11一恐龍紹介(巨龍)   MEGALOSAURUS
     Kī-liông，華語叫做「巨龍」、「巨齒龍」，抑是「斑龍」，是上早予人發現的恐龍，是1677年佇英國發現的，猶毋過彼陣猶毋知有恐龍這種動物，一个英國的牧師共這種化石講是古早時代巨人的骨頭，一直到1823年閣發現這種動物才共號名叫「巨龍」，伊號名的意思是「足大隻的杜定」。
     In生存佇1億6千6百年前的中侏羅紀。In的頭大大，喙齒長長彎彎，差不多有10公分長，佮人類咧用的護身刀足仝形，體長超過6米，比兩隻犀牛閣較長，懸度是大人的兩倍懸，體重欲倚1噸，用粗勇的後跤咧行，古生物學者根據發現的巨龍跤跡當中兩个跤印中央的距離來算，巨龍的後跤長度應該欲倚2米，後跤有5趾，内爿第一趾短短，向後壁，第5趾退化，賰的三趾足發達的，有跤爪，前跤干焦後跤的一半長，但是誠勇，有三个利利的跤爪，按呢的武器，予in會使攻擊大型的食植物的恐龍。
     按巨龍行路的距離判斷，in行路的速度大約一點鐘行7公里，但是當當in欲掠其他恐龍來食的時陣，就會改用走的，尾嘛會攑懸懸保持身軀平衡，猶毋過巨龍的體形無法度長時間用走的，所以除了掠食植物的恐龍來食以外，in嘛有可能四界揣漚肉來食。
     今仔日的「巨龍」就講到遮，感謝逐家的收聽。
- - - - - - - - - - - - - - - - - - - -
犀牛 sai-gû
當當 tng-tong
漚肉 àu bah
- - - - - - - - - - - - - - - - - - - -
FB迷眾頁：https://reurl.cc/4jYqnV
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments

Powered by Firstory Hosting

10—恐龍紹介(冰髻龍)  
    CRYOLOPHOSAURUS
     Ping-kuè-liông，華語叫做「冰脊龍」、「冰冠龍」，這種恐龍的化石是1991年佇南極發現ê，因為in頭頂有髻，閣是佇南極生活，所以就共in號做「冰髻龍」。
     In頭殼骨的長度差不多65公分，比拄出世的囡仔較長，頭殼頂的髻是横的，若葵扇展開的形體，而且閣彎向頭前，若像西洋歌手貓王的頭毛按呢懸懸彎彎，有學者講耍笑共叫做「貓王龍」，閣有人講in的髻足成國王的皇冠，所以共叫做「國王龍」，遮的稱呼是毋是蓋趣味neh！猶毋過這个髻沒法度做武器，應該是用來嚇驚敵人，哪無就是用來吸引母的冰髻龍。
     冰髻龍應該是佇1億9千年前的早侏羅紀生活佇咧南極，毋過彼當陣的南極大陸較倚赤道，氣候較溫暖，毋是像這馬規年迵天攏結冰，所擺頂懸嘛有袂少植物。In的前跤有跤爪，後跤比前跤較長，一般是用後壁兩跤咧行路。In的喙内有足濟喙齒，體長6公尺，體重450公斤，可能是彼當時南極地區上大隻的食肉的恐龍。
     咱今仔日的「冰髻龍」就講到遮，感謝逐家的收聽。
- - - - - - - - - - - - - - - - - - - - 
葵扇 khuê-sìnn
嚇驚 heh-kiann
規年迵天 kui-nî-thàng-thinn
- - - - - - - - - - - - - - - - - - - -
FB迷眾頁：https://reurl.cc/97WRjO
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments

Powered by Firstory Hosting

09一恐龍紹介(雙髻龍)
     DILOPHOSAURUS
     Siang-kuè-liông，華語叫做「雙冠龍」、「雙脊龍」，是1940年佇美國發現的。In的頭殼頂有兩个髻，所以就號做雙髻龍。
     In生存佇1億9千300萬冬前早侏羅紀的北美洲，身長7米，佮一台細台巴士差不多，體重400公斤，是上早期的大型食肉恐龍其中的一種。
     In的骨特别大，猶毋閣足輕ê，頭髻的功能是啥？科學家猶無足確定的答案，有的認為會使調節體溫，嘛有人認為頭髻可能有足顯目的色，會使吸引母的ê恐龍，横直頭髻袂使用來相拍，因為結構足荏ê，撞著可能就碎去矣！
     雙髻龍的頷仔頸長，龍骨空心，所以足輕ê，in的前跤誠勇，有四支指頭仔，第一指短閣粗，有大型的跤爪，第二指較長較幼，跤爪嘛較幼，第四指退化去矣！後跤粗勇，有跤爪，用後跤咧行，前跤雖然勇，但是較短，活動的範圈有限，所以主要可能是用喙來攻擊獵物。
     電影「侏羅紀公園」當中，捌出現雙髻龍，毋過電影內底演伊會噴毒，閣干焦狗仔遐大隻爾，彼攏毋是真實的喔!
     今仔日的「雙髻龍」就講到遮，感謝逐家的收聽。
- - - - - - - - - - - - - - - - - - - -
顯目hiánn-ba̍k
荏lám
- - - - - - - - - - - - - - - - - - - -
面冊迷眾頁：https://www.facebook.com/61552745440519/posts/pfbid0wfLjN4Yk3xwu6ZGQLnSfpBm7SR5HcX4rcPAGqcbkcRkPTMazaqXzLEa9aHVfb7PAl/?mibextid=cr9u03
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments

