Árni Tómas Ragnarsson segist vera læknir af gamla skólanum. Hann hefur verið sviptur starfsleyfi sínu að hluta eftir að hafa ávísað morfinlyf til hóps fíkla. Í dag er væntanleg ný þáttaröð Péturs Magnússonar um Árna Tómas, skaðaminnkunarúrræði og af hverju landlæknir svipti hann starfsleyfinu sínu að hluta. Pétur segir frá en umsjón hefur Freyr Gígja Gunnarsson.

Kristrún Frostadóttir fór í viðtal við hlaðvarpsþátt og upplýsti hver stefna flokksins væri í útlendingamálum. Tveir formenn Samfylkingarinnar sáu ástæðu til að koma henni til varnar. Af hverju? Grindvíkingar eru sárir og spyrja; hvers vegna fær Bláa lónið að hafa opið en ekki önnur fyrirtæki? Magnús Geir Eyjólfsson og Hólmfríður Dagný Friðjónsdóttir segja frá. Umsjón hefur Freyr Gígja Gunnarsson.

Í fimm ár hefur fjölskylda Jóns Þrastar Jónssonar barist fyrir því að halda máli hans opnu eftir að hann hvarf í Dyflinni. Til tíðinda dró fyrir viku þegar greint var frá tveimur nafnlausum bréfum og í vikunni var svæði girt af í almenningsgarði. En hvað gerist í dag? Ein af mest lesnu fréttunum á ruv.is í vikunni var frá Danmörku þar sem greint var frá ofbeldi barna í garð annarra barna í grunnskóla. Viðbrögð skólastjórnenda hafa verið harðlega gagnrýnd. Bjarni Pétur Jónsson og Róbert Jóhannsson segja frá. Umsjón hefur Freyr Gígja Gunnarsson

Þrír starfsmenn á vegum utanríkisráðuneytisins eru komnir til Kaíró til að reyna greiða leið þeirra Palestínumanna á Gaza sem eiga rétt á dvalarleyfi á grundvelli fjölskyldusameiningar. Utanríkisráðherra segist trúa því að ferðin skili einhverjum árangri. Málið hefur samt reynt á þolrif ríkisstjórnarflokkanna. Höskuldur Kári Schram segir frá. Umsjón hefur Freyr Gígja Gunnarsson.

Íbúar Suðurnesja hafa mátt búa við heitavatnsleysi og skert rafmagn eftir að stutt en afdrifaríkt eldgos skemmdi Njarðvíkurlögnina og ekki tókst að tengja hjáveitulögnina. Unnið er á vöktum við að búa til nýja heitavatnslögn en Suðurnesjamenn vilja vita; hverjum er þetta að kenna? Linda Blöndal segir frá. Umsjón hefur Freyr Gígja Gunnarsson.

Ofurskálin í bandarísku NFL-deildinni átti að vera ein í aðalhlutverki en svo byrjaði að gjósa og glóandi hraunbreiða ógnaði heita vatninu á Suðurnesjum. Því var gripið til uppbótartíma sem þau Ingibjörg Sara Guðmundsdóttir, Andri Ólafsson og Fanney Birna Jónsdóttir nýttu til fulls. Umsjón hefur Freyr Gígja Gunnarsson.

Á morgun hefjast réttarhöld í einu sérkennilegasta sakamáli seinni ára; hryðjuverkamálinu. 504 dögum eftir að ríkislögreglustjóri hélt blaðamannafund og sagði íslenskt samfélag vera öruggara eftir handtöku tveggja manna koma þeir fyrir fjölskipaðan Héraðsdóm Reykjavíkur og reyna að sannfæra dóminn um að þeir séu meinleysisgrey. Ákæran er ítarleg og þar er ýmislegt sem vekur upp spurningar. Stígur Helgason segir frá en umsjón hefur Freyr Gígja Gunnarsson.

Á miðvikudag kynnir peningastefnunefnd Seðlabanka Íslands stýrivaxtaákvörðun sína. Af hverju skiptir það þig máli og hvaða áhrif hafa hlutir eins og kjaraviðræður og Grindavík? Magnús Geir Eyjólfsson útskýrir þetta . Umsjón hefur Freyr Gígja Gunnarsson.

Það er komið fjölmiðlabann í Karphúsinu og það er yfirleitt vísbending um að staðan sé viðkvæm og kjaraviðræður séu að þokast áfram. Það hefur ekkert bann verið sett á eldgos á Reykjanesskaga; það er ekki spurning hvort heldur hvenær það sjötta kemur. Og svo eru það Grammy-verðlaunin sem hvorki Haukur Holm né Ingunn Lára Kristjánsdóttir hafa unnið en Laufey og Ólafur Arnalds gætu gert það.

Sænskir tónlistarmenn bættust í hóp þeirra sem hvetja forsvarsmenn Eurovision til að banna Ísrael frá keppni vegna stríðsreksturins á Gaza. Það flækir aðeins málið að Svíar halda keppnina í ár. Við sögu kemur líka framlag Lúxemborgar sem er ísraelsk söngkona og framlag Íra en hán vill ekki að Ísraelar fái að taka þátt. Birta Björnsdóttir segir frá. Umsjón hefur Freyr Gígja Gunnarsson.