Samoan Devotional

OPEN HEAVENS

MATALA LE LAGI MO LE ASO TOONAI 18 OKETOPA 2025

(tusia e Pastor EA Adeboye)

Manatu Autu: O Le Alii (The Lord)

Tauloto Tusi Paia –  Ieremia 33:2 “O lo‘o fa‘apea ‘ona fetalai mai o le ALI‘I lē na te faia, o le ALI‘I lē na te saunia, ‘ina ‘ia fa‘atumauina; o le ALI‘I o lona suafa lea:”

‭‭

Faitauga - Tusi Paia: Isaia 42:5-8

O ai o se alii? O se ‘alii’ o se tasi e tatau ona e gaua’i i ai. O se alii o se tasi e te lē fai i ai ‘Leai’. A ō tagata I le faamasinoga latou te faalupeina le faamasino o, ‘lo’u alii’. E leai se tagata e lelei sona mafaufau o le a fia finau ma se faamasino pe a uma ona aumai se faaiuga o se faamasinoga. Na o le pau le isi faatatau e fai e tagata pe a lē fiafia i se faaiuga, o le talosaga i se faamasinoga maualuga atu. Peita’i o le finau ma se faamasino o le o loo latou tā’ua o lo’u alii i totonu o le faamasinoga e le oo i ai se mafaufau. 

Afai o se uso ua tu’u lona ola iā Iesu Keriso, e lē gata ua fai Iesu ma ona faaola a ua avea fo’i Iesu ma ona Alii. Auā o Ia o lou Alii, e pule Iesu I lou olaga. Na te fuafua mea e te fai, o fea e te alu I ai, ma au amio e fai. E leai sou sa’olotoga i ni au faamatalaga e fai auā o Ia lea ua fai nei ma ou Alii. Fa’ata’ita’iga, e lē mafai ona e faaaoga au tupe i ala e te mana’o ai auā ua e lē toe pule ia te oe lava. A e malamalama i le pulega a Iesu ma gaua’i ia te Ia o lou Alii, o le a e maua le tele o manuia e lē ma faitaulia o avea o Iesu ma ou Alii. 

Fai mai le Salamo 16:8-9 

“‘Ou te tu‘u le ALI‘I i o‘u luma e lē aunoa; auā o i lo‘u itū taumatau o ia, e le fa‘agae‘etia ai lava a‘u. O le mea lea e fiafia ai lo‘u loto, ma ‘oli‘oli ai lo‘u mamalu; e mālōlō fo‘i lo‘u tino ma le saogalemū.”

I le fuaitau ua tā’ua mai le Tusi Paia, na vaai Tavita I le Atua o lona Alii ma usita’i ia te Ia. Na iloa e Tavita ua le toe pule ia ia te ia lava, o lea na ia faamuamua le Alii I taimi uma. A e faamuamua le Alii I mea uma e te fai, o le a ia faa mautinoa e leai se mea e afaina ai pe faaleaga ia te oe. Na te lavea’i, puipui ma leoleo ia te oe. O le Alii lenei o le Alii o ‘au ma e ia te Ia le malosi uma I le lagi ma le lalolagi ma lalo ifo o le lalolagi i lana pule. O le usita’i ma gaua’i i le Alii e te agava’a ai e faaaoga ma pule saoloto i mea uma a le Atua.

Fai mai le Ieremia 51:19 “E lē pei o ia mea le tofi o Iakopo; auā o ia lava na faia mea uma; o Isaraelu fo‘i o le to‘oto‘o o lona tofi lea; o le ALI‘I o ‘au, o lona suafa lea.”

‭

Le au pele e, ua tu’u atoatoa lou ola iā Iesu Keriso? E te iloa o Ia o lou Alii? O le Manuia o lou olaga e faalagolago i lou iloa ma usitai i le Atua, o Ia o le Alii o mea uma o lou soifua, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 17 OKETOPA 2025

(tusia e Pastor EA Adeboye)

Manatu Autu: O le tagata e te faaipoipo iai (Whom to marry)

Tauloto Tusi Paia –  Mataio 7:20 “O lea fo‘i tou te iloa ai i latou i o latou fua.”

‭‭

Faitauga - Tusi Paia: 2 Korinito 6:14-16

Fai mai le faitauga mai le Tusi Paia o le asō, e aua tou te amo fa‘alegatasi ma ē lē fa‘atuatua, o lona uiga, e lē tatau ona faaipoipo atu kerisiano i ē lē faatuatua. A faaipoipo atu kerisiano i le au lē faatuatua, ma le manatu e mafai ona latou suia i latou, o loo latou olegia i latou lava. O tagata e lē mafai ona suia ae lei faaipoipo, e seasea iai se tasi e sui pe a uma ona faaipoipo. E taua le maitau mai, o le lelei ma le faaaloalo o se tagata, e lē tutusa ma le faaolaina. 

