「毋較早講咧」歇足久，總算閣來講囉！這段期間，疫苗的議題足熱，眾人攏有看法，其中不免有真濟是毋捌假捌烏白講，咱敢有法度分辨啥物才是專業的聲音？這兩集阮就拄好對一本冊講起，號做「專業之死(The Death of Expertise)」，作者講的是美國，咱嘛會使反省台灣的狀況。當做漫談一寡心得啦，無專業喔！

紲接頂擺講的「過度溫柔」主題，小小的「靠北幼稚園」之「彩色筆事件」想袂到閣會當牽出咱日常溝通的種種障礙問題。另外講著《為什麼我們製造出玻璃心世代？》這本冊，美國社會的政治玻璃心現象，佇台灣敢嘛當時行？你會感覺台灣社會愈來愈無提倡就事論事、煞愈重視公關無？

你敢會感覺現時的社會，愈來愈愛講好聽話、袂使講真心話，較免摃著玻璃心？《過度溫柔的社會》這本冊是咧講日本，小美佮閒乘煞攏感覺台灣社會嘛真仝。當然嘛有一寡無完全同意的點，抑是作者無寫著，閣較微妙、閣較礙虐的面向。總是，若逐家表面上攏好來好去，敢是真「溫柔」？

對公共交通費用牽到小確幸，到台灣人傷鐵齒，毋過民主化帶來的公民意識有幫贊……。

對最近眾人關心的台鐵票價長期偏俗講起，一寡公共服務的價數壓低，對民眾生活品質敢正經好？總是咱這是一个開講節目，對火車的記憶到城鄉差距，牽來牽去請莫見怪......。

你敢知影今有足濟人堅持地球是平的？你敢有法度共in說服？台灣本世紀上大的政治陰謀論，是按怎信者恆信？

新聞定定看著，A指控B有陰謀，B就應講是A咧編陰謀論。敢講提出大膽的質疑就是陰謀論？抑是陰謀論者攏痟痟？陰謀論毋是凊彩叫的，專家講愛有一寡條件。可見代誌毋是戇人想的遐爾簡單，這內底一定有陰謀啦！

是啦，『鮭魚』話題已經退燒矣，毋過慢且，日常生活中，痟貪、「恥度」傷超過，予人看著刺鑿的代誌，敢毋是不時有咧？你會接受抑袂接受的界線佇佗？愛有啥物條件？閒乘和小美閣講一寡可能好笑，或者是譀古的例，來和你做伙探討。

『鮭魚之亂』可能已經逐家攏發表過意見矣，毋過阮猶是想欲來開講一下。小美感覺若是改名tsiah凊彩，「名」佮「人」ê連結就斷去矣，甚至人佇社會關係內底ê位置mā會動搖。閒乘講，有一寡人共這擺ê改名行動解說做有「進步性」，恐驚是空ê期待。你認為咧？

若是有彼日，免緊張，自由社會，華語袂禁袂廢，既然感覺遐重要，一定四界有通學，只是停止以政府之力培養中華文化認同。台灣人話語猶是會通，英語佮本土語言會大進步，華語至少幾十年內嘛猶是削削叫。語言使用慢慢仔變，免驚綴袂著。這款光景，你敢想像無？你知影啥人會上反對無？是按怎？