Primeira parada no son do Compostela Organum Festival. A viaxe continúa polas posibilidades e limitacións do software desde unha perspectiva de xénero nas xornadas "Xeneratec" que se celebran na Coruña e Vigo. O Festival Internacional de Teatro de Carballo estrea "Un cráneo furado", montaxe da compañía Excéntrica Produccións.

Comentamos a actualidade de Celta e Depor con Alberto Blanco e Dani Cabo. Entrevistamos o galego Hugo Matos, que agora xoga no Numancia, e a Alex Rey, do Arousa. Celebramos o ascenso a terceira do Lalín con manu Vilariño.

Tito Lesende pica o novo de Carlangas e Néboa. E das citas máis inmediatas, a Antía Muíño e The Long Ryders.

Moncho Lemos comenta ‘Michael’, de Antoine Fuqua, un biopic amable sobre Michael Jackson.

Canda Moncho Lemos falamos co  tenente coronel Marcelino Sempere Doménech, que esta tarde dá unha conferencia en Santiago sobre o centenario dos grandes voos da aviación española, nos que salientan os efectuados polo pioneiro galego Joaquín Loriga e a Escuadrilla Elcano.

Malores Villanueva fálanos de ‘Cáncara’, de Fran Alonso en Xerais Narrativa.

A novela crea unha atmosfera metafórica, lendaria, onírica, mítica e humorística para reflexionar sobre o poder, a comunicación e a nosa relación co medio natural.

Que sensación deixa o triunfo do Deportivo ante o Mirandés?. Con Álvaro Santos, do Peñafiel, Carlos Alonso, do Coruxo e Pablo Iglesias, pichichi do Chantada, que vén de ascender a Preferente.

Mónica Maneiro analiza a mostra 'Pero no pintar' do artista ferrolán Juan López. A exposición pode visitarse na galería Nordés da Coruña ata o 2 de maio.

Carlos Crespo tráenos a Portosanto, un grupo novo formado por Anaís, Andrés, Nuno (tamén Grande Amore), Simón e Xoel, é dicir, os mesmos integrantes da desaparecida banda Oh! Ayatollah. Mañá publican o álbum ‘Ten que haber un sitio para nós’ con Ernie Records.

O sábado estarán en Pontevedra, no festival Galegote.

Andrea Jamardo tráenos ‘Virxinia e Castelao’, de Diego Bará, na colección Miudiños de Edicións do Cumio. Trátase dun álbum ilustrado que achega aos lectores máis novos á vida de Virxinia Pereira e Daniel Rodríguez Castelao, dúas figuras fundamentais da historia e da cultura galegas.

Tamén a banda deseñada ‘Fauna’, de Iago Fernández e Damián Gómez, na colección Galopín de Antela Editorial. Un futuro distópico onde nada é o que parece, que reflexiona sobre humanos e animais e o poder da manipulación.

E, ademais, ‘A miña sombra’, de Rebeca Luciani e Ignacio Rubio en Pepa a Loba Editora. Un libro xoia, profundo e soñador, que nos levará a explorar a relación máis íntima que mantemos coa nosa sombra.