O le atalii poo le afafine o le Atua e tu i le Atua, le Papa Mautū. O se tagata lē faatuatua, o loo tu i le mea matuā palapalā. Ao e tu i le papa, ae o loo e uuina se tagata o loo tu i le mea matuā palapalā, e tele le avanoa e taitaiina oe e lē o loo tu i le mea matuā palapalā, e te sulu pe pau i lalo aua o loo ia tu i le mea māseesee. O le mea lea e tupu i le toatele o kerisiano e manatu e mafai ona latou suia latou paaga lē faatuatua. O latou paaga o le a taitaia i latou e solomuli ma pauu, ma e latou te iu ane lava, ua lē toe faatuatua. Fai mai le Tusi Paia i le 1 Korinito 10:12 …. o lē manatu o lo‘o o tu ia, ‘inā fa‘aeteete ia ne‘i pa‘ū.”

E lē tatau foi i kerisiano ona faaipoipo atu i tagata e lē fia faalogo i aoaiga ma faatonuga ma faia suiga lelei i mea e faia ma amio mo le lelei. Fai mai le Tusi Paia i le Faataoto 15:32 “O lē na te te‘ena mea e a‘oa‘oina, e fa‘alēaogāina e ia lona lava ola; a o lē fa‘alogo i le a‘oa‘iga, e maua e ia le poto.”   Afai o oe o se kerisiano e lei faaipoipo, aua e te faaipoipo i se tagata e leai se tagata taitai e faalogo ma usitai iai. O soo se tagata e lē mafai ona faalogo pe gauai i seisi tagata, e lē faalogo foi ia te oe. 

E lē fautuaina foi se kerisiano ona faaipoipo atu i se kerisiano e pepe le olaga. E sili atu le faaipoipo i se tagata ua ausia le matua faaleagaga ma o loo tuputupu pea ina ia mafai ona faamaai e le tasi leisi. Fai mai le Faataoto 27:17, “E ma‘ama‘ai le u‘amea i le u‘amea, e fa‘apea fo‘i ‘ona fa‘amafanafana o le tagata i lana uō.”

‭‭

Afai e te lei faaipoipo, aua e te faaipoipo i se kerisiano e faaletino aua o lona naunau i mea o le lalolagi e sili atu i mea faaleagaga e ono taitaia oe e te sulu ma pau. 

Le au pele e, o le faaipoipo i le tagata sao e pei ua e maua le lagi i le lalolagi nei. Peitai, a e faaipoipo i le tagata sese, o le a e maua ma ola i seoli i le lalolagi nei. O kerisiano e lei faaipoipo, e tatau ona e faaeteete i le tagata e te faaipoipo iai, i le suafa o Iesu, Amene.

OPEN HEAVENS

MATALA LE LAGI MO LE ASO TOFI 16 OKETOPA 2025

(tusia e Pastor EA Adeboye)

Manatu Autu: Le toe iai se ita (No more anger)

Tauloto Tusi Paia –  Efeso 4:26-27 “A ‘outou ita, ‘aua le agasala ai; ‘aua ne‘i goto le lā o ita pea ‘outou. ‘Aua fo‘i ne‘i tu‘uina atu e ‘outou se mea e mautū ai le tiapolo.”

‭‭

Faitauga - Tusi Paia: Iakopo 1:19-20 

Fai mai le Failauga 7:9, e tumau le ita i loto o ē valelea. I nisi faaupuga, afai e ita gofie se tagata, e tutusa lava o ia ma le tagata e faapea mai e leai se Atua, e valelea. O i latou e ita gofie e masani ona tuuaia isi tagata o loo faaosoina lo latou ita. A faapea o lea, ua latou faataga isi tagata e faaosoina lo latou ita e pulea o latou lagona. Fai mai le Faataoto 25:28, o le tagata e lē mafai ona ia pulea lona loto e faapei o le aai e leai ni aupa. A e faatagaina isi tagata e pulea ou lagona, o lona uiga ua matua lamatia oe, ia faaumatia. 

Fai mai le Faataoto 29:22, “O le tagata itagofie na te fa‘atupuina le misa; ma le tagata lotoa na te fa‘ateleina soliga o le tulafono.” O soo se tagata e ita gofie, e tau leai ni ana uo aua o le ia faatupuina le femisaai ma i latou. O mea e le masani ona misa ai ni tagata, o le a avea ma mataupu tetele ona o le itagofie o lea tagata. 

Sa iai se tamaloa sa faatau sana taavale fou, ma e iai se aso ao ia fufuluina, sa iai lona atalii e lima tausaga i le isi itu o le taavale, o loo ia tusitusia le taavale i se mea maai. Ina ua maua atu e le tamaloa lona atalii, ua oso lona ita tele ma ee atu, ‘fefē i lenei tama, ua e faaleagaina la’u taavale fou?’. I lona ita tele, na tago atu uu mai le mea muamua na tau atu iai, o le samala. Ua ia sasa ai tamaimailina o le tamaitiiti. E na te iloa ane lana mea o loo faia, ua matua leaga ma lē aogā tamaimailina o lona atalii. Na vave atu ma ave le tamaitiiti i le falemai, peitai ua lē mafai e fomai ona faasaoina tamaimailina ma ua tipi ese (tulou). I le aso na sosoo ai, na fesili iai le tamaitiiti, ‘Tamā, o afea e toe tutupu ai ou tamaimailima?’ Ua lagona lona salamo, ma ua alu atu i le taavale e tilotilo i le mea na tusi e le tamaitiiti. Faauta, o loo tusia ai, ‘ou te alofa ia te oe, tamā’. Sa ia lē mafai ona talia le loto mafatia ma le tigā ma ua alu atu ma pule i lona ola. O lona ita ua matua vevesi ogaoga ma faatupu masei i lona aiga. 