Powered by Firstory Hosting

08-三疊紀尾期的物種滅絕
     佇第一集內底，咱捌講過白堊紀尾期的小行星挵著地球，致使恐龍斷種。其實佇三疊紀尾期，嘛有一擺生物大滅絕喔！
     三疊紀尾期的時陣，陸地漸漸分開，所擺定定有地震，捷捷有火山爆。火山爆發噴出來的氣體影響著全球的氣候，海平面漲懸，海水變較酸，海洋内底的生物擋袂牢，有足濟攏死去矣！佇陸地的生物嘛無好過，毋但溫度衝懸，空氣中二氧化碳的量嘛增加，予彼陣本底佇陸地咧做王的「初龍類」動物死欲了矣！遐的動物滅絕，煞予恐龍有閣較大的生活空間，佇侏羅紀的時陣成做陸地的王。
     恐龍是按怎無佇這擺的災害中滅绝咧？科學家認為恐龍比遐的動物有較好的新陳代謝，予in閣較有效率去利用食物佮能量，加上較gâu生湠，會使快速生湠後一代，閣湠去無仝的生存環境，而且恐龍有足濟款生態角色，包含食肉的、食植物的、佮啥物攏食的，in會使利用無仝的食物資源，佇各種環境中揣著適合家己的生存空間。
     順利度過難關，進入侏羅紀了後，地球氣候溫暖澹濕，適合植物生長，提供恐龍豐沛的食物，加上進前的物種滅絕，競爭的對手減少，煞予恐龍愈演化愈大隻、愈濟種，沓沓仔變做是彼當時陸地生物的王。後禮拜，咱就欲來紹介侏羅紀時期的食肉的恐龍囉！
     今仔日「三疊紀尾期的物種滅绝」就講到遮，感謝逐家的收聽。
- - - - - - - - - - - - - - - - - - - - - - - - 
定定 tiānn-tiānn
捷捷 tsia̍p-tsia̍p 
擋袂牢 tòng bē tiâu
生湠 senn-thuànnsinn-thuànn
- - - - - - - - - - - - - - - - - - - - - - - - 
面冊迷眾頁：https://www.facebook.com/61552745440519/posts/pfbid02VDUn41zwGpUQfzfgiCUKz52zzf37CcfcApodrMbM2u3HYvVXkgHaywLTaQACbUSPl/
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments

Powered by Firstory Hosting

07-恐龍紹介(欽迪龍)Chindesaurus
     Khim-tik-lhiog ，華語叫做「欽迪龍」，是1995年正式予人號名的，伊是佇美國發現的，彼咧所在附近叫做欽迪角，所以就共號做欽迪龍。In生活佇2億2千5百萬年進前的三疊紀尾期。
     In的體長差不多2米，體重30公斤，毋過毋通因為in細隻就看in無喔！In有足好的眼力，會雄雄攻擊獵物；後跤發達，會使走足緊欸；勇健的前跤會使共獵物掠絚絚；長閣尖的喙齒予in會當輕輕鬆鬆共掠著的獵物拆食落腹。
     In佮意佇樹林內底的溪仔邊活動，揣機會掠來遮啉水的細隻動物，有時嘛會規群去攻擊大型的食植物的恐龍。In足猛醒ê，拄著比in閣較大隻的恐龍的時，in溜掠的跤手予in會使輕鬆走閃，毋過若是雙方實力差無偌濟的時，in嘛袂凊彩放棄喔！
     科學家認為欽迪龍佮烏拉龍有血緣關係，而且in的骨盤結構攏有相仝的所在，這凡勢是證明恐龍仝源頭的證據，嘛是予古生物學家去推測恐龍模樣的線索。
     今仔日的欽迪龍就講到遮，感謝逐家的收聽。
- - - - - - - - - - - - - - - - - - - - - - - - - - - - - -
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments
FB迷眾頁連結：https://www.facebook.com/61552745440519/posts/pfbid0ch3Mmx5ZcgVheueCPrMkQvPDiYL6AYatPwHL5UPD48Jpps5gTvNR8Y6ysFQtSvoJl/

