Aşgabatda Polisiýanyň ýol gözegçiligi gullugynyň işjeňligi dowam edip, olaryň ilata, dürli bahanalara salgylanyp, jerime ýazmagy we olardan para almagy bilen bagly wakalar köpelmese azalmaýar diýip, paýtagtly ýaşaýjylar aýdýar. Bu barada Azatlyk Radiosynyň habarçylary maglumat berdiler.

Daşoguzda güýçli gar ýagdy. Ýollaryň wagtynda arassalanmazlygy we döwlet awtobuslarynyň köpüsiniň öz işini wagtlaýyn togtatmagy, ilatyň kadaly hereketini ep-esli çäklendirdi. Howanyň temperaturasy gijelerine -11 gradusa çenli sowaýan mahaly, ilatyň elektrik we gaz üpjünçiligi hem kesilýär.

Türkmenistanda nobatdaky zähmet, pensiýa haklarynyň, kömek pullarynyň raýatlaryň bank hasaplaryna geçmegi bilen, ýurduň dürli künjeklerinde bankomatlardaky maliýe ýetmezçiligi, pul nagtlaşdyrmakdaky meseleler, töleg terminallaryndaky bökdençlikler ýaly ýagdaýlar hem döräp başlady.

Şu hepdäniň başynda Balkanyň Türkmenbaşy şäherinde onlarça ýaşaýjy şäher häkimligine baryp, täze golf-klubynyň gurulmagyna garşy nägilelik protestini bildirdi. Bu waka, häkimiýetleriň Awazada täze golf-klubyň guruljak ýerinde düýbüni tutmak çäresi üçin taýýarlyklara başlan mahalyna gabat geldi.

Türkmenistanyň Milli howpsuzlyk ministrliginiň işgärleri (MHM) daşary ýurtlarda Ukrainanyň Ýaragly güýçlerine meýletin pul kömegini berýän türkmen raýatlaryny anyklamak boýunça çärelerini güýçlendirdiler diýip, Azatlyk Radiosynyň ýurduň kanun goraýjy edaralardaky ygtybarly iki çeşmesi aýtdy.

Eýranda hökümete garşy protestleriň zorlukly basylyp ýatyrylmagynyň arasynda, türkmen häkimiýetleri öz goňşusy bilen arasyndaky gümrük nokatlarynda serhet çäklendirmelerini gowşadyp başlady. Bu barada Azatlyk Radiosynyň habarçysy 4-nji fewralda sebitden maglumat berdi.

Aşgabat-Daşoguz awtomobil ýolunyň ugrunda 30-njy ýanwarda öýlän bolan ýol-ulag hadysasynda bäş adam heläk boldy. Ak bugdaý etrabyndaky Derweze sebiti bilen Ýerbent obasynyň aralygynda bolan pajygaly ýol hadysasy barada Azatlyk Radiosynyň habarçysy 3-nji fewralda sebitden maglumat berdi.