Le au pele e, a e faatagaina le ita e pulea oe, o loo e tuu avanoa i le tiapolo (Efeso 4:27), ma o soo se mea e sao atu iai le tiapolo, o lana misiona o le gaoi, fasioti ma ia faaumatia (Ioane 10:10). Afai e te itagofie pe lē mafai foi ona e pulea lou ita, ole atu i le Atua ia faasaoloto oe i le asō. Ia e faafouina lou mafaufau i aso uma e ala i Lana Upu ma ia e faamaulalo i se fesoasoani e faufautua ia te oe ina ia e manumalo i le malosiaga e faaumatia, o le ita. Aua e te tuu avanoa i le tiapolo i lou olaga i le faatagaina lea o le ita e pulea oe, i le suafa o Iesu, Amene.

OPEN HEAVENS

MATALA LE LAGI MO LE ASO LULU 15 OKETOPA 2025

(tusia e Pastor EA Adeboye)

Manatu Autu: O le Atua Malosi (The All-Powerful God)

Tauloto Tusi Paia –  Ieremia 32:17 “Auē! le Ali‘i e, le ATUA, fa‘auta, o oe na e faia le lagi ma le lalolagi i lou malosi tele ma lou ‘a‘ao fa‘aloaloa, e le faigatā fo‘i ‘iā te oe se mea e tasi;”

‭‭

Faitauga - Tusi Paia: Ieremia 51:15-16

O le malosi i le lagi ma le lalolagi  o i le Atua lea. Fai mai le Salamo 62:11 “Na fetalai fa‘atasi mai le Atua; ‘ua ‘ou fa‘alogo fa‘alua i lenei mea, o i le Atua le malosi.” O lona uiga e leai se mea e na te lē mafaia ona fai. I le Ieremia 32:27, ua ia fetalai, ‘Fa‘auta, o a‘u lava o le ALI‘I, o le Atua o tagata uma; pe faigatā ‘ea ‘iā te a‘u se mea e tasi?” I le Luka 1:37 o loo faaalia mai iai tatou, “Auā e leai lava se mea e tasi e lē mafaia e le Atua.” A fai atu se tagata ia te oe o le tulaga o loo e iai ua le toe mafaia ona toe suia i le lelei, e tatau ona e iloa o lena tagata e na te leiloa le Atua malosi. E te valaaulia ma le iloa le Atua i le tulaga o loo e iai, o le a suia vave mo le lelei. 

I le 1979, ao matou sauni atu i le matou fono tele. Sa matou faaigoaina o le ‘Fonotele a Keriso le Faaola’. Sa masani ona faia le fonotele i taulaga eseese ma e fafaga uma tagata e auai. Ao sauni atu mo le fonotele i le tausaga lea, na ma ō ma lo’u toalua e faatau mai ni povi e fafaga ai tagata, peitai ina ua ta’u mai le tau, na ma toe foi i le fale ona e lē lava le tupe. Ua ma fesili atu i le Atua, ‘Le Alii e, o le a le mea o le a fai? O fea e maua ai le tupe e faatau ai povi?’. Ua amata ona ma tatalo, ma na faafuasei ona tuitui mai le faitotoa. Ina ua tatala atu le faitotoa, sa iai se tasi o uso ua malaga mamao mai Lagos. Ua ia faapea mai, ‘Lau susuga, talosia e te lei faataua ni povi. Ua ma tali atu, ‘e leai, ona e lei lava le tupe’. Ona ia faapea mai lea, ‘ua maea ona ou faataua povi e tolu mo le fonotele’. O le Atua Malosi e iai ana lafu manu i mauga e afe (Salamo 50:10), ua ia saunia mea na manaomia i le toe taimi. 

O le Atua Malosi e mafai ona ia suia lou talaaga, tusa poo le a le leaga o iai. O Sakaio sa iloa o ia o le tagata agasala e tagata uma o le taulaga. Peitai ina ua ia feiloai ma Iesu, na suia lona talaaga. O le Malosi o le Atua ua suia Sakaio ma avea o ia ma tagata fou ( Luka 19:1-10). 

Le au pele e, o le Malosi uma lava i le lagi ma le lalolagi ma lalo o le lalolagi e i le Atua lea, ma e mafai ona ia feluiaina olaga o tagata, o ulugalii faaipoipo, o tulaga tau tupe ma soo se mea e te manatu iai. Afai o iai se tulaga lē lelei i lou olaga, valaaulia le Atua i lena tulaga, tatalo ma tuuina atu i le Atua ona e faatuatua lea e na te faataunuuina. E faailoa mai o ia i se tulaga matautia i lou olaga ma liliuina lena tulaga mo le lelei. 

