Indesch chavaltgadras e chavaltgaders èn sa mess l'emna passada cun lur manader da tura, l'Engiadinais Men Juon, sin in viadi tut spezial: Traversar las alps a chaval.

Lur aventura moderna als maina dentant sin fastizs istorics, sin ils fastizs dal Currier da Lindau. Cun posta e martganzia fascheva quel durant plirs tschientaners emna per emna la tura da Lindau sur las Alps a Milaun ed enavos.

Ils curriers istorics faschevan tut il traject en 5 dis e mez. Lur collegas moderns èn en viadi set dis en in mund, che n'è betg pli adattà per viagiar a chaval. La Marella è sa messa en sella per accumpagnar la gruppa sin ina part da lur aventura tranter istorgia e moderna, sendas istoricas ed autostradas.