Nach de Natipause mit zwei Testspiel gahts ide SL langsam aber sicher i die entscheidendi Phase: De Raphi und de Tim hend sich gmeinsam s Zürcher Derby gönnt und brichtet vom Stadion-Bsuech. Eine vo beidne isch verhalte happy, de ander setzt im Podcast zume Rant ah. Und de David denkt sich nur, "es gaht im Fall no schlimmer" nachdem sin FCW au gege Basel kei wiiteri Pünkt cha ifahre. Fazit: Mer hend zwei Barometer uf 10.

Am David sini Abstiegs-Sorgefalte werded grösser, genau glich wie d Barrage-Sorgefalte vom Tim. De FCW holt trotz kämpferischer Leistig kei Pünkt uf de Baustell im Tessin und au GC cha trotz eme Last-Minute-Usglich gege Sion nöd würklich happy si. Wem das alles egal isch? am Raphi! Sin FCZ macht alles richtig, schlaht Luzern dihei und widmet sogar no es Goal ihrem verletzte Uslehnspiller.

Das hend sich wohl alli Super League Fans das Wucheend gfrägt. Zvill Penalties und zwenig Fingerspitzegfühl sind mittlerwiile ade Tagesordnig im Schwiizer Fuessball. Leidtragendi sind au d Zürcher Clubs: Nach de Euphorie ide letzte Episode macht sich nach 3 Niederlage wieder Ungwüssheit breit. Öb de Zuffi-Penalty arrogant oder lässig isch, wieso de Gbamin meh Salat sell esse und wases mitem Voodoo-Streller uf sich het, erfahrsch i dere Episode.

Es Wucheend voller Zürcher Erfolg: De FCW setzt es Statement und schlaht sin Lieblingsgegner St. Galle dihei grad mit 4:0. De FCZ reagiert ufs Cup-Out und de EimalHopperImmerHopper-Zuber trifft dopplet – und sorgt trotzdem nöd bi allne mitgreiste Fans für Jubel. Und au GC bewahrt sin Status als Angstgegner vo YB: Zum dritte Mal schaffets d Berner die Saison nöd d GC-Abwehr zknacke und müend sich 1:0 gschlage ge dank em Volley vom Kittel.

Die verdammte letzte Minute... GC schaffts wieder nöd die ersehnte 3 Pünkt heizbringe und kassiert i letzter Sekunde in Lausanne de Uusglich. De FCW macht en FCW und staht nach Füehrig und gueter Leistig in Genf wieder mit 0 Pünkt da. Und bim FCZ wird en Yverdon-Spiller bejublet und en eigene uspfiffe. Für de Sieg langts, d Frag blibt: Chunt das guet mitem FCZ?

5:53 Lausanne-Sport – Grasshopper Club Zürich

24:45 FC Zürich – Yverdon-Sport

40:37 Servette FC – FC Winterthur

Als ersts e Info: De David het sis Ersatzmikrofon müese bruche, drum isch de Ton nöd ganz so guet wie sust. Ab nechst Wuche denn wieder alles bim Alte!

De FCZ sorgt mit de Verpflichtig vom Benjamin Mendy wiedermal für vill Gsprächsstoff. Und ufem Platz? Obwohl de Perea endlich wieder für de FCZ trifft, verlüred d Zürcher in Sion mit 1:2 und sinked immer wiiter unter de Strich. De FC Winti, unterem Strich dihei, sorgt für en Befreiigsschlag uf de Schützi: en verdiente 1:0 Sieg geg YB giht neui Hoffnig. GC machts umgekehrt wie sust und spillt guet, holt aber für eimal kein Punkt. Es blibed nur 5 Pünkt Vorsprung uf d Forte-Truppe.

7:07 FC Sion – FC Zürich

24:12 FC Winterthur – BSC Young Boys

38:14 Grasshopper Club Zürich – Servette FC

Für die einte en Fluech, für en gwüsse Trainer e Verschwörig. Winti wird eimal meh vom Pech verfolgt und muess e kontroversi 2:3 Niederlag in Luzern istecke. De FCZ macht wiiter uf FC Hollywood und sorgt für vill Schlagziile und wenig Pünkt. GC machts wie immer und holt zwei Unentschide gege besseri Gegner, für meh langts aber eimal meh nöd.

5:24 Grasshopper Club Zürich – Lausanne-Sport
13:39 FC Winterthur – FC Zürich
21:50 FC Lugano – Grasshopper Club Zürich
31:50 FC Luzern – FC Winterthur
59:59 FC Zürich – FC St. Gallen

Gmischti Gfühl nach de 21. Rundi ide Super League: Winti verlüürt s Chellerduell in Yverdon doch relativ kläglich – zum Leid vom David. De FCZ spillt neuerdings nur no mit 1 Verteidiger ide Startelf und holt trotzdem fast en Punkt – im Duell gege Basel stahts am Endi aber doch 0:1. Und berguf? Das gahts bi GC. E Lupi-Muci Kombi sicheret de Hoppers en spaate Punktgwünn in Genf.

PS: De Tim isch chrank und fallt für die Episode us.

Fussball Super League. Jede Dsiistig 12 Uhr.

4:20 Yverdon-Sport FC - FC Winterthur

25:41 FC Zürich - FC Basel 1893

47:48 Servette FC - Grasshopper Club Zürich

Piccolo, Wolfensberger und co sorged für e Penalty-Party: Winti trifft, GC verschüsst und de FCZ kassiert. Und am Schluss chönd glich nume d Hoppers zfride si mit de Rundi.

2:48 Grasshopper Club Zürich – BSC Young Boys

14:48 FC Winterthur – FC Lugano

32:20 FC Luzern – FC Zürich

Super League Fussball – Jede Dsiistig 12 Uhr.

D Rückrundi startet miteme Knall: Zerst sorged d Winti Fans in Bern mit Ragete für Ufruehr, knapp 3 Minute später und 100Km entfernt knallt de Decarli sim Gegespiller eis ine – beidi gsehnd Rot. Und am Schluss chamer sich trotzdem freue. De FCZ schnappt sich imene – wie akündet – gurkige Spiel geg Yverdon spaat alli 3 Pünkt.

Super League Fussball – Jede Dsiistig 12 Uhr.

3:37 GCZ vs FC Sion
21:40 FC Winterthur vs YB
49:09 FCZ vs Yverdon-Sport