Tatalo, 

Le Atua Malosi, faamolemole faailoa mai lau afio matautia i lo’u olaga i le suafa o Iesu, Amene. 

OPEN HEAVENS

MATALA LE LAGI MO LE ASO LUA OKETOPA 2025

(tusia e Pastor EA Adeboye)

Manatu Autu: Aua le popole mo a taeao (Dont worry about tomorrow)

Tauloto Tusi Paia –  1 Peteru 5:7 “Ia tu‘uina atu ‘iā te ia mea uma tou te popole ai, auā o lo‘o manatu mai o ia ‘iā te ‘outou.”

‭‭

Faitauga - Tusi Paia: Mataio 6:25-34

E toatele tagata e matua popole i lo latou lumanai, e galo ai ona latou faia mea tonu ma sa’o i le asō. Fai mai le tusi faitau mai le Tusi Paia o le asō, e le tatau ona e popole mo a taeao, aua e saunia e le Atua mea uma. E tatau i le aso lona lava leaga, o lona uiga, e tatau ona e fa’afetauia fa’afitauli o le aso, ae lē o le popole mo a taeao. Talitonu mai, o le popole e matua faamaimau taimi. Sa fetalai Iesu, e le mafai ona  faaopoopo se kupita o lou umi, i le popole. (Mataio 6:27). O le popole e fa’avaivai ai, tuu le popole ae fa’atuatua i le Atua, mo lou lumanai.

E so’o se mea e tuuina atu i a’ao o le Atua o le a fua tele mai. ‘Aua nei e manatu e mafai ona e fa’aleleia taeao, aua e matuā e le silafia se mea o le a tupu taeao. Mo se fa’ataitaiga, e anoanoa’i tagata  sa faata’atia a latou fuafuaga ae e lei tupu mai le Koviti. Peitai, ona o le faama’i, sa toe tuu i tua a latou fuafuaga. E matuai anoanoa’i mea e ono tutupu e lē oo iai lau pule, ma e sili le tuuina atu o lou lumanai i a’ao o Lē, o le Amataga ma le Gata’aga. O le mafua’aga lena e fai mai ai le Iakopo 4:13-16, e te lē silafia le mea o le a tupu taeao, ma o so’o se taimi e te talanoa ai i le lumana’i, e tatau ona e iloa, o soo se mea e tupu, e faalagolago i le finagalo o le Atua.

E lei atoa lo’u 40 tausaga, ae tofia a’u e avea ma taitai aoao o le Ekalesia RCCG. E iai le aso sa ou tilotilo i lo’u ata i le faata ma ou va’aia ua sinā uma lo’u ulu. Ona ou fesili lea i le Atua, “Pe faapefea ona tupu lenei mea? O a’u ua nā o se talavou.” I lena foi taimi, sa iai faafitauli i le Ekalesia, ona fetalai mai lea o le Alii ia te a’u; ‘E mafua uma nei fa’afitauli ona o lo’o e tau’aveina se ‘avega, e lē o se avega tau oe..” Sa ou tali atu ia te ia: “O le ‘avega a le Ekalesia”, ona ia fesili mai, “O se Ekalesia a ai? O se Ekalesia o Adeboye?” Sa ou tali atu iai, “Leai”. Ona ia faapea mai lea: ”O ai na fai atu ia te oe e le mafai ona ou tau’aveina le ‘avega e patino ia te a’u? O lo’o e tau’aveina se ‘avega e le o sou faafitauli. 

O lea faato’a uma ona ou tofia oe e avea ma taitai aoao ina ia iloa oe e tagata o lo’u sui. O a’u e ona  le Ekalesia  ma ou te tausia lelei la’u Ekalesia.”

Ina ua ou faalogo i upu nei, ua māmā mea uma, ona toe lanu uliuli ai lea o lo’u ulu. I nai tausaga ua tuanai atu, sa ou vaaia ni sina fou i lo’u ulu, ma ou fesili atu i le Atua, “Le Alii e, po ua ou toe popole ea?“ Sa ia tali mai:“Leai, o le taimi nei, ua fa’asolo ina e matua.”  

Le ‘au pele, aua le popole. Ae tuu lou faatuatua i le Atua aua e na te tausia ona tagata i taimi uma. Aua le popole; filifili e faatuatua i le Atua, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 13 OKETOPA 2025

(tusia e Pastor EA Adeboye)

Manatu Autu: Tali o le taufa’amata’u (Handling threats)

Tauloto Tusi Paia –  Isaia 41:11 “Fa‘auta, e mamā ma māsiasi i latou uma o ē ita ‘iā te oe; e ‘avea i latou e peiseaī ‘ua leai; e fano fo‘i i latou o ē finau atu ‘iā te oe.”

