21一恐龍紹介（peh樹鳥龍） Scansoriopteryx
    Peh-tshiū-tsiáu-liông，華語叫做「擅攀鳥龍」，伊號名的意思是「會peh樹的翼仔」，目前猶無清楚這種恐龍是佇啥物所在發現的，因為伊是對無記錄正確地質數字的私人化石經銷商遐得著的。是中國的科學家佇2002年發表出來的，這種恐龍大概是生活佇1億6千萬年前的侏羅紀尾期。
     這種恐龍目前干焦發現一隻，體重100公克，體長包括伊的尾，干焦18公分，差不多大人手的一掠闊，就是手展開的時，大頭拇到尾指的長度按呢爾，伊尾溜的長度大約是身軀的三倍，所擺身軀的部分干焦4公分彼跤兜，若像厝鳥仔遮大隻。毋閣這是一隻猶未大到在的幼囝，成年的peh樹鳥龍應該會較大隻。伊的頭大大粒，目睭大大蕊，下槽的喙齒超過12齒，尖尖利利的喙齒，足適合食肉欸！伊的前跤足長足勇欸！第一指上短，第三指上長，是第二指的兩倍，跤爪嘛足發達的。後跤明顯無前跤勇，毋過嘛是會使共身軀牚起來行，伊長長的尾毋但會使予伊佇運動的時保持身軀平棒，嘛會使佇peh樹仔的時陣鬥牚身軀，遮的特徵攏顯示伊是足gâu peh 樹仔欸！伊嘛會像啄樹仔鳥仝款，食樹皮內底的蟲豸，毋過伊毋是用喙啄，是用伊長長的跤爪，共肥軟的蟲豸撓出來食。
     是按怎伊欲佇樹仔頂生活咧？因為伊足細隻欸，樹仔頂會使予伊閃避大型動物，而且樹仔頂有蟲豸通好食。雖罔伊的身軀頂有羽毛，毋過佮這馬鳥仔的羽毛無仝，伊的羽毛袂使幫助伊飛起來，干焦會使保持溫暖，伊勇健的跤予伊會使像猴山仔按呢，佇樹仔頂跳來跳去。科學家認為peh樹鳥龍佮鳥仔類有足倚的親緣關係，凡勢peh樹鳥龍會是拍開鳥仔飛行源頭謎題的鎖匙。
     今仔日的「peh樹鳥龍」就講到遮，感謝逐家的收聽。
- - - - - - - - - - - - - - - 
一掠闊 tsi̍t lia̍h khuah

彼跤兜 hit kha-tau

撓 ngiáu
- - - - - - - - - - - - - - -
FB迷眾頁：https://reurl.cc/z1W300
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments

Powered by Firstory Hosting

20-恐龍紹介(原初鳥)ARCHAEOPTERYX
     Guân-tshoo-tsiáu， 華語叫做「始祖鳥」，是1861年佇德國發現的。In的骨骼佮羽毛的痕跡攏齊保存佇一塊石頭頂懸，體型佮這馬的野雞仔差不多大。In德文名的意思就是「上蓋代先的鳥仔」，對19世紀尾期到21世紀初期，原初鳥攏予人認為是上早、上原始的鳥仔，因為in身軀有羽毛，而且是佮現代鳥仔足仝形的羽毛，猶毋閣in喙裡有喙齒、尾椎有21節骨頭，前跤有三支有作用的指頭仔，遮的特徵，煞是佮爬蟲類仝款，in閣有佮細隻食肉恐龍足仝形的後跤，所擺原初鳥的發現嘛予科學家當作是鳥仔對恐龍演化來的證據。
     原初鳥身軀的結構，無適合用現代鳥仔的動作來飛，致使in飛行的能力猶無足四序。若按呢本底佇路裡咧行的動物，是按怎變做佇天頂飛咧？科學家有兩種看法：第一種是講in原本佇陸地足gâu走矣！咧走的時陣會用in有羽毛的前跤拍空氣來加速，尾仔前跤發展變做翼仔，in就撇翼仔開始離開塗跤。另外一種看法是講in本底是蹛佇樹仔頂，會使靠in有羽毛的前跤，對一叢樹pha過另外一叢，尾仔沓沓仔發展出飛行的能力。
     過去百外年的時間，科學家當作in是恐龍佮鳥仔之間唯一的過渡，猶毋過這幾年閣有發現其他閣較早、閣較原始的有羽毛生物化石，原初鳥佇鳥仔類演化頂懸的地位嘛受著影響矣！
     今仔日的「原初鳥」就講到遮，感謝逐家的收聽！
- - - - - - - - - - - - - - - - - - - - - - - -

