L'Euro Song Contest, ina da las pli grondas concurrenzas da musica internaziunala ha lieu questa fin d'emna a Malmö en Svezia.

L'instrumentala dad oz è pronta cun hits e semperverds che derasan gia oz atmosfera dad ESC. Nus tadlain hits sco «Tattoo», «Fairytale», «Arcade» e semperverds sco «Waterloo», «Puppet on A String», «Swiss Lady» e natiralmain era la chanzun «Viver senza tei» dals Furbaz, ils participants da l'onn 1989.

Interpretadas na vegnan questas chanzuns dentant betg da Loreen, Alexander Rybak, dad Abba, Pepe Lienhard ubain da Sandie Shaw, mabain dad enconuschentas furmaziuns da brass ed armonia.