Abbyr Shen Reesht - Say That Again

Ta Fiona McArdle chebbal yn chied chlaare ayns straih noa jeh 'Shiaght Laa'. Ayns 'Jamys Jeheiney' ta three gammanyn ain dy chloie - Kianglaghyn Kiaullee, Cre'n Cheer? as Quoi Shoh? Ta 'Claare ny Gael' cur-lesh episode elley ass yn chyndaays 'sy Ghaelg jeh Dracula liorish Bram Stoker.

Fiona McArdle presents the first programme in a new series of 'Shiaght Laa'. In 'Jamys Jeheiney' we have three games to play - Kianglaghyn Kiaullee (Musical Links), Cre'n Cheer? (What's the Country?) and Quoi Shoh? (Who's This?). 'Claare ny Gael' brings us another episode from the translation into the Manx Gaelic of Bram Stoker's Dracula.

Meeryn ass daa chlaare yn cheayrt shoh, lesh kuse dy ghammanyn er-nyn-son ayns 'Jamys Jeheiney' as meer jeh'n chyndaays 'sy Ghaelg jeh lioar ard-ghooagh Bram Stoker, Dracula, ayns 'Claare ny Gael'.

Extracts from two programmes this time, with some games for us in 'Jamys Jeheiney' and an extract from the translation into the Manx Gaelic of Bram Stoker's famous book, Dracula, in 'Claare ny Gael'.

Cha nel 'Shiaght Laa' goll ec y traa t'ayn as cha row 'Jamys Jeheiney' ry chlashtyn yn shiaghtin shoh, myr shoh ta shin clashtyn meer giare ass 'Goll as Gaccan', as Phil Gawne loayrt rish Simon Clarke mychione ennym yn chlaare, as eisht meer elley ass chyndaays 'sy Ghaelg jeh Dracula liorish Bram Stoker va ry chlashtyn ayns 'Claare ny Gael'.

'Shiaght Laa' is not on at the present time, and 'Jamys Jeheiney' was not heard this week, so we hear a short piece from 'Goll as Gaccan', with Phil Gawne talking with Simon Clarke about the name of the programme, and then another excerpt from the translation into the Manx Gaelic of Dracula by Bram Stoker which was heard in 'Claare ny Gael'.

Ta daa ghamman er-nyn-son ayns 'Jamys Jeheiney', choud's ta caa dooin cloie Kianglaghyn Kiaullee as Cre'n Cheer? Ta shin clashtyn kuse dy veeryn 'sy Ghaelg ayns 'Goll as Gaccan', lesh Phil Gawne ginsh dooin mychione taghyrt v'ayn, mychione ny kiare imbaghyn, t'eh aa-loayrt er-nyn-son ronney ass arrane tradishoonagh as t'eh ginsh dooin mychione yn aght t'eh gennaghtyn. As ayns 'Claare ny Gael' ta shin clashtyn ny ren captan y schooner, Demeter, screeu 'sy lioar-lhuingey er yn jurnaa veih Varna gys Whitby ayns meer elley ass yn chyndaays 'sy Ghaelg jeh Dracula liorish Bram Stoker.

There are two games for us in 'Jamys Jeheiney', as there's an opportunity for us to play Kianglaghyn Kiaullee (Musical Connections) and Cre'n Cheer? (What's the Country?). We hear several pieces in the Manx Gaelic in 'Goll as Gaccan', with Phil Gawne telling us about an event that was on, about the four season, he recites for us a verse from a traditional song, and he tells us about the way he's feeling. And in 'Claare ny Gael' we hear what the captain of the schooner, Demeter, wrote in the ship's log of the journey from Varna to Whitby in another extract from the translation into Manx Gaelic of Dracula by Bram Stoker.

Cha nel agh daa chlaare er-nyn-son y cheayrt shoh, agh ayns 'Goll as Gaccan' ta shin clashtyn Phil Gawne goaill daa ghrane va scruit son Mooinjer Veggey dy ynsaghey sheeanyn ny Gaelgey, as she Annie Kissack ta cloie yn accordion.

Ayns 'Claare ny Gael', va meer elley ass Dracula liorish Bram Stoker, as tooilley jeh art scruit ec naighteyr ayns Whitby mychione ny haghyr lurg da schooner cosney stiagh 'sy phurt, hug yindys eer ny smoo er sleih.

There are only two programmes for us this time, but in 'Goll as Gaccan' we hear Phil Gawne singing two rhymes which were written for Mooinjer Veggey to teach the sounds of the Manx Gaelic, and it's Annie Kissack who is playing the accordion.

In 'Claare ny Gael', there was another extract from Dracula by Bram Stoker, and more of the article written by a correspondent in Whitby about what happened after a schooner made it into the harbour, which was an even greater surprise to people.

Ta Daniel Quayle chebbal 'Jamys Jeheiney' as ta goaldagh echey, Owen Williams, dy loayrt mychione ny recortyssyn echey, agh ta Kianglaghyn Kiaullee as Cre'n Cheer? ayn neesht. Ayns Dracula liorish Bram Stoker, ta shin clashtyn mychione schooner joarree cheet stiagh ayns Whitby ayns sterrym - as skeeal whaagh ee neesht. Shoh meer elley ass chyndaays 'sy Ghaelg jeh'n skeeal ard-ghooagh shoh.

Daniel Quayle presents 'Jamys Jeheiney' and he has a guest, Owen Williams, to talk about his recordings, but there are Kianglaghyn Kiaullee (Musical Connections) and Cre'n Cheer? (What's the Country?) as well. In Dracula by Bram Stoker, we hear about a strange schooner coming into Whitby in a storm - and a strange tale it is, too. This is another extract from a translation into the Manx Gaelic of this famous story. 

