Hjördís Sigursteinsdóttir, doktor í félagsfræði og dósent í viðskiptafræði við Háskólann á Akureyri (HA), hefur unnið mjög áhugaverðar og hagnýtar rannsóknir á heilsu og líðan starfsfólks sveitarfélaga (s.s. starfsfólk leik- og grunnskóla, elliheimila og sambýla) síðustu tíu ár. Niðurstöður rannsókna Hjördísar varpa m.a. mikilvægu ljósi á langvarandi áhrif hrunsins 2008 á þætti á borð við álag og veikindi sem og einelti, áreitni og ofbeldi á vinnustað.

Gögn rannsókna Hjördísar koma annars vegar úr viðamikilli spurningalistakönnun sem er lögð reglulega fyrir starfsfólk sveitarfélaga og hinsvegar úr rýnihópaviðtölum. Síðasta könnunin var lögð fyrir árið 2019 og til stendur að bæta við könnun í ár út af Covid-19 faraldrinum. Ástæðan er ekki síst sú að efnahagslægðin sem vofir yfir mun líklega hafa neikvæð áhrif á starfsaðstæður og líðan fólks til langs tíma og því afar mikilvægt að grafast fyrir um birtingarmyndir þessa svo hægt sé að bregðast við á sem bestan hátt.

Hjördís spjallaði við Guðmund Oddsson, dósent í félagsfræði við HA, um náms- og starfsferil sinn, rannsóknaráherslur, niðurstöður sínar og spurningakönnunina sem til stendur að leggja fyrir í ár.