齊 tsiâu；tsê/tsuê

代先 tāi-sing

四序 sù-sī

- - - - - - - - - - - - - - - - - - - - - - - -
FB迷眾頁：https://reurl.cc/MOde94
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments

Powered by Firstory Hosting

19-中國盜龍Sinraptor
     Tiong-kok-tō-liông，華語叫做「中國盜龍」，是中國佮加拿大的科學家做伙合作，佇1987年到1988年，用兩年的時間，對中國西北的沙漠內底發現的。伊號名的意思是「對中國來的盜賊」。這種恐龍是生活佇1億6千萬年前的侏羅紀尾期，in佮進前紹介的永川龍有倚近的親緣關係。
     現此時有兩種中國盜龍，體型大細精差誠濟，一種體長7米半，頭骨85公分，體重1噸8，另外一種較大隻，體長9米，頭骨104公分，體重3噸半，懸度欲倚3米，伊主要的特徵是頭骨粗，佮永川龍比起來，中國盜龍的頭較長嘛較低。伊的喙䫌骨，就是華語講的顴骨，發展做大的氣囊，前跤誠勇，後跤較長，佇仝體長的恐龍內底，伊算是躼跤ê，身軀嘛足粗勇。
     In生活佇懸地樹林倚水的所在，走的速度不止仔緊，較gâu長途逐獵物，猶閣有咬物件的力頭足大ê，古生物學家捌佇其他恐龍的身軀頂，發現中國盜龍留落來的喙齒號，毋但會咬細隻的食植物的恐龍，進前紹介的食肉的一髻龍，嘛有予in咬過的號。In嘛會去掠足大隻的馬門溪龍，不而過馬門溪龍嘛無好惹，有中國盜龍的化石顯示伊有去予馬門溪龍的尾溜捽著的號喔！
    今仔日的「中國盜龍」就講到遮，感謝逐家的收聽。
- - - - - - - - - - - - - - -
盜賊 tō-tsha̍t
精差 tsing-tsha
不止仔 put-tsí-á
- - - - - - - - - - - - - - -
FB迷眾頁：https://reurl.cc/6vV8oO
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments

Powered by Firstory Hosting

18-恐龍紹介(一髻龍) Monolophosaurus
     Tsi̍t-kuè-liông，華語叫做單冠龍」，這種恐龍化石佇1984年的中國新疆發現的，雖然干焦發現一隻，毋過保存甲誠完整。一開始因為是佇將軍廟發現的，共號做將軍廟龍，尾仔決定號做「一髻龍」，學名的意思是「有一个頭髻的杜定」，因為佇伊頭骨的中線有一个髻。伊大約是生活佇1億6千6百萬年前侏羅紀中期的中國。
    伊的體長量其約仔有5米。體重450公斤，懸度1米7，頭骨的長度80公分，頭髻的位置佇鼻頭到目睭的所在，欲倚規粒頭長度的4分之3，這个頭髻不是用來相拍欸，顛倒是欲用來唌仝類的目。伊的頭骨結構顯示伊有足發達的鼻仔，真有可能是虎鼻師。
     發現一髻龍化石的所在有水痕，所以一髻龍大概生活佇湖邊抑是海岸邊，伊主要應該是食魚仔抑是細隻恐龍，因為伊狹狹的喙、整齊的喙齒、扭掠的頷仔頸，足適合掠魚仔來食，猛醒但是無結實的身軀，干焦會使掠細隻動物來食，無法度掠著中、大型食植物的恐龍。仝彼咧時代佇遐生活的恐龍，有食植物的馬門溪龍，佮比一髻龍閣較大隻食肉的「中國盜龍」，一髻龍凡勢嘛是中國盜龍的獵物喔！
    今仔日的「一髻龍」就講到遮，感謝逐家的收聽。
- - - - - - - - - - - - - - - 
將軍 tsiong-kun
量其約 liōng-kî-iok
虎鼻師 hóo-phīnn-sai
好鼻獅 hó-phīnn-sai
- - - - - - - - - - - - - - -
FB迷眾頁連結：https://reurl.cc/RWaOq6
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments

