Ala xa nn bembaa Haadamalu daa tumoo meŋ na, ii senuyaliŋo leelu tuŋ mu woo tumoo.  Bari, silaŋ, ii xi ii faŋolu la kuwo tiñaa--jaxuyaa bi ii jusukuŋo leelu to. A teŋ ma, Ala mini ii tuu noo saradiŋ to.

Nn maamaa Haadama niŋ nn maamaa Hawa boyita ii faŋ soto la waxatoo meŋ, ii tuŋ be miŋ? Ii tuŋ be saradiŋñee xono la ba fo saradiŋ xoo fee? Ii tuŋ be senuyaaliŋ Ala ñaa xoto, fo ii tuŋ be noxoliŋ? Ii tuŋ be Ala la mansayaa xono la ba, fo Nbilisa la mansayaa? Nn maamaalu tuŋ be meŋ to, ii xi i faŋ soto waxatoo meŋ, ii diŋolu fanaŋnu maŋ wuluu woo lee to ba?

Nn maamaa Haadama la diŋ ke foloolu, na a leelu mu Kayini a niŋ Abelu, ii fuloo bee danxeneyaata a ma, xo Ala be keliŋ, xo a xa duniyaa daa fanaŋ. Ii fuloo bee naata saraxoolu ti Ala yeŋ fanaŋ.  Woo to, Ala se soŋ ii fuloo bee ma ba? Karaŋo niŋ nee to, ilu ba a je la, woo keta ñaa meŋ.

Ala timinna xa dii ñaa meŋ, siñaa sabaa, a naata xuma Kayini yeŋ, fo a se a fakiloo yelema a yeŋ, bari woo bee to, Kayini xi i baŋ a to.

Niŋ Maningoo lee mu ba; Niŋ Fuloo lee mu ba; Waraŋ te, Tandaa.  Niŋ fentigoo lee mu ba, waraŋ te fangantaŋo. Niŋ moroo lee mu ba, niŋ tuntigoo lee mu ba, waraŋ te Katolikoo.  Bee maŋ bo Haadama siyo to ba?  Woo to silaŋ, baawoo nn bee mu haadamadiŋ ti, nn bee wuluuta kiitoo xoto; nn bee wuluuta Nbilisa la mansayaa xono la. A xa dii nn yeŋ ba, a maŋ dii nn yeŋ ba, a be teŋ nee. Nn wuluuta a to, nn bembaa Haadama la soosooli kuwo lee xaŋ ma.

Ala xa meŋ fo Kayini yeŋ, Kayini xi i baŋ woo lee to, bari haabii a tuuta saraxoo bo la.  Woo ñaa ma, a be saraxoo bo la, bari a ba a bo xaŋ faniyaa lee xaŋma. A teŋ ma, a xa a la moxoolu fanaŋnu lafili saraxoo xoto lee la.  Bari, Ala tantu, haabii, a xa kee doo sugandi, meŋ maŋ ŋina Ala la toŋñaa lee kuu.

Ala xa haadamadiŋo daa, xa a topoto, bari haadamadiŋo xi i baŋ a to. Woo to, a be muŋ ke la silaŋ?  A sa a la daali feŋo woolu tuu jee ba? Ite duŋ? Ni i xa feŋ doo daraa, na a boyita tiñaa la, i se muŋ ke? I miya tiñaa ba, xa a taa a ma tuguŋ?

Ala la tiliŋñaa lee xaŋ ma, fo xa junuboo kiiti; bari, a la kanoo lee xaŋ ma, a xa siloo labo, moxoo se i soto kiitoo la ñaa meŋna la.

Ala xa xuluŋ ba daa taxuŋ doroŋ, jiyo boyita naa la, xa naa, xa naa, xa naa.  I la miirato, moxoo doo xi i soto saayaa la, na a maŋ ke Nunfuŋ ni a koree ti ba?  Muŋ xa a ke, Nunfuŋ kisita wamoo ma?  A xa baara ba ke, bari woo xa a kisi ba?  A lasaxaa, na a tuŋ xa sanjiy keme nin saŋ muxaŋ baara, xa xuluŋ ba daraa, na a tuŋ maŋ duŋ xuluŋo la, muŋ tuŋ se ke a la?  A tuŋ mee faxa wamoo ma ba?  Woo to, ate la baaroo ma a kisi. Niŋ woo ma a kisi, muŋ duŋ xa a ke?

Ala la fiinoo lee xaŋ ma, Anabi Nunfuŋ kisita wami baa ma, bari xuluŋ baa maŋ Nunfuŋ kisi Jahanama taxoo ma. Woo loŋo lee xaŋ ma, Nunfuŋ xa saraxoo bo, xa a yita, xo a be laaliŋ a la, xo Ala xa laafidoo meŋ taa, xo a be a la gullo baa woo lee daafaa la.