e mulimuli (Isaia 44:6). Ua na o ia le Atua ((Salamo 86:10); e lelei o ia (Salamo 73:1), e faamaoni lava (Failauga 3:23), o le Atua malosi e ia te ia mea uma (Kenese 17:1), e lē suia o ia (Malaki 3:6). O le Atua o lou fesoasoani (Ioane 14:16), o le faaola( 2 Samuelu 22:2), o le fesoasoani (Salamo 54:4), o le faiaoga (Ioane 14:26), o le malosi ma le pese (Esoto 15:2). O ia o le fesoasoani sili I taimi o puapuaga (Salamo 46:1). E fa‘a‘atoa e ia ‘iā te ‘outou mea uma e matitiva ai, e tusa ma le faula‘i o lona vi‘iga (Filipi‬ ‭4‬:‭19‬) ma fa‘asilisili lava i mea tou te ole atu ai ma mafaufau i ai (Efeso‬ ‭3‬:‭20‬). E na te faaola ma leoleo ia te outou seia oo i le iuga (Iuta 1:24). 

Le au pele e, o loo iai le manava ia te oe, e iai le mafuaaga tatau e te vivii ai i le Atua, i le suafa o Iesu, Amene. 

OPEN HEAVENS

MATALA LE LAGI MO LE ASO TOONAI 30 AOKUSO 2025

(tusia e Pastor EA Adeboye)

Manatu Autu: E mafai ona faaaoga oe e le Atua (God can use you )

Tauloto –  Mareko 9:23 “Ona fetalai atu lea o Iesu ‘iā te ia, “‘Ai se mea ‘e te mafaia. Auā e mafaia mea uma lava i lē fa‘atuatua.”

Faitauga - Tusi Paia: Mareko 16:17-18 

Sa soona sauā Paulo I Kerisiano ma Ia tuuina nisi o I latou I le falepuipui (Galuega 8:3). Na vaai Paulo ia te ia lava ua sili musa I e agasala (1 Timoteo 1:15). Peita’i na suia o ia e le Atua ma amata fa’aaogā o ia e faia vavega sili (Galuega 19:11-12). Afai na fa’aaogā e le Atua Paulo, e mafai fo’i ona Ia fa’aaogā oe. Fai mai Galuega 5:14-16 ua aumai e tagata I e mama’i ma faataooto i auala i Ierusalema ma le faamoemoe tau lava ina ia lafoia le ata o Peteru i nisi o i latou pe a ui ane ai ona malōlō ai lea o i latou. O Peteru lava lea e tasi na faafitia fa’atolu Iesu, peita’i na toe fa’afo’isia o ia e le Atua ma amata fa’aaogā ia te ia. Afai e mafaia e le Atua ona fa’aaogā Peteru, e mafai fo’i Ona Ia fa’aaogāina oe.

 Sa faia sa matou sauniga o le Agaga Paia i le Aai o le Togiola ae maua atu se telefoni a se tinā, ua fanau lana tama, ma ua maliliu uma ma si ana masaga. Na tali lea fafine, “aua ne’i lotea i latou, faamolemole faatali mai ia te a’u.” Sa tamoe le tinā i le falemai ma talosaga e fia vaai i le masaga, na faaali ifo i le tinā tino maliu o le masaga. Sa avatu e le tinā se fagu suauu ma se solosolo sa tatalo ai i luga le au uso a’o fai le sauniga, ma faasinasina le suauu i le gutu o le tasi o le masaga (ua maliu) ma faapea, “Fo’i mai iinei, o ai na fai atu ia te oe e mafai ona e oti?” I ni nai minute ae tale le pepe ma toe ola mai. Na fa’aauau e le tina i le isi pepe ma na faapea fo’i ona toe ola le isi pepe o le masaga. Ina ua maea, na feei ma vavaō uma le falemai atoa. O le taimi lea ua toso atu agai i le fale maliu le tino maliu o lana tama teine, le tinā o le masaga. Sa ia taofi le au toso, tului sina suauu i le fofoga o lana tama maliu, tu’u le solosolo i ona luga ma fai i ai, “o ai e te manatu o le a tausia lau fanau? Aua e te fa’ama’imaua lo’u taimi; fo’i mai!” O le taimi lava lea na toe ola ai ma nofo mai i luga lana tama. Na fa’aaogā e le Atua lenei tinā e toe fa’atutū ai tagata e toatolu mai le tuugamau i le aso e tasi. Le au pele e, e mafai fo’i ona fa’aaogā oe e le Atua e fai vavega.

 O le tatou tusi faitau o le asō, o loo fai mai e mulimuli atu fo’i nei faailoga i e fa’atuatua; e tutuli e i latou temoni, e tautalatala i gagana fou, fa’ae’e lima i luga o e mama’i ma faamalōlō i latou i le suafa o Iesu. Afai o oe o se soo o Iesu Keriso, o oe o le tagata sili ona fetaui e faaaoga e le Atua e faia faailoga ma vavega. Ia e talitonu i lona malosi ia te oe ma o le a Ia faia mea tetele ma le ofoofogia e ala ia te oe i le suafa mamana o Iesu.

Tatalo 

Tamā, ou te faatuatua ia te oe, ma ou te tuuina atu lo’u tagata mo lau galuega, i le suafa o Iesu, Amene.