ប្រជាសហគមន៍ព្រៃឡង់ខេត្តកំពង់ធំ រកឃើញបទល្មើសព្រៃឈើទ្រង់ទ្រាយធំ ឋិតក្នុងឃុំចំនួន ៣ ជាប់ដែនជម្រកសត្វព្រៃឡង់។ ការរកឃើញនេះ ក្រោយ ពីពួកគេ បានពង្រាយកម្លាំងចុះល្បាត នៅក្រៅតំបន់ព្រៃឡង់ ដើម្បីឃ្លាំមើលបទល្មើសព្រៃឈើ និងសកម្មភាពកាប់ព្រៃទន្ទ្រានយកដី ធ្វើជាកម្មសិទ្ធិឯកជន ក្នុងតំបន់ ព្រៃឡង់ ។

សាច់​ញាតិ​របស់​សកម្មជន​សង្គម​​​ចំនួន​៧​នាក់ កំពុង​ជាប់​ឃុំ​បណ្ដោះ​​ក្នុង​​​ពន្ធនាគារ​ព្រៃ​ស និង​មេធាវី​​ ខក​ចិត្ត​ ចំពោះ​ចៅក្រម​​​សាលា​ដំបូង​រាជធានី​ភ្នំពេញ​ ដែល​​​សម្រេច​បដិសេធ​សំណើ​ សុំនៅ​ក្រៅ​ឃុំ​អាសន្ន​របស់​​យុវជន​ទាំង​៧​នាក់​។ មេធាវី អះអាង​ ថា កូន​ក្ដី​ទាំង​៧​នាក់ មាន​លក្ខខណ្ឌ​​ សម​ស្រប​​នឹង​ទទួល​បាន​ការ​អនុញ្ញាត​ឲ្យ​នៅ​​ក្រៅ​ឃុំ។

សាច់ញាតិ​បុរស​ម្នាក់​ដែល​ស្លាប់​ក្នុង​ពេល​ជាប់​ឃុំ​នៅ​ពន្ធនាគារ​ខេត្តបាត់ដំបង​​​​ខក​ចិត្ត​នឹង​មន្ត្រី​គណៈកម្មាធិការ​ជាតិ​ប្រឆាំង​ទារុណកម្ម​​យឺតយ៉ាវ​​បញ្ជូន​សំណុំរឿង​​​ស្រាវជ្រាវ​ដើម្បី​រក​យុត្តិធម៌​ដល់​ជនរងគ្រោះ​។ ប្រតិកម្ម​​របស់​សាច់ញាតិ​នេះ​ ក្រោយ​ពេល​​ស្ថាប័ន​មួយ​នេះ​​បាន​ចុះ​ជួប​គ្រួសារ​រងគ្រោះ​រងគ្រោះ​​ប្រមាណ​​១​សប្ដាហ៍​ហើយ​ ពុំ​មាន​ដំណឹងពី​ការ​វិវឌ្ឍន៍​​លើ​​រឿង​នេះ​​នៅ​ឡើយ​ទេ​។

ជនភៀសខ្លួនផ្នែកនយោបាយ និងសហគមន៍ខ្មែរក្រោមព្រមទាំងពលករកំពុងស្នាក់នៅក្នុងប្រទេសថៃកំពុងឆ្លងជំងឺកូវីដ-១៩(Covid-19)ច្រើនគ្នា នៅរយៈពេលមួយសប្ដាហ៍ចុងក្រោយនេះ។ ទន្ទឹមនឹងនេះ អ្នកឃ្លាំមើលសិទ្ធិពលករ ក្នុងប្រទេសថៃថា ពលករឆ្លងជំងឺកូវីដ-១៩ស្រាលៗច្រើននាក់ មិនទាន់ទទួលបានការព្យាបាលនៅតាមមន្ទីរពេទ្យទេ។

