trufm Current Affairs

Abasebenzi benkampani yamavili eKariega u Good year, bavakakalise umothuko nenkxalabo ziindaba zokuba lenkampani izakumisela u section 189A, wenkqubo yohlengahlengiso lweenkqubo zokusebenza zalenkampani. Oku kuzakushiya abasebenzi abangapha kwamakhulu asithoba bengenamisebenzi. Oku kubhengezwe kwintlanganiso ebibanjwe kulenkampani ngabakulawulo. Ukuncokola banzi ngoku, emnxebeni sinaye ophuma kwimanyano yabasebenzi i Numsa apha ephondweni, u Mphumzi Maqungo.....

INTRO: Isebe elijongene nolawulo kwiinkonzo zikarhulumente, likhuthaze abantu abatsha abano Grade 12 bafake izicelo kwizikhundla ezikwarhulumente, nokuba abanamava omsebenzi. Eli sebe belivele phambi kwekomiti yasepalamente ukuxoxa ngesimo sengqesho ngakulutsha. Le yinxalenye yokuphelisa intswela ngqesho bekwaxhobisa ulutsha. U Vuyolwethu Mabeqa ukuphathela  ingxelo kaZalene Merrington. 

Uphando olusandulukwenziwa yinkampani ezimeleyo i TPN, lufumanise ukuba eMzantsi Afrika bangapha komyinge ka 2.9 percent abasebenzi ezikolweni abafunyaniswe benamatyala aquka ubundlobongela, nokuxhaphaza ngesondo, phakathi kwenyanga YeKwindla kunyaka ophelileyo uyakutsho kweyoMdumba kulonyaka. Kwinkqubo ndaba yethu namhlanje u Ayabonga Kekana uncokole nengqonyela ye NAPTOSA apha eMpuma Koloni u Loyiso Mbinda

Kwiveki ephelileyo umphathiswa wesebe lentsebenziswano kulawulo lukarhulumente, ubhengeze ngokusesikweni ukuvulwa kwexesha lolwaluko lasebusika lwalonyaka. Iphulo lalonyaka lilandela unyaka obenzima ka 2024 nalapho kubhubhe abantwana abaselula abangamashumi asithoba anesine, abalishumi elinanye banyanzeleka ukuba banqunyulwe ubulungu babo ngenxa yokungakhuseleki kwesiko lolwaluko kwilizwe. U Ayabonga Kekana ubambe udliwano ndlebe nosekela sihlalo wendlu yeenkosi eMpuma Koloni u Nkosi Gwazinamba Matanzima....

Ujaji Phillip Loubser uxelele inkundla ephakamileyo yaseFreystata e Bloemfontein ukuba igunyabantu lezotshutshiso kwisizwe, iNPA, bekufanele lazile ukuba ngumphathiswa weSebe lophuhliso lomgaqosiseko nobulungisa kuphela onamagunya okwenza isicelo kurhulumente waseMelika, somyalelo wokudidinjelwa kuka Cholota kweli. Echophele ityala eliqandusele kwelinye ityala, uJaji Loubser uthi akhange kulandelwe imigaqo efanalekileyo ngethuba kusingethwe lo mba. Uthi isigwebo esiyalelayo senkundla yezibheno, kwisithuba seenyanga ezimbini ngaphambi kokuba iNPA icele ukudidinjelwa kuka Cholota kweli, bekufanele ukuba sibe ngumkhombandlela ngenyathelo emalithatyathwe yi NPA. UKamohelo Tsotetsi usenzela le ngxelo...

Ziqalile iintshukumo zomthetho kwinkundla ephakamileyo yaseGqeberha kwiMpuma Koloni, nalapho kuvulwe ngokutsha uphando ngokusweleka kwesine saseCradock, kwiminyaka ephantse ibe ngamashumi amane aswelekayo la matshantliziyo ayechasene nocalucalulo ngokobuhlanga kweli, ebulawa ngamapolisa orhulumente wengcinezelo. Iintsapho, ekaMathew Goniwe, ekaFort Calata, ekaSicelo Mhlawuli nekaSparrow Mkhonto, zithi zisakhangela inyaniso nentatho-xanduva ngokusweleka kwabo. USisipho Ngcumbe uza nengxelo...

