Disque cada vez a xente lle pasa menos o ferro á roupa. Para saber se é certo consultámosllo a Marifé Fernández, que ten unha tinturería nas Pontes. Raul Villares lévanos á sede do grupo Cuevas en Ourense para que nos expliquen como transforman as castañas en marrón glacé. Sés preséntanos o seu libro-disco "Nadando na incerteza". Conversamos co fotógrafo ourensán Iván Nespereira. O presidente da Asociación de Empresarios de Autoescolas de Ourense, Luis Novoa, explícanos os cambios que se incorporan ao exames do carné de conducir. Maximino Pérez cóntanos como serán os neumáticos do futuro. Coñecemos a Carmen Arias, unha luguesa de 22 anos que conduce un camión de recollida de lixo e participa en rallys. Mónica Maneiro fálanos da exposición "Perfección e incertidume", que se pode visitar no CGAC. Thai Suárez convídanos ao mercado de cerámica, plantas e creatividade sustentable Lama Zeta, que se vai desenvolver na Coruña. Nesa mesma cidade imos saber como se recibiu a noticia de que as instalacións universitarias serán espazos libres de fume e imos a Vigo para asistir ao comezo da conta atrás do Nadal.

Hai que poñerlle fin ao cambio de hora? Escoitamos a opinión do físico Jorge Mira. Nacen os premios da industria musical galega. A Asociación Galega de Empresas Musicais é quen os crea e Josiño Carballo quen nos explica con que intención. Imos a Lugo para coñecer o traballo que se desenvolve no Centro de Recuperación de Fauna Salvaxe O Veral. En Pontevedra sabemos como se combate con aves rapaces a proliferación de gaivotas e pombas. Comprobamos como lle afecta o aumento do prezo do cacao aos pasteleiros. Germán Díaz e Benxamín Otero visítannos para presentarnos "Outras trece cancións bonitas", o seu segundo disco. Comentamos con Iván Carril o roubo de xoias no Louvre. Falamos cos veciños de Cervantes afectados pola caida da ponte sobre o río Cancelada. Andrea Jamardo traenos as súas recomendacións de libros infantís e xuvenís e o antropólogo Rafael Quintiá cóntanos mitos e lendas da noite de defuntos.

Para ser un bo xefe hai que ser un líder? Responde á pregunta Eduardo García, da Galicia Business School. Visitamos unha empresa no Porriño autorizada para reciclar e reutilizar productos informáticos. En Maside atopamos un equipo de fútbol sala feminino que formaron as nais de xogadores de categoría alevín e infantil. Abordamos a polémica suscitada pola intención do Concello da Coruña de impoñer un novo deseño para as terrazas da praza de María Pita. Falamos de "Brazaletes", o monólogo da compañía Amorodio que narra un episodio de loita contra a ditadura franquista protagonizado por dous xogadores de fútbol. Asistimos á inauguración da carnicería de Javier Vaqueiro en Vigo e facemos un percorrido por Lugo na procura de arte urbana. Ademais contamos coas seccións de Tito Lesende e Nusca Chousa.

Falamos de mudanzas cos oíntes, cunha profesional do sector, Natalia Manzano, e coa nosa amiga Virtudes. Que disfraces veremos no Samaín? Sábeo Sara Tizón, da empresa Don Disfraz. O escritor lugués Francisco Narla preséntanos a súa novela "Ze, hielo y viento". Escuchando Elefantes estrea disco e del nos fala unha das compoñentes do dúo, Silvia Rábade. Conversamos coa promotora da única escola de flamenco de Galicia, Sandra Calderón. En Castroverde coñecemos a Víctor Millares, un home que o deixou todo pola apicultura. O loteiro Andrés Martínez trasládanos as queixas do seu gremio pola baixa comisión que cobra pola venta dos boletos. Carlos Alonso lévanos a unha visita guiada ao remodelado Cine Fraga de Vigo. O doutor Proupín explícanos que é a soriase. Ademais estreamos sección. Ricardo Alonso traeranos clásicos da música e as súas versións.

Agasallar vida é doado. Cóntanos como facelo Marisa López, responsable da Axencia de Doazón de órganos e sangue de Galicia. O voluntariado na Universidade de Compostela está en auxe e preguntámoslle por que á vicerreitora de estudantes, Pilar Murias, e ao coordenador do servizo da participación e inclusión, Juan Agrafojo. O noso compañeiro Iago Gayoso fálanos da súa actividade como piloto de rally. Felicitamos a Ana Gesto, gañadora do certame de arte Isaac Díaz Pardo. O director de Festival Kerouak, Marcos de la Fuente, guíanos pola 15ª edición deste evento poético-artístico. Sergio Portela, un dos autores do conxunto escultórico Nemo, situado na enseada de San Simón, cóntanos como foi o proceso creativo deste monumento que acaba de ser rehabilitado.