តំណាង​សហជីព​កម្មករ​នៅ​រោង​ចក្រ​ធំ​មួយ​​ នៅ​​សង្កាត់​ស្ទឹង​មាន​ជ័យ​ ខណ្ឌ​មាន​ជ័យ​ រាជធានី​ភ្នំពេញ​ថា​ថៅកែ​រោងចក្រ​ មិន​ស្តាប់​សហជីព​តំណាង​កម្មករ​ ហើយ​មិន​ស្តាប់​តាម​ការ​ណែនាំ​របស់​ក្រសួង​ការ​ងារ​ អំពី​​វិធាន​ការ​បង្ការ​ជំងឺ​កូវីដ​-​១៩​។ តំណាង​​សហជីព​រូប​នេះ​ ថា​ការ​បំពាន​វិធានការ​បង្ការ​នេះ​ នឹង​​ធ្វើ​ឲ្យ​កម្មករ​ប្រឈម​ការឆ្លង​ជំងឺ​នេះ​ ពេញ​រោង​ចក្រ​ជា​បន្ត​ទៀត​។

ក្រុម​អ្នក​វិភាគ​លើក​ឡើង​​ថា​​​ ការ​ប្រព្រឹត្ត​ខុស​របស់​ឧកញ៉ា​មួយ​ចំនួន​​កំពុង​ធ្វើ​ឱ្យ​​ប៉ះពាល់​​​ដល់​រដ្ឋាភិបាល​​ដែល​ជា​អ្នក​ស្នើ​គោរមងារ​នេះ​ហើយ​ថែម​ទាំង​ប៉ះពាល់​ដល់​កិត្តិនាម​ព្រះ​មហាក្សត្រ​ដែល​ផ្ដល់​គោរមងារ​នេះ​ដែរ។​ ការលើកឡើងនេះ បន្ទាប់ពីមានក្រុម​ឧកញ៉ា​ជាច្រើនរូប​ រង​ការ​ចោទ​ប្រកាន់ថា​ ធ្វើ ជំនួញ​មិនសុចរិត ​​​រំលោភ​សិទ្ធិ​មនុស្ស ​​អំពើ​ពុក​រលួយ ​រឹបអូស​ដីធ្លី ​អំពើ​ឃាតកម្ម​ និង​បំផ្លិច​​បំផ្លាញ​ធនធានធម្មជាតិ ​និងមានឈ្មោះអាស្រូវរឿងផ្លូវភេទជាដើម។ ទោះ​យ៉ាង​ណា​ អ្នក​នាំ​ពាក្យ​បក្ស​កាន់​អំណាច​ថា​ កំហុស​របស់​ឧកញ៉ា​ជា​រឿង​បុគ្គល​នៃ​ជន​ប្រព្រឹត្តិខុស​ប៉ុណ្ណោះមិន​ប៉ះពាល់​ដល់​រដ្ឋាភិបាល​និងព្រះ​មហាក្សត្រ​ទេ​។

សាច់ញាតិ ​និងមេធាវី​ ទាមទារឲ្យ​តុលាការក្រុងភ្នំពេញ ​សម្រេច​ដោះលែង​យុវ​ជន​ខ្មែរ​ថាវរៈ ​និង​យុវជន​សមាគម​សម្ព័ន្ធ​និស្សិត​បញ្ញវន្តខ្មែរ​ចំនួន៧នាក់​ឲ្យនៅ​ក្រៅឃុំ​បណ្តោះ​អាសន្ន ​ដោយ​អះអាងថា ​ការឃុំខ្លួនពួកគាត់​ដើម្បី​រងចាំ​សវនា​ការ​កាត់ទោស ​បានលើស​ថិរវេលា​កំណត់​នៃច្បាប់។ ការទាមទារនេះ ​ធ្វើឡើង​នៅមុន​មួយ​ថ្ងៃ​ដែល​សាលា​ដំបូង​រាជធានីភ្នំពេញ ​គ្រោងនឹង​បើកសវនាការ​ជំនុំជម្រះ​លើបណ្តឹង​សុំនៅ​ក្រៅ​ឃុំ​បណ្តោះ​អាសន្នរបស់​យុវជន​សង្គម​ទាំង៧នាក់ ​នៅថ្ងៃ១៨​ ខែឧសភា ស្អែកនេះ។

