Á tónsviðinu

Nýlega komu öll einleiksverk fyrir píanó eftir Sveinbjörn Sveinbjörnsson í fyrsta skipti út á tvöfaldri geislaplötu í flutningi Þórarins Stefánssonar. Sveinbjörn er einkum þekktur sem höfundur þjóðsöngsins "Ó, guð vors lands", sum sönglög hans eru líka vel kunn og tvö af píanóverkum hans, "Idyll" og "Vikivaki" hafa oft fengið að hljóma. En öðrum píanóverkum Sveinbjörns hefur verið sýndur lítill áhugi og mörg þeirra voru því hljóðrituð í fyrsta skipti fyrir hina nýju geislaplötu. Í þættinum verða flutt nokkur af þessum verkum og einnig verður leikin fiðlusónata Sveinbjörns í F-dúr, sem var fyrsta íslenska sónatan.

Harðstjórar eru persónur sem oft koma fyrir í óperum, persónur sem stundum eru byggðar á raunverulegum þjóðhöfðingjum úr mannkynssögunni. Oftast eru það bassa- eða barítónsöngvarar sem fara með hlutverk harðstjóra, þar sem djúpar raddir þykja hæfa þeim best. Í þættinum "Á tónsviðinu" verða fluttar aríur og dúettar harðstjóra sem koma fyrir í óperum eftir ýmsa höfunda. Meðal persónanna sem fjallað verður um eru Macbeth í samnefndri óperu eftir Giuseppe Verdi, Scarpia í óperunni "Toscu" eftir Giacomo Puccini og Boris Godunov í samnefndri óperu eftir Modest Mussorgskí. Í tónlistinni er lýst ýmsum hliðum á harðstjórunum: fyrstu skrefum þeirra í átt til harðstjórnar, sjálfsöryggi þeirra á hátindi valdsins, einmanaleikanum sem þeir geta ekki varist, og samviskubitinu sem liggur í leyni í sálarfylgsnum þeirra. Umsjón með þættinum hefur Una Margrét Jónsdóttir og lesari er Kristján Guðjónsson.