Бурхан зөвт бус хүмүүсийн дээр шударга шүүлтээ гарцаагүй буулгах болно. Гэхдээ энэ шүүлт зөвт хүмүүс дээр буухгүй. Үүний баталгаа бол Содом Гоморрагийн сүйрлээс Бурхан Лотыг аварсан түүх юм. Нөгөөтэйгүүр итгэгчид бид Лот шиг гэрчлэлгүй итгэгчид биш харин Абрахам шиг гэрчлэлтэй итгэгчид байж амьдралаараа Есүс Христийг гэрчлэн амьдрах учиртай.

Бурхан хэзээ ч бузар мууг шийтгэлгүй орхидоггүй. Хуурам багш нарын дээр буух шийтгэл ч зайлшгүй юм. Үүнийг батлахын тулд Петр Хуучин гэрээн дээр Бурханы буулгасан шударга шүүлтүүдийг эш татсан байна. Гэм нүгэл үйлдсэн тэнгэрэлч нарыг ч, гэм нүглээр дүүрэн байсан ард түмнийг ч, Содом Гоморрагийн завхайралд автсан иргэдийг ч Бурхан шударгаар шүүж, хатуу шүүлтийг буулгасан. Гэхдээ Бурхан энэ бүх шийтгэлийн дундаас Бурхан Өөрийнхөө зөвт хүмүүсийг авран хамгаалсан байдаг. Үүний нэгэн адил хожим нь Бурхан шударга шийтгэлээ энэ дэлхий дээр буулгахдаа Өөрийн хүмүүсийг авран хамгаалах болно.

Чуулган дунд хонины арьс нөмөрсөн чоно мэт орж ирсэн хуурамч багш нар Бурханы нэрийг барин өөрсдийнхөө хүслийг заах бөгөөд чуулганыг өөрийнхөө эрх ашгийн төлөө ашиглах гэж оролдоно. Үүнээс бол Христийн нэр муу хэлэгдэх болно. Гэхдээ тэдний дээр буух Бурханы шударга шүүлт зайлшгүй бөгөөд тэдний дээр хатуу ширүүн гэсгээлт буух болно. 

Бурханы эш үзүүллэг нь хүнээс биш ганцхан Бурханаас ирдэг. Хуучин гэрээн дээр Бурханы үгийг жинхэнэ эш үзүүлэгчид дамжуулж байсан шиг хуурамч эш үзүүлэгчид бас ард иргэдийг төөрөгдүүлдэг байсан. Үүнтэй нэгэн адил хожим нь хуурамч багш нар гарч ирэн итгэгчдийг төөрөгдүүлэх болно. Тиймээс итгэгчид бид чуулган дотор шургалан орж ирэх хуурамч багш нараас сэргийлэн сэрэмжлэх ёстой.

Бурханы үг үнэн болохыг элч нар өөрсдөө гэрчилдэг. Учир нь элч нар өөрсдөө Есүс Христийн гайхамшгуудыг нүдээрээ үзсэн амьд гэрч нар байсан. Түүгээр зогсохгүй Хуучин гэрээний үеийн эш үзүүллэгүүдийн биелэл ч Бурханы үг үнэн болохыг гэрчилдэг. Хуучин гэрээн дээрх эш үзүүллэгүүдийн биелэл нь энд хэлэгдсэн Бурханы үг ч бас биелэх болно гэдгийг батлах бодит баталгаа болдог.

Өнгөрсөн удаагийн хичээлээр бид итгэл нэгт ах дүүсийн талаар хамтдаа суралцсан. Таныг Христ итгэл дотроо хил хязгааргүй хамгийн том улсын иргэн болсон гэдгийг сануулахдаа баяртай байна. Мөн Итгэгчид бид Есүс Христэд итгээд зогсохгүй итгэл дээрээ олон зүйлийг нэмэх ёстой гэдгийг өнгөрсөн хичээлээр үзсэн. Тэгвэл тэр чанарууд бидний итгэлийн амьдралд байгаад зогсохгүй улам бүр өсч нэмэгдсээр байх ёстой. Тэгж чадвал бидний итгэлийн амьдрал үр жимсээр дүүрэн байж чадна. Эсрэгээрээ бидний итгэлийн амьдралд эдгээр чанарууд дутмаг байх юм бол бид итгэл дотор байгаа эсэхээ шалгаж үзэх ёстой.

Итгэгчид бид Бурханд итгэх итгэлээр дамжуулан Бурханы хүүхдүүд болж бурхан мөн чанарыг хуваалцагчид болсон учраас бид итгэлийн амьдралдаа хичээл зүтгэлтэй байх учиртай. Ингэхдээ бид хичээл зүтгэлээр, итгэл дээрээ сайн чанарыг, сайн чанар дээрээ мэдлэгийг, мэдлэг дээрээ өөрийгөө захирахуйг, өөрийгөө захирахуй дээрээ тэвчээрийг, тэвчээр дээрээ итгэл сүсгийг, итгэл сүсэг дээрээ ах дүүсэг энэрлийг, ах дүүсэг энэрэл дээрээ хайрыг хамтатгаж амьдрах ёстой.

Өнгөрсөн хичээлээс эхлэн бид Шинэ гэрээний 2 Петр захидлыг үзэж эхэлснийг та бүхэн санаж байгаа байх. Элч Петрийн хамгийн сүүлчийн захидал болсон энэ захидлыг хамтдаа нээж Бурханы үгээс сурцгаая.

Өнөөдрөөс эхлэн бид хамтдаа Шинэ гэрээний 2 Петр захидлыг үзэж эхлэх болно. 2 Петр 1:1 дээрээс хавал энэхүү захидлыг бичигч нь Есүсийн дагалдагч Симон Петр мөн болох нь тодорхой харагддаг. Гэхдээ сонирхолтой нь Библийн олон судлаачид 2 Петр захидлыг үнэхээр Петр бичсэн үү үгүй юу гэдэг дээр маргасан байдаг. Тодруулбал Шинэ гэрээн дээрх захидлуудын дундаас зохиочийг нь тойрч хамгийн их маргасан захидлуудын нэг бол 2 Петр захидал байдаг.

Христэд итгэж чуулганд нэгдсэн итгэгчид бид бие биентэйгээ харилцахдаа Христийн хүслийн дагуу харилцдаг байх ёстой. Ахлагч нар нь зөв сэдэл, зөв хандлага, зөв шалтгаан, зөв сүнсээр үйлчлэх нь чухал. Харин итгэгчид өөр хоорондоо даруу зүрх сэтгэлээр хандах ёстой. Итгэгч бидний амьдралд ирэх диаволын аливаа дайралт болон аливаа зовлон бэрхшээлийн дунд бид итгэлээр сонор сэрэмжтэй байж, бат зогсож, өөрсдийгөө Бурханд даатгаж, санаа зовниолоо Бурханд өргөж, урам зоригтой, итгэл найдвараар дүүрэн байх ёстой. Зовлон бэрхшээлээр дамжуулан Бурхан биднийг Өөр лүүгээ улам бүр ойртуулж, биднийг босгон байгуулдаг.