trufm Current Affairs

Isigaba sokuqala sophando oluvulwe ngokutsha ngokubhubha kwamatshantliziyo amane aziwa njenge Cradock four, siqukunjelwe kwinkundla ephakamileyo yaseGqeberha, eMpuma Koloni. Olu phando luvulwe ngokutsha ukuqwalasela iziganeko zokubulawa kwalamatshantliziyo awayechasene nengcinezelo ngonyaka ka 1985, naquka uMatthew Goniwe, Fort Calata, Sparrow Mkhonto, kunye noSicelo Mhlauli, nekutyholwa ukuba babulawa ngamapolisa orhulumente wengcinezelo. Olu phando lukwanika ithuba amalungu eentsapho zalamatshantliziyo ukuba zinike ubungqina okokuqala. Uphando lukwabandakanya ukutyelela kwiindawo ezithile eNxuba, eyayisakuba yiCradock, naseGqeberha apho imizimba yesisine yafunyanwa khona. USisipho Ngcumbe usilungiselele le ngxelo...

Umongameli uCyril Ramaphosa izolo ubhengeze ukubanjwa kweengxoxo zesizwe ezizakubanjwa ngomhla weshumi elinesihlanu kwinyanga yeThupha, neenjongo zazo ikukumanya abemi boMzantsi Afrika ukuze kuqutyiswane nemingeni ejongene neli lizwe, ze kuhlahlwe indlela yeminyaka engamashumi amathathu yekamva leli lizwe. Uthi ezi ngxoxo zizakubanjwa kube kanye kodwa kunjalo zizakuqhutywa izigaba ngezigaba kuqalisa ngeemboniswano zasekuhlaleni, iingxoxo zamacandelo ohlukileyo ze zikhokhelele kwiindibano zamaphondo nezika zwelonke. Phakathi kwemiba ekuzakuqutyiswana nayo kwezi ngxoxo, kukungalingani ngokwentlalo, intswela-ngqesho, intlupheko, ezolawulo, impatho-mbi yamanina, ubuhlanga neminye. Ukungena nzulu ngokuqulethwe zezi ngxoxo, sithe masikrwece intloko yeziko elichasene nobuhlanga norhulumento lwentando yesininzi, kwiDyunivesithi i Nelson Mandela eGqeberha, uNjingalwazi Bheki Mngomezulu... 

Kufunyenwe eminye imizimba emithathu yabantwana besikolo namhlanje, kwabo bebekhangelwa emva kokukhukhuliseka nomlambo ngelixa benqumla ibhulorho ngesithuthi izolo, kwindawo yase Decoligny kwingingqi yaseMthatha. Balishumi elinanye abantu ebebechazwe njengabalahlekileyo izolo, kwaye baliqela abahlangulwe emva kokuvaleleka likhephu kwingingqi yase Alfred Nzo, kulandela isimo sezulu ebesimaxongo. Ukusabela banzi ngoku, emnxebeni sinayo intatheli yethu elandela elinqaku u Fundiswa Mhlekude......

Iingxelo zithi kusweleke abantu abasixhenxe kwizikhukhula ezithe zahlasela ummandla wase OR Tambo eMpuma Koloni. Oku kubangele abahlali base Decoligny eMthatha basale bengenamakhaya. Ngentsasa yanamhlanje, aboncedo lokuqala bebemanxada-nxada bezama ukuhlangula abo bavalelekileyo. Kusenjalo, lusaqhuba uphando lokukhangela ibhasi ebinabafundi abalishumi elinesithoba nekhukhuliswe ngumsinga. Emnxebeni uVuyolwethu Mabeqa ubambe intatheli elandela eli nqaku, uFundiswa Mhlekude...

Imozulu embi ichaphazele kakubi iihambo ezindleleni nalapho kubekho iindlela ezivalwayo neengozi, ngenxa yezikhukhula nekhephu. Kusweleke abantu abahlanu kwenye ingozi yetaxi kuhola wendlela uN2 kufuphi nase Chintsa eMonti. Ukuva banzi ngomonakalo odalwe yile mozulu ezindleleni, emnxebeni sibambe isithethi sesebe lezothutho eMpuma Koloni, u-Unathi Binqose...

