ኤርትራዊው አባ ሙሴ ዘርዓይ ባሕር አቋርጠው ወደ አውሮጳ ለመግባት የሚሞክሩ ስደተኞችን ከሚገጥማቸው አደጋ ሲታደጉ እና ለተገን ጠያቂዎች ድጋፍ ሲያደርጉ ከዐስር ዓመታት በላይ በመዝለቃቸው የፕሮ አዚል የ2016 የሰብዓዊ መብት ሽልማት ተበረከተላቸው፤በሶማሊያ ዋና ከተማ ሞቅዲሹ በዛሬው ዕለት በደረሰ የአጥፍቶ መጥፋት ጥቃት አንድ ከፍተኛ የጦር መኮንን እና ሰባት ጠባቂዎቻቸው መገደላቸውን ሮይተርስ የዜና ምንጭ ዘገበ፤በዩናይትድ ስቴትስ ተባባሪዎቿ የአየር ጥቃት በርካታ የሶርያ መንግስት ወታደሮች መገደላቸው በዋሽንግተንና ሞስኮ መካከል ውጥረት በመፍጠሩ የሶርያ የተኩስ አቁም ስምምነት ከውድቀት አፋፍ ተንጠልጥሏል ተባለ።

ኤርትራ ከአስራ አምስት ዓመታት በፊት ያሰረቻቸውን ከሃያ በላይ የመንግስት ባለሥልጣናት እና ጋዜጠኞች ያሉበትን ሁኔታ እንድታሳውቅ የተባበሩት መንግስታት ድርጅት ባለሙያ ጥሪ አቀረቡ፤በአፍሪቃ ኅብረት ሰላም አስከባሪ ጦር ድጋፍ የሚደረግላቸው የሶማሊያ መንግስት ወታደሮች ለሰዓታት በአልሸባብ ታጣቂዎች ቁጥጥር ሥር ወድቃ የነበረች በኬንያ ድንበር አቅራቢያ የምትገኝ ከተማ መልሰው መቆጣጠራቸውን ባለሥልጣናት እና የዐይን እማኞች አስታወቁ፤የደቡብ ሱዳን ፕሬዝዳንት ሳልቫ ኪር ቃል-አቀባይ ሴንተሪ የተሰኘ ተቋም ይፋ የተደረገው ዘገባ አገራቸው ለሰላም እና መረጋጋት ያላትን ጥረት ያደናቅፋል ሲሉ ወቀሱ።