Езекиел номын төгсгөлийн хэсэгт 1000 жилийн хаанчлалын үед энэ дэлхий дээр буюу Израильд байх Эзэний сүм болон Эзэний хотын тухай өгүүлсэн байна. Тэнд Израильчууд Эзэний ивээлээр дүүрэн амьдарч, Эзэний тэдний төлөө хийсэн бүхнийг дурсан санаж тахил өргөж, Эзэнийг алдаршуулан амьдрах болно. Харин итгэгч бидний хувьд 1000 жилийн хаанчлалаас өмнө дээш өргөгдсөн байх учраас газар дэлхий дээрх 1000 жилийн хаанчлалын үеэр мөнхийн улсад буй Шинэ Иерусалимд байх болно. Тэнд сүм гэж байхгүй Есүс Христ Өөрөө сүм нь байх болно гэдгийг Илчлэл ном өгүүлсэн байдаг.

Хожим нь Израиль рүү түрэмгийлэх Хойд зүгийн Магог улсыг Бурхан шүүж тэднийг устгах болно гэдгийг Езекиел эш үзүүлсэн байна. Бурхан гэм нүглийг шийтгэлгүй орхидоггүй. Бурхан Өөрийнхөө ард түмний үйлдсэн гэм нүглийг ч Бурханд итгэдэггүй хүмүүсийн үйлдсэн гэм нүглийг ч шийтгэлгүй орхидоггүй. Бурхан Израилийг ч бас шударгаар хатуугаар шүүсэн. Итгэгч бид Христэд итгэх итгэлээр мөнхийн шийтгэлээс аврагдсан ч бид үргэлж гэм нүгэл үйлдэг учраас Бурханаас эмээж, өдөр бүр гэмээ гэмшиж амьдрах учиртай. Хожим нь Бурхан энэ дэлхийн бузар муу бүхнийг нэг мөсөн шүүх болно. Тэр цагт Бурханы шүүлт бүхэн нь зөвт байх болно.

Хожим хойд зүгээс Магог улс буюу түүний ноён Гог Израильчуудыг эзлэн түрэмгийлэхээр довтлох болно гэдгийг Езекиелээр дамжуулан Бурхан урьдаас хэлсэн байна. Хэдий тийм боловч Бурхан Израилийг өмгөөлж тэднийг дарах болно. Бурхан бол ямар ч үед Өөрийнхөө хүмүүсий өмгөөлдөг гэдгийг итгэгчид бид санаж урам зоригтой амьдрах ёстой. Харин хожим болох энэ үйл явдлаар Их зовлонгийн үеийн түр зуурын амар тайван байдал дуусч дэлхий дээр аймшигт шийтгэлүүд ар араасаа буух болно гэж Библи хэлдэг.

Езекиелийн үзсэн үзэгдэлд хөндийгөөр дүүрэн хувхай яс байсан шиг Бурхан Израильчуудыг үндэстнүүдийн дунд тараан хаясан байсан. Гэхдээ Езекиел Бурханы үгээр ярих үед тэр яснууд амь орсон шиг Бурхан ч бас Израиль үндэстнийг амилуулан босгох болно гэдгийг тунхагласан байна. Бурханы үг сүнсээрээ үхсэн нэгнийг амьдруулах хүч чадалтай. Итгэгч бидний амьдралыг ч амьд, эрч хүчтэй болгох хүч чадалтай. Тэр хүчтэй үгнээс итгэгчид бид зуурч амьдрах ёстой.

Едомчууд Бурханы ард түмэн болох Израильчуудын сүйрэлд баярлаж байсан ч тэдний гэм нүглийнх нь улмаас Бурхан тэдний дээр ч бас сүйрлийг авчирсан. Өнөөдөр энэ дэлхий дээр Бурханы ард түмнийг хавчин гадуурхагч хүмүүс олон байдаг ч цаг нь ирэхэд Бурхан тэднийг шударгаар шүүх болно. Есүс Христ дахин ирэх үед Бурхан бүх хүмүүсийг шүүх болно. Тэр цагийг хүртэл итгэгчид бид итгэлээрээ бат зогсож, Бурханы үгээс зуурч амьдах учиртай.