Iqela i African Transformation Movement libhengeze ukuchongwa kuka Njingalwazi Caeser Nongqunga njengomongameli walo omtsha. uNongqunga ungena ezihlangwini zika Vuyo Zungula nothe wakhokhela eli qela njengomongameli susela ukusekwa kwalo ngo 2018. Ikomiti yesigqeba esiphezulu yeqela ithi igqibe kwelokuba uNongqunga uzakukhokhela ukwakha nokukhulisa iqela lo gama uZungula yena ezakugxila kumsebenzi wokukhokhela iqela ePalamente. Ukuva banzi ngesi sigqibo emnxebeni ngoku sinaye umhlalutyi wepolitiko uNjingalwazi Ntsikelelo Breakfast...

Kwilinge lokuzama ukuzisa ucwangco kwiziko lemfundo ephakamileyo i Walter Sisulu eMthatha, umbutho i Academic and Professional Staff Association (APSA), ubambe intlanganiso nabakulawulo kweliziko lemfundo. Lombutho ukwameme neenkokheli zokuhlala noluntu kwiindawo ezingqonge le univesithi, ukuba zingenelele kwelikhwelo lokuzisa uzinzo kweliziko lemfundo ephakamileyo. U Amanda Xhala ubambe udliwano ndlelbe nothethela i APSA U Masomelele Nongandlela ngoku.....

UMzantsi Afrika ujamelene nengxaki yokwanda kweqondo lokulahleka kwabantwana. Umbutho iMissing Children South Afrika uthi ngokwecandelo elijongene nabantu abalahlekileyo kweli, abantwana kweli lizwa balahleka qho ngeeyure ezintlanu.  Likwathi kubantwana abalahlekileyo, ngumyinge we-77% othe wafumaneka, ngeli lixa i23% ingekafumaneki, bambi bethutyeleziswe kwamanye amazwe, abantu beswelekile. Ukuxoxa banzi ngale ngxaki, kwa nokukhangela izisombululo, emnxebeni uAyabonga Kekana ubambe umququzeleli wombutho iMissing Children South Africa, uBianca van Aswegen. Ukanti kamva, sizakubanayo ingqonyela yombutho iSave the Children South Africa, uGugu Xaba, kwakunye nengcali kwimiba yolwaphulomthetho, uGqirha Thompho Tshivhase...

Ukuphawula iminyaka elikhulu yokuzalwa kongasekhoyo owayeligqala lomzabalazo,  uRobert Mangaliso Sobukwe, kubanjwe umyhadala wemiboniso bhanya-bhanya eRhafu kwiMpuma Koloni, nequkunjelwa namhlanje. Lo myhadala, nobizwa ukuba yi 'Visionaries of Freedom' uqale ngomhla wesihlanu kule imiyo, kwaye injongo yayo kukufundisa uluntu ngeli gqala lomzabalazo wokulwela inkululeko, uSobukwe, nokuzisa ubugcisa kulo mandla. Ukusabela banzi, emnxebeni uVuyolwethu Mabeqa ubambe igosa lonxibelelwano lalo mnyhadala, uSinethemba Gayiza...

Uqoqosho loMzantsi Afrika luthwaxwa yimingeni eliqela, nequka intswelangqesho, intlupheko nokungalingani, nto leyo ibachaphazelayo abo sele bethweswe izidanga nabafuna imisebenzi, ukuze babenakho ukuthatha inxaxheba kwezoqoqosho. Ukanti i-arhente yezobuchwephesha, i-Technological Innovation Agency, yenza unako-nako ukuzama ukuqubisana nale mingeni. Ngale nkquboz, abafundi abasele bephumelele izifundo zabo banikwa inkxaso-mali ukuze baqhube uphando kwiinkalo ngeenkalo, nto leyo ingatshintsha izinto kuqoqosho lwephondo iMpuma Koloni. Ukuva banzi ngalo mba, uVuyolwethu Mabeqa ubambe emnxebeni oyi Programme Manager kwiTechnology Stations Programme kule arhente, uNanga Mjila...