‭‭

Faitauga - Tusi Paia: 2 Nofoaiga Tupu 20:1-30

I le Galuega 4:1-31, na taumatau le au aposetolo e le au ositaulaga sili ma toeaina, ia aua nei toe ta’ua le suafa o Iesu. Peitai na latou potopoto faatasi e tatalo, ma ao tatalo, o le nofoaga sa potopoto ai ua luluina, ma ua latou talai atu le upu a le Atua ma le toa. O le tiapolo e taufaafaamatau ma taufaafefe, e lē fiafia ae lui atu e se tagata. Afai e taufaamatau atu se tagata ia te oe ona o le faia o le finagalo o le Atua, e lē o le taimi lena e te tetemū ai i le fefe pe lafi, o le taimi lena e te tatalo ai. 

I le faitauga o le Tusi Paia o le asō, e tolu atunuu tetele o fili o Isaraelu na faasagatau ma taufaamatau mai ia Iosefatu, ona tatalo lea ma anapogi tagata uma o Iuta, na avatu e le Atua iai latou le fuafuaga e faaumatia ai o latou fili, o le viiga. Ao amata e Iosefatu ma tagata uma o Iuta ona pepese ma vivii atu ile Alii, na toe osofaia lava e le fili i latou, ma o i latou sa o mai faatasi e faasagatau ia Iuta ua faafuaseia ona liua ma ua faasagatau lava i latou i ai latou ma fefasiai ai lea oi latou. Fai mai le 2 Nofoaiga Tupu 20:23

“Auā na tula‘i le fānauga a Amoni ma Moapi e tau ma ē nonofo i le mauga o Seira, e matuā fasioti ma fa‘aumatia ai i latou; ‘ua uma ‘ona latou fasia o ē nonofo i Seira, ‘ona fefasia‘i ai lea o i latou.”

‭‭

Na faafilemu e le Atua le tau faafefe mai o fili o Iosefatu e aunoa ma se faaaogaina o se pelu. I le suafa e sili i suafa uma lava, e tulai lo’u Tamā e faafilemu soo se taufaamatau mai a ou fili e faasagatau i lou olaga ma le lumanai, i le suafa o Iesu. 

I ni tausaga talu ai, na sau se fafine ia te au ua luluina. O lana tama ua manuia i le maitaga ma ua o mai ona fili e tau faafefe ia te ia ma faapea mai, ‘ua manuia lau tama? O le a matou filifili pe fanau i le laueleele poo luga o le ea. O le a matou faia matou vai ina ia aua lava nei fanau’. Ua fefe le fafine ma sa ou fai atu ia te ia, ‘aua e te fefe, e ola ma manuia si au tama’, na fesili mai, e faafefea ona e iloa?. Na ou tali atu, ‘aua o le Atua o ‘Au o le a tau mo oe’. E moni na tau le Alii mo ia, ma ua ola manuia ma fanau si ana tama. 

Le au pele e, ou te iloa le Atua e malosi atu i lo lē sili ona malosi. E na te tali i soo se taumafaatau mai e o’o mai i ou ala. A taufaamatau mai le fili, aua e te fefe. Ae ia tuu lou faatuatua i le Atua aua e sili le malosi o lē o loo i totonu ia te oe i lo lē o loo i le lalolagi (1 Ioane 4:4). 

Tatalo

Tamā faamolemole tulai ma faafilemu soo se taufaafefe mai a le fili o loo faasagatau mai i lo’u aiga ma lo’u lumanai i le suafa o Iesu, Amene.

OPEN HEAVENS

MATALA LE LAGI MO LE ASO SA 12 OKETOPA 2025

(tusia e Pastor EA Adeboye)

Manatu Autu: Ola I Tua Atu O Tapula’a (Living Beyond Limitations)

Tauloto Tusi Paia –  Kenese 21:19 “Ua fa‘apupulaina e le Atua ona mata, ‘ona iloa ai lea o ia o le vai‘eli; ‘ona alu lea o ia, ‘ua utu ai le fagu pa‘u i le vai ma fa‘ainu ai le tama.”

‭‭

Faitauga - Tusi Paia: Kenese 21:13-19

O Elia o se tagata na ia iloa ma masani I le fesoasoani a Agaga Paia ia tula’i I luga a’e o tapula’a fa’ale tagata. I le taimi o le tetele o le oge ae sa talitali lelei lava tausami ma vai taumafa a Elia (1 Tupu 17:3-6). A o maliliu tagata I le matelaina a o loo fiafia lava Elia I le foai mai le lagi I le taimi atoa o le oge. A mafana le lua mafutaga ma Agaga Paia o le a e talia fa’atonuga fa’alelagi e te ‘alo’ese ai i faafitaul o loo ui ai isi tagata. I taimi o oge, e faamalieina lava oe ma e te lē māasiasi i taimi leaga (Salamo 37:19). 

