01一恐龍的出現佮消失
     咱這馬蹛的地球，你敢知影伊規歲矣？伊已經46億歲矣喔！46億就是46後壁閣8个0。A̍h人類佇地球雖然已經600萬冬矣，毋過按照按呢的比例，假使地球是才满1歲的囡仔，按呢人類就是ta̋nn出世半點鐘爾爾。抑就是講人類出現佇地球的時間猶閣足短欸！
     抑若恐龍出現佇地球，是佇離這馬2億3千萬年到6千6百萬年之間。這段時間，閣分做三疊紀、侏羅紀佮白堊紀。三疊紀的時陣，地球頂懸的陸地是連做伙ê，陸地中央較無水分，氣侯較焦，植物猶無足濟，彼陣拄開始有恐龍，毋閣無足濟種，體型嘛較細。到侏羅紀的時陣，陸地漸漸分開，氣候變溫暖嘛較澹，植物開始愈來愈濟，恐龍嘛綴咧變濟，變大隻。
     猶毋過到白堊紀尾期，恐龍雄雄就對地球消失去矣！彼陣是發生啥物代誌neh？有人講彼陣地球氣候發生變化，無適合恐龍生存，嘛有一種講法，是講彼當時有足大粒的小行星挵著地球。你想看覓，假使咱共石頭擲佇塗跤，邊仔的塗沙粉就會飛起來。啊彼粒小行星，對足懸的所在，足大力挵來，噴起來的塗沙粉足濟，規个空氣攏坱pōng-pōng，袂輸若烏雲仝款共日頭遮的，足久攏無法度散去，植物曬袂著日頭，tsua̋nn死去，食植物的恐龍無通食，嘛死去矣！紲落來食肉的恐龍嘛綴咧死去！所以地球頂懸就無恐龍囉！
     今仔日「恐龍的出現佮消失」就講到遮，感謝逐家的收聽。
- - - - - - - - - - - - - - - - - - - - - - - - - - -
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments
粉絲頁連結：https://www.facebook.com/profile.php?id=61552745440519&mibextid=LQQJ4d

Powered by Firstory Hosting

留言告訴我你對這一集的想法：
粉絲頁連結：https://www.facebook.com/profile.php?id=61552745440519&mibextid=LQQJ4d
- - - - - - - - - - - - - - - - - - - - - - - - - - - - -
00—踏話頭
逐家好，我是柚仔，是三个囡仔的阿母。我會做這个podcast，算是予家己的一个挑戰佮紀錄。我對兩冬前開始練台文，想欲共台語抾轉來講，佇厝裡畫量用台語佮囡仔講話、用台語唸故事冊予in聽。我兩个查某囝較大漢，家已有法度看册，無啥需要我唸册予in聽，细漢後生猶毋捌字，所擺攏會提冊叫我唸予伊聽。最近伊足愛提恐龍的册叫我唸，這對我來講誠困難，因為較早我對恐龍無興趣嘛毋研究，這馬掀遮的册，發現有誠濟詞我攏袂曉講，甚至連彼个詞的意思我攏毋知。為著欲予囡仔聽有，我開始揣資料、做功課，才有法度用台語共恐龍紹介予囡仔捌。我想講既然我就已經做功課矣！規氣共錄起來，毋但家已會使提來餾，嘛會使予其他對這个主題有興趣的人聽。毋過我嘛不是研究恐龍的專家，所講的内容攏是對冊佮網路頂懸揣來矣！假使我有啥物講重耽的所在，歡迎逐家寫批來共我講，閣較需要
的是寫批來共我鼓勵啦！對今仔日開始，咱逐禮拜五來講一寡佮恐龍有關係的代誌。「台語話恐龍」請逐家多多支持！

Powered by Firstory Hosting