Jinoo be ñaa dii?  A mu muŋ feŋ ti?  Jina ñimmaa be keliŋ ba, a niŋ jina kuruŋo?  Woo mee loŋ noo, fo i xa Kitaaboo karaŋ.  Ilaŋ nn xa a mee, Ala xa meŋ fo jinoo la kuwo to.

Nn xa a je, xo Ala kuraata duniyaa daa la waxatoo meŋ, xo a xoo, xo -A be bendiŋ kuu soobe!   A xa woo fo, baawoo feŋ kuruŋ tuŋ te keliŋ.  Niŋ feŋ kuruŋ tuŋ te keliŋ, muŋ na a xa Jahanama daa?  Karaŋo niŋ nee to, nn be woo je la, xa a tofo.

I mu moxoo tilidiŋo ti Ala ñaa xoto ba, fo moxo kuruŋo?  Ilaŋ xa a mee, Ala be meŋ fo la i yeŋ niŋ kuwo to.

Niŋ doo ba a fee xi i kele, aŋ te naa la, xa a fo xo -N bi i kele la de!  Ayi.  A be meŋ be ke la, a si i nuxuŋ, xa a ke.  Woo ñaa ma, ite mee loŋ noo xo i jaxoo lee mu.  Tuma doo, hayida, a se ke i yeŋ, xo a mu i kafuñoxoo ti, xa tara, a sagoo mu, a xi i la kuwo tiñaa lee.  Awa.  I sa a tara naa, Nbilisa xa nn bembaa Haadamalu kele woo ñaa.  A naata ñaa meŋna, nn bembaalu ma a loŋ, xo ii jaxoo lee mu.  Nbilisa xi ii makewuyaa ñaa meŋna la, woo be safeeliŋ Tawureta xono la.

Ala xo teŋ, Nbilisa xo teŋ, joŋ taa mu toŋñaa ti?  Ala taa te?  Xa tara naa, baawoo Nbilisa tuŋ xa woo loŋ, a xa nn bembalu makewuyaa, fo ii si ii faŋo la kuwo tiñaa lee.  Nbilisa tuŋ mee meŋ noo, nn bembaalu xa woo ke lee.

Nn na karaŋo tambiliŋolu xono la, nn xa a je, xo Ala maŋ duniyaa niŋ saayaa lee daa. Xo, ate sagoo lee tuŋ mu moxoo xanna faxa muume. Woo to, niŋ Ala saguŋ te, saayaa xa duŋ, muŋ xa a ke, saayaa be keliŋ? Na a maŋ ke woo ti, ni i xa a mee, xo saayaa, woo xoto mu muŋ ti? Nn be woo fanaŋ je la Tawureta xono la, xa a tofo karaŋo niŋ nee to.

Ala naata xa nn maamaalu maŋiniŋxa meŋ xa a ke, ii xa a soosoo.  I la miira to, nn maamaalu xa a jaabi ñaa dii?  Ii xi i soŋ loo Ala yeŋ ba, fo ii xa jalagiloo lañori doo kuta xaŋ? Ite tuŋ se muŋ ke, ni ite lee tuŋ mu?

Baawoo Nbilisa duŋta saa xono la, xa nn maamaalu lafili.  Ala xumata a yeŋ saa xono la woo ñaa.  A xumata a yeŋ tumoo meŋ, a xa xumoo doo fo Nbilisa yeŋ, xa a fo saa yeŋ, xa a fo nn maamaalu yeŋ, a niŋ ii diŋolu bee. Karaŋo niŋ nee to, nn ba a karaŋ na Tawureta xono la, Ala xa meŋ fo nteleelu yeŋ, woo luŋ.

Muŋ xa a ke baaroo xa xole? Muŋ xa a ke, tiŋo se musu xonomaa buŋ? Muŋ xa a ke, jangaroo niŋ asidaŋolu be keliŋ? Muŋ xa a ke, saayaa be keliŋ?  Niŋ moxoo saata, a be ke la ñaa dii? Ni i maŋ woo loŋ, ni i xa Ala lamee, a xa woo bee fo i yeŋ Tawureta xono la.

I xa a loŋ, meŋ xa a ke, Ala xa saraxabo kuwo labo ba? I xa a loŋ, saraxoo xoto mu meŋ ti? Ala xa woo leelu fo nn yeŋ Tawureta xono la, Anabi Musaa bulu la.