上海大亨 的 历史传说

和大囡游中东

鸳鸯蝴蝶梦 爱情让人昏头 让人受伤 门当户对很重要 节目最后报道对抗isis的英雄们

上海大囡 中东旅游 奇遇记

沪语朗读社 最可爱母子档 小西瓜和小西瓜妈妈 黑猫警长

沪语朗读社 人气作品 唐洁寅老师的《荒山怨笛》

沪语朗读会 下

闲话上海滩 沪语朗读社实况（上）上海话大聚会

何处长又来啦 这次何处长为大家带来新歌 宁海过年 上午吃年糕 下午吃海鲜 我决定了 年休我也要去 宁海

执子之手，与子偕老。搿是对爱情最完美个解释。搿是对恩爱个宣誓，也是对幸福个承诺。

当今世界，网络发达，有勿少人欢喜剌网啷向秀自家个恩爱，晒自家个幸福，拿照片发到网啷向去卖样，以为一时头个恩爱幸福就是永远了。其实，一时头个恩爱只是代表一时、一刻，或者最多是一个阶段个恩爱！幸福是心里个感受，勿会因为侬晒出来就会觉着更加幸福，也勿会因为侬呒没晒出来 而觉着勿幸福！
关于秀恩爱、晒幸福，娱乐圈里向，真个是可以讲 怪胎 邪气多！ 搿几年来，剌网啷向、剌各档节目里向秀恩爱/晒幸福、隔手就各奔东西个名人夫妻、明星情侣实在是 勿老少；娱乐圈里向 侬来我往、调过来转过去，也是相当个频繁！真个勿晓得 伊拉当初秀出来个恩爱、晒出来个幸福，是真还是假 ？！
欢喜看电影、看电视剧个人当中，有交关人欢喜看爱情片。当中又有勿少人会得想当然，认为，现实生活当中个爱情，就应该像影视剧当中个一样，搿再算得上是“爱情”！ 伊拉实在是忒入戏了，拿现实跟戏剧混了一淘，以为夫妻之间、情侣之间个爱情，会得跌宕起伏，外加会得最终得到完美，也就是讲，最终会得 “过着恩爱幸福个生活”。 伊拉可能是勿晓得，也可能是勿肯承认，戏剧当中个完美爱情，剌现实当中是勿大可能存在个。搿些故事只不过是经过浓缩提炼出来的人生描述，绝对勿是平凡生活当中个时时刻刻。
相爱，就剌一淘，勿爱了，就分开…… 哪怕是当初爱了死去活来，山崩地裂。剌走进婚姻殿堂以后，一旦平凡琐碎个日脚消磨了激情，就义无反顾个选择离开，完全勿顾及当初信誓旦旦许下个诺言。对某些人来讲，誓言，只不过是当前个做作；责任，只不过是古老个枷锁。

执子之手，与子偕老。搿句言话出自《诗经》，当初，是 描写出征战士们相互之间个约定，后手来演绎成为“夫妻白头到老”个名句。现在，已经 数勿清爽 有多少对情侣 用搿句言话来做为相互之间个誓言…… 但是，剌分道扬镳个辰光，伊拉是哪能介看待当初所讲个搿句言话哪？！
恩爱，其实就迓了 平凡而琐碎个生活中，幸福，其实就迓了平常个恩爱个日脚里。恩爱就是，呒没因为违背誓言而让对方伤心，呒没因为放弃承诺而让自家悔恨！幸福就是，当侬经历了岁月，再回头 望过去，曾经个恩爱 还是 安安稳稳个 剌间侬个身边！
侬可以呒没多少钞票，侬可以呒没啥权力，侬也可以呒没啥名气， 但是，侬勿可以呒没恩爱。如果侬失去了恩爱，侬必定会失去幸福。
恩爱搭仔幸福，是剌 平凡个岁月当中，点点滴滴、积累而成。 一时头个恩爱、短辰光个幸福，勿一定经得起岁月个考验，勿一定会得 一如既往个延续下去。
安心于平凡，真心于琐碎，恩爱、就会 停留剌身边，幸福、就会得 持续长久！
恩爱，也许就是 平凡生活当中，一趟无意个回眸，一副期待个眼神，一只默契个笑容，一句称心个问候，也许就是，一杯温吞个白开水！