Бурхан бол ариун Бурхан бөгөөд шударга Шүүгч юм. Тиймээс ямар ч гэм нүглийг Тэр шийтгэлгүй орхихгүй. Тиймээс бид Бурханы шүүлт эргэлт буцалтгүйгээр буухаас өмнө Бурхан уруу эргэж, эргэн тойрондоо байгаа ёс бус амьралаар амьдарч байгаа хүмүүст анхааруулан сануулах учиртай. Бурхан Өөрт нь итгэмжтэйгээр үлдэгсдийг Өөрөө авран хамгаалдаг.  

Израильчууд хуурамч эш үзүүлэгчдийн үгэнд автаж Бурханы үгийг үл тоож байснаасаа болоод Бурханы сэрэмжлүүлэг анхааруулгыг үл тоон аймшигтай шийтгэлийг амссан. Өнөөдөр итгэгч бид Бурханы үгийг үл тоож, Бурханы үгийг үл хайхран амьдарч байгаа нь бидэнд байгаа маш том алдаа дутагдал юм. Бид Иерусалимын сүйрэл болон Израильчуудын дээр буусан шийтгэлээс сургамж авч Бурханы өмнө өөрсдийгөө даруу болгон амьдрах учиртай.

Бурхан Өөрөө биднийг ямар нэгэн үйлчлэл, ажилд дуудсан бол тэрхүү ажлыг гүйцэтгэх хүчийг Бурхан Өөрөө бидэнд өгдөг. Тиймээс бид Бурханы алдрын төлөө ямар нэгэн онцгой үйлчлэлийг хийхээсээ өмнө тэрхүү үйлчлэлд үнэхээр дуудагдсан эсэхээ мэдэх нь хамгийн чухал юм.  Бурхан Езекиелийг Израилийн сүнслэг харуулаар томилсон шиг пастор ахлагч нар ч бас чуулганыхаа сүнслэг харуулууд байдаг. Тэд чуулганыг сүнслэг аюулаас сэрэмжлүүлж сонор сэрэмжтэйгээр үйлчилдэг байх учиртай.  

Бурханы суу алдар нь хэмжээлшгүй агуу бөгөөд Бурхан Өөрөө гайхамшигтай ариун учраас бид Бурханы оршихуйн өмнө өөрсдийгөө даруу болгох хэрэгтэй. Бид гэм нүглийнхээ улмаас Бурханы оршихуйд зогсох боломжгүй байсан боловч Есүс Христийн урсгасан цусны гавъяагаар бид Бурханы оршихуйд зогсох боломжтой болсон.   

Бурханы алдар нь хэмжээлшгүй агуу бөгөөд Түүний оршихуй нь хүмүүс бидний хувьд хүршгүй өндөрт юм. Бурхан бидэнд Өөрийн алдрыг Өөрөө илчилж өгөхөөс нааш бид тэрхүү алдрыг харах ямар ч боломжгүй байдаг.  

Бурхан өмнө нь дэлхий ертөнцийг усан галваар шүүж байсанчлан хожим нь цаг нь ирэхэд энэ дэлхий ертөнцийг галаар шүүх болно. Тэр цагт энэ дэлхий ертөнц улиран одож харин Бурхан итгэгчдэд цоо шинэ дэлхий ертөнцийг өгөх болно. Энэ шинэ ертөнцийг зөвхөн Есүс Христэд итгэж зөвт байдлыг хүлээн авсан хүмүүс л өвлөн авах болно. Тиймээс бид гарцаагүй ирэх шүүлтийн өмнө дэлхий даяар Бурханы сайнмэдээг тунхаглах ёстой. Итгэгчид бид Есүс Христийг таньж мэдэх мэдлэг дотор улам бүр өсөх ёстой. Тэгж байж бид гаж буруу урсгалын давалгааг сөрөн зогсоод зогсохгүй Есүс Христийн сайнмэдээг дэлхий даяар тунхаглан тарааж чадна.

Бурхан хожим нь энэ дэлхий ертөнцийг шударгаар шүүх болно. Үүний баталгаа нь Бурханы өмнө нь дэлхий дээр буулгаж байсан шүүлт юм. Өмнө нь Бурхан энэ дэлхийг усан галваар шүүсэн бол хожим нь Бурхан галаар шүүх болно. Харин өнөөдөр тэрхүү шүүлт хараахан ирээгүй байгаа нь хүн төрөлхтөнд хандсан Бурханы өршөөл нигүүлсэл юм. Тэр цагийг хүртэл итгэгч бид нар улам бүр шаргуугаар Бурханы үгийг дамжуулах учиртай.

Хожим нь гарч ирэх хуурамч багш нар нь гаднаа сүсэгт дүртэй боловч тэд Есүс Христийн дахин ирэлт болон тэр цагт ирэх Бурханы шударга шүүлтийг үгүйсгэж үл тоодог. Харин Бурхан өмнө нь дэлхий ертөнцийг усан галваар шүүж байсанчлан энэ дэлхий ертөнцийг ч мөн галаар шүүх болно. Өмнө нь болж өнгөрсөн Ноагийн үеийн усан галав нь хожим ирэх Бурханы шүүлтийн баталгаа болдог.

Хуурамч багш нар Бурханыг таньж мэдээгүй учраас Бурханаас үл эмээн Бурханыг доромжилдог. Тэд бол хургүй үүл мэт эргэн тойронд байгсдыг Бурханы үгээр ундаалж үл чадах хуурамч багш нар юм. Харин цаг нь ирэхэд Бурхан тэдний дээр аймшигтай шийтгэлийг буулгах болно.