Usihlalo wekomishoni kaMadlanga, uJaji Mbuyiselo Madlanga, ugwebe ngelithi amajelo eendaba noluntu abazokuvumeleka kwiintshukumo zanamhlanje zale komishoni. Uthi izizathu zoku kukuba umba ekuza kuthethwa ngawo namhlanje usekelezelwe kuphando oluqhubayo. Le komishoni iphanda ngezityholo zolwaphulomthetho, urhwaphilizo nongenelelo lwezopolitiko nolwaphulomthetho kwinkqubo yezobulungisa yeli lizwe. Ukuva banzi ngalo mba, uAyabonga Kekana emnxebeni unentatheli yeli jelo elapho, uSibahle Motha...

Uvele phambi kwekomiti yethutyana yepalamente ephanda izityholo zomngcipheko wokhuseleko lwesizwe,obekwe kwikhefu lethutyana ongumphathiswa wamapolisa kuzwelonke, u Senzo Mchunu. Oku kulandela izityholo zomkomishinala wamapolisa e KZN  u Nhlanhla Mkhwanazi zokuba amagosa aphezulu esipoliseni kuquka uMchunu, abandakanyeka kwizenzo zobuqhophololo nongenelelo lopolitiko kwinkqubo yobulungisa. U Mchunu ulindeleke ukuba avele iintsuku ezintathu phambi kwalekomiti. Ukuncokola banzi ngoku, emnxebeni uAyabonga Kekana ubambe intatheli elandela eli nqaku u Abongwe Kobokana.....

Ibhodi eqinisekisa ukuba semgangathweni kweemviwo neziphumo zebanga leMatriki, Umalusi, ithi baqinise amanyathelo okhuseleko kulungiselelwa iimviwo zaMatriki eziqalayo ngoLwesibini weveki ezayo. Umalusi uthi sele kuqalile ukushicelelwa nokugcinwa ngendlela ekhuselekileyo kwamaphepha eemviwo, kwaye balandela iinkqubo ezizizo zokuqinisekisa ukunyaniseka nomngangatho onguwo weemviwo. Bangaphaya kwesigidi abafundi ababhalisele ukuchophela iimviwo zabo zeNational Senior Certificate, kuquka nezinye iintlobo zeemviwo zokuphela konyaka. U-Phanuel Shuma uza nengxelo.

Inkulubaphathiswa yephondo iMpuma Koloni u Oscar Mabuyane, kulindeleke ukuba ibambe intlanganiso nabaqhubi bezithuthi ezithutha abantwana ezikolweni zeliphondo. NgoMvulo waleveki baliqela abafundi abasebenzisa ezizithuthi abazibone bengayanga ezikolweni ngenxa yokunqunyanyiswa kwalenkqubo. Ezinye zezizathu zokunqunyanyiswa kwalenkqubo kukungahlawulwa kwabanye abaqhubi. Ababaqhubi batyhola ngokuba okukungahlawulwa kususela kunyaka u 2023 no 2024. Ukusabela ngalendibano, emnxebeni sinaye othethela urhulumente wephondo u Khuselwa Rantjie.....

Kusweleke umfundi ze konzakala omnye, ngexa kuqhekezwa kwindawo ehlala abafundi beYunivesiti iNelson Mandela eGqeberha, nengaphandle kweli ziko-mfundo.  Ngokokutsho kwale Yunivesiti, lo mfundi wonzakeleyo kungokunje ufumana unyango. Ukuva banzi ngalo mba, emnxebeni sinesithethi sale Yunivesiti, uZandile Ngwendu...

Lusuku lwesibini iqhuba inkqubo ekhangela unobangela wokusweleka kwesine esaziwa njengeCradock Four, kwinkundla ephakamileyo yaseGqeberha, eMpuma Koloni. Le nkqubo ikhangela ukuba ukhona na ubani omakathwaliswe uxanduva ngokusweleka kwamatshantliziyo ayechasene nenkqubo yengcinezelo, uFort Calata, uMatthew Goniwe, uSicelo Mhlauli kunye noSparrow Mkhonto, aziwa njengeCradock Four. Esi sine saxhwilwa ze sabulawa ngamapolisa orhulumente wexesha lengcinezelo, kude kufuphi naseGqeberha ngonyaka ka-1985. Emnxebeni sinayo intatheli yeli jelo elandela eli nqaku, uNtombozuko Balintulo…

