Kristín okkar Einarsdóttir fór á hrútasýningu á bænum Heydalsá í Strandabyggð og fylgdist með ráðunautnum Stellu Ellertsdóttur dæma hrúta og bændur fylgdust spenntir með. Þetta er einn þeirra viðburða í sveitum landsins þar sem fólki gefst tækifæri til að hittast og gleðjast yfir góðum árangri í sauðfjárrækt. Auk Stellu talaði Kristín við Barböru Guðbjartsdóttur, Viðar Guðmundsson, Magnús Sigurðsson, Ragnar Bragason, Þórey Ragnarsdóttur og Karl Björnsson.

Þriðja þáttaröðin af Ófærð hófst á sunnudagskvöldið. Lögreglumaðurinn Andri er mættur aftur og enn reynir á hann að rannsaka dularfullt mannslát, þar sem koma við sögu vélhjólaklíka, sértrúarsöfnuður og eldra sakamál sem tengist Andra. Ólafur Darri Ólafsson leikur auðvitað Andra eins og áður og þarna eru fleiri góðkunningjar eins og Hinrika lögreglukona, sem Ilmur Kristjánsdóttir leikur, og fleiri. Fyrstu tvær þáttaraðirnar urðu gríðarlega vinsælar, ekki bara hér á landi heldur víða um heim. Við fengum Ólaf Darra í þáttinn í dag og hann sagði okkur frá þessu ferðalagi í Ófærð undanfarin sex ár, samferðarmanninum Andra og fleiru.

UMSJÓN GUÐRÚN GUNNARSDÓTTIR OG GUNNAR HANSSON