Wie was die man agter die legende? C. Johan Bakkes, die bekende en gewilde reisskrywer, se vrou Nanna, ander familielede en Johan se heel naaste vriende onthou hom. Jy kan ook luister na uittreksels uit ‘n 2010-onderhoud waarin Daniël Hugo met Johan gesels het.

Het verhale, wat van ons lesers gemaak het, soos Liewe Heksie en Huppelkind, nog ‘n plek in Afrikaanse kinderharte? Beslis, sê Magdel Vorster, ‘n kinderboekkenner wat hierdie verhale self beproef het op ‘n klompie kinders. Johan Myburg gesels oor die wenner van die Womens’ Prize for Fiction (THE SAFEKEEP), die Walter Scott-prys vir historiese fiksie, en ‘n nuwe boek deur Taylor Jenkins Reid.

Ilse Salzwedel gesels met Francois Bekker oor sy leeslysie. Daar is o.a. twee biografieë, een oor Van Zyl Slabbert, en ‘n outobiografie deur Tony Leon. Hy gee ook sy indrukke van Francois Loots se roman, TWYFELBOS, en die spanningsroman, LENS, deur Gert Coetzee. En vir aanhangers van ware misdaadverhale het hy iets oor die Amerikaanse reeksmoordenaar, Ted Bundy. Ilse gesels ook met Anneke Langner, skrywer van PLATSAK MAAK ‘n PLAN, wat sy op universiteit geskryf het, en wat ook vir skole voorgeskryf is. Johan Myburg bring hulde aan Frederick Forsyth, wat verlede week oorlede is, en vertel meer oor die Duitse skrywer, Thomas Mann, wat in 1929 met die Nobelprys bekroon is.

Die boek-smaakmaker, Anchen Conradie, gesels oor tien boeke wat sy nooit sal vergeet nie. In Johan Myburg se internasionale insetsels bied hy ‘n interessante perspektief op THE GREAT GATSBY, wat vanjaar 100 jaar gelede vir die eerste keer verskyn het, en bring hulde aan die Amerikaanse skrywer, Edmund White. Johan het ook nuus oor The Women’s Prize for Fiction se eerbetoon aan Bernardine Evaristo, en ‘n ope brief deur meer as 380 skrywers en organisasies wat hulle uitspreek teen die oorlog in Gasa.

André P. Brink sou op 29 Mei 2025 sy 90e verjaarsdag gevier het. Ons onthou hierdie groot skrywer met 'n huldeblyk, wat Ina Strydom in 2015 oor hom gemaak het. Zelda Bezuidenhout gesels oor die rolprent wat gemaak is van haar boek, DIE DEKONSTRUKSE VAN RETTA BLOM. In Johan Myburg se internasionale bydraes kan jy meer uitvind oor die splinternuwe klimaatprys, en 'n twiet wat die Australiese skrywer, Karen Wyld, 'n prys gekos het. Hy bring ook hulde aan Ngũgĩ wa Thiong’o, die Keniaanse skrywer, wat onlangs oorlede is.

Ilse Salzwedel gesels met Antjie Krog, een van ons land se mees bekroonde en veelsydigste digters en skrywers, oor haar outobiografiese roman, DIE BINNERYM VAN BLOED, wat onder andere die komplekse verhouding tussen haar en haar skrywer-ma, die ewe bekende Dot Serfontein, verken. Johan Myburgh praat oor die wenners van die International Booker vir vertaalde werk (HEART LAMP), asook  THE ADVERSARY, wat met die Dublinprys bekroon is.

SARIE se boekeredakteur, Phyllis Green, bespreek Afrikaanse en plaaslike Engelse fiksie. Johan  Myburg vertel meer oor die wenner van die Dylan Thomasprys, ‘n onlangse toekenning aan Margaret Atwood, en die aangrypende ware verhaal uit die pen van die TV-ster Kelsey Grammer. Johan stel ons ook voor aan Mia Couto, die Mosambiekse skrywer wat onlangs deur PEN Amerika vereer is met die Nabokov-prys vir sy lewensbydrae tot internasionale letterkunde. Jy kan ook uitvind wie is op die kortlyste van die UJ-prys en UJ-debuutprys. Ilse Salzwedel vertel meer oor die nuwe Breyten Breytenbach-poësieprys.

Luister na ‘n heruitsending van ‘n onderhoud met Eunice Visser oor haar boek, DIE KAAPSE SLAWE, wat onlangs weer bekroon is. SARIE se boekeredakteur, Phyllis Green, deel ‘n lys van interessante nie-fiksie aanbevelings. Johan Myburg het nuus oor twee internasionale romans, THE EMPEROR OF GLADNESS deur Ocean Vuong, en JAMES, deur Percival Everett.

Ilse Salzwedel gesels met Hennie van Deventer, oud-koerantman en skrywer van meer as 20 nie-fiksie boeke, en Elizabeth Wasserman, die skepper van die fantastiese Mevrou Smit, wat tans op RSG voorgelees word. Johan Myburg het vier bydraes uit die internasionale boekewêreld. Hy kyk terug na die onvergeetlike boeke wat presies ‘n eeu gelede in 1925 verskyn het, het nuus oor ‘n nuwe kinderboek oor die gewilde Gruffalo-karakter, vertel meer oor ‘n internasionale skryfkompetisie, en gesels oor die Carol Shields-prys.

Luister na heruitsendings van onderhoude wat met die pas bekroonde Eben Venter en Gaireyah Fredericks gevoer is oor hulle bekroonde boeke. Eben se DECIMA is met die Hertzogprys bekroon, en Gaireyah se EEN VOET INNIE KAR met die Eugene Maraisprys.