في شهر مايو، اللي بيبدأ أول أيامه بعيد العمال،  فكرنا في بودكاست «سينما صيفي» في تأمل علاقة عدد من السينمائيين المصريين  بالطبقة العاملة المصرية، وكيفية ظهور العمال في أفلامهم، أبعد من زاوية السينما الاجتماعية أو أو ذات الوعي الطبقي. في الحلقة الأولى تناولنا عُمّال يوسف شاهين الغاضبين، التنظيم النقابي، والحركات الاحتجاجية والإضرابات، وحضورها الكبير في عوالم شاهين السينمائية. 

في الحلقة دي بنفتح أسئلة تخص حضور العمال في خيال السينما التسجيلية المصرية، لكن من خلال فيلم روائي، وهو فيلم العوامة 70 لخيري بشارة، اللي بطله مخرج تسجيلي بيعمل فيلم عن محلج قطن، وبيكتشف عن طريق عامل فساد كبير جوه المحلج. فيلم بيكشف ويفتح مساحة للتفكير في علاقة مخرج الأفلام التسجيلية بأبطاله، تحديدًا العمال.. بيشوفهم إزاي وبيشوفوه إزاي، وإيه مصير العلاقة قبل وبعد وأثناء تصوير الفيلم، أسئلة الفن والمسؤولية والتحقق والصلة بين الفنان وأبطاله من الطبقة العاملة، في رحلة تلاقي بطلين خيري بشارة، أحمد الشاذلي وعبد العاطي. 

يقدم الحلقة المخرج بسام مرتضى ويشاركنا الحلقة المخرج والمنتج مصطفي يوسف.