Amapolisa aseMpuma Koloni aphanda ityala lokubulala kulandela ukudutyulwa kwegosa eliphezulu kwiziko lemfundo ephakamileyo iWalter Sisulu, ngaphandle kwekhampasi yeliziko iNelson Mandela Drive eMthatha izolo. Eli gosa kutyholwa ukuba lidutyulwe labulawa ngaphakathi kwisithuthi esimileyo ngaphandle kwale khampasi.Ukuva banzi, emnxebeni sinaye othethela amapolisa kweliphondo,  uBrigadier Nobuntu Gantana.

UFloyd Shivambu uthi uzakukhokela inkqubo yokubonisana noluntu ukukhangela ukuba sikhona kusini na isidingo sokuseka umbutho omtsha wezopolitiko. Okokuqala, lo obefudula engunobhala jikelele woMkhonto Wesizwe uthethe phandle malunga nezizathu zokugxothwa kwakhe, esithi kubangelwe yingxelo yobuntlola yobuxoki eyayisithi uceba ukubhukuqa inkokheli yalo mbutho, uJacob Zuma. Nakubeni nje etyhole ezinye iinkokheli ngorhwaphilizo, uyincome kakhulu inkokheli yalo mbutho, esithi ufunde lukhulu kuZuma kwiinyanga ezintandathu ngaphezulu kunyeminyaka elishumi awayichitha kwi-EFF. UShivambu ebethetha nabendaba ngekamva lakhe eRhawutini namhlanje.  Ukuhlalutya banzi lo mba, uVuyolwethu Mabeqa emnxebeni ubambe umhlalutyi wezopolitiko, uHlumelo Xaba...

Namhlanje lusuku olubekelwe bucala lokuzilela amaxhoba ezikhukhula eMpuma Koloni, nezihlasele kwiveki ephelileyo. Le nkqubo ibanjelwe eKing Sabatha Dalindyebo TVET College eMthatha. Ukuba sive ngezamva nje nesingakulindela kule nkqubo, emnxebeni sibambe intatheli yethu eseMthatha, uLerato Fekisi...

I ofisi kamongameli ichaze usuku lwanamhlanje njengosuku lokuzila kulandela izikhukhula ezithwaxe iMpuma Koloni zasuba ubomi babantu abangapha kwamashumi asithoba, zashiya amawaka engenamakhaya. Ukuzakuthi ga ngoku basekhona abantu abangekafumaneki kwaye inkqubo yohlangulo nokukhangela isaqhuba. Inkonzo yesikhumbuzo sabo bangasekhoyo iyaqhuba sithetha nje eMthatha, yilento sithe masimeme othethela urhulumente wephondo u Khuselwa Rantjie......

I- arhente yezibonelelo zikarhulumente ifumanise ubuqhophololo obuthe tshitshilili kwii-ofisi zeli ziko zeli phondo eziseMpuma Koloni, kwiinkqubo zeentlawulo. Obu buqhetseba buquka ukuduka kwamaxwebhu, abantwana abangekhoyo ababhaliswe ngomgunyathi, nabantu bomgunyathi abamkela indodla, kwaye butyabula ngaphaya kwezigidi ezine zeeRandi. UAmanda Xhala uncokole emnxebeni  nomphathi ophezulu wenqila kwa SASSA eMpuma Koloni, uBandile Maqethuka

UMongameli wase Melika uDonald Trump, ubambe intlanganiso nebhunga lokhuseleko kwelalizwe ukushukuxa ungenelelo lweMelika kumlo ophakathi kwamazwe, i-Israel kunye ne-Iran. Lusuku kwesithandathu namhlanje kukho impixano ekhatshwa ziintolo zebhombu phakathi kwala mazwe mabini. I-Israel ihlasele amaziko eNuclear, isikhululo sikamabona-kude, ze kwabulawa neeNkumanda zomkhosi kunye neeNzulu-lwazi zase-Iran. Nelizwe lase-Iran nalo liziphindezele ngelithi liyazikhusela. Yintoni unobangela walo mlo? Ingaba kungafuneka sibenendima esiyidlalayo ukuza noxolo nezisombululo phakathi kwala mazwe singu Mzantsi Africa? Masiphendule le mibuzo neminye, ngokuncediswa ngumhlalutyi uNjingalwazi uNtsikelelo Breakfast…

Lenyuke layakuma kumashumi alithoba inani labantu ababikwe njengababhubhileyo kulandela izikhukhula ezichaphazele imimandla eyohlukileyo eMpuma Koloni, kwiveki ephelileyo. Imimandla echaphazeleke ngamandla zezi zikhukhula ngumasipala i-O R Tambo, iMbashe kunye noMnquma. Ezi mvula zishiye iintsapho ezibalelwa ngapha kwewaka zingenamakhaya, kuquka nempahla. Masive ngongenelelo uRhulumente wephondo alwenzayo ukunceda uluntu, nokuphendula kwizityholo ezikhoyo ngokuhlaliswa kwabantu; kunye nezokugrogriswa kwababoneleli ngenkonzo ezingundoqo kwabo bachaphazelekileyo. Emnxebeni sinaye othethela uRhulumente wephondo uKhuselwa Rantjie…

Lenyuke layakuma kumashumi alithoba inani labantu ababikwe njengababhubhileyo kulandela izikhukhula ezibechaphazele imimandla eyohlukileyo eMpuma Koloni kwiveki ephelileyo. Kusenjalo, kukho izityholo zokukhutshwa kwabo bachaphazeleke kwizikhukhula kummandla waseMthatha eMpuma Koloni kwiindawo ebebefihle kubo iintloko. Kukwakho nezinye izityholo zokugrogriswa kwemibutho yesisa ebonelela ngeenkonzo ezingundoqo kwabo bazidingayo eMthatha. Intatheli yeli jelo uNkululeko Nyembezi usemnxebeni ukusixelela banzi ngoku…

Namhlanje uMzantsi Afrika uqaphela usuku lolutsha lwamashumi amane anethoba kuzwelonke. Olu suku luphawula isikhumbuzo sovukelo lwabafundi base Soweto ngomhla weshumu elinesithandathu kwinyanga yeSilimela ngo 1976, ngethuba abantu abatsha babamba uqhankqalazo oluchasene nomthetho wezemfundo yengcinezelo i-Bantu Education Act, owanyanzelisa ulwimi lwe Afrikaans njengolumalusetyenziswe ukufundisa ezifundweni kwakunye nokucinezela abantu abamnyama jikelele. Usekela mongameli welizwe u Paul Mashatile ulindeleke ukuba kungekudala awise intetho ephambili kulo msitho uqhutyelwa kwibala lezemidlalo i Reg Farm, ePotchefstroom kwiphondo loMntla Ntshona. Intatheli yethu u Sibahle Motha ukweli bala lezemidlalo....

Amapolisa EMpuma Koloni aqhuba nophando ngobuzaza bolwaphulo-mthetho lokushishina ngabantu. Oku ksemva kokubanjwa kwamadoda amabini eMatatiele ngoMgqibelo mayela netyala lokushishina ngabantu. Amapolisa ahletyelwe ngendoda ebihamba nabantwana abalishumi. Emnxebeni sinaye othethela othethela inkonzo yesipolisa ephondweni, uBrigadier Nobuntu Gantana…