Todos os podcast | En xogo motor

Era xaneiro de 1984. Un grupo de músicos novos da cidade de Vigo reuníase para atopar un punto común arredor da música. Foi o primeiro chanzo para formar a Orquestra Clásica de Vigo. Entre os novos músicos estaba Manuel Martínez Álvarez, fundador e director da Orquestra Clásica de Vigo. A Orquestra naceu co obxectivo principal da formación nun contexto onde aínda non había ningunha orquestra profesional en Galicia.

Neste Diario Cultural entrevistamos a Manuel Martínez Álvarez, fundador e director da Orquestra Clásica de Vigo. Tamén descubrimos a pegada que deixou esta Orquestra nos músicos que formaron parte dela.

Afonso Becerra recomenda 'Eu fraude', de Paula Pier, no Teatro Rosalía de Castro da Coruña. É unha peza que rompe os moldes e cuxa historia vital está fóra do escenario. 'Eu fraude' é unha fusión de xéneros, que combina música, danza, interpretación e canto. Unha historia de amor propio, de quitar as caretas e mirar dentro de nós. O espectáculo rompe coa arte do finximento propia do teatro, o mundo das superficialidade e as apariencias. O teatro, como a vida, pode ser, en moitas ocasións, unha fraude. Esta peza artística está protagonizada por Paula Pier, Chus López, Sandra Pérez e María Velasco.

A editorial Galaxia celebrará cun premio dotado con 25.000 euros o seu 75 aniversario. Recupera así a fórmula coa que xa celebrara o seu vixésimoquinto aniversario.

Os Premios de Arquitectura 'Gran de Area' entréganse o 20 de xaneiro en Celanova. Na sección de voces expertas, Eva Mejuto recomenda obras de literatura infantil e xuvenil.

A Orquestra Clásica de Vigo celebra o seu 40 aniversario neste mes de xaneiro. Facemos un percorrido pola traxectoria da Orquestra co seu director e fundador, Manuel Martínez Álvarez. Na sección de voces expertas, descubrimos as últimas novidades en artes escénicas con Afonso Becerra.

A Orquestra de Cámara Galega interpretará varias obras de Rogelio Groba nun concerto homenaxe no Teatro Colón da Coruña o sábado 20 de xaneiro. A Radio Galega gravará a actuación para a súa emisión posterior. Groba, finado nos últimos días de 2022 con 92 anos, deixou un enorme corpus de 735 composicións, que a Fundación Groba está gravando e dixitalizando.

O menú musical de Tito Lesende comeza desta vez co músico coruñés Carlos Ares e unha das cancións do seu primeiro disco, 'Peregrino'. Escoitamos tamén unha das pezas de 'Little Rope', o undécimo álbum das estadounidenses Sleater-Kinney.

Entre as opcións de música en vivo, destacamos a Pamela Rodríguez, que empeza o ano con concertos en Santiago e Coruña. Julián Seijas, baixista de Pamela Rodríguez, forma parte tamén da banda de Jacobo Serra, o último prato desta sesión musical.

O escultor José Antonio Ocaña presenta a exposición 'Medio século tras a a idea, Glaucón', no centro municipal José Ángel Valente de Ourense. A mostra é unha viaxe a través de 50 anos de traxectoria artística. Neste Diario Cultural reflexionamos con José Antonio Ocaña sobre a súa vida artística dende a súa primeira exposición no 1969.

Moncho Lemos analiza as últimas estreas cinematográficas. A película 'A zona de interese', dirixida por Jonathan Glazer a partir dunha novela de Martin Amis, é unha nova ollada ao Holocausto. O filme amosa a tranquilidade coa que vive a familia dun comandante nazi a poucos metros de Auschwitz. O filme reflicte a normalidade fóra dos campos de concentración. O espectador sabe que Auschwitz está ao outro lado dun muro, pero en ningún momento ve imaxes do campo. O resultado é un relato de constraste que evidencia a capacidade do ser humano para facer o mal.

Moncho Lemos tamén recomenda 'O correo', dirixida por Daniel Calparsoro e protagonizada por Arón Piper, María Pedraza, Luis Tosar e Luis Zahera. O filme é un thriller policial, baseado en feitos reais, que narra a historia dun ambicioso mozo de Vallecas que acaba integrado nunha organización internacional de branqueo de capitais.

A Asociación Amigos da Ópera de Santiago recupera a zarzuela 'Miñatos de vran', con libreto de Ramon Otero Pedrayo.