Ta Daniel Quayle cur dooin leeidyn son daa ghamman - Kianglaghyn Kiaullee as Cre'n Cheer? - ayns 'Jamys Jeheiney', as ta caa diu foast cur stiagh ansooryn roish y nah chlaare. Mastey cooishyn elley ayns 'Goll as Gaccan', ta shin clashtyn Phil Gawne aa-loayrt meeryn as skeeal liorish John Tom Kaighen; ta coloayrtys giare echey 'sy Ghaelg rish Dot Saunders; as t'eh goaill daa ronney jeh drane tradishoonagh. 'Sy chyndaays ain 'sy Ghaelg jeh Dracula ayns 'Claare ny Gael', ta shin clashtyn art ass pabyr naight mychione sterrym haink er Whitby, boayl ta Mina Murray tannaghtyn marish e carrey, Lucy Westenra.

Daniel Quayle gives us clues for two games - Kianglaghyn Kiaullee (Musical Connections) and Cre'n Cheer? (What's the Country?) - in 'Jamys Jeheiney', and there's still an opportunity to send in answers before the next programme. Amongst other topics in 'Goll as Gaccan', we hear Phil Gawne recite two extracts from a story by John Tom Kaighen; he has a short conversation in the Manx Gaelic with Dot Saunders; and he sings two verses of a traditional rhyme. In our translation into the Manx Gaelic of Dracula in 'Claare ny Gael', we hear an article from a newspaper about a storm which struck Whitby, where Mina Murray is staying with her friend, Lucy Westenra.

Atreih, va Daniel Quayle goit voin rish tammylt tra chaill eh y moggyl AM, agh ta caa dooin goaill soylley jeh paart jeh'n chlaare, 'Jamys Jeheiney', ec y chooid sloo. Cha row skeeal ny meer er-lheh 'sy Ghaelg ayns 'Goll as Gaccan' y cheayrt shoh, myr shoh ta shin goll er oaie gys meer ass yn chyndaays 'sy Ghaelg jeh Dracula vees ry chlashtyn ayns 'Claare ny Gael'. Ta shin feddyn magh ny vees scruit ayns Lioar Laa Mina Murray, as ta giarrag ass pabyr naight festit aynjee neesht.

Unfortunately, Daniel Quayle was taken from us for a while when he lost the AM network, but we have an opportunity to enjoy part of the programme, 'Jamys Jeheiney', at least. There wasn't a story or a particular piece in the Manx Gaelic in 'Goll as Gaccan' this time, so we go on to a piece from the translation into the Manx Gaelic of Dracula which is to be heard in 'Claare ny Gael'. We find out what was written in Mina Murray's Journal, and there's a cutting from a newspaper stuck in it as well. 

Ga dy row coloayrtyssyn as meeryn feer anaasagh ayns 'Goll as Gaccan', myr ta shin oayllagh rish, as Phil Gawne as Simon Clarke chebbal yn chlaare shen, cha row meer er-lheh 'sy Ghaelg, myr shoh ta shin clashtyn meeryn ass daa chlaare elley y cheayrt shoh. Hoshiaght, ta daa ghamman er nyn son ayns 'Jamys Jeheiney', agh shegin diu fuirraghtyn derrey y nah cheayrt roish my vees ny ansooryn ry gheddyn veih Daniel Quayle. Ayns 'Claare ny Gael', ass Dracula, ta shin clashtyn meeryn ass jeelane yn Fer Lhee John Seward as Lioar-Laa Mina Murray: yn chied er jeeaghyn er surransagh, R M Renfield; as yn nah er boirit mychione Lucy Westenra as Jonathan Harker.

Though there were very interesting interviews and features in 'Goll as Gaccan', as we're used to with Phil Gawne and Simon Clarke presenting that programme, there wasn't a separate section in Manx Gaelic, so we hear extracts from two other programmes this time. First, there are two games for us in 'Jamys Jeheiney', but you'll have to wait until the next time before the answers are to be had from Daniel Quayle. In 'Claare ny Gael, from Dracula, we hear extracts from the diary of Dr John Seward and the Journal of Mina Murray: the former looking at a patient, R M Renfield; and the latter worried about Lucy Westenra and Jonathan Harker.

Foddee dy bare dooin gra 'Jeheiney' rish y chlaare er Radio Vannin AM 1368 fastyr Jeheiney,  shaghey 'Jamys Jeheiney' myr v'ee.  She Daniel Quayle vees chebbal yn chlaare, as y cheayrt shoh ta shin clashtyn ny gammanyn va jeant echey. Ayns 'Goll as Gaccan' ta coloayrtys dooghyssagh 'sy Ghaelg eddyr Phil Gawne as Isla Callister, lurg daue jannoo coloayrtys anaasagh 'sy Vaarle son yn chlaare. Ayns Dracula 'sy chyndaays ain 'sy Ghaelg, ta'n Fer Lhee John Seward cur eab er feddyn magh tooilley mychione surransagh, R M Renfield.

Perhaps it would be better for us to call the programme on Manx Radio AM 1368 on Friday afternoon 'Jeheiney', rather than 'Jamys Jeheiney' as it was. It's Daniel Quayle who presents the programme, and this time we hear the games he put together. In 'Goll as Gaccan' there's a natural conversation in the Manx Gaelic between Phil Gawne and Isla Callister, after they did an interesting conversation in English for the programme. In Dracula in our translation in the Manx Gaelic, Dr John Seward is attempting to find out more about a patient, R M Renfield.