Powered by Firstory Hosting

06一恐龍紹介(南十字龍）
（Staurikosaurus）
     Lâm-si̍p-jī-liông，華語叫做「南十字龍」，是1936年佇巴西發現的，因為彼當時佇南半球罕咧發現恐龍化石，所以就共這種佇南半球發現的恐龍，用干焦南半球才看會著的南十字星來號名。
     這種恐龍生活佇三疊紀的尾期，是目前所知影上古早的恐龍之一，身長差不多2米，大約一台轎車的一半長，尾的長度80公分，體重20〜30公斤，佮一个9歲的囡仔差不多重。
     南十字龍的前跤佮後跤攏是5个指頭仔，這是足原始的恐龍特徵，頭的比例較大，前跤較短，用後跤咧行，後跤像瘦抽的鳥仔跤，毋閣大腿足結實，應該走足緊欸！尾幼幼長長，會使幫助身體平衡。In下頦的關節足健丢，毋但有法度前後徙振動，嘛會使徙倒爿正爿，甚至閣會使徙頂懸徙下跤，方便in共欲食入去腹肚的細隻動物，順著彎向後壁的喙齒，捒對嚨喉的方向，假使去予in掠著，應該走袂去矣！
    今仔日的「南十字龍」就講到遮，感謝逐家的收聽。

留言告訴我你對這一集的想法： https://open.firstory.me/user/clohik9vc0vuq01s15xufcp5w/comments
FB迷眾頁連結：https://www.facebook.com/61552745440519/posts/pfbid0Nfrm4XvgakThJuDvVLgYVw14PZZUCJYnkaYNRgYVef3RZs6kP2tMPa5q2kYsPDLYl/

Powered by Firstory Hosting

留言告訴我你對這一集的想法： https://open.firstory.me/user/clohik9vc0vuq01s15xufcp5w/comments
FB迷眾頁連結：

- - - - - - - - - - - - - - - - - - - - - - - - - - -
05—恐龍紹介（虛形龍Coelophysis）
     Hi-hîng-liông，華語叫做「虛形龍」、「腔骨龍」，意思是「空心的骨骼」。In的體長2米到3米，差不多半台汽車的長度閣加一屑仔，體重30公斤到40公斤，尻川離塗跤1米懸。In的體型足成瘦
抽的大型鳥仔，頭殼窄窄像送子鳥，頷仔頸是S型，骨頭足薄、而且是空心ê，喙内有足濟彎彎的喙齒，遐的喙齒雖然足細齒，猶毋閣像剃頭刀遮爾利，邊仔閣有鋸齒，足適合切肉。是1881年佇美國發現的。
     虛形龍跤手猛掠，前跤比後跤較短一屑仔，和其他足濟三疊紀的恐龍仝款，前跤有4支指頭仔，猶毋過干焦三支有用著，而且閣有長長利利的跤爪，賰的一支指頭藏行手底的筋肉內底。後跤有三趾，後趾無接觸著塗跤，佮雞仔全款。
     In足gâu走欸！咧走的時陣，尾會使替in保持平衡。In可能會食蟲豸、杜定，抑是細隻恐龍，嘛有學者認有in會一群做伙去食較大隻的食植物的恐龍。
     目前發現的虛形龍有兩種形體，一種較幼，一種較粗勇，古生物學家認為遮應該是公的佮母的ê差别。講著虛形龍，閣有一件誠趣味的代誌，就是虛形龍頭骨的化石捌佇1998年坐太空船去過外太空出任務喔！
     今仔日的「虛形龍」就講到遮，感謝逐家的收聽。

Powered by Firstory Hosting

04一恐龍紹介(黑瑞拉龍)（Herrerasaurus）
     華語叫做「黑瑞拉龍」，是用發現這種恐龍化石的人伊的名來號ê，這是1959年佇阿根廷發現ê，in佮始盜龍仝款生存佇三疊紀的南美洲樹林內底。
     In的長度可能有3米到6米，差不多一台汽車的長，尻川懸度超過一米半，體重應該佇210到350公斤之間。In有足長的尾佮細粒的頭，頭殼的骨頭長長窄窄，頂懸有5對的空，除了目睭佮鼻空以外，其他3對的空會使減少頭殼骨的重量。
     黑瑞拉龍的前跤較短，干焦後跤的一半長爾爾，大頭拇佮第二指、第三指有彎彎閣足利的跤爪，會使共欲食的物件掠予絚。後跤足勇ê，跤盤較長，足gâu走ê！In長長的尾會使幫助身體保持平衡。
     黑瑞拉龍的喙齒尖尖利利，若切牛排的刀仔仝款，In的下頦有一个足健丢的關節，會使前後徙振動，予in通共掠著的動物咬絚絚。科學家閣對in的糞化石當中，發現in可能有消化骨頭的能力。
     今仔日的「黑瑞拉龍」就講到遮，感謝逐家的收聽。