Powered by Firstory Hosting

17—恐龍紹介（美頦龍) COMPSOGNATHUS
   Bí-hâi-liông，華語叫做「美頜龍」抑是「細顎龍」，是1850年佇德國發現的。In的下頦瘦抽，所以就共號做「美頦龍」，in是生存佇1億4千5百萬年前侏羅紀尾期的歐洲海岸邊。In足細隻
的，佮火雞差不多大，身長大約一米長，體重干焦3公斤，尾溜的長度有身軀一半較加的長。
   In長長的頷仔領誠溜掠，頭骨足輕的，目睭誠大蕊，喙齒有68齒，雖然足細齒，毋過攏足利ê，適合食細隻動物。前跤比後跤較短，前跤有三支指頭仔，攏有跤爪，猶毋過干焦2指有法度拗彎，第三指若像彎袂起來。美頦龍是用後跤咧行，長長的尾溜會使佇in走的時陣保持身軀平棒，in走的速度足緊的，科學家推算in 100公尺可能免6秒就走了矣！
   In可能會食蟲豸佮杜定，古生物學家捌佇in化石胸坎的所在，發現一副完整的杜定化石，所擺美頦龍可能會共獵物規隻吞落去。
   過去有誠長的一段時間，科學家攏當作美頦龍是上細隻的一種恐龍，猶毋過這幾年閣有發現足濟種比美頦龍較細隻的恐龍，一寡故事册内底講in會規群做伙活動
，猶毋過科學家認為目前猶無科學證據通證明這件代誌。
  今仔日的「美頦龍」就講到遮，感謝逐家收聽。
- - - - - - - - - - - - - - - 
瘦抽 sán-thiu
扭掠 liú-lia̍h
平棒 pênn-pāng/pînn-pāng
- - - - - - - - - - - - - - - 
FB迷眾頁：https://reurl.cc/OGlabX
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments

Powered by Firstory Hosting

16一恐龍紹介(蠻龍)Torvosaurus
    Bân-liông，華語叫做「蠻龍」。第一擺發現這種恐龍應該大概是佇1899年的美國，毋過正式號名發表，是佇1979年，號名的意思是「野蠻的杜定」。In大概是生活佇1億6千5百萬年進前的侏羅紀尾期。除了美國，另外葡萄牙、德國嘛捌發現蠻龍的化石。
    In的體長上長有到11米，體重4噸到5噸，懸度差不多有4米。In的頭骨誠長，古生物學家用高科技恢復蠻龍頭殼的形體，推測in的頭應該有1米2，佮一个7歲囡仔的身懸差不多。喙齒大大利利，咬物件足有力ê，會使共其他恐龍的骨咬予碎。In的後跤粗勇，走足緊的，前跤比起來是有較短，猶毋過足有力的，而且有尖尖的跤爪，會使真緊共獵物拍倒。猶毋過in長長的身軀較歹轉斡，較歹通過彎彎狹狹的所在。
     蠻龍佮異特龍、角鼻龍佇仝一个地層予人發現。這三種食肉的恐龍欲按怎共同生活，嘛是科學家足想欲了解的問題。有ê人認為遮的大型食肉的恐龍，生活的空間有可能攏離較開。異特龍較愛佇焦燥的平地活動，蠻龍佮角鼻龍可能會較愛倚水的所在；嘛有學者認為這三種恐龍身體的結構無仝，喙齒、頭型、頷仔頸的活動程度，會影響著in食食的慣勢，異特龍gâu齧骨頭，角鼻龍食肉，蠻龍會共獵物拆開，所擺這三種食肉的恐龍，嘛有可能共同生活喔！
    今仔日的「蠻龍」就講到遮，感謝逐家的收聽。
- - - - - - - - - - - - - - -
轉斡 tńg-uat