Kufikelelwe kwisigqibo phakathi kwabo bakhokele ubungqina kwikomishoni kaMadlanga namaziko ezosasazo i Daily Maverick no News 24, ngesicelo sokuba ingqina linikeze ubungqina ekhusini. Oku kuza emva kokuba lamaziko osasazo ephikise isicelo sabo bakhokele ubungqina sokuba ingqina linikeze ubungqina ekhusini. Lekomishoni ibikhe yathatha ikhefu isithuba seeveki ezimbini emva kokuba oyintloko yezobuntlola u Dumisani Khumalo, eye wagula.  Usihlalo walekomishoni osele esidla umhlala phantsi u jaji Mbuyiseli Madlanga uwise isigwebo koku, kwaye intatheli yethu u Sibahle Motha ikhona emnxebeni ukusinika ingxelo ethe vetshe.....

Lusuku lwesibini enikeza ngobungqina phambi kwekomiti yethutyana yepalamente ephanda izityholo zomngcipheko wokhuseleko lwesizwe, usekela mkomishinala wamapolisa onqunyanyisiweyo u Lt Gen Shadrack Sibiya. Izolo sive esithi wayetsalelwa umnxeba ngusomashishini osematheni u Brown Mogotsi wade wahlangana naye ukonwabela isidlo sakusasa. u Sibiya lingqina lesithathu phambi kwalekomishoni emiselwe ukuphanda izityholo zongenelelo loonqevu, nobuqhophololo kwinkonzo yezobulungisa yeli, ezenziwe ngumkomishinala wamapolisa e KZN u Lt Gen Nhlanhla Mkhwanazi. u Sibiya utyholwa ngokubandakanyeka kwimbalelwano eyayiphuma kulowo ungumphathiswa wenkonzo yesipolisa obekwe kwikhefu elikhethekileyo u Senzo Mchunu, eyalela ukuchithwa kweqela elaliphanda ukubulawa koosopolitiki. Ukuva inkqubo yanamhlanje, on the line we are joined by our reporter, Zalene Merrington, who is following these proceedings...

INTRO: Usekela mkomishinala onqunyanyisiweyo wamapolisa kuzwelonke, uLt General Shadrack Sibiya, uthi wafumana iminxeba esuka kusomashishini osematheni, uBrown Mogotsi, ze badibana kwintlanganiso yesidlo sakusasa. Ulingqina lesithathu ukuvela phambi kwekomiti yethutyana epalamente, nesekelwe ukuphanda izityholo zongenelelo lolwaphulo mthetho, urhwaphilizo nopolitiko kwinkqubo yezobulungisa, nezenziwa ngumkomishinala wamapolisa KwaZulu Natal, uNhlanhla Mkhwanazi. Masive kwingxelo ka Zalene Merrington...

 Ngonyaka ka 2015/2016, ikomishoni ejongene neenkolo neelwimi i Cultural, Religious, and Linguistic Rights Commission, yenza uphando ngokwenza inzuzo okanye ushishino  ngenkolo kwakunye nokuxhatshazwa kwenkolo abantu abakholelwa kuyo. Oluphando lwaveza izehlo ezahlukileyo eziquka ezo zokusetyenziswa kwezibulali zinambuzane ebantwini kusithiwa bayancedwa. Kwaye kwavela nezityholo zokuxhatshazwa ngokwesondo kwamantombazanana amancinci zinkokeli zakwalizwi. Okwafunyaniswa koluphando kwathiwa thaca phambi kwekomiti yasePalamente ejongene nolawulo ngentsebenziswano kwakunye nemicimbi yezemveli. Kwaye kwamiselwa ikomiti kaSection 22, nezakujonga indlela iinkonzo ezizakusebenza ngayo phakathi kwezinye izinto. Ezinye iinkonzo azihambisani noko kuzakwenziwa yilekomiti imiselweyo kaSection 22. UAyabonga Kekana ubambe udliwano ndlebe nophuma kwi-South African Church Defenders njengomququzeleli eNtshona Koloni, uApostle Siniko Nxesi. Sizakuba naye nosekela sihlalo wale komiti yeCRL uPrince George Mahlangu.