Израильчуудын гэм нүглийг сануулж сэрэмжлүүлэх жинхэнэ хоньчин биш харин тэдний гэм нүглийг өөгшүүлэх хуурамч хоньчид байсан учраас Израильчууд гэм нүглээсээ эргэлгүй явсаар Бурханы шийтгэлийг хүртсэн. Өнөөдөр итгэгч бидэнд ч бас Бурханы үгийг үнэнээр дамжуулдаг, Бурханы өмнөөс бидэнд сэрэмжлүүлэн сануулдаг жинхэнэ хоньчид, пастор ахлагч нар хэрэгтэй. Бидний төгс Хоньчин болох Есүс Христийг дахин ирэх хүртэл бид энэ л итгэлээрээ бат зогсохын төлөө хичээж амьдрах хэрэгтэй.  

Бурхан Израилийг гэм нүглийнх нь улмаас хатуу шийтгэсэн боловч тэднийг бүрмөсөн орхихгүй харин дахин сэргээх болно гэж амласан. Үүний нэгэн адил Бурхан Өөрийнхөө ард түмэн болсон биднийг ч бас хэзээ орхидоггүй. Дэлхий даяар маш олон хүмүүс Бурханыг үгүйсгэж байсан ч бид итгэлээрээ бат зогсож, Эзэнтэйгээ уулзах өдрийг хүртэл Бурханаас зууран амьдрах учиртай.    

Египет улс болон Фараон хэдийгээр агуу сүр жавхлантай байсан ч Бурхан тэднийг гэм нүглийнх нь улмаас шүүж тэр цагаас хойш Египет одоог хүртэл анхны үе шигээ дэлхийд тэргүүлэх улс болж чадаагүй. Энэ түүхээс бид сургамж авч Бурханы өмнө дуулгавартай даруу байхыг хичээх ёстой. Бурхан энэ дэлхийг ч бас цаг нь ирэхэд шударгаар шүүж, гэм буруутныг шийтгэх болно. Харин тэр цаг хүртэл бид итгэлээрээ бат зогсож, Бурханд дуулгавартай амьдрах учиртай.

Египет хэдийгээр хүчирхэг гүрэн байсан боловч тэдний үй олон хиймэл шүтээнүүд болон аймшигтай гэм нүглүүдийнх нь улмаас Бурхан тэднийг шүүсэн байна. Бурхан гэм нүглийг шийтгэлгүй орхидоггүй. Түүний шүүлт гарцаагүй. Итгэгчид бид энэ үнэнийг санахдаа өөрсдийнхөө гэм нүглүүдээс эргэн гэмшиж, Бурханы үгээс зуурч амьдрах хэрэгтэй. Учир нь Египетийн дээр шүүлтийг тунхагласан Бурханы үг бүрэн биелэлээ олсон шиг бидэнд өгсөн Түүний амлалтууд ч бас гарцаагүй биелэлээ олох болно.   

Тир хэдийгээр агуу цэцэглэн хөгжиж байсан хот байсан боловч Бурханы эсрэг гэм нүглээр дүүрэн байсныхаа төлөө Бурханаар шийтгэгдсэн. Бурхан Тир Сидон хэмээх хоёр ихэр хотын Тирийг нь бүрмөсөн сүйрнэ гэж айлдсан ч Сидоныг үлдэх болно гэж айлдсанчлан өнөөдөр Тир хот устаж, Сидон хот үлдсэн байна. Энэ бүхэн нь Бурханы өмнө гэм нүгэл шийтгэлгүй үлдэхгүй гэдгийг батлаад зогсохгүй Бурханы үг гарцаагүй биелэх болно гэсэн баталгаа болж байна. Эсрэгээрээ Бурхан Израильчуудын гэм нүглийг шийтгэсэн ч тэднийг бүрмөсөн орхиогүй. Үүний нэгэн адил Бурхан Өөрийнхөө ард түмнийг хэзээ ч бүрмөсөн орхихгүй. Тиймээс бид урам зоригтой, баяр хөөртэй амьдрах ёстой.