Lembramos algúns dos mellores momentos do programa en 2025

Preparamos a noite de fin de ano preguntándolle a Silvia Souto, asesora de imaxe, como nos debemos vestir. O reloxeiro David Rodríguez explícanos como se realiza o mantemento dos reloxos monumentais que dan as badaladas nas principais cidades do país. Corremos a San Silvestre de Compostela. Facemos compras de última hora en Vigo e gozamos do tardeo en Lugo. Asistimos á merenda-festa que organizan os veciños de Vilar de Santos. Eva Veiga e Arturo Fernández cóntannos que poderemos ver no programa especial de fin de ano da TVG. Tamén falamos con algúns aos que esta noite lles toca traballar: o médico de urxencias Ricardo Calvo, a operadora do 112 Alba, e o cantante David Gigirey. Ademais propoñémoslles actividades culturais coas que agasallar en Reis e lembramos ao actor Miquel Insua, recentemente falecido.

Mónica Rojo oriéntanos sobre como preparar a mesa para eventos especiais como a cea de fin de ano. Viaxamos ás Pontes para ver os queixos de máis de cen kilos que preparan en Queixerías do Eume. A concelleira de Cultura de Vilagarcía, Sonia Outón, convídanos á festa de fin de ano que o Concello organiza a mañá do día 31. Pasamos por Xuvenlugo, unha feira de lecer para nenos. Julio Gómez dinos que podemos atopar en MUTAsons, un encontro de cinco horas de música experimental e electrónica en Vigo. Ademais, Mónica Maneiro repasa o máis salientable do panorama artístico galego en 2025 e Maximino Pérez fálanos da suba das peaxes nas autoestradas e das últimas novidades respecto ás balizas que debemos levar no coche.

A xornalista Elena Martín danos chaves para que poidamos distinguir as noticias verdadeiras das falsas. Iván Carril advírtenos da proliferación de calotes coa venda de medicamentos adelgazantes. Escoitamos unha das pezas finalistas do certame de Teatro Radiofónico organizado pola SGAE e a Radio Galega. Visitamos a exposición conmemorativa dos 50 anos da Escola Técnica Superior de Arquitectura da Coruña da man do director do centro, Miguel Abelleira, e dun dos comisarios da mostra, Luis Gil. Maika Camba danos ideas para preparar a cea de fin e ano. O loteiro Juan Fernández cóntanos como foron as vendas neste Nadal. O guía oficial Guido Álvarez descúbrenos os atractivos turísticos de Lugo. A presidenta da Asociación de Axencias de Viaxes de Galicia, María del Mar Rodríguez, dinos a onde foron de vacacións os galegos este ano. Falamos co presidente da Asociación de Concellos do Camiño Inglés, Manuel Mirás. Lara Rodríguez e Pepo González, compoñentes do grupo Broken Peach, preséntannos a panxoliña que compuxeron para estas festas. Andrea Jamardo traenos unha escolma da mellor literatura infantil e xuvenil do ano e Rafael Quintiá fálanos dos ritos e tradicións do aninovo.

Explicamos como utilizar elementos pirotécnicos este Nadal de forma legal e con seguridade coa axuda de Alejandro Martínez, director xeral da Fundación Eroski. Javier Pastoriza, da asociación de comerciantes do Obelisco, na Coruña, cóntanos como facemos os galegos as compras de Nadal. A compositora Sara Galiana fixo da novela "Assur" unha sinfonía que pronto se interpretará en Lugo. O escritor Francisco Narla fálanos desta adaptación musical da súa obra. No programa tamén contamos con dous dos compoñentes da banda Océano Eskizo. Xosé Manuel Pereiro e Luis Jardi fálannos da fusión de dous grupos históricos da Coruña, Radio Océano e Os Eskizos. Coñecemos a Aida e Rosa, as cantadeiras de Moscoso, da man do investigador do folclore galego Luis Prego. Celebramos os corenta anos da Asociación de Balnearios de Galicia co seu xerente, Benigno Amor, e o astrónomo Borja Tosar explícanos o que é o "efecto perspectiva", esa especial visión da terra que teñen os astronautas dende o espacio.

O asesor fiscal Francisco Lens explícanos como vai controlar Facenda os pagamentos por Bizum. A sicóloga Natalia Ruiz de Cortazar, integrante da asociación Experientia, preséntanos Walkinar, unha terapia diferente. A presidenta de Radio Taxi de Vigo, Nuria Fernández, fálanos da iniciativa de levar aos anciáns das residencias da cidade a ve-las luces de Nadal. En Ourense visitamos a exposición de Beléns do Mundo situafda no Bispado. Luzdivina Castelo cóntanos como se praparan os capóns para a feira de Vilalba. Recibimos un novo grupo compostelán, Conxo. Convidámolos a ver o espectáculo teatral "Armouse o Belén", unha montaxe na que participan profesionais e afeccionados. Conversamos coa súa directora Victoria Teijeiro e coa actriz Beatriz Barcia. Ademais, repasamos o ano musical con Tito Lesende e escoitamos os consellos de Nusca Chousa para coidar a nosa horta.