I le 1 Tupu 18:44-46 ina ua auina e le Alii uaga i Isaraelu, na tamoe Elia I luma atu o le kariota a le tupu o Isaraelu. O tupu lava e I ai kariota aupito lelei ma saoasaoa i le nuu, peitai na mua Elia i le aupito lelei o lelei auā sa i ona luga Agaga Paia. Ou te tatalo i le suafa e sili i suafa uma lava ia i ai le aao o le Alii i ou luga ma o le a amata e soifua i luga atu o tapula’a fa’ale natura.

O le valea o le tasi o faafitauli tugā e fesaga’i ma soose tagata. O le tele o taimi e lē iloa e tagata punaoa e mafai ona laveaiina ma fa’asaoina i latou, tusa pe o latalata ma papa’i ifo ia i latou. O le mafuaaga lea o le feagai o le toatele o tagata ma fa’asalāvei matuiā. Ua faatusa i le tusi o Efeso 4:18; le valea i le pouliuli ma le tauaso. I le fuaiupu lenei, fai mai Paulo o nisi tagata ua faapouliuligia o latou mafaufau, o le liliueseina o i latou i le ola o i le Atua ona o le valea ua ia i latou ma le maa’a o latou loto. A fai o se tagata pupula o loo nofo i le pouliuli, o i ai pea le faamoemoe a o’o mai le malamalama ona o latou iloa lea o mea o si’osi’omia i latou. Peita’i afai o tagata tauaso ma ola i le pouliuli, e ese la le tulaga o le pouliuli lea.

O le valea e taofiofia tagata ma pupunia o latou mata ma o latou le iloa ai avanoa lelei ua saunia e le Atua mo i latou. I le faitauga mai le Tusi Paia o le asō na feagai Akara ma le ituaiga faatapula’a lenei seia o’o ina faapupulaina e le Atua ona mata. A matala ou mata fa’ale Agaga, o le a siitia oe i luga atu o faasalāvei o loo taofiofia isi.

Le au pele e, e tatau ona matuai faatofu lou tagata i le upu a le Atua ina ia pupula ai ou mata fa’aleagaga. A e suesue le upu a le Atua i aso uma, na te faamalamalamaina ou ala ma avatu ia te oe le malamalama ma le poto manaomia e te soifua manuia ai (Salamo 119:105). O’u te tatalo ia faapupulaina e le Alii ou mata e te vaai ai i fofō ma tali ua ia saunia mo ou faafitauli, ma aveese ufimata uma o le valea ua pa puipuia oe mai lou maua o lona atoatoa i le asō i le suafa o Iesu.

Tatalo

Le Alii e, faamolemole faapupula o’u mata ia o’u vaai ai i punaoa saotualasi ua e foai mo a’u, i le suafa o Iesu, Amene. 

OPEN HEAVENS

MATALA LE LAGI MO LE ASO TOONAI 11 OKETOPA 2025

(tusia e Pastor EA Adeboye)

Manatu Autu:   E Le Te’ena E Le Atua ē Tapua’i Faamaoni (God Doesnt Ignore True Worshippers)

Tauloto Tusi Paia –  Salamo 5:7 “Ae peita‘i a‘u nei, o le tele o lou alofa, ‘ou te alu atu ai i lou fale, ‘ou te ifo i lou malumalu pa‘ia ma le mata‘u ‘iā te oe.”

‭

‭‭

Faitauga - Tusi Paia: Mataio 8:2-4

I le tusi o Mataio 16:21-28; ina ua sau se fafine Kanana ia Iesu ma olega ia te Ia e faamalolo ma faasaoloto lana tama teine mai le tiapolo, na sau le fafine e tapuai ma le alaga o lana viiga. Ou te talitonu o lana tapuaiga moni ma le faatuatua ia Iesu Keriso na fesoasoani e maua ai le vavega na manao ai. I le faitauga mai le Tusi Paia o le asō, na sau se tagata lepela ia Iesu ma tapuai atu ia te Ia. Na pa’i atu Iesu ia te ia ma fetalai, “Ia malolo ia oe.” O lana tapuaiga na faaosofia le Alii Faaola e pa’i atu ia te ia. Sa leai se faamoemoe e malolō lenei lepela pe ana le alu ia Iesu ma tapuai atu ia te Ia. Na ifo toele e tapua’i ia Iesu, o ia o se lepela; peita’i e uma ifo lana tapuaiga ma tula’i I luga ua fa’amamāina o ia. O lau tapuaiga o le a avea ai oe ma tagata agava’a mo le pa’i alofa a le Atua, ma afai e pa’i le Atua I se uso, o le a tutupu suiga lelei I lona olaga.

Na fetalai Iesu I le tusi o  Ioane 4:23; “‘Ae o‘o mai ona aso, ‘ua o‘o nei fo‘i i ai o ē tapua‘i fa‘amaoni latou te tapua‘i i le Tamā i le agaga ma le fa‘amaoni; auā o lo‘o sā‘ili le Tamā i ē tapua‘i fa‘apenā ‘iā te ia.”

