你敢捌食酒醉？是因為少年毋捌代誌？抑是因為工課場的應酬無法度？抑是家己愛啉？抑是家族的習慣？抑是做月內啉雞酒？啉酒的理由百百款，佇古早激酒無簡單，勝利、豐收、大日子的時才有酒通啉，閣不醉不歸。佇現代，有錢就有通買酒，敢需要逐改都啉甲醉茫茫？其實快樂佮痛苦是仝時間出現，我絕對尊重個人的選擇，毋過若問我個人佮意佗一款，我感覺隨時保持頭殼清醒較安全。若因為按呢減少人生的一寡趣味，嘛無要緊。命較重要。

你有佮意食羊羹無？你知影伊的來源佮引起的誤會無？你敢會予外表騙去？你敢看會清世間人的真面目？人人扶挺若甜心的主角，伊正港的生活敢是你看的、你想的按呢？你想欲做主角抑是配角？路遙知馬力，足濟主角嘛是對配角開始的。你較愛永遠做配角抑是恬恬仔拍拚栽培家己的才情等待時機，抑是無撙無節護龍懸過正身？

若同齊有兩个人會使揀，理想佮現實你會揀佗一項？社會價值佮真心的感受你會按怎選？看人是欲看過去？抑是看目前？抑是看未來？抑是看家己永遠的價值？實在是足為難，人生是一連串的選擇，有時少年淺想，毋過有時是經過風霜，才知初心的珍貴。欲按怎揣著平衡點？有時是靠運氣，閣較需要一直問家己。毋管是家己一个人，拄著一个人，有兩个人，有足濟人，毋管拄著未，簡單的原則是：心內有一直為你設想的才是真正愛你的、妥當的人。

你的人生敢有斜槓？你的人生敢有合你的意？你的人生敢有予人放棄？你敢有放棄你的人生。閣較艱苦、無奈嘛毋通放棄，透過學習來改變家己的運命。這需要有天生的善良佮毋認輸的決心，佇奮鬥的過程，會使欣羨別人，有一个楷模認同，千萬毋通怨妒抑是害人，人咧做天咧看，你的良心嘛較會得過。上好是學一兩項仔才藝，變做一世人貢獻佮快樂的源泉，等你功成名就，千萬毋通袂記得你的初心佮善心，看人的奮鬥，學人的力量。人生的旅程會愈來愈光明。

人生會經歷啥物無一定，有的歡喜，有的悲傷，有的綴計畫，有的誠突然，每一个人的傷痕深淺無仝，有的人會轉念和家己和解，有的人愛經歷痛苦，甚至傷害關心伊的人，最後才理解別人嘛是足傷心，嘛為你幼稚的面對方式傷心流目屎，好運的最後行出悲傷，歹運的影響一世人，甚至強欲無命。生離死別，人生艱料，若會當加思考一下你思念的人上希望你按怎過日子，通常是希望你平安健康，轉念毋若會當行出悲傷，嘛會當行向光明。

地球有70%的水，人是70%的感性，基本上是感情、感動世界才會使運作。你是理性抑是感性的人？你若是有話攏毋講出喙，做代誌有計畫、袂衝碰，就是理性的人，你若是定定為愛付出一切，無考慮後果，抑是做選擇的時干焦看心情，聽心內的想欲，無聽頭殼的需要，你就是較感性的人，若會使揣著平衝點，會較自在、平安。每一个個性攏是神上好的設計，免煩惱，一定有欣實你的人，嘛一定會揣著對同的伴，只是你愛了解家己的個性，累積人生的經驗，跋一倒抾著一隻金雞母。

你是唯物？抑是唯愛？你揀對象是看物質？抑是看精神？抑是兩種攏欲？兩種欲平衝？是當初青春少年用草仔做手指的純情愛？抑是年歲到矣參加婚友社比家伙看璇石？毋管按怎，揣著真情愛、仝價值觀佮仝習慣的才嫁，較袂後悔。結婚毋是嫁一个人，是嫁一家族。看娘嬭、看老爸、嘛愛看兄弟姊妹，有基本的家伙，嘛愛有品德才嫁。莫降低標準，無放棄就有機會。

拄著就知。到時就會曉。你其實比你想的較強！孤單是世間平常的代誌，有的自細漢予親人棄養，有的予愛人放捒、有的是嫁娶重耽、有的踮佇身軀邊煞無疼惜、有的老伴無法度陪你到老，毋管按怎你閣會喘氣，閣有家己的意志，你閣有天地佮大自然陪你、予你啟示。世間無絕對，嘛無啥物道理，只要你無放棄學習充實家己，你猶原會當活落去，閣活出志氣。

你敢是厚操煩的人？抑是啥物攏毋驚？你驚的人事物有幾項？敢有一百項？有一兩項仔驚無要緊，若傷濟致使焦慮感超磅已經造成生活、精神、工課佮人際問題，可能就需要去除焦慮的練習抑是揣心理專業鬥相共。佇日常生活、學校的日子、出業了後的頭路、愛情的追求，攏有可能佮家己的期待和想像無仝，你敢有法度做一个無咧驚、看會開、誠自在、享受孤單、勇敢的人？

你有幾个皮包仔？是實用貯物抑是造型看媠？有啥物記持？你捌食啥物包？菜包？肉包？卵包？你心內的包是啥物包？有幾包？是半包？兩包？……八包？內底是包含偌濟人對你的愛佮支持？有啥物溫暖佮趣味？人生敢有包好運的？無喔！毋過，毋管拄著啥物代誌，只要面對，家己無放棄，攏是好滋味，包你佮意。