Ilse Salzwedel gesels met Philip de Vos oor sy boek, DIE JAAR TOE DIT GEMMERBIER GEREËN HET. Dié prettige storie word op RSG voorgelees. Elna van der Merwe, die organiseerder van die Stilbaai-boekefees (wat op 27 en 28 Februarie gehou word), vertel waarna boekliefhebbers kan uitsien. Johan Myburg gesels onder andere oor WUTHERING HEIGHTS, wat al beskryf is as die grootste liefdesverhaal van alle tye, se gewildheid. Hy stel jou ook voor aan Megha Majumdar, die wenner van ‘n belangrike Amerikaanse fiksieprys, en vertel meer oor Arturo Pérez-Reverte, ʼn vooraanstaande Spaanse skrywer, se kommer oor die verval van sy taal.

Akademikus, aktivis, die mense se digter, kultuurleier… Dit was Dr. Diana Ferrus, wat op 30 Januarie 2026 oorlede is. Sy was 72 jaar oud. Ilse Salzwedel het ‘n huldeblyk saamgestel oor haar lewe en werk. Verskeie mense deel hulle herinneringe aan hulle vriendin en mentor: Dr. Nico Koopman, prof. Steward van Wyk, die skrywer Ena Jansen, die skrywer Anzil Kulsen, Chareldine van der Merwe van die VVA, Anneghret Erasmus, bekroonde skrywer Gariyah Fredericks, bekroonde digter Lynthia Julius en Theo Kemp, hoof van die Jakes Gerwel-stigting.

Geskiedkundige Karen Horn vertel vir Ilse Salzwedel meer oor haar boek, IN ENEMY HANDS, waarin sy die verhale vertel van ‘n klomp Suid-Afrikaanse krygsgevangenes wat in die Tweede Wêreldoorlog gevange geneem is. Johan Myburg vertel meer oor die wenner van die Nero-prys vir fiksie, en die wenner van die T.S. Eliot-prys vir poësie. Jy kan ook meer te wete kom oor die sangeres Dolly Parton se internasionale Imagination Library-boekprojek. En as jy dit oorweeg om in te skryf vir RSG se 2026-radiodramakompetisie, hoor wat se Jana Nortier, wat die derde prys verower het, J.J. Roberts (jong skrywer van die jaar) en Morné Malan, vanjaar se merieteprys-wenner.

Ilse Salzwedel gesels met die veelsydige skrywer, Francois Bloemhof, oor SPOOKSOEKER, ‘n televisiereeks vir tieners wat gebasseer is op drie van sy boeke, die waarde van lees vir kinders en jongmense, en ‘n nuwe roman gebasseer op die baie gewilde TV-reeks, EEN KEER OM DIE SON. Jy kan ook die drie skrywers ontmoet wat aangewys is as naaswenner en gesamentlike naaswenners in vanjaar se RSG-radiodramaskryfkompetisie. Johan Myburg vertel meer oor twee onlangse voorvalle van sensuur in die kunste wat groot teenkanting ontlok het, en hy vertel meer oor Dave Pilkey en die belangrike boodskap wat hy het vir kinders wat sukkel om te lees.

Gerda Taljaard gesels oor haar roman, DIE GRAFDIGTER. Johan Myburg vertel meer oor die Jaipur-letterkundefees, vanjaar se International Bookerprys, en Elif Shafak se aanwysing as president van die Royal Society of Literature. Daar is ook twee bydraes oor verskillende skryfskole wat vanjaar aangebied word.

Die skrywer Marko van der Colff is onlangs oorlede, en jy kan luister na ‘n argiefopname waarin SARIE se boekeredakteur, Phyllis Green, oor sy debuutroman gesels. Suzette Myburg gesels oor vier boeke wat haar verlede jaar beïndruk het. Johan Myburg bring hulde aan die Vlaamse digter, Leonard Nolens, en die gewilde Britse skrywers, Joanne Trollope en Sophia Kinsella (‘n skuilnaam vir die skrywer Madeleine Wickham) wat almal onlangs oorlede is. Hy vertel ook meer oor die aanvaardingstoespraak van die Nobelpryswenner, László Krasznahorkai, die gewildheid van gruwelfiksie as genre, en nuwe internasionale publikasies vir 2026.

Anita du Preez vertel meer oor haar sielkundige riller, DIE LAASTE LEUEN. Chris Karsten vertel van die inspirasie vir sy baie vermaaklike misdaadroman, AL DIE SWENDELAARS. In sy bydraes uit die internasionale boekewêreld vertel Johan Myburg meer oor die wenner van die Bollingerprys, waar dié beroemde Franse sjampanje die groot prys is, en ‘n nuwe bundel briewe deur die skrywer John Updike wat meer lig werp op sy werk en lewe. Jy kan ook meer uitvind oor twee nuwe nie-fiksie boeke: ‘n biografie oor die Amerikaanse sanger Lou Read, en die akteur Al Pacino se outobiografie. Johan vertel ook meer oor die Ierse digter se gebruik om elke Kersfees ‘n spesiale gedig te skryf, en jy kan na een so gedig luister.

Irma Venter gesels oor haar jongste misdaadroman, DIE DRIE WEDUWEES. Deborah Steinmair en Ina Strydom, beide groot boekliefhebbers, gesels oor boeke wat hulle onlangs gelees het en kan aanbeveel. Johan Myburg praat oor die lewe en werk van Tom Stoppard, vertel meer van die wenner van die Brics-letterkundeprys, en het nuus oor AudioFile, ʼn gedrukte en aanlynpublikasie wat oudioboeke aanbeveel en resenseer.

Marita van der Vyver gesels oor haar reisboek, MY JAAR VAN VREES EN VRYHEID. Skrywer en resensent Deborah Steinmair vertel meer oor haar gunsteling Afrikaanse romans en misdaadfiksie vir 2025. In Johan Myburg se internasionale boekenuus vertel hy meer oor die baie vermaaklike roman, THE TRUE STORY OF RAJA THE GULLIBLE (AND HIS MOTHER), deur Rabih Alameddine wat onlangs met ‘n gesogte Amerikaanse prys bekroon is, asook ‘n nuwe roman uit die pen van die bekroonde Maggie O’Farrel, en die langlys vir volgende jaar se Dublin-letterkundeprys.

Marieta Carrick gesels oor haar mediese riller, BLOED VAN ’N VLINDER. Daar is ‘n uittreksel uit ‘n onderhoud met die Springbok, Eben Etzebeth, oor sy biografie, TEN SLOTTE. Johan Myburg het nuus oor die pas aangekondigde Booker-kinderboekprys, en vertel meer oor ‘n nuwe boek deur die Poolse skrywer, Olga Tokarczuk. Hy bring ook hulde aan Marina Lewycka, skrywer van onder andere A SHORT HISTORY OF TRACTORS IN UKRAINIAN. Wonder jy wat om Desember te lees of as Kersgeskenke te gee? SARIE se boekeredakteur, Phyllis Green, het nog aanbevelings vir jou vakansieleeslys.