សហព័ន្ធខ្មែរកម្ពុជាក្រោមប្រើប្រាស់យុទ្ធសាស្រ្តថ្មីដើម្បីឲ្យពលរដ្ឋ​​​ខ្មែរ​​ក្រោមយល់ដឹងពីសិទ្ធិស្វ័យសម្រេចដោយខ្លួនឯងទៅថ្ងៃអនាគត ក្រោយពេល​អាជ្ញាធរវៀតណាម ចាប់ផ្តើមរឹបអូសសៀវភៅ និងឯកសារមួយចំនួនពីយុវជនខ្មែរកម្ពុជាក្រោម​អំពីសិទ្ធិជនជាតិ​ដើមកំណើត​។ តើយុទ្ធសាស្រ្តថ្មីរបស់សហព័ន្ធខ្មែរក្រោមមានដូចម្តេចខ្លះ?​

អនុប្រធាន​គណបក្ស​ប្រឆាំង និង​ជាអតីត​រដ្ឋមន្រ្តី​ក្រសួង​កិច្ចការ​នារី​អ្នកស្រី មូរ សុខហួរ ជំរុញ​អោយ​ក្រសួង​យុត្តិធម៌​ធានា​ផ្ដល់​យុត្តិធម៌​ពេញ​លេញ និង​ស្មើភាព​គ្នា​ដល់​ស្ដ្រី​រងគ្រោះ​ដោយ​អំពើ​រំលោភបំពាន​ផ្លូវ​ភេទ និង​ត្រូវ​ហ៊ាន​ប្រាប់​ទៅ​លោកនាយក​រដ្ឋមន្រ្តី ហ៊ុន សែន អោយ​ឈប់​ប្រើ​អំណាច​រំលោភ​លើ​ប្រព័ន្ធ​យុត្តិធម៌​តទៅទៀត។ ការលើក​ឡើង​នេះ បន្ទាប់​ពី​លោក ហ៊ុន សែន បាន​លូកដៃ​ចូល​អន្តរាគមន៍​ក្នុង​រឿងរ៉ាវ ចោទ​ប្រកាន់​ឧកញ៉ា ហេង សៀ ពីការរំលោភ​បំពាន​ផ្លូវភេទ​លើ​ពិធីការិនី​ទូរទស្សន៍ My TV ។

ប្រជាពលរដ្ឋ​​មាន​ជីវភាព​ក្រីក្រ​​ជា​ច្រើន​គ្រួសារ​នៅ​ក្រុង​ប៉ោយប៉ែត​ ខេត្ត​បន្ទាយមានជ័យ នាំគ្នា​ប្រថុយ​ជីវិត​ដើរ​រើស​អេតចាយ​​​ ដើម្បីលក់​យក​​​​ប្រាក់​ដោះស្រាយ​ជីវភាព​គ្រួសារ​អំឡុង​ពេល​ជំងឺ​កូវីដ​១៩​កំពុង​រាតត្បាត​ខ្លាំង​។ ពលរដ្ឋ​​ដើរ​រើស​អេតចាយ​ទាំង​នោះ​ អះអាង​ថា ​​ចាប់​តាំង​ពី​​​មេរោគនៃជំងឺកាចសាហាវនេះ​ឆ្លង​ចូល​សហគមន៍​លើក​ទី​៣​មក​ ពុំ​ទាន់​មាន​អាជ្ញាធរ​ណា​ផ្ដល់​ស្បៀង​អាហារ​ជូន​ដល់​ពួកគាត់​នៅ​ឡើយ​ទេ។