trufm Current Affairs

Lisaqhuba iphulo lohlangulo nokucoca kwingingqi yaseMthatha emva kwezikhukhula ezisube ubomi babantu abalikhulu.SiseseMthatha njalo ngokuhlwa kwaphezolo kudutyulwe kwabulawa abantu abathandathu ngamapolisa kuhola wendlela u R61 phakathi koMthatha ne Ngcobo. Kuvakala iingxelo zokuba ngethuba amapolisa emisa isithuthi abarhanelwa baye behlika bavuthulula iimbumbulu kumapolisa nathe aziphindezela. Ukuba sincokole banzi ngoku emnxebeni sinayo intatheli yethu eseMthatha u Nomzwanele Mngoma....

Umphathiswa wezemisebenzi nengqesho uNomakhosazana Meth ukhokhela isebe lakhe ukuya kunikezela isiqabu kumaxhoba ezikhukhula kwindawo yase Mthatha. Eli sebe lizakuphinda lise neenkonzo kumaxhoba ezinjengokubhalisela iUIF abo bafuna imisebenzi kwinkqubo yezengqesho yeli. Ukusabela banzi ngolu tyalelo emnxebeni ngoku sinaye u...

Sele eqalile amakhwenkwe ukuya esuthwini kwimimandla eyahlukileyo yephondo iMpuma Koloni. Unyaka nonyaka, abo bakhokelayo kwisiko lolwaluko balungisa kangangoko, ngelokuqinisekisa ukuba eli siko lihamba ngendlela kwaye amakhwenkwe aya ephila esikweni, abuye esaphila. Noko kunjalo, nangona zikhona ezi nzame, amakhwenkwe asaqhuba ephulukana nobomi okanye nobudoda bawo ngenxa yokuba enomnqweno wokuba ngamadoda. Kwinkqubo-ndaba yakho namhlanje sithe makhe sishukuxe lo mba, khe sijonge nokungenziwa ukulondoloza ubomi bamakhwenkwe eli lizwe, nalikamva leli.  Ukuxoxa banzi ngalo mba, emnxebeni uYolanda Kambile ubambe usihlalo wekomiti eququzelela ulwaluko kwiphondo iMpuma Koloni, uNkosi Gwazinamba Matanzima. Ukanti kamva sizakubanaye nomlawuli wombutho ojongene nokuqinisekisa ukuziphatha kwamakhwenkwe namadoda, iPhila Ndoda, uBishop Zolile Dayimani....

Kubanjwe amadoda asibhozo naphakathi kweminyaka elishumi elinesithandathu, namashumi amabini anesixhenxe ubudala, KwaNobuhle eKariega, natyholwa ngokubulala amantombazana amabini. Ukubulawa ngokungenalusini kwala mantombaza kubangele uloyiko nomothuko kubahlali. Imizimba, oka-Ibanathi Peter, nokaSinothando Malinga, ifunyenwe kufutshane nehlathi. Kutyholwa ukuba badlwengulwe, ze batshiswa.  Omnye kule mizimba utshe kwanzima ukufaniseka. Abahlali bathi ulwaphulo-mthetho kule ndawo luxhaphakile, kwaye bamemelela ubulungisa nokhuseleko emapoliseni. UAnda Nqonji usenzele le ngxelo...

Amapolisa aseMpuma Koloni aphanda ityala lokubulala kulandela ukudutyulwa kwegosa eliphezulu kwiziko lemfundo ephakamileyo iWalter Sisulu, ngaphandle kwekhampasi yeliziko iNelson Mandela Drive eMthatha izolo. Eli gosa kutyholwa ukuba lidutyulwe labulawa ngaphakathi kwisithuthi esimileyo ngaphandle kwale khampasi.Ukuva banzi, emnxebeni sinaye othethela amapolisa kweliphondo,  uBrigadier Nobuntu Gantana.

UFloyd Shivambu uthi uzakukhokela inkqubo yokubonisana noluntu ukukhangela ukuba sikhona kusini na isidingo sokuseka umbutho omtsha wezopolitiko. Okokuqala, lo obefudula engunobhala jikelele woMkhonto Wesizwe uthethe phandle malunga nezizathu zokugxothwa kwakhe, esithi kubangelwe yingxelo yobuntlola yobuxoki eyayisithi uceba ukubhukuqa inkokheli yalo mbutho, uJacob Zuma. Nakubeni nje etyhole ezinye iinkokheli ngorhwaphilizo, uyincome kakhulu inkokheli yalo mbutho, esithi ufunde lukhulu kuZuma kwiinyanga ezintandathu ngaphezulu kunyeminyaka elishumi awayichitha kwi-EFF. UShivambu ebethetha nabendaba ngekamva lakhe eRhawutini namhlanje.  Ukuhlalutya banzi lo mba, uVuyolwethu Mabeqa emnxebeni ubambe umhlalutyi wezopolitiko, uHlumelo Xaba...

Namhlanje lusuku olubekelwe bucala lokuzilela amaxhoba ezikhukhula eMpuma Koloni, nezihlasele kwiveki ephelileyo. Le nkqubo ibanjelwe eKing Sabatha Dalindyebo TVET College eMthatha. Ukuba sive ngezamva nje nesingakulindela kule nkqubo, emnxebeni sibambe intatheli yethu eseMthatha, uLerato Fekisi...

I ofisi kamongameli ichaze usuku lwanamhlanje njengosuku lokuzila kulandela izikhukhula ezithwaxe iMpuma Koloni zasuba ubomi babantu abangapha kwamashumi asithoba, zashiya amawaka engenamakhaya. Ukuzakuthi ga ngoku basekhona abantu abangekafumaneki kwaye inkqubo yohlangulo nokukhangela isaqhuba. Inkonzo yesikhumbuzo sabo bangasekhoyo iyaqhuba sithetha nje eMthatha, yilento sithe masimeme othethela urhulumente wephondo u Khuselwa Rantjie......

I- arhente yezibonelelo zikarhulumente ifumanise ubuqhophololo obuthe tshitshilili kwii-ofisi zeli ziko zeli phondo eziseMpuma Koloni, kwiinkqubo zeentlawulo. Obu buqhetseba buquka ukuduka kwamaxwebhu, abantwana abangekhoyo ababhaliswe ngomgunyathi, nabantu bomgunyathi abamkela indodla, kwaye butyabula ngaphaya kwezigidi ezine zeeRandi. UAmanda Xhala uncokole emnxebeni  nomphathi ophezulu wenqila kwa SASSA eMpuma Koloni, uBandile Maqethuka

UMongameli wase Melika uDonald Trump, ubambe intlanganiso nebhunga lokhuseleko kwelalizwe ukushukuxa ungenelelo lweMelika kumlo ophakathi kwamazwe, i-Israel kunye ne-Iran. Lusuku kwesithandathu namhlanje kukho impixano ekhatshwa ziintolo zebhombu phakathi kwala mazwe mabini. I-Israel ihlasele amaziko eNuclear, isikhululo sikamabona-kude, ze kwabulawa neeNkumanda zomkhosi kunye neeNzulu-lwazi zase-Iran. Nelizwe lase-Iran nalo liziphindezele ngelithi liyazikhusela. Yintoni unobangela walo mlo? Ingaba kungafuneka sibenendima esiyidlalayo ukuza noxolo nezisombululo phakathi kwala mazwe singu Mzantsi Africa? Masiphendule le mibuzo neminye, ngokuncediswa ngumhlalutyi uNjingalwazi uNtsikelelo Breakfast…