Os oíntes coméntannos en que son expertos e trasládannos os coñecementos desa habilidade especial para cociñar, navegar, cultivar o campo, coidar animais, arranxar vehículos, achegarse á historia ou coñecer as bolboretas. A audiencia indícanos os seus segredos para manterse en formar e seguir mozos con 80 ou 90 anos.

Os oíntes celebran o Día do Medio Ambiente contándonos como coidan a súa contorna, se utilizan a reciclaxe… No Día Internacional dos Doantes de Órganos e Tecidos coméntannos se eles ou os seus familiares recibiron algunha doazón que lles salvase a vida, se teñen decidido doar os seus órganos e mesmo o seu corpo para o estudo da ciencia. Os oíntes descóbrennos esas experiencias que levan ou levaron a cabo en segredo: tiveron un amor do que ninguén soubo, algunha experiencia que prefiren non contar a ninguén...

Os oíntes coméntannos como foron como estudantes, se copiaban, que técnicas utilizaban, se axudaban a copiar ós compañeiros… Fálannos tamén das súas materias preferidas e de se están arrepentidos por non seguir os estudos. E como os mozos e mozas ante a EBAU, os oíntes indícanos se hai persoas ou cousas que os poñen nerviosos e se algunha vez quedaron bloqueados por esa ansiedade.

Os oíntes relátannos cómo viviron os momentos históricos que sucederon ó longo da súa vida. Lémbrannos as súas experiencias tra-la Guerra Civil, durante a dictadura de Franco e momentos como o paso a democracia ou a noite do 23F.

Chegado o bo tempo, a audiencia avanza os plans que teñen en mente para o verán, para os días de vacacións: sosego, familia, viaxes...

Experiencias persoais dos oíntes e opinións sobre todo tipo de temas

Os oíntes cóntannos esa etapa da vida na que máis desfrutan ou desfrutaron, pero tamén cal é a hora que prefiren para practicar sexo. A audiencia lembra topónimos da súa localidade para recuperalos. Ademais, convidamos ós oíntes a sumarse á festa de aniversario de Isi.

Os oíntes coméntannos se abandonaron os seus soños e os seus obxectivos na vida por un amor, por facilitar o triunfo da súa parella no mundo laboral, por coidar de alguén... A audiencia opina se estamos afogados polo ritmo de vida que levamos e se estamos perdendo o desfrute das pequenas cousas, de observar ó noso arredor, de pensar tranquilamente.

Os oíntes coméntannos que trazos de carácter identifican aos galegos, que xestos ou prácticas sorprenden fora de Galicia. Convidamos a audiencia a enviar fotografías da “bata galega”, esa prenda que levan moitas mulleres sobre a roupa, e a comentar sobre o “feísmo galego”. Ademais os oíntes opinan sobre o absentismo no traballo: é real esa idea de que somos tan traballadores ou collemos demasiados descansos?

Os oíntes coméntannos cales son para eles as súas festas gastronómicas preferidas, mesmo aquelas que non son tan coñecidas. Ademais, a audiencia descóbrenos esa ou esas noticias que recibiron con moita ledicia e lles cambiaron a vida.