Willkomme zrugg im Abstiegs-Podcast. Wiedermal verlüüred alli drü Zürcher Verein und chömed nöd vom Fleck. Winti zeigt zwar e aständigi Leistig, de jungi Lausanne-Agriff isch aber zvill für Lüthi und co. GC kassiert e wiiteri Flättere und d Entscheidige und Ussage vom Papi Sutter sorged für vill Diskussione. De FCZ verlürt in St Galle, z rede gebed aber vorallem die viele Abgäng im Summer.

D Ziit vom Scheibi isch verbi: De Papi Sutter het de Österricher nach guet 9 Mönet im Amt entlah. Das het für vill Diskussione gsorgt und au de David und de Tim nehmed das Thema nomal uf. Bsunders prekär macht die Situation, dass GC unterem neue Trainer Messner direkt 5:0 in Genf untergaht. Au ohni Pünkt aber mitere vill bessere Leistig het sich Winti präsentiert: Sie verlüred unverdient dihei gege Basel, uf dere Leistig laht sich ufbaue. Un de FCZ dreiht de Spiess um, macht sini Goal und günnt überraschend gege Thun mit 2:1.

Während de Raphi gmüetlich sis Singha Bier in Thailand gnüsst, widmed sich de David und de Tim de Super League. GC wird zwar vo Thun grööstet, dank em Winti-Sieg in Luzern gihts aber wiedermal öppis Positivs zbespreche. Die beide reded über komischi Social Media Kommentär, Scheibi-Out-Talk und öb Winti ez doch wieder sis jährliche Combeack gstartet het.

E wiiteri englischi Wuche bringt de Zürcher Clubs grad mal 2 vo mögliche 18 Pünkt. Nur Winti erhöht s Punktekonto dank zwei Unentschide geg Servette und Sion inkl Buess-Hammer, de FCZ verlürt zwei Mal hinterenand ide letzte Sekunde. Bedroht fühle muess er sich aber nöd, au für GC isch nüt zhole. Trotz guetem Uftritt in Basel und Kids Day im Letzi gihts zwei Niederlage. Also alles normal im Tabellecheller-Podcast.

VAR-Seich und Spiel ih Unterzahl: S Wucheend het einiges z büte gha. Winti verlürt eimal meh uf bitteri Art und Wiis nachdems in St Galle lang guet usgseh het. GC günnt überraschend und zu zehnt geg Lugano, de FCZ kassiert ebefalls zu zehnt e Flättere vo YB.

Zumindest en Teil vode 26. Rundi isch gspillt. Wiedermal en Strich dur d Rechnig macht d "Pfützewiese", s Spiel geg Thun het müese verschobe werde. Somit liht de Fokus hüt ganz ufem Zürcher Stadtderby zwüsched em GCZ und em FCZ – passend dadezue sind hüt au nur de Raphi und de Tim debi, de David fallt leider chrank us. Ganz nachem FCW Vorbild sozege. Aber au bim Derby gihts einiges z bespreche. Nach somene Sieg schribt sich sogar de Raphi uf d Fahne, endlich mal positiv z blibe.

Die englisch Wuche isch durre. Zum Glück chamer sege. De FC Winterthur erlebt e Horrorwuche und verlürt im Letzi 0:3 und denn im Wankdorf 1:6, da David wett am liebste gar nöd drüber rede. De Tim isch defür trotz nur eim Punkt us de Spiel geg Luzern und St Galle recht positiv unterwegs, d Neuverpflichtige helfed. Und nacheme klare Sieg geg Winti und denn ere klare Niederlag geg Luzern psycht de Raphi vorem Derby am Samstig. Für ihn isch klar: So gahts nöd wiiter!

Ufem GC Campus wird gspendet zum winne: Nach villne Transfers sind die Wuche mitem Ngom und em Köhler zwei neui dezue cho. Mier fräged eus, wo vo chunt das Geld? Wer no paar Spiller chent bruche wär de FCZ. Eine nachem andere gaht um mit ere dünne Bank isch in Basel nüt zhole – Niederlag ide letzte Minute. Winti hingege isch sich am wiiter ufbäume und holt au geg Lugano wieder en Punkt. De David cha wider lache.

Wer Patient und wer Doktor isch het sich bim Spiel YB - FCZ sehr schnell zeigt. Au ohni de Brecher kassiered d Zürcher es 0:3 in Bern und baued de Gegner uf. Winti holt endlich de dritti Sieg vode Saison, schlaht Lausanne dihei und sorgt für en guetgluunte David im Pöde. Au GC machts nöd schlecht: Sie chnöpfed am formstarche Lugano en Punkt ab dankem spate Goal vom Junghopper Krasniqi. Au ide Epi: Schiri-Lob, (nomal chli) Behrens-Hate und die grossi Frag: Chunt de FCZ no zu de andere Gurke-Teams abe?

Endlich wieder vereint! Ide hütige Episode isch de Raphi zrugg und es giht au direkt vill zbespreche wenns um de FCZ gaht: Natürlich s spektakuläre 3:4 gege Basel, aber au nebed em Platz isch wieder einiges gloffe. Nebed em FCZ verlüürt au Winti, dasmal mit 1:3 in Lugano – de David gseht sin FCW scho als sichere Abstieger. Und GC chan nach de klare Niederlag gege Thun in Lausanne e Reaktion zeige und holt en Punkt.