對公共交通費用牽到小確幸，到台灣人傷鐵齒，毋過民主化帶來的公民意識有幫贊……。

對最近眾人關心的台鐵票價長期偏俗講起，一寡公共服務的價數壓低，對民眾生活品質敢正經好？總是咱這是一个開講節目，對火車的記憶到城鄉差距，牽來牽去請莫見怪......。

你敢知影今有足濟人堅持地球是平的？你敢有法度共in說服？台灣本世紀上大的政治陰謀論，是按怎信者恆信？

新聞定定看著，A指控B有陰謀，B就應講是A咧編陰謀論。敢講提出大膽的質疑就是陰謀論？抑是陰謀論者攏痟痟？陰謀論毋是凊彩叫的，專家講愛有一寡條件。可見代誌毋是戇人想的遐爾簡單，這內底一定有陰謀啦！

是啦，『鮭魚』話題已經退燒矣，毋過慢且，日常生活中，痟貪、「恥度」傷超過，予人看著刺鑿的代誌，敢毋是不時有咧？你會接受抑袂接受的界線佇佗？愛有啥物條件？閒乘和小美閣講一寡可能好笑，或者是譀古的例，來和你做伙探討。

『鮭魚之亂』可能已經逐家攏發表過意見矣，毋過阮猶是想欲來開講一下。小美感覺若是改名tsiah凊彩，「名」佮「人」ê連結就斷去矣，甚至人佇社會關係內底ê位置mā會動搖。閒乘講，有一寡人共這擺ê改名行動解說做有「進步性」，恐驚是空ê期待。你認為咧？

若是有彼日，免緊張，自由社會，華語袂禁袂廢，既然感覺遐重要，一定四界有通學，只是停止以政府之力培養中華文化認同。台灣人話語猶是會通，英語佮本土語言會大進步，華語至少幾十年內嘛猶是削削叫。語言使用慢慢仔變，免驚綴袂著。這款光景，你敢想像無？你知影啥人會上反對無？是按怎？

台灣是多語社會，「國家語言發展法」明訂愛復振各本土語言，民進黨政府煞欲推sak「雙語國家」來限制人民ê語言認識佮能力，敢毋是倒退攄？提升英語真好，同時愈需要質疑華語ê地位、挑戰「無華語袂使」ê迷思！

這集uì關係節日ê食食繼續牽。是按怎有ê節日消費咱會感覺是「生理人ê陰謀」，有ê就毋是咧？Koh，「台灣料理」佮「台菜」ê概念分別講啥物款ê國族故事？

你敢聽過元宵「煮過較好食」？囡仔時的飲食記憶若是消失去，你會毋甘無？你敢願意親身入灶跤共抾轉來？

過年歇一禮拜，【毋較早講咧】koh轉來矣！趁逐家（抑是阮家己？）ê心情猶teh過年，就來uì過年到元宵ê食食（tsia̍h-si̍t）講起。毋過內底mā是有值得思考ê議題-！