社群咧衝啥

你心內敢有一个予你感覺「遺憾」的人？對今(2026)年的廣播金鐘獎生活風格節目獎得主、《愛家好姊妹》主持人德民來講，是伊的「老爸」。德民的阿爸佇伊24歲的時來離開，也予伊重新思考家己的人生佮追求，產生「這馬就去做！」的動力，也寫下〈人生24歲才開始〉這條歌。伊做Youtube、寫歌、唱歌、練吉他、寫文章去投稿比賽，甚至去參加電視台的練喙花節目，猶有做廣播節目，這款「好好仔活佇現此時」可能正是面對遺憾的解方。

同時做一个新二代(新住民二代)，伊也追尋阿母的根源「越南」，無論是話語、文化，抑是越南的親情，透過了解佮體驗，共身上另一半的認同揣轉來，我想這也是伊做《愛家好姊妹》的養分，也因為有這款經歷佮共感，才會予評審受著感動，共這个獎頒予這个異鄉變做新故鄉，而且共新故鄉佮故鄉牽挽做伙的節目。

特別來賓：雪鳳姊

你敢捌看過網路時行的AI短劇，一、二分鐘時間短短，也著掰50集才看會著結局，伊的戲文鋪排有計略，30秒至1分鐘著愛有報應的收束。這二年AI功能大發展，影片生成的成本直直輾，個人透過AI就會使包辦所有影視穡頭規連片，內底的人物並真人閣較嫣。毋過AI短劇遮時行，毋但影響演員產業的錢聲，人物畫面塑膠感、戲文看久毋是攏仝款，就是傷過譀；到底AI短劇對影視產業的衝擊會是啥？若長期掰手機仔直直看，對人的大腦又閣會按怎？這集咱攏總共伊講予破。

若欲講台語做料理，你心內會想著啥物？是滷肉飯、摵仔麵，抑是草仔粿包菜脯米？IG短影音創作者西瓜(Suika)，無論是台灣、日本抑是西洋的料理，攏總做出屬於伊的台灣味，配合台語介紹食食的文化底蒂，行出社群經營的新意，是講伊怎會遮𠢕煮食？原來也有家族的因端，這集咱來熟似西瓜的台語料理路，聽煞嘛會當試看覓家己動手做！

來賓：新聞工作者/台語工作者 鄭家和

政治人物選舉提政見，會有偌濟通實現？簽下彼張台語政策承諾書，語言的政策對佗位來做起？這集咱對前一站仔台北市長候選人沈伯洋的台語政策來講起，分析台語政策按怎才會行氣，開拆政策推動的道理，議論語言的病母怎根除。

【按怎刁持講台語？台語實體社群專題】(三)

台語實體社群專題進入上尾回，這遍形式有改過，咱對語言現況調查來掰會，來講台語實體社群的機會；活動欲做百百款，流程設計有機關，隨人意愛無完全，主辦會搪著啥難關？參加者的需求是啥物？佗一款方式對伊會合宜？會來參加是為啥動機？隨人攏有家己的道理；這集共主辦者佮參加者的訪問做伙tshāi，來看台語實體活動的未來，土本語言的環境會當按怎來安排，這條復振之路才會疏開？

【按怎刁持講台語？台語實體社群專題】(二)

「台語開講會」會使生做啥物款？破豆、唱歌、酒嘛 tshāi 幾罐，輕鬆暢樂免驚現場亂，只要肯開喙自然有人佮你講一番；這个活動號做台語Party，主打予你來講了真歡喜，庭漪會講會唱閣會鬥主持，I人嘛免驚無話通好喋；靜態活動無夠氣，熟似了後閣欲行出去，peh山落海攏有人相招做伙去，同時是全程台語來開喙；實體的台語活動會當百百項，總有濟濟有心人，無計較時間佮金錢來相幫，只待眾人做伙歡喜來開講。

【按怎刁持講台語？台語實體社群專題】(一)

想欲練講外國話，都市時行招做伙，逐遍來講無仝的主題，著用彼个語言來掰會；

現今欲練講台語，也有人是真拚勢，無顧下班忝甲強欲死，猶來參加「暗時講台語」；

阿銘是活動主辦，熱心安排無驚難，主題設計多元無制限，勞心勞力到底為哪般？

社群毋但線頂紡，實體也有濟濟人，台語實體社群鬧烘烘，敢是未來的希望？

繪本作家番麥陳(玉米辰)，畫圖講古無為難，伊畫一隻菜車虎來駛，駛入魔神山兜內；車頂閣載二个囝，一男一女照無影，原來是事故害性命，只賰魂魄綴阿爸行；為救囡仔通復活，著愛魔神珠來換，魔神恐怖欲按怎？伊著講古來盤撋；故事一沿疊一沿，包裝俗諺古人言，圖畫古錐媠閣嫣，來聽劇情怎發展。

一層私人婚姻家內事，變做網路話題通人咧關注，網友看甲心齊挐，決定請戲來共舞；民間動員力量大，幾句罔講煞袂收山，出錢出力舞一下規大攤，成做台南文藝負心運動之鍘美藝術節閣有節目單；這聲各團欲到台南來做戲，有做包公欲斬駙馬陳世美，也有林投姐活捉周阿司，閣通食桌看戲鬥支持；毋過戲欲按怎看有路來？著先對戲文佮站頭有了解，這集𤆬你認捌負心漢反僥的心態，看入戲文佮演員的真才。

社群短影音閃都閃無路，TikTok、小紅書與 Reels 上的中國詞無張無持就侵門踏戶，和出版編輯面對「支語字蟲」都定定變無步。這集節目邀請前衛出版社總編輯鄭清鴻，對網路現象來講起，深談「支語入侵」背後的文化焦慮佮社會心理。面對有意識的語言佮文化洗記持，干焦靠「掠字蟲」抑是自我懷疑，攏無才調共問題排除。節目內底阮有提起，抵抗文化侵略的上好一帖，就是予在地的文化自信佮語言有相接，本土語言顧予在，咱才有底蒂來排解。這集咱輕鬆聽、入心內，做伙思考台灣語言的過去、現在佮未來。