狹狹 e̍h-e̍h

慣勢 kuàn-sì

- - - - - - - - - - - - - - -
FB迷眾頁：https://reurl.cc/nr8K82
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments

Powered by Firstory Hosting

15-恐龍紹介(角鼻龍）Ceratosaurus
     Kak-phīnn-liông，華語叫做「角鼻龍」，是1884年佇美國發現的，伊號名的意思是「有角的杜定」，因為in的鼻仔頂懸有一个短短仔的角。In大約是生活佇1億5千萬年前的侏羅紀尾期，活動的範圍可能包括這馬的北美洲、南美州、歐洲佮非洲。
     In的體長5米到7米，體重欲倚1噸，前跤雖罔較短，毋過功能完整，有4支指頭仔，後跤較長，用後跤咧行。In的特徵除了鼻仔頂懸有角，目睭頂懸嘛有一對。對頷仔頸、尻脊骿到尾溜的中線，有一排phok-phok的皮甲。頭大大，下頦長長，喙内有形體若長刀的喙齒。腰粗粗，尾長長闊闊，略仔成鱷魚的尾，可能會使幫助in泅水。
     鼻角的作用是啥?有科學家認為是攻擊抑是保護家已的武器，嘛有科學家認為in袂用鼻角去佮別種恐龍相拍，顛倒是咧爭母ê的角鼻龍的時，佮别隻公的角鼻龍相挵咧用的，閣有學者認為鼻角干焦是看媠爾爾，完全無法度用來相拍，所擺鼻角可能有顯目的色水，凡勢仝群內底會比啥人的角較大，啥人就來做王。
     科學家閣捌佇一个角鼻龍跤骨的化石，發現伊的跤骨有折去閣好去的號，所以恐龍的骨頭嘛是會折去的喔！
     角鼻龍佇19世紀就發表出來，長期以來發展做一種誠有代表性的食肉的恐龍，足濟文學作品佮電影內底攏有講著In。一直到20世紀初期暴龍的發現，tsua̋nn漸漸代替角鼻龍的地位矣！
     今仔日的「角鼻龍」咱就講到遮，感謝逐家的收聽。
- - - - - - - - - - - - - - - - - - - - - - - - - - - - - -
泅水 siû-tsuí

色水 sik-tsuí

骨頭折去 kut-thâu-tsi̍h--khì

- - - - - - - - - - - - - - - - - - - - - - - - - - - - - -
面冊迷眾頁：https://reurl.cc/L4OYd4
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments

Powered by Firstory Hosting

14-恐龍紹介(異特龍)ALLOSAURUS
     Ī-ti̍k-liông，華語叫做「異特龍」，是1877年美國古生物學者發現的，號名的意思是「無仝款的杜定」，因為in凹(nah）落去的龍骨佮彼當時已經知影的恐龍攏無siāng，In生活佇1億5千萬年前的侏羅紀尾期，平均體長10米，體重2噸半，in咧走的速度可能一點鐘會使走30至55公里。
     In上明顯的特徵是目睭頂懸有細的角髻，角髻的功能猶無確定，有可能會使替目睭遮光。In的跤目特別懸，跤的頂懸有鱗，前跤粗勇，有三支指頭仔，攏有跤爪，會使共獵物拆開，用後跤咧行。In有70齒邊仔有鋸齒的喙齒，攏足利的，假使有某一齒佇拍獵的過程中落去，真緊就會閣發一齒新的喙齒補彼个空。
     異特龍的化石予人發現的量袂少，所擺in算是予古生物學家研究較齊透的一種恐龍。根據對in關節的研究，in的下頦有法度開足開，予in會使一喙共細隻恐龍吞落去腹肚，嘛會使對大型食植物的恐龍身軀頂咬一塊肉落來。異特龍蹛佇美國中西部，彼个所在佇仝彼个時代嘛有劍龍、迷惑龍佇遐生存，異特龍會共in當作食物，猶毋過in嘛袂乖乖予食，有一隻異特龍伊尾的化石看起來捌受傷過，骨頭頂懸有一个空，古生物學家認為彼應該是予劍龍尾溜頂懸的刺鑿著造成的空喙喔！
     今仔日的「異特龍」咱就講到遮，感謝逐家的收聽。
- - - - - - - - - - - - - - - - - - - - - - - -

