ЖЕР ЭНЕ

Москва талаптарын күчөткөндөн улам жүздөгөн кыргызстандык жүк ташуучу автоунаалар казак-орус чегинде такалып калган. Кыргыз өкмөтү бул жагдай ишкерлер Евразия экономикалык биримдигиндеги эрежелерди сактабаганынын айынан чыкканын, маселени жөнгө салуу аракеттери көрүлүп жатканын билдирүүдө.

Кыргызстанда сасык тумоого чалдыккандар көбөйдү. Жугуштуу оорулар бейтапканасында оорулуулар палатага батпай, коридорго жаткырылууда. Саламаттык сактоо министрлиги соңку апталарда өлкө боюнча тумоолоп дарыгерге кайрылгандардын саны 7966 адамга жеткенин билдирсе, эпидемиологдор сасык тумоонун пандемияга тез алдырган А түрү (H3N2) каттала баштаганын айтышты.

Ысык-Көл облусунун Кара-Ой айылындагы эс алуу жайында Эрлан Батыралиев аттуу жаран ур-токмокко кабылып, ошол эле күнү ооруканада каза болду. “Адам өлтүргөн” деп шектелип төрт киши кармалды, анын экөө милиция кызматкери. Маркумдун жакындары окуянын чоо-жайын айтып берип, адилет териштирүүнү талап кылууда.

Бишкек менен Ош шаарларынын мэрлерине байланышкан соңку окуялар жалпы мамлекеттик кызматкерлердин жүрүм-туруму жана этикасына байланыштуу талкуу жаратты. Соңку кездери Кыргызстанда айрым жетекчилердин кол алдындагы кызматкерлерине, жарандарга корс мамиле жасаганы, ачык кагып-силккени көндүм адатка айланды. Мындан улам коомчулукта сын-доомат көбөйдү. Президент Садыр Жапаров дагы жетекчилерди орой болбоо тууралуу эскертти.

Чүйдүн Константиновка айылынын жанында курулуш компанияларында айдоочу болуп иштеген кыргыз жана кытай жарандарынын мушташы боюнча Кылмыш кодексинин “Бейбаштык” беренеси боюнча иш козголду. Соцтармактарда кытайлыктарга каршы маанай күчөп, бийлик жарандарды чагымга алдырбоого чакырууда.

Кошмо Штаттарынын президенти Дональд Трамп АКШ ядролук сыноого даярдыгын билдирди. Ал журналисттердин суроолоруна жооп берип бул "жакын арада" болорун айтты, бирок мөөнөтүн, чоо-жайын тактаган жок.

Мамлекет башчысы Садыр Жапаров буга чейин мурдагы президент Алмазбек Атамбаевдин энергетика тармагы боюнча айткан сынына 14-ноябрда “Кабар” улуттук агенттигине курган маегинде жооп берди. Атамбаев Жапаровдун энергетикалык каатчылык тууралуу билдирүүсүнө байланыштуу үн каткан эле.

Орус-казак чек арасында соңку үч айдан бери оор жүк тарткан унаалардын өтүшү татаалдашты. Орус тарап муну контрабандалык товарды Казакстан аркылуу Орусияга ташыган жүк ташуучулардын өтүшүнө чек коюш үчүн текшерүү күчөтүлгөнү менен түшүндүргөн. Мындай жагдай Кыргызстандын тигүү тармагына кесепетин тийгизиди. Кыргызстандык тигүүчүлөр Орусияга товарлары дээрлик өтпөй калганын, айрымдары жабыла баштаганын айта баштады.

Энергетика министри Таалайбек Ибраев Кыргызстанда бардык майнинг фермалардын иши токтотулганын билдирди. Ал коомчулукта “майнинг фермаларга электр энергиясын берип, элге болгон 5 кВт кубаттуулукту 3 кВтка чейин түшүрдү” деген сын-пикирлер айтылып жатканын мисал кылды.

Акыркы маалыматтарга таянсак, Кыргызстанда калктын 11 пайызы психикалык бузулуулардан жабыркайт. Адистердин айтымында, соңку убакта депрессия, тынчсыздануу, ар кандай терс ойлордун кучагында калып дүрбөлөңгө түшүп, уйкусуздукка кабылгандар көбөйүүдө. Алардын белгилешинче, мындай симптомдордун айынан коомдо суицид, агрессия өңдүү түрдүү көйгөйлөр жаралышы мүмкүн. Өлкөдөгү менталдык оорусу барларга мамиле, дарылоо ыкмалары кандай? Кыргыз психиатриясы өнүгүүдөбү? “Сергек жашоо” подкастында бүгүн ушул суроолорго жооп издейбиз.