E le o sailia e le Atua ni tagata tapua’i fa’a vaitaimi, o loo Ia saili ia I latou o ē tapua’i I le agaga ma le faamaoni. E finagalo le Atua ia avea i latou o e tata’e pea a latou fagu alapasa ma sasa’a le u’u nato tautele o le tapuaiga i luga o lona ao (Mareko 14:3). A e tapua’i i le Atua e ao ona tu’u atu atoa lou loto ia te Ia. E lē faatatau i se mea e mafai ona e maua mai ia te Ia; ae fa’atatau po o ai o Ia? A e avea le Atua e fai ma ogatotonu lemū o lou olaga ma e fiafia lava oe i le Alii, i le fale o tapuaiga, o le a Ia foa’i ia te oe mea uma e te mana’o ai.

E masani ona o’u fai i la’u fanau faapea; o isi uma tagata e mafai ona o latou vaai i vavega o tutupu i o latou talane, a’o tagata tapua’i e tutupu vavega i o latou olaga e lē aunoa. Afai o oe o se tagata tapua’i, o ta’utinoga o loo e faitau ma faalogo ai i le Tusi Paia o le a faapenā ona tutupu i lou olaga i aso uma. Soose taimi e tatalo ai se tagata tapua’i ma le faamaoni, e lē faatuai ona tali le Atua. A e tapua’i, e sosola temoni mai ia te oe auā e matua’i lē mafai ona latalata i se nofoaga e afio ai le Atua. O le fa’amatalaina lenei o le mea na tupu i le 1 Samuelu 16:23 “A o‘o mai le agaga mai le Atua ‘iā Saulo ‘ona tago ai lea o Tavita i le kitara ‘ua ta i lona lima; ‘ona mapu ai lea o Saulo, ‘ua lelei ai o ia, ‘ua alu ‘ese ai le agaga leaga ‘iā te ia.”

Le au pele e, ola i se olaga faapaiaina ma ia lava sou taimi e te tapua’i ai i le Atua i aso uma ona o Ia o le Atua ae lē seiloga ua e mana’o i se mea mai ia te Ia. A avea ma au masani, ma vaega o lou soifuaga le ola tapua’i i le Atua o le a Ia faia vavega i lou olaga e lē aunoa, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 10 OKETOPA 2025

(tusia e Pastor EA Adeboye)

Manatu Autu:   O le Upu a le Atua (The Word of God)

Tauloto Tusi Paia –  Eperu 4:12“Auā o lo‘o ola le afioga a le Atua, o lo‘o matuā galue fo‘i, o lo‘o sili fo‘i lona ma‘ai i pelu uma e fa‘atau ma‘ai itū, o lo‘o vaevae fo‘i e o‘o lava i le vavae‘eseina o le loto ma le agaga, o gaugātino fo‘i ma ‘a‘ano o ivi, o lo‘o fa‘amasino fo‘i i manatu ma filifiliga o le loto.”

‭‭

Faitauga - Tusi Paia: Salamo 119:25-27

O le Upu a le Atua o le malamalama. Fai mai le Salamo 119:105 “O lau afioga o le sulu lea i o‘u vae, ma le malamalama i lo‘u ala.” A leai se malamalama, e fai ma pauū solo tagata ma leiloa o latou ala. Ou te tatalo ia fai le malamalama o le Atua ma sulu i ou ala e taitai ia te oe i le olaga nei, i le suafa o Iesu. 

O le upu a le Atua o le upu moni. Fai mai le Ioane 17:17 “ia e fa‘apa‘iaina i latou i lau ‘upu moni; o lau afioga o le ‘upu moni lea.” Afai e te fia iloa le upu moni e faatatau i se mataupu, saili i afioga a le Atua. Afai e te fia iloa le upu moni i lou soifua maloloina, aua le umi na e sioa i le ripoti a le fomai, ae taulai lau vaai i le Upu a le Atua ma faatuatua i lana upu e pei ona faaali mai i lou soifua maloloina. Fai mai le 1 Peteru 2:24, o ona faalavalava ua e malolo ai. Ua mautu lenei mataupu, ma e tusa poo a ripoti e tetee iai, o le soifua maloloina lelei, o le upu moni lea mo oe. Afai e te fia iloa le upu moni i au tupe ma le tamaoaiga, faitau le upu a le Atua ae lē o ripoti o le tamaoaiga o le atunuu. E mafai e le au popoto o le tamaoaiga ona faia soo se ripoti, ae tatau ona e filifili e faatuatua i le upu a le Atua. O le upu a le Atua o loo iai le upu moni i soo se mea tau ia te oe. 

O le upu a le Atua o le ola (Ioane 6:63). A iai se vaega o lou olaga ua leai se ola, e mafai e le Upu a le Atua ona toe faaola. I Lana Upu, na toe faaola le pisinisi a Peteru ua gau, na matua tumu le vaa i i’a ua toeitiiti goto ai (Luka 5:1-7). I Lana Upu, o le tama a le fafine ua oti lana tane mai Naina na toetu mai le oti (Luka 7:11-15). O le upu a le Atua e ola. E tusa ma le tauloto mai le Tusi Paia o le asō, o Lana Upu e ola, e matuā galue ma e sili lona maai i lo le pelu e faataumaai ona itu. 