龍骨 liông-kut

齊透tsiâu-thàu

鑿tsha̍k

- - - - - - - - - - - - - - - - - - - - - - - -
面冊迷眾頁：https://reurl.cc/N4m6A5
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments

Powered by Firstory Hosting

13–恐龍紹介(永川龍) YANGCHUANOSAURUS
     Íng-tshuan-liông，華語叫做「永川龍」，是1977年佇中國永川這个所在，做水壩工程的時陣挖著的，所以就共號做「永川龍」。In應該是生活佇離這馬1億6千萬年前的侏羅紀尾期，是目前所知影佇彼當時、彼个所在上大隻的食肉的恐龍。古生物學家認為in的體長可能有11米，佮一台公車差不多長，徛咧的時陣有4米懸，超過一層樓的懸度，體重30噸，走的速度上緊會使到一點鐘50公里。
     In的前跤短，毋閣足溜掠，有三支指頭仔，攏有跤爪，後跤粗勇，嘛有三趾，是用後跤咧行。頷仔頸較短，尾較長，徛咧的時陣尾會使鬥牚身軀，走的時陣，尾會翹懸，幫助身軀平棒。
     In的頭殼欲倚一米長，小可仔三角形，頭殼骨兩爿有6對的空，會使減輕頭殼的重量。In的目睭應該袂䆀，in定定出現佇樹林抑是湖邊，可能會像這馬的虎、豹這類的動物仝款，較愛單獨活動，掠動物來食，靠in足利的跤爪佮喙齒，一下仔就會使拍倒較荏身的恐龍，是足粗殘的殺手,連足大隻的馬門溪龍，攏會變做in的食物喔！
     今仔日「永川龍」就講到遮，感謝逐家的收聽。
- - - - - - - - - - - - - - - - - - - -
倚 uá

荏身 lám-sin

粗殘 tshoo-tshân
- - - - - - - - - - - - - - - - - - - -
面冊迷眾頁：https://reurl.cc/G4vxvv

留言告訴我你對這一集的想法： https://open.firstory.me/user/clohik9vc0vuq01s15xufcp5w/comments

Powered by Firstory Hosting

12一 恐龍紹介(奇翼龍) YI
     Kî-si̍t-liông，華語叫做「奇翼龍」，是2007年中國的一个作穡人發現的，尾仔伊共賣予博物館，科學家共這種恐龍號作「奇翼龍」，就表示伊有足特别的翼仔，伊身軀有羽毛，毋過佮這馬鳥仔的羽毛無仝款，伊的翼仔較成夜婆，有薄薄仔的膜。
     In應該是生存1億5千900萬年進前的侏羅紀，遐應該是樹仔懸大的樹林，in足細隻欸，翼股展開的寬度差不多60公分爾爾，體重360公克，體型佮客鳥仔差不多。In的頭短短，喙齒無濟，前跤較長，後跤較短，前跤第一指上短，第三指上長，皮膜對第三指佮身軀相連，變做足成夜婆的翼股。猶毋過in襟胸無夠發達，可能沒法度像鳥仔展翼對塗跤起飛，嘛無法度飛較懸咧，in可能足gâu peh樹仔，會使像飛鼠按呢，對較懸的所在pha去較低的所在，甚至嘛有科學家認為in的翼股凡勢毋是用來飛的，是用來表演欲賢唌母的奇翼龍。奇翼龍無法度飛，可能就是in佮鳥生存競爭輸去的原因，當當in拄著敵人的時，鳥仔會使飛去樹仔頂，奇翼龍干焦會使pha去較低的所在，走無路的結果就是予敵人食去矣！
     今仔日的「奇翼龍」就講到遮，感謝逐家收聽。
- - - - - - - - - - - - - - - - - - - - - - - -
夜婆（iā-pô）、密婆（bi̍t-pô）
客鳥仔（kheh-tsiáu-á)
唌(siânn)
- - - - - - - - - - - - - - - - - - - - - - - -
FB迷眾頁：https://reurl.cc/G4lDbv
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments

Powered by Firstory Hosting