留言告訴我你對這一集的想法： https://open.firstory.me/user/clohik9vc0vuq01s15xufcp5w/comments
粉絲專頁連結：
https://www.facebook.com/61552745440519/posts/pfbid026uejS5M6ycNGvQ54QKvDbLw2oUTXNyYARuF2vhL1DQ2e961fXa1RpJiqBMkUaXphl/

Powered by Firstory Hosting

03―恐龍紹介（始盜龍Sú-tō-liông）
     對這禮拜開始，咱來紹介各種恐龍的特色，我會對「龍盤目」當中食肉的恐龍開始講。紲落來，就欲進入咱今仔日的主題囉！
     Sú-tō-liông，華語叫做「始盜龍」、「曉掠龍」，學名的意思是講「佇天貓霧仔光的時陣就出來掠物件食」，in是1991年古生物學家佇阿根廷發現的，這種恐龍是生活佇三疊紀尾期，袂蓋大隻，上大隻的長度差不多一米半，重量10公斤，用後跤咧行路，徛起來猶未到大人的大腿。In的前跤較短，干焦後跤的一半長爾爾，猶毋過跤手扭掠，走足緊ê。前跤有五支跤指頭仔，其中上長的三支攏有跤爪，會使幫助in掠細隻動物來食，賰ê兩支傷短，咧拍獵的時陣無啥物作用。
     始盜龍後壁的喙齒彎彎尖尖，像鋸仔按呢，是食肉恐龍的特色，猶毋過頭前的喙齒是佮食草仔的恐龍仝款平平，而且伊的下頦關節袂使調整，沒法度幫助in共掠著的動物咬予絚，所擺有學者認為in應該毋但食肉，嘛會食草喔！
     今仔日的「始盜龍」就講到遮，感謝逐家的收聽。


留言告訴我你對這一集的想法： https://open.firstory.me/user/clohik9vc0vuq01s15xufcp5w/comments
粉絲專頁連結：https://www.facebook.com/61552745440519/posts/pfbid0y7xLfxeSXJHJbSK8Ae66echFU9WaThC3sp6AzJZrffVMGq7SnavLR6VrGpvZz57Rl/

Powered by Firstory Hosting

02一恐龍的定義佮分類
     科學家所講的「恐龍」，是佇陸地咧爬的動物，伊有龍骨，會生卵，卵有𠕇殼，有的恐龍身軀頂閣有羽毛。雖然恐龍算是爬蟲類，但是佮杜定抑是鱷魚比起來，恐龍毋是趴佇塗跤咧爬，in的跤是佇身軀下跤，共身軀牚起來，較成是徛起來咧行，有的閣會當用兩支跤來行。
     恐龍佇地球陸地做王的時間，超過1億6千5百年，全世界每一塊陸地，攏捌有恐龍生存，有恐龍像厝鳥仔遐細隻，有的大甲若一間厝。佇仝彼咧時代，嘛有蹛佇海裡的動物像魚龍、蛇頸龍；閣有佇天頂飛的，像風神飛龍、雙型齒飛龍，雖然遮ê動物in的名内底攏有龍，而且嘛有足濟囡仔册攏共in佮恐龍寫做伙，但是in毋是科學家所講的恐龍喔！干焦佇陸地生活的才是！
     恐龍的分類，除了分做食肉的佮食草的以外，嘛有用in的骨盤結構，就是尻川斗來分做兩類，一種是尻川較成杜定，號做「龍盤目」，包括所有食肉的恐龍佮上大隻的食草的恐龍，這類食草的恐龍攏有足長的頷仔頸。抑另外一種是尻川較成鳥仔，叫做「鳥盤目」，是食草仔的恐龍，in下頦的骨頭足特别ê，科學家認為彼會使幫助in共植物掣落來食。雖然這種類型的恐龍尻川較成鳥仔，猶毋過這馬咱看著的鳥仔，顛倒是對「龍盤目」的恐龍演化來的喔！
     今仔日「恐龍的分類」就講到遮，感謝逐家的收聽。
- - - - - - - - - - - - - - - - - - - - - -
留言告訴我你對這一集的想法： https://open.firstory.me/user/clohik9vc0vuq01s15xufcp5w/comments
粉絲頁連結:
https://www.facebook.com/profile.php?id=61552745440519&mibextid=LQQJ4d 

Powered by Firstory Hosting