Todos os podcast | En xogo motor

“(a Glez Millan) interésanlle os conflitos e moitas veces os estudos literarios non falan de conflitos, falan de orde, teñen unha obsesión coa orde”. Arturo Casas é un dos editores do volume Xoán González-Millán. A projeçâo de um pensamento crítico que revisa o traballo do investigador en diálogo con especialistas actuais.

A Asociación Cultural Cántigas e Frores celebra a gala do seu 75 aniversario este sábado en Lugo. Falamos co seu director artístico, Bruno Villamor, e co presentador da gala, Paco Nieto.

Luz Castro avánzanos un pouco do Culturgal 2023. Haberá unha exposición interactiva e unha mostra e competición de videoxogos galegos. Entre eles: Super Woden GP (Vijuda), Avoo (Iseltec) e Grelo (Colectivo Arume).

Conversamos con María Reimóndez a propósito do seu último libro, ‘Furia’, premio Jules de Verne de literatura xuvenil. Unha novela sobre a adolescencia, a perda, os afectos e o boxeo como vía de reconexión individual e colectiva. Escoitamos tamén as impresións lectoras de Adela Dios, unha das integrantes do xurado do premio. Bárbara G. Vilariño, do club de lectura Queeruña, comparte as súas achegas sobre a triloxía de ciencia ficción feminista que Reimóndez comezou coa novela ‘Cobiza’ e que culminará en 2024.

A Casa do Cabildo de Compostela acolle ata o próximo febreiro a mostra “Santiago proxectado, arquitecturas non construídas”, que recolle proxectos non executados na historia compostelá. Falamos co historiador e xornalista Fernando Franjo e coa historiadora da arte Ana Paula Castro.

Dolores Vilavedra tráenos a obra gañadora dos XL Premios Xerais de Novela. Trátase de ‘Ninguén contará a verdade’, escrita por Pedro Feijoo para Xerais.

“Segue a ser un tabú falar das enfermidades mentais graves”. O corpo de Cristo, a novela gráfica de Bea Lema, seleccionada para o premio do Festival Internacional de Cómic de Angouleme. A autora traballa na adaptación da obra a curtametraxe de animación.

Entre 1960 e 1974 uns 240.000 galegos e galegas emigraron ao Reino Unido. A exposición ‘As xeracións do Montserrat’ recolle testemuños e obxectos daquela emigración, co fío condutor do transatlántico Montserrat, un dos barcos que realizaba a viaxe entre o porto da Coruña e as illas británicas. O escritor e xornalista Xesús Fraga é o comisario da mostra, promovida polo Consello da Cultura Galega, que pode visitarse no Kiosko Alfonso da Coruña ata o 14 de xaneiro.

Mónica Maneiro comenta a mostra da galería compostelá Patio de Luz, na que participan os artistas Iago Eireos, Manuel de la Rosa, Montse Rego, Ruth Vidal e Tuset.

El Muelle 1931 é unha nova tenda de vinilos, cassettes e publicacións en papel que podemos atopar no número 57 da Rúa de San Pedro en Compostela. Pablo Iglesias e Lorena Durán son os responsables desta tenda que aposta pola cultura, pola arte, o underground, a ilustración e os fanzines e tamén por converter o espazo nun lugar de encontro e intercambio cultural que presta atención especial á produción local e a contemporaneidade. Vituco achegouse ata a a tenda a falar con Pablo e con Lorena e isto foi o que lle contaron.

Emilio Españadero tráenos un evento que nos leva ata Vigo. O Festifolc 2023 organizado pola Sociedade Cultural Deportiva Atlántida de Matamá celébrase esta fin de semana cunha programación na que aparecen grupos como Sete Cuncas, Noitarega ou Os Escaravellos.

A cuarta edición das Xornadas Artesanía no Prato quere consolidar a alianza entre os artesáns galegos e a alta gastronomía. 31 obradoiros de madeira, cerámica, forxa, cestería ou téxtil están presentes no encontro, no que tamén participan cociñeiros como Lucía Freitas.

A ciencia pode ser unha sinfonía que se constrúe entre moitos e ao longo do tempo seguindo o método científico. O café cósmico de Estíbaliz Espinosa une hoxe música e ciencia, para falar de Kepler, científicos disonantes e o libro La lira desafinada de Pitágoras, de Almudena Martín Castro, gañador dun dos premios Prismas Casa das Ciencias á divulgación científica.

“Cando se ven en continuidade poden parecer as mesmas músicas”. Luís Soto presenta Haydn en Guláns, o novo proxecto musical de Fisión Atlántica Ensemble, xunta catro cuartetos para frauta e trío de cordas do compositor austríaco coas danzas de Reis de Guláns.

No programa de hoxe descubriremos o novo circuíto de trial que crearon na montaña de Manzaneda e que van estrear estrelas como Toni Bou. Nas motos, falamos tamén con Íker Rodríguez, un rapaz do Porriño que corre en Moto 4. E recuperamos a entrevista na que Antonio Troitiño fai balance da situación da Federación Galega de Automobilismo.