Schön bisch hie. Ir hütige Folge geits um Wyybereitig im Grundsatz. Also wie wird us Trubesaft de eigentlech Wyy? Im Wytere geits drum, wie ner verschlosse und verpackt wird.

U de gits tatsächlech e nöii Rubrik. Plöfferzüg - lah di mal lah überrasche. 

Hie no dr Film.

Härzlech, dr Ädu Zumbrunn 

Schön bisch hie. Ir hütige Folg geits ume wichtigscht Produzänt im ganze Wyybou. Neeeei dänk nid um Château Petrus und ou no nid um Italie. Es geit um d Räbe höchschtpersönlich. Und was die alti Dame so dür ds Jahr düre tribt.

Ds Wyymärli verzellt de e riise Irrtum zu Bio-Wyy.

Härzlech, dr Ädu Zumbrunn

Schön bisch hie. Ir dere Folg lehrsch öppis über ds Lagere und ds Serviere vo Wyy. Warum du dir villicht e Wyychüelschrank darfsch ufs Wiehnachte schänke? I gibe dr e Notfallplan, wenn Bsuech hesch und nur warme Apérowyy und i säge dr, wis a re aabrochene Fläsche würklech geit.

Härzlech, dr Ädu Zumbrunn

Schön bisch hie. Wosch Wyy würklech objektiv vergliiche, de muesch ne es paar Kriterie ds Grund lege, wod chasch beurteile. Zäme mit de Arome us dr Episode 3 überchunnsch hüt ir Episode 4 so e richtige Sprachschatz um chönne ds vergliche u i Wort ds fasse, WARUM dassd ne gärn hesch und e Andere weniger.

Ds Märli ruumt de när dermit uuf, warum du nach Wy durchus ou no darfsch es Bier trinke.

U hie no ds Arbeitspapier zum Mitschribe.

Härzlech, dr Ädu Zumbrunn

Schön bisch wieder hie. Die nächschte beide Folge hange chli zäme u si göh um ds Verkoschte. Wed seisch: "dä Wyy ha ni gärn" oder aber "dä Wyy fägt für mi nid", de isch das völlig richtig u darf ou so sy! Wyy mues fäge - meh nid. Wennd das aber äbe so beschribsch, de isch das nid objektiv sondern dini subjektivi Meinig (u wie gseit - die isch ou völlig richtig). Um e Grundstei zum Wahrnäh vo Wyy ds lege, luege mr mal die wichtigschte Wyyarome aa, bevors de ir Episode 4 a ds eigentleche Verkoschte geit.

Ds Wyymärli verzellt dr, werum dr Pris beschtefalls zum plagiere da isch.

U hie no ds Arbeitspapier zum Mitschribe.

Härzlech, dr Ädu Zumbrunn

Schön bisch wieder mit derby. Hüt starte mr sänkrächt: es geit nid um weniger als um ne ganz grossi Trubesorte. Vo wo chunnt si u warum genau cha e Trube e riise Zicke sii? Finds use.

Ds Wyymärli ruumt de drmit uuf, us welne Trube me de wele Wyy cha mache.

​Härzlech, dr Ädu Zumbrunn

Tschou

Schön bisch hie! Um was geits? I dere Folg verzell i dr, was mini Motivation isch, das Ding da hie überhoupt ds mache? Ds Ziel söll si, es Thema vor Wyywält ds behandle u derbi möglechscht abschliessend ds si. Das het für di dr Vorteil, dassd vor dere gsuechte Folg nid no 10 anderi Episode muesch lose, um chönne aadschnüpfe. Es het also ke Ufbou. Äbeso hei di einzelne Episode ke logische Fade. Mal es Land, mal e Trube, mal e Machart, de wieder e Region - eifach wild dür ds Wyuniversum. Ds Wyymärli am Schluss ruumt de mit vilne Gschichte uuf.

Hüt lehrsch itz no grad nüt über Wyy - derfür weisch villicht när besser, ob du mr chli magsch zuelose oder eher nid. Wenn nid: Isch doch ke Problem, me chas nie allne rächt mache. Aber villicht kennsch ja öpper, wo sech derfür interessiert. Wenn ja: Hey, so schön - das fröit mi ächt. De bis doch so lieb u verzell dine Bekannte dervo. Je meh dass mr si, desto länge machi das :-) versproche.

Söttsch Idee oder Kritik zu Theme ha: i bi gärn für di da. U wed das hie öppe magsch teile oder like, de findes näbscht dir ou anderi - merci derfür. So oder so - i fröie mi druf. ​

Härzlech, dr Ädu Zumbrunn