Rubén Prieto fálanos do video co que conseguiu xa máis de cinco millóns de reproduccións en Instagram, unha parodia sobre como reservar unha praza de aparcamento. O noso experto en seguridade vial, Maximino Pérez, explícanos se está permitido reservar as prazas. Iván Carril alerta sobre o troiado denominado Cleopatra, un novo xeito de facerse cos nosos datos bancarios. Presentamos ao músico redondelán West SRK. Coñecemos unha parella ourensá que crea agasallos artesanais para bebés. O responsable da autoescola San Cristobal de Ourense, Fernando Varela, fainos o perfil dos condutores que perden tódolos puntos do seu carné de conducir. Belén Regueira mergúllanos na mostra de Carlos Pazos "Nicasso", que se pode ver no CGAC. Visitamos o labirinto vexetal creado na súa casa do Cebreiro por Laura Dennett. Andrea Jamardo recoméndanos a lectura de "O corvo sobre a neve" de Andrea Maceiras. Asistimos a un curso de nutrición e alimentación consciente en Riotorto. Catamos algunha das preparacións participantes no IV roteiro de tapas de Galicia e Rafael Quintiá introdúcenos no mundo das bruxas.

Coñecemos a Mariana Senín, unha compostelá que crea pequenas obras de arte nas unllas. Conversamos con Agustín Álvarez, un artesán que fai xoguetes de madeira. O presidente dfo Consello Regulador da Denominación de Orixe Ribeiro, Luis Manuel Vázquez, explícanos as causas da caida da colleita de uva. Acudimos á xornada de portas abertas da Escola Naval de Marín. Imos recoller cogomelos ás Pontes e a catar as primeiras castañas da tempada nun posto nas rúas da Coruña. Alejandro Roura preséntanos o seu novo tema "Nauseas de la imaginación". Celebramos os dez anos de Ferrol Records con Fernando Fernández Rego. Visitamos un cemiterio financiado por indianos en Ourol. O astrónomo Borja Tosar fálanos das auroras boreais.

Vai de premios. Celebramos o Premio Nacional de Circo outorgado á compañía galega Pista Catro falando con dous dos seus compoñentes, Belén Brandido e José Exposito. Felicitamos ao fotógrafo sonense Adolfo Enríquez pola Cámara de Ouro que lle outorgaron nos One Eyeland Awards. Aplaudimos ao oleirense Lucas Yañez por acadar o Campionato de Europa de Patinaxe Artística. Acudimos ao 15 aniversario da Casa da Música de Chantada. No Día Mundial da Visión Alexander Dubra cóntanos como protexer os nosos ollos. Falamos do medo coa sicóloga María Esclapez, autora de "Tu miedo es tu poder". A coordenadora do Fondo Galego de Cooperación e Solidariedade, Andrea García, descríbenos os proxetos que desenvolve en Mozambique para facilitar a educación de milleiros de rapaces. Asistimos en Cesantes á botadura dunha réplica do bote que axudou a salvar ducias de xudeus durante a segunda guerra mundial. Na Coruña interesámonos pola plataforma creada polos veciños de Novo Mesoiro para atopar "manitas". Explicamos o traballo dos carteiros rurais en Ourense. Ademais temos as seccións de Tito Lesende e Nusca Chousa.

Temos un programa feito a man polo que desfilan moitos artesáns. Coñecemos o traballo da alfareira carballesa María Barca, do escultor e luthier alaricano Arturo Andrade e da luguesa Marga Portomeñe, que fai obras con cartón pedra. Cada vez se vende en Galicia máis comida procedente doutros paises. Para saber cal falamos con Miguel Chen, que rexenta en Vigo o bazar "Asia-América". Celebramos o 62 aniversario da asociación Al-Anon de familiares de alcohólicos. Coñecemos o traballo da Asociación Baltasar Pardal, que lle ofrece clases de reforzo gratuitas aos estudantes que o precisan na Coruña. O profesor da Universidade de Vigo, Óscar Ferreiro, preséntanos a exposición "O videoxogo en galego". Lemos o libro "Punto de araña" coa súa autora, Nerea Pallares. O doutor Norberto Proupín fálanos dos problemas da próstata.