O le tauloto mai le Tusi Paia o le asō o loo faapea mai o le Upu a le Atua e faaalia mai mea e lē masani ona iloa ma malamalama ai. E leai se mea i lalo o le la e lilo i ona luma, e aliali mea uma i lana silafaga ( Eperu 4:13). E ese mai le faaalia o mealilo uma, e aumai e le Upu a le Atua le filemu i taimi o afā. Ao taumafai Iesu ma lona ausoo e sopoia leisi itu o le sami, e lei mafaufauina o le a afatia i latou i se matagi. Na oo mai le matagi, ua matua louloua ua manatu le au soo o le a latou fano. Ua fefefe, ae faafetai, sa iai Iesu i le vaa, ma o lana upu na faafilemuina le matagi (Mareko 4:35-39). 

Le au pele e, o le Upu a le Atua e maua ai soo se mea e te manaomia i lou olaga. E pau lau mea e faia o le suesue iai, faatuatua iai, manatunatu iai ma faaaoga i lou olaga i aso uma. E maua i le Upu a le Atua mea uma e te manaomia e manumalo ai i le ola nei, avea lea ma taiala i lou soifua i aso uma, i le suafa o Iesu, Amene. 

‭‭

OPEN HEAVENS

MATALA LE LAGI MO LE ASO TOFI 9 OKETOPA 2025

(tusia e Pastor EA Adeboye)

Manatu Autu:   O le malosiaga o upu (The power of words)

Tauloto Tusi Paia –  Faataoto 18:21 “O le oti ma le ola, o lo‘o i le pule a le laulaufaiva ia; o ē manana‘o i ai latou te ‘a‘ai i lona fua.”

‭‭

Faitauga - Tusi Paia: Eperu 13:5-6

O upu lē lelei e soona lafo e ono faaitiitia le malosi faaleagaga o se kerisiano. Afai e tautala pea se kerisiano i upu e feteenai ma le finagalo o le Atua mo lona olaga, o lea tagata e i’u ane lava ua vaivai faaleagaga. A faatumuina lou loto i le upu a le Atua, ma o upu e te tautala ai e ō gatasi ma lana upu, e tumau le malosi o lou faatuatua ma ola lou agaga. Fai mai le Salamo 107:2

“Ia fa‘apea lava o ē ‘ua fa‘aolaina e le ALI‘I, o i latou na ia fa‘aolaina nai le lima o lē fa‘asauā,”

‭‭

E te iloa le mafuaaga e tatau ai i tagata faaolaina o le Alii ona ‘faapea atu’? Aua foi e iai le mana i upu e te tautala ai. Afai o oe e faaolaina o le Alii ae e faaauau ona e tautala i upu a le au lē faaolaina, e te maua le taui ma fua o upu e te tautala ai. Afai o se tagata faatuatua o ana upu e  tatau ona tumu i le alofa ma faamāi e le masima (Kolose 4:6), peitai e tautala pea i upu leaga ma soona lafo, e le umi se taimi ae atagia i lona olaga upu o loo tautala ai. Afai e amata ona lē ō gatasi mea e tutupu ma au fuafuaga, pe ua faaletonu foi le tamaoaiga o le atunuu, aua nei galo ia te oe, o oe o lē faaolaina a le Alii, o lona uiga ua faia ma faapolokalameina oe e te manumalo. O lona uiga e lē tatau ona e suia le polokalame mo lou olaga i le toilalo ma faiaina e ala i au lava upu. 

Faatumu lou loto i le upu a le Atua ina ia avea ana upu e tumau i lou gutu, tusa lava poo a mea poo tulaga e tutupu i ou ala, aua o le tele o mea i lou loto e tautala mai ai le gutu ( Luka 6:45). Afai e te faatumu lou mafaufau i upu leaga ma upu sese, o upu na o le a tino mai ia te oe, pe a oo mai afā ma matagi i le olaga nei. E lē mafai ona e toa ma faapea mai o le Alii o lou fesoasoani pe afai e te lei faalogo muamua pe talitonu foi, e lē tuua lava oe e le Alii. O le mea e te masani ona e faalogo iai e fausia ai, a lē o lou malosi, o le fefe ia te oe. 

I soo se tulaga lava e te oo iai, saili poo le a le upu a le Atua i lena mataupu, tumau i lana upu ma ia e tautala i upu e tusa ma lena tulaga. Ia e faamautinoa o upu e te tautala ai e ō gatasi ma le upu a le Atua, o lona uiga e tatau ona e faatumuina lou loto i lana upu. Ia e mautinoa e nofo le afioga a Keriso i totonu ‘iā te oe ‘iā tele lava, ma le poto uma lava (Kolose 3:16). A tumu lou loto i le upu a le Atua, o au upu e atoatoa ma faatumuina i le alofa ma atagia i lou ola le mamalu o le Alii. O upu e iai lona malosiaga e faatupu pe faatoilalo ia te oe. Ia e faautauta i upu e te tautala ai, i le suafa o Iesu, Amene.