Ingxelo yomkhuseli woluntu iligxeke kabukhali isebe lezempilo eMpuma Koloni, ngokusilela kwalo ukunikezela izixhobo ezaneleyo nabasebenzi kwisibhedlele i Dora Nginza eGqeberha, nto leyo ithe yashiya eli ziko nabasebenzi kwiimeko ezinganyamezelekileyo. Kule ngxelo umkhuseli woluntu uKholeka Gcaleka, ubalule phakathi kwezinye izinto ukushokoxeka kwabasebenzi nezixhobo zonyango, ukhuseleko olushokoxekileyo kwakunye negumbi elingamelaniyo nomthwalo wamanina azokubeleka, ntoleyo enyanzelisa amanina akhulelweyo ukuba alale phantsi. Ukusabela banzi ngeempendulo ezinikwa lisebe kwezi meko zalathwa yile ngxelo, emnxebeni sinaso isithethi sesebe lezempilo eMpuma Koloni uSizwe Kupelo...

Ibhanka yeposi ilumkisa abaxhamli bemali yesibonelelo sendodla karhulumente, ngabantu abazenza ngokungathi ngabasebenzi be Postbank abahamba bengena kumakhaya abaxhamli besisibonelelo, ngelinge lokubaphanga imali yabo. Kutyholwa ngelithi ababantu bangena kumakhaya balukuhle abaxhamli ukuba babanike amakhadi abo endodla neenkcukacha zokukhupha imali kulamakhadi ( bank pin), besenza ngokungathi kukho into efuna ukulungiswa kumakhadi abo, beboyikisa nangokuba abazokuyifumana imali yabo ukuba oku akwenzekanga.  Ukusabela banzi ngoku, sithetha noThami Cele ophuma kwi Posbank...

Sele ingunyaka ngoku susela uMzantsi Afrika wabamba unyulo lukazwelonke ngomhla wamashumi amabini anethoba kwinyanga ka Canzibe ngo 2024. Olu nyulo lwadala imbali nalapho iqela elikhulu kweli i African National Congress yaphulukana nesininzi sayo epalamente okokuqala susela ukubanjwa konyulo lokuqala lwentando yesininzi ngo 1994. Ukanti unyulo lwanyakenye lwaqandusela ekubunjweni korhulumente lobumbano lwasezizwe nalapho amaqela ohlukileyo ngezimvo zopolitiko nangemigaqo nkqubo ahlanganisana ndawonye esakha lorhulumente usezintanjeni sithetha nje. Kunjalo, akho namanye amaqela afumana iivoti ezivisayo, nangazange azibandakanye kulo rhulumente. Ukusincedisa ukuhlalutya unyaka emva konyulo, impumelelo kwakunye nemingeni yorhulumente wobumbano ngokuphathelele kwezopolitiko, uqoqosho nentlalo, emnxebeni ngoku sinabo abahlalutyi bezopolitiko uHlumelo Xaba kwakunye no Dr Makhosandile Kwaza...

Umhlobo kaPhilangenkosi Makhanya ongumrhanelwa ophambili kwityala lokubulalwa kuka Olorato Mongale uchaze ngeziganeko nokwenzeke ngeyure zokugqibela zikaMakhnaya phambi kokuba abulawe kudubulwano namapolisa ngentseni yangoLwesihlanu (30 May). Indoda eqeshe indawo yokuhlala eManzimtoti kumazantsi eTheku apho uMakhanya adutyulwe khona, uthethe neziko lendaba iSABC. Uthi wathandaza noMakhanya kwimizuzwana embalwa phambi kokuba amapolisa angene kwindlu yakhe. UFanele Mhlongo uqulunqe le ngxelo...